![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F04%2F86%2F04868b9161e7d23dda9334f80372006879d5e163%2F04868b9161e7d23dda9334f80372006879d5e163.jpeg/full/!250,/0/default)
Liliu Atu ia te Ia ma o Le a E Mauaina Tali
Ia usiusitai, manatua taimi na outou lagona ai le Agaga i le taimi ua tuanai, ma ole atu i le faatuatua. O le a o’o mai a outou tali.
A o avea o se tama talavou, na auai ou matua i Le Ekalesia a Iesu Keriso o le Au Paia o Aso e Gata Ai. Sa matou iloaina sa aoaoina i laua e faifeautalai, ae sa na o o’u matua na faia la lesona e faifeautalai.
Ina ua maea lenei faasilasilaga na faateia ai [matou], sa amata foi e o’u uso ma a’u ona faalogo i faifeautalai, ma sa latou taufai maua uma le savali o le Toefuataiga ma le fiafia. E ui sa ou fiailoa e uiga i le talalelei, ae lei i ai so’u manao e suia lo’u olaga. Peitai, sa ou talia le lu’i e tatalo pe o le Tusi a Mamona o le afioga a le Atua, ae sa ou le’i mauaina se tali.
Atonu e te fesili pe aisea na le tali ai e le Tama Faalelagi lena tatalo; sa ou tuu fesili moni lava. Ua ou iloa talu mai lena taimi o lena folafolaga na faia e Moronae e sa’o lelei. E tali lava e le Atua a tatou tatalo e uiga i le moni o le talalelei, ae Na te taliina [tatalo] pe a tatou maua “le loto faamaoni” ma le “manatu moni i ai.”1 E le tali mai o Ia ina ia tau lava o se tali i lo tatou fiailoa.
Masalo o i ai se mea i lou olaga o loo e fia fesili ai. Atonu o loo i ai se faafitauli e te le o iloaina tonu pe faapefea ona taliina. Ou te fia faasoa atu i le asō ni manatu e mafai ai ona fesoasoani ia te oe e maua ai tali po o le fesoasoani o loo e sailia. E amata le faagasologa i le liuaina i le talalelei a Iesu Keriso.
O Le Mauaina o Faaaliga e Faalagolago i le Tulaga ma le Manatu o o Tatou Loto
Sa ou mafaufau e uiga i tala o ni nai tagata o loo i tusitusiga paia. E fai ma faataitaiga, ia Lamana ma Lemuelu. E pei o Nifae, sa “fanaua [i laua] e matua lelei” ma na aoaoina “i le poto uma o [lo latou] tama.”2 Ae sa la muimui ona o lo latou tama o se tama tali faaaliga. Mai lo la manatu, o ana faaiuga na feteenai ma le faautautaga, aua la te le’i iloaina mea a le Atua ma, o lea, la te lei talitonu lava.3
E mata’ina le matauina e faapea o a la filifiliga na mafai ona faatagaina ai i laua e mauaina ni aafiaga faatupu faatuatua. Sa la tuua lo latou fale ma a latou oa. Sa laua pagatia i le latou faigamalaga i le vao. Sa iu lava ina laua fesoasoani i le fauina o le va’a, ma sa laua malilie e faimalaga atu i se laueleele e le mailoa.
Na oo foi Nifae i nei aafiaga e tasi. Ae pe na fausia e nei amioga lo latou faatuatua? Sa faamalosia atili le faatuatua o Nifae, ae o Lamana ma Lemuelu sa atili ona faatauemu ma feitai. Na oo foi ina vāai ma faalogo nei uso i se agelu, ae paga lea, sa laua faaauau pea ona masalosalo.4
E le faigofie le olaga faaletino mo soo se tasi o i tatou. Ua tuu mai i tatou i le lalolagi ina ia tofotofoina ma suesueina. O a tatou tali i aafiaga o le olaga o le a tele ina matua faatosinaina ai a tatou molimau. Mafaufau i nisi o tali a Lamana ma Lemuelu: Sa la muimui ina ua fai atu lo la tama ina ia faia ni mea faigata.5 Sa la taumafai e maua papatusi apamemea, ae ina ua le faamanuiaina, sa laua faavaivai. O o la uiga nei “Sa ma taumafai, o a nisi mea e mafai ona ma faia?”6
Sa i ai foi se taimi sa laua faanoanoa ai mo le faia o mea sese ma ole atu mo le faamagaloga.7 Sa laua tatalo ma sa faamagaloina. Ae ua faamaumauina i tusitusiga paia na mulimuli ane la toe foi i le faitio ma sa la mumusu e tatalo. Sa laua o atu ia Nifae ma faapea atu ua “le mafai ona malamalama i upu [na] fai mai ai lo [latou] tama.”8 Sa fai atu Nifae ia i laua pe na la “ole atu ea i le Alii.”9 Matau a laua tali: “Matou te lei ole atu; ona e le faailoa maia e le Alii ia te i matou se mea faapena.”10
O Le Usiusitai Faifai Pea e Faataga ai i Tatou ina ia Maua Tali
O le tali a Nifae i ona uso o se mataupu faavae taua mo i tatou i le mauaina o tali faifai pea i le tatalo:
“E faapefea ona outou lē tausia o poloaiga a le Alii? E faapefea ona outou fano, ona o le maaa o o outou loto?
