Háísh Bich’į’ Diikah?
Akéedi, Yisdá’iiníiłii nanhídééłtidyę́ę hait’éego háádiidzih, “Niísh ałdó’ dahdiinááh?”
Lą’í nááhaiyę́ędą́ą́’, Kéyah Hodiyingóó sha’áłchíní bił nisiskai. Íiyisíí bénáshniih éí Jerusalemdi wódahgo haz’ą́ą́góne’ yah’iikai, ákwe’é akéedi da’jííyą́ą́’.
Ákwe’é nisiidzį́įgo, John 17 bich’į’ déiłta’, nléí Jesus Bíkéé’ naakaaígíí yá biZhe’é ná-yookąhgi.
“Bá sodadiszin … áko ła’í yee dadooleeł, nihí nahalingo. …
“Dooni’ t’áá sahí bá sodiszin da, ndi t’áá’át’é bá ałdó’ bizaad yinahjį’ éiyá dashiidoodlááł;
“Eíí ałtso ła’í dadooleeł; ni gi’át’áo, aZhe’é, shii’ hólǫ́, dóó nii’ honishłǫ́, eíí ałdó’ ałtso nihii’ dahółǫ́ǫ doo.”1
Yéego shidiisnáá’ díidi saad yíníshta’go dóó hódiyingi eíí sodiszingo ádaa ákoniisdzį́į́’ áko bił dashighaníí dóó aZhe’é Diyiníí bił dóó BiYe’ bił hool’áágóó ła’í dadiidlééł.
Bił danihighaníí, danihik’is, Bóhólníihii, dóó Sodizin Bíghan ániid ánályaíí yee’ ts’ída aláahgo eíí baa ntsídahákees. Díí éí ts’ídá ílį́nii ádaat’é, ayóó’iiníi’níi doo, baa áhwiilyą́ą doo, dóó ba’iiltso’ doo.
Ła’ hane’ ts’ída yéego ajéí atíyiilaaígíí yee’ “[Bóhólhíihii] t’óó’ ahayóí bikéé’ ndaakaaígíí” éí bina’nítin dóó bee’oodááł doo dayoodląą da, dóó yits’ą́ą́’ “anáheeskai dóó doo yikéé’ tádikáa da daazlį́į́.”2
Díidi bits’áheeskaigo, Jesus Naakits’áadah bich’į’ náheeyá dóó íiłní, “Nihíísh ałdó’ dah didooh-káh?”3
Peter éí háádzíí’:
“Bóhólníihii, háish bich’į’ diikah? hool’áágóó iiná bizaad yee’ nééhózin.
“Dóó dayiniidlą́ dóó aaníí eíí daníizin ni eíí Christ nílį́, Diyin God hinánii BiYe’ nílį́.”4
Ts’ídá ákwe’é, ła’ doo dayoodlánígíí ntsídaakeesgo, Akéé’naakaíí éí dayoodlánigíí dóó bił béédahózinígíí yee Christ t’áá yił daazlį́į́’.
Áko Pentecost beiníłką́ągo, Naakits’áadahyę́ę Ii’sizį́ Diyinii baa daheesya’. Yéego Christ yá dahalne’ daazlį́į́’ dóó Jesus bina’nitin yéego yik’ida’diitą́.
Dííjį́ éí doo łahgo át’ée da. Ła’ Christ nihííł’aad yę́ę dóó índa yiniidlánée t’ahdii nihił nidanitł’a. Ła’ akéé’naazíinii bee haz’áanii dóó bína’niltin doo yik’i da’diitįįh da. Ła’ nahdę́ę́’ ádahóót’įį yę́ę bida’diił’á, nahdę́ę́’ dóó k’ad alą́ąjį’ naazínée nida’iisíí’ígíí da. Ła’ éí díí oodlą’ “ayóo bina’anish daaní.”5 Nááná ła’ éí, t’óó ch’ééh deeskai. Díí biniinaa oodlání ła’ be’oodlą’ yína’ídíłkid, t’óó daats’í ła’ “t’ą́ą́’ anáhaaskai dóó doo Jesus yił deiíkáah da k’ad.”
Ła’ oodlą’ bee akéé’ soolį́į’go, Peter na’ídééłkidyę́ę bee nanídíshkid, “Háish bich’į’ díínááł?” Doo nándáah da sínílį́į’go dóó Jesus Christ biGáamaliijí bits’áiníyáago, háágóosh díínááł? Haash díínííł? Doo alą́ąjį’ naazínígíí dóó oodlání bitah yisháał da doo jidííniid éí nízaadgóó anáhóót’i’ dooleeł. Bee haz’áanii daats’í haaída ni’diił’áago ne’oodlą’ yeinít’į́, áko t’óó oodlání doo “bił yishkah da doojígo” daats’í yá’át’ééh nínízin. Shígi ánízáagi nanitih éí nił bééhózin doo, łahda t’áadoo le’é t’áábí hasht’énát’įįh. Diyink’ehgo da hoł ííshjáán á’ál’įįhgo binahjį’ bik’izhdiitį́į́h. Díí bééníniih, Oodlą’ Ániid Ánályaaígíí doo t’óó áhóót’įįd da, ndi t’ahdii bina’anish.
