Se A se Mea o Toe Ou Te Lei Faia?
Saunia e Elder Larry R. Lawrence
O Le Fitugafulu
Afai tatou te lotomaualalo ma aoaogofie, o le a musuia i tatou e le Agaga Paia ia faaleleia ma taitai i tatou i le aiga, ae manaomia ona ole atu i le Alii mo faatonuga i luga o le ala.
Ina ua avea a’u ma se talavou matua, sa amata ona ou sailiili i le Ekalesia. I le taimi muamua sa ou fiafia i le talalelei ona o faataitaiga a a’u uo o le Au Paia o Aso e Gata Ai, ae na iu lava na ou tosina atu i le aoaoga faavae tulaga ese. Ina ua ou aoaoina e mafai e alii ma tamaitai faamaoni ona alualu i luma ma mulimuli ane avea e faapei o o tatou matua faalelagi, sa ou maofa moni lava. Sa ou fiafia i le mataupu; na lagonaina le moni ia te a’u.
E lei leva i le maea ai o lou papatisoga, sa ou suesueina le Lauga i luga o le Mauga, ma sa ou iloa ai sa aoaoina e Iesu lea lava upumoni e uiga i le alualu i luma e faavavau i le Tusi Paia. Na ia fetalai, “Ia atoatoa ona lelei o la outou amio, e pei o lo outou Tamā o i le lagi e atoatoa ona lelei o ia.”
Ua avea nei a’u ma se tagata o le Ekalesia mo le silia ma le 40 tausaga, ma o taimi uma ou te faitauina ai lenei fuaiupu o le mau, e faamanatu mai lava ia te a’u lo tatou faamoemoega iinei i le lalolagi. Sa tatou o mai e aoao ma faaleleia seia faasolosolo lava ina tatou faapaiaina pe faaatoatoaina ia Keriso.
O le malaga o le avea ma soo e le o se mea faigofie. Ua valaauina o se “ala o le faaleleia pea.” A o tatou faimalaga i le ala lauitiiti ma le vaapiapi, e faaauau pea ona luiina tatou e le Agaga ia sili atu ma ia faaauau pea i luma. E faia le Agaga Paia ma se soa malaga taua. Afai tatou te lotomaualalo ma aoaogofie, o le a Ia uu o tatou lima ma taitai atu i tatou i le aiga.
Peitai, tatou te manaomia ona ole atu i le Alii mo faatonuga i luga o le ala. E tatau ona tatou fesiligia ni fesili faigata, e pei “O le a le mea e manaomia ona ou suia?” “E mafai faapefea ona faaleleia a’u?” “O a ni vaivaiga e manaomia ona faamalosia?”
Se’i mafaufau i le tala o le Feagaiga Fou i le taitai taulealea mauoa. Sa avea o ia o se taulealea amiotonu o lē sa leva ona tausia Tulafono e Sefulu, ae sa ia manao ia lelei atili. O lana sini o le ola e faavavau.
Ina ua ia feiloai i le Faaola, sa ia fesili atu, “Se a se mea o toe ou te lei faia?”
Sa tali Iesu i le taimi lava lena, ma tuuina atu le apoapoaiga sa faamoemoeina faapitoa mo le taulealea mauoa. “Ua tali atu Iesu ia te ia, Afai e te manao ina ia atoatoa ona lelei o lau amio, ia e alu ma e faatau atu au mea, i le e avatu ai i e matitiva, ma … sau ma mulimuli mai ia te au.”
Sa te’i le taulealea; na te le’i mafaufau e uiga i le faia o sea ositaulaga. Sa lava lona lotomaualalo e fesili ai i le Alii ae sa le lava le faatuatua e mulimuli ai i le fautuaga paia na tuuina mai ia te ia. E tatau ona tatou naunautai e galulue pe a tatou mauaina se tali.
Sa aoao mai Peresitene Harold B. Lee: “E tatau ia i tatou uma lava, pe afai tatou te mananao e taunuu i le tulaga o le atoatoa, ona fesili i se taimi i lenei fesili, ‘Se a se mea o toe ou te lei faia?’”
Sa ou iloaina se tina faatuatua o le sa faalotomaualaloina o ia lava ma fesili, “O le a le mea o loo taofia ai a’u mai le alualu i luma?” I lona tulaga, o le tali mai le Agaga na oo mai i lena lava taimi: “Tu’u le faitio.” O lenei tali sa maofa ai o ia; na te le’i mafaufau lava ia te ia o se tagata faitio. Peitai, o le savali mai le Agaga Paia sa matua manino. I aso na mulimuli ane, sa amata ona ia iloaina lana mausa o le faitio. I le faafetai ai mo musumusuga ina ia faaleleia, sa ia naunau ai e faitau ona faamanuiaga nai lo ona luitau. I totonu o ni nai aso, sa ia lagonaina le faamaoniga a le Agaga.