“Tou te le manatua ea mea na fetalai mai ai le Alii?—Afai tou te le faamaaa o outou loto, ma ole mai ia te a’u i le faatuatua, ma le talitonu o le a outou maua, faatasi ma le filiga i le tausiga o a’u poloaiga, e moni [o le a] faailoa mai nei mea ia te outou.”11
Ou te iloa nisi o faifeautalai ua maea mai misiona sa mauaina ni aafiaga faaleagaga le mafaafitia, ae o le leai o ni mausa faapitoa faaleagaga na foliga mai ai ua latou faagalo ni taimi na fetalai atu ai le Atua ia i latou. I na faifeautalai ua maea mai misiona ma i tatou uma, afai ua outou “fia pepese i le pese o le alofa togiola, ou te fia fesili atu, e mafai ea ona outou lagonaina nei?”12 Afai tou te le lagonaina nei, e mafai ona outou toe lagonaina, ae mafaufau i le fautuaga a Nifae. Ia usiusitai, manatua taimi na outou lagona ai le Agaga i le taimi ua tuanai, ma ole atu i le faatuatua. O le a o’o mai a outou tali, ma o le a outou lagonaina le alofa ma le filemu e sau mai le Faaola. Atonu e le oo mai i le vave po o i le mamanu tou te mananao i ai, ae o le a oo mai le tali. Aua le fiu! Aua lava nei fiu!
Sei o tatou faatusatusa Lamana ma Lemuelu i atalii o Mosaea. O nei vaega uma o alii sa tausia e ni aiga amiotonu, peitai na o ese uma mai le talalelei. Sa valaauina uma i latou e le agelu ina ia salamo, ae o le a le mea na ese ai e uiga i le aafiaga o atalii o Mosaea?
O Le a Fausia e Tofotofoga lo Tatou Faatuatua
O lo latou manuia faafaifeautalai sa le mafaagaloina. E faitau afe sa faaliliuina i ala o le Alii. Ae peitai, e tele ina galo ia i tatou a o amata le latou misiona, sa “vaivai o [latou] loto, ma toetoe a [latou] toe foi i tua, [ae] sa faamafanafanaina i [latou] e le Alii.” Sa fautuaina i latou e le Alii e “tauave ma le onosai o [latou] puapuaga.”13
O Le Suesueina o Tusitusiga Paia e Ta’u Mai ai ia i Tatou le Finagalo o le Atua
Aisea na faamalosia ai e tofotofoga o nei atalii o Mosaea lo latou faatuatua ma tautinoga nai lo le faamatuā’ia ai o i latou e muimui pe masalosalo? O le mea taua sa “latou matua malolosi i le malamalama o le upumoni; ona o i latou o ni alii mafaufau lelei ma sa latou suesue i tusitusiga paia ma le filiga, ina ia latou iloa le afioga a le Atua.”14 O le a tatou feagai uma ma tofotofoga ma i ai ni fesili, ae ia manatua e tatau ona tatou “piimau pea i le ai u’amea.”15 “O afioga a Keriso o le a ta’u mai ai ia [i tatou] mea uma e tatau ona [tatou] faia.”16 E tatau ona tatou faia le suesueina o tusitusiga paia o se vaega o o tatou olaga i aso uma, ma o le a tatalaina e lenei mea faitotoa o faaaliga.