T’áá’aaníí Joseph Smith bá yáłti’í yaa hoolne’yę́ę baa yóónééh lágo. T’áá baa ííníłta’ yéego baa ntsíníkees, dóó Morman Binaaltsoos biyi’ Christ bibee’haz’áanii choiníł’į́.
T’áá’ áłahjį’ Bóhólníihii bá hosíníł’ą́ągo Bóhólníihii nił ííshją́ ííléhígíí bik’i’didíítį́į́ł. Shik’is dóó bił nináshnishii, Eldir Neal A. Maxwell łah ání, “T’áadoo t’óó daats’í níníziní … t’áa doole’é doo béé’deetįįhgóó doo béédi’dootį́įł da níníziní, éí béédi’dootį́į́ł.”6
Áko t’ahdoo bits’ą́ąjį’ dah diinááhdą́ą́’, áłtsé áhodiilzééh dóó hazhó’ó baa ntsíníkees hait’éego Jesus Christ bi’oodlą’ yisínídląąd ńt’ę́ę́’. Hodiilzééh dóó baa ntsíníkees oodlą’ haaniilaa ha’át’íí biniinaa ákwíinidzaa. Baa ntsíníkees hádą́ą́’ Níłch’i Diyinii hool’áágóó t’áá’aaníinii nił ííshjáán áyiilaayę́ę.
Háadish nigi’ít’éego oodlánígíí ła’ bik’ídíínááł, Nimá dóó nizhé’é diyinii hólǫ́ǫ di, hool’áágóó iinánígóó nídíídááł yínandínóołtįįłígíí?
Háágóó éí díínáałgo nik’is Yisdá’iiníiłii bóhwiidííł’ááł, nibąąhági’át’éii yá ti’hooznii’ áádóó bee ajooba’ yiniiyé “t’áá’ałtso atah hodiniih dóó doo ál’íinii ał’ąą át’éi” yee ti’hooznii’ éí bik’ehgo bidine’é nida’iisííhígíí yíká adoolwoł biniiyé,”7 hwe’oodlą’ ásdįįdjí bee oodzíí’ígíí da da’atah.
Háágóósh díínáałgo éí NihiTaa’ hool’áágóó ił hózhǫ́ dóó ił hodéezyéél yínandínóotįįł, nahat’á ił hózhǫ́ t’óó’ahayóí bii’ hólǫ́ǫgo, na’nitin da, dóó bik’ehgo kwe’é iiná dóó hool’áágóó iiná? Béénílniih, yisdá’iildéehii binahata’ éí biniiyéi dóó bik’ehgo dooleełii bii’ hólǫ́.
Háágóó díínáałgo éí áadi oodlání danilíinii níká’adoojahgo Diyin yá’átéehgo bá nanilnish dooleeł áádóó ni dóó na’áłchíní ałdó’ yíká’adoojah?
Háágóó díínáałgo éí Diyin yá dahalne’é dóó Diyin yá naazíinii hólǫ́, Diyin God dabííł’aadgo nihíká’anájah na’nitinjí, ak’i’diitįįhjí, ił hózhǫ́ǫ́jí, dóó ináhóót’i’ nihá yaa’ákonízin?
Háágóó díínáałgo éí diné bik’ehgo yá’át’éehgo iinánigíí bee dahólǫ́ áádóó yee nidandínóotįįł áko na’áłchíní bee nidíníítįįł.?
Áádóó háadi éí Diyin Bighandi bee haz’áanii bee yisdá’iildéehii bee ił hózhǫ́ nił bééhodoozįįł?
Shik’is dóó shilah, Christ bizaad nízhdiiléé dóó bik’ehgo jiiná éí nantł’ah. T’áá’ákót’éé ńt’ę́ę́’ dóó t’áá’ákót’ée doo. Iina’ éí kíhonii’ą́ągo dego joogááł nahalin. Łahda áłtsé ninájíltłi’go háájiiyooł doo, háágóójoogááł náázhnál’įįh dóó hait’éego joogááł baa’ákozhnízin. Doo t’áá’ániit’é háádeilyį́įh da, éí t’áadoo át’éhé da. Áko éí yá’át’éeh łeh ei háájílyį́įhgo Christ bizaad tó hináanii nahalingo jidlį́įhgo.
