2010–2019
Rinanon Ana Taratara te Atua
Okitobwa 2015

Rinanon Ana Taratara te Atua

Iroun Unimwaane Dale G. Renlund

Man te Kooram n Abotoro n te Tengaun ma Uoman

Former official portrait of Elder Dale G. Renlund of the First Quorum of the Seventy, April 2009. Formerly a member of the Fifth Quorum of the Seventy. Called to the Quorum of the Twelve Apostles and sustained October 2015. Portrait replaced in November 2015.

A na rangi ni buokaki aomata ngkana, ti taraiia n aia taratara karo, ao n ana taratara Tamara are i Karawa.

Tariu ao mwaaneu aika kam tangiraki, kam bati n rabwa ibukin kamatoaakiu ngkoananoa n tibwangau bwa te membwa n te Kooram n Abotoro n te Tengaun ma Uoman. E bon matoa kabwarabwaraan au namakin ibukin ami kamatoa. Au kakaitau ae onoti n aia kamatoa uoman aiine aika kakaawaki inanon maiu: kainnabau, Ruth, ao natiu te aine ae bati n tangiraki, Ashley.

Tibwangau aei e kaota koauan ana taeka te Uea inanon moan ukin te mwioko n tararua ni boong aikai: “Bwa e aonga ni katanoataaki irouia naake a mamaara ao aki reirei nako tabotabon aonaba.”1 Ngai temanna mai buakoia aomata aika mangori ao aika rinano. Tebwina te ririki n nako, ngke I weteaki nakon tibwangau bwa te Bitiobi n te Uoote n te United States mainiku, tariu, ae e ikawai teutana ao e wanawana riki nakoiu, e tareboniiai. E taku, “Ko riai n ataia bwa te Uea e aki weteiko ibukin bwaai ake ko a tia ni karaoi. Ma ni kaeineti ma ngkoe, bon ibukin baike inanom ake ko a tia ni karaoi. Te Uea e weteiko bwa E na karaoi Ana mwakuri rinanom, ao e na koro nanon anne ngkana ko karaoa Nanona.” I ataia bwa ana taeka n reirei tariu ae ikawai aei e a korakora riki kainnanoana ni boong aikai.

A riki bwaai aika kamimii n ana mwakuri te mitinare ngkana teuanne ke neienne e ataia raoi bwa te mwakuri anne bon tiaki ibukina, ma, bon ibukin te Uea, Ana mwakuri, ao natin Tamara are i Karawa. I namakinna bwa aio tii tearona ibukiia Abotoro. Te wewete aei tiaki ibukiu. Bon ibukin ana mwakuri te Uea ao ibukiia natin Tamara are i Karawa. Bwa tera tabem ke tibwangam n te Ekaretia, e na koro nanon tibwangam, ngkana ko ataia bwa aomata ake ko beku ibukiia “bon naati n tamnei aika mwaane ao aine ake a tangiraki iroun tamaia ma tinaia ake i karawa, ao, ibukin anne, … iai rikiia ma aia konabwai ae tabu.”2

Au mwakuri ngkoa bon, taokitan te buroo ao e boboto riki ni buroo ake a toki ma te korokoro n te buroo, ao e mwaiti aoraki aika a kaakaiaki. E manikangare kainnabau n taekinna bwa te kanikina ae aki tamaroa ngkana I a manga riki bwa te aoraki. E ngae n anne, I noriia aomata aika mwaiti ni mate, ao I karekea te aeka n namakin n tei raroa ngkana e aki nakoraoi te mwakuri. Ibukin aei, e roko irou namakinan te nanokaawaki ma te aki kukurei.

Inanon te 1986, iai temanna te ataeinimmwane ae arana Chad are e mamaara buroona ao e karaoaki te korokoro nakoina. E nakoraoi maiuna inanon tebwi ma nimaua te ririki. E kabanea a na kona Chad n tiku ni marurung ao ni maiu n aron maiuna ae tamaroa. E beku ni mitinare, e mwakuri, ao bon te nati ae tangiraki irouia ana karo. Tabeua ririki ni maiuna, e ngae ngke, e korakora te kakaewenako, e aki toki n rin ao n otinako man te on aoraki ni katoa tai.

Teuana te tairiki, e nikiraki n te on aoraki n te imetienti ae e onrake irouia aoraki aika buro. Raou ni mwakuri ao Ngai ti kabanea te tai ae maan ni kaoka butin te rara. N tokina, ti a ataia bwa Chad e aki kona ni maiu. Ti katoka ara beku ae aki manena, ao I a kanakoa au taeka bwa e a mate. E ngae ngke I bon nanokawaki ao n rawawata, I aki kaotia. I taku i nanou, “E a tia n tararuaki raoi Chad. E a bati rakan ana ririki ni maiu nakon are e a bon tia ni kantaningaaki mai mwaina.” E uruaki nanou, e ngae, ngke ana karo a roko n te imetienti n nora rabwatan natia ni wene ni mate iaon te taibora ni korokoro. N te tai anne, I noora Chad rinanon mataia tinana ma tamana. I noora te kantaninga ae korakora ao aia katautau are a iangoia ibukina, nanoia bwa tao e na kona ni maan riki maiuna ao n reke te marurung. Ni karekean te taratara n namakin aei, I a moanna n tang. N matoan te mwakuri ao ni karaoan te akoi ae I aki kona ni mwaninga, ana karo Chad a anganai karauan nanou.