O le Tatalo, Tuufaatasi ma le Anapogi, e Valaaulia ai Faaaliga
Mo atalii o Mosaea, “sa le ona pau lea; sa latou tuu atu i latou lava i le tatalo tele, ma le anapogi; o lea na i ai ai ia i latou le agaga o valoaga, ma le agaga o faaaliga.”17 O le a faataga i tatou e le tatalo ma le anapogi ina ia taliaina musumusuga faaleagaga. O le fesootaiga ma le Tama Faalelagi a o aloese mai meaai ma vaiinu, e faataga ai i tatou e “tatalaina fusi na faia i le amio leaga [ma] tatala fusi o le amo.”18 O le tatalo, tuufaatasi ma le anapogi, o le a maua ai, lea afai tatou te “valaau [atu], … e tali mai Ieova; … [ma pe a tatou] alaga atu, … e fetalai mai o ia, O a’u lenei.”19
Liliu Atu ia te Ia
O nei mausa patino faalelotu—usiusitai, suesueina o tusitusiga paia, tatalo, ma le anapogi—na faamalosia ai atalii o Mosaea. O le leai o nei mausa patino faalelotu o se mafuaaga tele lea na tuua ai Lamana ma Lemuelu e vaivai tele i le faaosoosoga e muimui ma masalosalo.
Afai sa faaosooso oe ia muimui, afai sa ia te oe ni masalosaloga na taitai atu ai i le lē talitonu, afai ua foliga mai ua sili atu tofotofoga nai lo mea e mafai ona e onosaia, liliu atu ia te Ia. Afai o oe na liliu ese pe na faamaoniaina lau oe amio, liliu atu ia te Ia. E mafai ona e manatuaina se taimi na Ia “tautala atu [ai] le filemu i lou mafaufau … ? O le a se molimau sili atu e mafai ona e maua nai lo le molimau mai le Atua?”20 Fesili ifo ia te oe lava, “O ou ola latalata ea i le soifuaga faaKeriso i le taimi nei e pei ona ou ola ai muamua?” Faamolemole, liliu atu ia te Ia.
Sei ou toe foi atu lava i lau tala patino. Na iu lava, na amata ona ou faamaoni. Ou te manatuaina ina ua fesili mai le faifeautalai sa aoaoina au pe ua ou sauni e papatiso. Na ou tali atu sa ia te au pea ni fesili. Sa tau mai e lenei faifeautalai poto ia te au e mafai ona ia taliina ae e tatau ona ou taliina muamua lana fesili. Sa ia fesili mai ia te au pe moni le Tusi a Mamona ma pe o Iosefa Samita o se perofeta. Sa ou tau atu ia te ia ou te le iloa, ae sa ou manao ia iloa.
O au fesili na taitai atu i le faateleina o le faatuatua. Mo au, sa le i oo mai le tali i se mea se tasi na tupu ae i se faagasologa. Sa ou matauina a o ou “tofotofo i [le] upu” ma amata ona “faaaoga sina vaega itiiti o le faatuatua,” na avea le Tusi a Mamona ma mea “suamalie ia te au” ma na “faamalamalamaina ai lo’u malamalama” ma e moni lava na “faalauteleina ai lo’u agaga.” Na iu lava ina ou maua lena aafiaga ua faamatalaina e tusitusiga paia o se “malena ae i totonu o lou fatafata.”21 O le taimi lea sa ou manao ai e papatiso ma tuuto atu lou ola ia Iesu Keriso.
Ou te iloa moni lava o le Tusi a Mamona o le afioga a le Atua. Ou te iloa o Iosefa Samita sa avea o se perofeta. E moni, o loo i ai pea ni mea ou te le malamalama ai, ae o lau molimau i upumoni ua atili ai ona ou latalata i le Faaola ma fausia lou faatuatua.
Uso e ma tuafafine, manatua Nifae ma atalii o Mosaea, o e na i ai aafiaga faaleagaga ma galulue i le faatuatua ina ia oo mai tali ma na faatupulaia ai lo latou faatuatua. Faatusatusa lenei mea ia Lamana ma Lemuelu, o e na masalosalo ma muimui. E ui lava o nisi taimi sa latou amio ai i ni auala lelei, ae e mate lava le faatuatua e aunoa ma galuega. E tatau ona ia i tatou le faatuatua ma galuega ina ia maua ai tali.
Ou te faamoemoe a o outou faafofoga i lenei taeao ua fesootai atu e le Agaga i o outou mafaufau ma loto se mea e mafai ona outou faia ina ia taliina ai a outou fesili pe mauaina foi se vaifofo musuia i se faafitauli o loo fetaiai ma outou. Ou te tuuina atu se molimau paia o Iesu o le Keriso. Liliu atu ia te Ia ma o le a taliina a outou tatalo. I le suafa o Iesu Keriso, amene.