O se alii talavou lotomaualalo, sa foliga mai sa le mafai ona maua le tamaitai talavou sa’o, sa alu atu i le Alii mo se fesoasoani: “O le a le mea ua taofia ai a’u mai le avea ma se alii sa’o?” sa ia ole atu ai. O le tali lenei sa oo mai i lona mafaufau ma le loto: “Faamamā lau gagana.” I lena taimi, sa ia iloaina o ni faaupuga mataga sa avea ma vaega o lana gagana, ma sa ia tautino ai e sui.
O se tuafafine nofo toatasi sa fesiligia ma le toa le fesili: “O le a le mea e tatau ona ou suia?” ma sa musumusu le Agaga ia te ia, “Aua e te faalavelave i tagata pe a latou talanoa.” E tuuina mai moni lava e le Agaga Paia fautuaga ina ia faaleleia ai. O ia o se soa faamaoni atoatoa ma e ta’u mai ia i tatou mea e lē iloaina e se isi tagata pe o maua foi le lototoa e ta’u mai ai.
Sa maua e se tasi o faifeautalai ua maea le misiona o ia lava ua lagona le mamafatu ona o le pisi tele. Sa ia taumafai ina ia maua se taimi mo le galuega, suesuega, aiga, ma se valaauga o le Ekalesia. Sa ia ole atu i le Alii mo se fautuaga: “E mafai faapefea ona ou lagonaina le filemu i mea uma e tatau ona ou faia?” O le tali sa le o [se tali] sa ia faamoemoeina; sa ia mauaina le uunaiga e tatau ona ia tausi atili ma le faaeteete le aso Sapati ma tausia ia paia. Sa ia filifili e tuuto atu le Aso Sa i auaunaga i le Atua—ina ia lē galue i ana kosi faaleaoaoga i lena aso ma nai lo lena ia suesueina le talalelei. O lenei fetuunaiga itiiti na aumaia ai le filemu ma le faapaleniina na ia sailia.
I tausaga ua tuanai, sa ou faitau ai i se mekasini a le Ekalesia i le tala i se tamaitai sa nofo ese mai le aiga ma alu i le kolisi. Sa vaivai o ia i ana vasega, o lona olaga faaleagafesootai sa le o se mea sa ia faamoemoe i ai, ma sa masani lava ona le fiafia. Na iu lava i se tasi o aso, sa ia faapa’ū ai i ona tulivae ma alaga atu, “O le a le mea e mafai ona ou faia ina ia faaleleia ai lou olaga?” Sa musumusu mai le Agaga Paia, “Tu i luga ma fa’amamā lou potu.” Na oo mai lenei musumusuga i se mea na matua faateia ai, ae sa na o se amataga sa ia manaomiaina. I le maea ai o le faaaluina o le taimi e toe faatulaga tonu ai mea uma, sa ia lagona le faatumulia o lona potu i le Agaga ma siitia ai lona loto.
E le ta’u mai e le Agaga Paia ia i tatou ina ia faaleleia mea uma i le taimi e tasi. Afai e Na te faia, o le a tatou faavaivai ma fiu ai. E galue le Agaga faatasi ma i tatou i lo tatou lava saoasaoa, i le laa e tasi i le taimi, po o le mea na aoao mai e le Alii, “i lea fuaitau i luga o lea fuaitau, ma lea mataupu i luga o lea mataupu, … ma e manuia lava i latou o e e faalogologo i a’u mataupu, … ona o ia o lē na te taliaina o le a Ou tuu atu atili i ai.” Mo se faataitaiga, afai na musuia oe e le Agaga Paia e fai atu soo “faafetai tele,” ma e tali atu i lena musumusuga, ona Ia lagona lea ua oo i le taimi mo oe e see atu ai i se isi mea e sili atu ona luitauina—e pei o le aoaoina e fai atu, “Ou te faamalie atu; o a’u na mafua ai lena mea.”
O se taimi taua e fesili ai “Se a se mea o toe ou te lei faia?” o le taimi tatou te aai ma feinu ai i le faamanatuga. Sa aoao mai le Aposetolo o Paulo e faapea, o le taimi lelei lenei mo i tatou taitoatasi e suesue ai i tatou lava. I lea siosiomaga migao, pe a liliu atu o tatou manatu i le lagi, e mafai e le Alii ona fetalai mai ma le agamalu ia i tatou i mea e manaomia ona tatou galulue i ai i le isi taimi e sosoo ai.
E pei o outou, ua ou mauaina le tele o savali mai le Agaga i le tele o tausaga e faaali mai ia te a’u le auala e mafai ai ona ou faaleleia a’u. Se’i o’u faasoa atua ni nai faataitaiga patino o savali na ou taliaina i lo’u loto. O nei musumusuga na aofia ai:
-
‘Aua ne’i siisii lou leo.