I a ataia bwa inanon te Ekaretia, ni karaoa te ibuobuoki raoi nakoia tabeman ti riai n noriia rinanon mataia kaaro, rinanon ana taratara Tamara are i Karawa. Ao man anne ti na ataa koauan kakawakin te aomata imatan te Atua. Ti ngkana ti kona ni mataata n ana tangira Tamara are i Karawa ibukiia Natina. Ti ngkana ti kona n namakina tabeakinakiia iroun te Tia Kamaiu. E aki kona ni bwanin karaoan tibwangara n te berita n tang ma ake a tang ao ni karau nanoia ake a kainnanoa karauan nanoia ni karokoa ae ti taraiia n ana taratara te Atua.3 Karababaan te kakoaua aei e na anganiira ukin nanora nakon rawawataia tabeman, maakuia ao nanokawakiia tabeman. Ma Tamara are i Karawa e na buokiira ao ni karaui nanora, n aron ana karo Chad ngke a karaua nanou n te ruu n te emetienti n ririki aika a nako. Ti kainnanoi maata aika a na noraba, taninga aika a na ongongo, ao te nano ae na atatai are e na koro iai nanon te mwakuri n ibuobuoki are e tataekinna Beretitenti Thomas S. Monson.4

Bon tii man tarakiia aomata n ana taratara Tamara are i Karawa are ti na kaonaki iai n “ana tangira ae kororaoi Kristo.”5 Ni katoa bong ti riai ni ukoukora te Atua ibukin te tangira aei. E reirei Moomon, “Mangaia are, tariu aika kam tangiraki irou, tataro nakon te Tama ma korakoran nanomi ni kabane, bwa kam na kaonaki n te tangira aei, are e a tia ni katoka i aoia ni kabane ake taan iriira Natina, are Iesu Kristo ni koaua.”6

Ma nanou ni kabane I tangiria n riki bwa te tia iriira Iesu Kristo ni koaua.7 I Tangiria. I Karinea. I kakoaua ae E maiu n aki toki. I kakoaua bwa Ngaia ae Kabiraki, te Mesia. Ngai bon te tia kakoaua n Ana nanoanga ae akea kabotauana, tabeaiangana, ao ana tangira. I kaota au koaua n aroia Abotoro ake, inanon te ririki 2000, a taekinna “bwa Iesu bon te Kristo ae Maiu, Natin te Atua ae maiu n aki toki. … Boni Ngaia te oota, te maiu, ao ana kaantaninga te aonaba.8

I kakoaua bwa te bong are n 1820 n te buakonikai n aonon New York meang, e kaoti te Uea are e a tia n Uti, ni ikotaki ma te Atua, Tamara i Karawa, nakon te burabeti Iotebwa Timiti, n aron ae taku Iotebwa Timiti ae A bon kaoti. Kiing n te nakoanibonga a mena iaon te aba bwa e na kona ni karaoaki te kamaiu ao otenanti ni karietataaki. I ataia. N aran Iesu Kristo, amen.

Bwaai aika a na taraaki

  1. Reirei ao Berita aika Tabu 1:23.

  2. “Te Utu: Te Katanoata nakon te Aonnaaba,” Ensign ke Riaona, Nobembwa 2010, 129; e warekaki iroun Beretitenti Gordon B. Hinckley ni mwakoron ana marooro n aia maungatabu Aiine n te Botaki n Aine are karaoaki n Tebetembwa 23, 1995, i Salt Lake City, Utah.

  3. Taraa Motiaea 18:8–10.

  4. Taraa, te katootoo, Thomas S. Monson, “Karaoa te Mwakuri n Ibuobuoki,” Ensign, Meei 2001, 48–50; Riaona, Tuurai 2001, 57–60; “Tabera ni Buokiia Aomata,” Ensign ke Riaona, Okitobwa 2013, 4–5. Beretitenti Monson e kaokioki botoniango aikai n ana rongorongo nakoia Mataniwi ni kabuta n Tebetembwa 30, 2015, are e kauringiia aomata ake botaki bwa e katurua riki ongotaeka nakon te rongorongo ae anga nakoia Mataniwi ni Kabuta ao Itingaun te Aono n te bowi ni kataneiai n te maungatabu ni kabuta are n Eberi 2009.

  5. Moronaai 7:47.

  6. Moronaai 7:48.

  7. Taraa Reirei ao Berita aika Tabu 18:27–28:

    “Ao naake Tengaun ma Uoman a na riki bwa au taan reirei, ao a na katoka arau i aoia; ao naake Tengaun ma Uoman bon ngaia ake a kukurei ni katokaa arau i aoia ma nanoia ni kabane.

    “Ao ngkana a tangiria ni katokaa arau i aoia ma nanoia ni kabane, a bon weteaki bwa a na nako n te aonaba n tataekina au euangkerio nakoia aomata nako.”

  8. “Te Kristo ae Maiu: Aia Koaua Abotoro,” Ensign ke Riaona, Eberi 2000, 3. N taekinana ikai, I anga au tiaaina nakon te koroboki, ni kakoaua nakon boni ngaia te koaua are aanga Abotoro akekei.