T’ááháida iiná t’iis sikaadgóó atiinígíí bits’ą́ąjį’ dashdiiyáago éí bááhádzid.8 Łahda éí ni’jiłkaahgo t’áadoo le’é hoł bééhoozįįh, łahdi éí t’óó hwe’oodlą’ bee, a’jólíigo dóó hoł chohoo’į́įgo bee.
T’áá’ániit’é éí Yisdá’iiníiłii bich’į’ háádiidzih: “Niiísh ałdó’ dah diinááh?”9 T’áá’ániit’é éí hait’éego nát’ą́ą́’ háádiidzihígíí nidiikah. Ła’ éí doo bá nantł’ah da; ła’ éí ba’ nantł’ah. Hait’éego bi’oodlą’ bá nidantł’aaígíí éí doo shił bééhózin da. Bína’ídíkidígíí éi hólǫ́ǫgo baa shił hózhǫ́, haniitáago—íiyisíí biniiyéi hólǫ́ǫgo dóó t’áá’aaníí nihijéí bee sodiizingo—díí Diyin bizaad bee atiingóó haniit’áii bik’ídiidááł. Na’nishtinjí, bééhózingo nihits’áheeskaiyę́ę éí oodlą’ yee ninaheeskai.
Íiyisíí bíká laanaa nisinígíí éí God ba’áłchíní łą́ągo God bizaad bee atiin yik’ídookah dóó yikáá’-góó yikah dooleeł ákó “tsin bineest’ą’ deiidoolnih, éí tsin bineest’ą’ biláahdi łikan.”10
Díí baa ná’ooshkąąh, ła’ ch’ééh ádaat’ínígíí bíká’adiijah, bił dahoniidlǫ́ǫgo, deísíníilts’ą́ą’go dóó ayóó’ádeiíníí’níigo. Nik’is dóó nihilah baa dayoohnééh lágo. Doo ahiniilt’ée da áko Diyin bizaad bee ahíłká’anájah.
Oodlání ániidígíí ayóó’íi’nínígi ít’éego, bich’į’ nidahwii’nánigíí ayóó’ádeiíníi’níi doo áádóó bíká-’anéilwo’ dooleeł.
Nááná, God dóó Christ “Zion Tsinaa’eeł Sání” yooł’ołígíí bits’ą́ą́’ adah deishwoł nosinígíí hodiizéehgo hazó’ó baa ntsíníkees.
T’ááshǫǫdí, azhą́shį́į́ níyoltsoh dóó tó náádadiidáahgo díí tsinaa’eeł yi’oł ndi béénílniih Yisdá’-iiníiłii éí díí yich’į’ yáłti’go dabíists’ą́ą́’, “Hodiilzééh, t’áadoo nahí’nání,” Ákohgo, t’áadoo néil-dzidí áádóó nihe’oodlą’ niłdzilgo dóó bééhózingo “níyol dóó tó da bik’edahół’į́.”11
Shik’is dóó shiláh, t’áá’aaníí ádíshníigo Diyin éí bi’oodlą’jí doo yits’ádoogáał da dóó nihí ałdó’ doo nihits’ádoogáał da. Peter Yisdá’iiníiłii yich’į’ nát’ą́ą́’ hanáádzíí’yę́ę bénániih:
“Háísh bich’į’ diikah? hool’áágóó iiná yaa halne’ii.
“Dóó deiiniidlą́ dóó t’áá’aaníí nihił bééhózingo eííChrist nílį́, God hinánii Biye’.”12
T’áá’aaníí shił bééhózingo “yízhí doo ła’ nááhódlǫ́ǫ da dóó doo nááná łahgo át’éego diné ba’áł-chíní yisdádoogáał da, Christ bii’góne’ dóó beego t’éiyá.13
Díí ałdó’ t’áá’aaníigo shił bééhózin, Jesus Christ Diyin yá naazíní yee na’nitin dóó bee haz’áanii ániid ánályaa éí bee “báháchį’ii dóó bááhádzidii” bits’ąą yiidziih ákondi atí nihidoolííł doo ádaa ná’iisiikan dóó nihiDiyin baa néidzáágóó.14
Áádóó ałdó’ Diyin “shaahohkáahgo shiyá’át’éehii nihii’ nidahaleeh; áádóó doo ła’ dooda yidíi-niid da, łizhin dóó ligaii, da’ahótą’ii dóó sahdii naagháii, biką’ii dóó bi’áadii; … God beego t’áá’aheełt’é.15
Jesus éí nihi Yisdá’iiníiłii, dóó Niná’ídláanii nilį́, éí Diyin bizaad ániidí ányiidlaa éí Yá’ąąshdi nídiidááł hazhó’ó Diyin bizaad bee atiingóó yiidáałgo dóó bikéé’ yiidáałgo. Díí shił t’áá’aaníí, Jesus Christ bizhi’ binahjį’, amen.