-
Faatulaga oe lava; fatu se lisi o mea e fai i aso uma.
-
Ia tausia lelei lou tino e ala i le taumafaina o le tele o fualaau aina ma fualaau fai sua.
-
Faateleina lou auai i le malumalu.
-
Faaalu se taimi e mafaufau loloto ai ae e te le’i tatalo.
-
Fesili atu i lau ava mo se fautuaga.
-
Ma ia onosai pe a aveina le taavale; ‘aua ne’i sili atu ma le saoasaoa faatapulaaina. (Lea ou te galue lava i lena mea mulimuli.)
O le taulaga togiola o le Faaola ua mafai ai ona maua le atoatoaga po o le faapaiaina. E le mafai lava ona tatou faia na o i tatou, ae o le alofa tunoa o le Atua ua lava e fesoasoani ai ia i tatou. E pei ona matauina i se tasi taimi e Elder David A. Bednar: “O le toatele o i tatou ua malamalama lelei o le Togiola e mo tagata agasala. Ae peitai, ou te le o mautinoa lelei, pe ua tatou iloa ma malamalama o le Togiola e mo tagata paia foi—mo alii ma tamaitai lelei o e usiusitai, agavaa, ma galulue malosi ma e o loo taumafai ia lelei atu ma auauna atu ma le faamaoni sili atu.”
Ou te fia fautuaina ia taitasi outou ma auai i se faatinoga faaleagaga i se taimi vave mai, atonu o nanei a o faia a outou tatalo. Ia fesili atu ma le agaga maualalo i le Alii le fesili lenei: “O le a le mea o loo taofia a’u mai le alualu i luma?” I nisi upu: “Se a se mea o toe ou te lei faia?” Ona faatalitali lea ma le filemu mo se tali. Afai e te faamaoni, o le a vave ona manino le tali. O le a avea ma faaaliga e faamoemoeina mo na o oe lava.
Atonu e tau atu e le Agaga ia te oe e te manaomia ona faamagalo se tasi. Pe e te ono mauaina se savali ina ia sili atu ona faaeteete i ata tifaga e te matamata ai po o musika e te faalogologo i ai. Atonu e te lagonaina le musuia ina ia faamaoni atili i au feutagaiga faapisinisi pe ia sili atu ona limafoai i au taulaga anapogi. E tele avanoa eseese.
E mafai e le Agaga ona faaali mai ia i tatou o tatou vaivaiga, ae e mafai foi ona Ia faaali mai ia i tatou o tatou malosiaga. O nisi taimi e tatau ona tatou fesili po o a mea ua sa’o ona tatou faia ina ia mafai e le Alii ona musuia ma uunaia i tatou. Pe a tatou faitau a tatou faamanuiaga faapeteriaka, e faamanatu mai ia i tatou e silafia e lo tatou Tama Faalelagi lo tatou gafatia paia. E olioli o Ia i taimi uma tatou te alualu ai i luma. Ia te Ia, o le itu tatou te agai i ai e sili atu ona taua nai lo le tatou saoasaoa.
Ia naunautai, uso e ma tuafafine, ae aua lava ne’i faavaivai. O le a tatou le ausiaina lo tatou atoatoa i le olaga faaletino, ae o iinei i le olaga faaletino e mafai ona tatou faataatia ai le faavae. “O lo tatou tiute ia tatou lelei atu i le asō nai lo ananafi, ma ia sili atu a taeao nai lo le asō.”
Afai o le tuputupu ae faaleagaga e lē o se faamuamua i o tatou olaga, afai tatou te le o i ai i luga o le ala o le faaleleia pea, o le a tatou misia ni aafiaga taua e finagalo le Atua e tuuina mai ia i tatou.
I le tele o tausaga ua tuanai, sa ou faitauina ai upu nei a Peresitene Spencer W. Kimball, lea sa i ai se aafiaga tumau ia te a’u. Na ia saunoa mai: “Ua ou aoaoina e faapea o le mea o loo i ai se loto tatalo, o se manao malosi mo le amiotonu, o se tuuese o agasala, ma le usiusitai i poloaiga a le Atua, e tuuina mai e le Alii le tele ma le tele o le malamalama seia iu ina i ai le mana e ulufia ai le veli faalelagi. … O se tagata o sea amiotonu o loo i ai le folafolaga le mafaatauina e i ai se aso e na te vaaia ai fofoga o le Alii ma iloaina o le Alii lava.”
O lau tatalo o lenei aafiaga tupito e mafai ona avea ma o tatou [aafiaga] i se aso, a o tatou faatagaina le Agaga Paia e taitai i tatou i le aiga. I le suafa o Iesu Keriso, amene.