Te hōʼē uʼi paʼari i mua i te hara
’Ia haʼapiʼi, ’ia arataʼi, ʼe ’ia here anaʼe ʼoutou i te mau tamariʼi e nehenehe ʼoutou ’ia fāriʼi i te heheuraʼa nō ʼoutou iho o te tauturu ia ʼoutou ’ia faʼatupu e ʼia faʼaineine i te mau tamariʼi ’ia itoito ʼe ’ia pāto’i i te hara.
Hōʼē matahiti ʼe te ’āfa i maʼiri aʼe nei, ’ua parau te peresideni Russell M. Nelson nō niʼa i te hinaʼaro « nō te haʼapiʼi ʼe nō te tauturu i te aupururaʼa i te hō’ē u’i paʼari i mua i te hara ».1 Teie parau---« Te hō’ē u’i paʼari i mua i te hara »---e auraʼa vārua faufaʼa rahi e te hōhonu ïa iāʼu nei.
Tē faʼatura nei tātou i te mau tamariʼi e tautoʼo nei i te ora i te oraraʼa mā ʼe te haʼapaʼo. ’Ua ʼite mata vau i te pūai o te mau tamariʼi e rave rahi nā te ao nei. Tē tiʼa itoito nei rātou, « ma te mau māite ʼe te ʼāueue ʼore »2 i roto i te mau vāhi ʼe te ʼoraraʼa huru rau. ’Ua ʼite teie mau tamariʼi i tō rātou tiʼaraʼa hanahana, ’ua ʼite rātou i te here ʼo te Metua i te Ao ra, ʼe tē tūtava nei rātou i te haʼapaʼo i Tōna ra hinaʼaro.
Tera rā, tē vai ra te mau tamariʼi tē fifi ra nō te tiʼa « ma te mau māite ʼe te ʼāueue ʼore » ’e ’ua mamae tō rātou ferurira’a.3 Tē ʼarohia nei rātou nā te mau vāhi atoʼa ʼe « te mau ophi auahi o te enemi ra »4 ʼe tē hinaʼaro rahi nei rātou i te haʼapūairaʼa ʼe te pātururaʼa. ’Ua riro rātou ʼei tumu pūai nō tātou nō te tiʼa atu i niʼa ʼe nō te ʼaro atu i te hōʼē tamaʼi i te hara nā roto i tā tātou tautoʼoraʼa ’ia ’āfaʼi i tā tātou mau tamariʼi i te Mesia ra.
ʼA faʼaroʼo nā i te mau parau a Elder Bruce R. McConkie fātata e 43 matahiti i teie nei :
« ʼEi mau melo nō te ʼĒkālesia, tei roto tātou i te hōʼē ʼaroraʼa pūai. Tei roto tātou i te tamaʼi. Tei roto tātou i te ʼohipa a te Mesia nō te ʼaro atu ia Lucifero…
« E tamaʼi rahi, te ’aro nei nā te mau pae atoʼa, tē fifi ra, e rave rahi tei mo’e, vetahi e mea ’ino roa, e ’ere ra i te ʼohipa ʼāpī…
« Teie nei rā i roro i teie tamaʼi ’aita e taʼata e faʼaea noa ».5
Tē tāmau noa ra te tamaʼi i te uʼana-roa-raʼa i teie mahana. Tei roto tātou pāʼātoʼa i teie ʼarora’a ʼe tei mua tā tātou mau tamariʼi i te mau reni nō te ʼaroraʼa i te mau nuʼu a te ʼenemi. Nō reira, te rahi nei te tītaura’a ia tātou ’ia haʼapūai i tā tātou mau perera’a pae vārua.
’Ua riro te haʼapūairaʼa i te mau tamariʼi ’ia ’eta’eta i mua i te hara ʼei hōʼē haʼamaitaʼiraʼa nā te mau metua, te mau metua tupuna, te mau melo nō te ʼutuāfare, te mau ʼorometua haʼapiʼi, ʼe te feiā faʼatere. Tē amo nei tātou tātaʼitahi i te hōpoiʼa ’ia tauturu. Area rā, ’ua faʼaue-taʼa-ʼē te Fatu i te mau metua ’ia haʼapiʼi i tā rātou mau tamariʼi ’ia « ʼite pāpū roa i te parau nō te tātarahapa, te faʼaroʼo i te Mesia te Tamaiti a te Atua Ora, ʼe nō te bāpetizoraʼa ʼe te hōroʼa nō te Vārua Maitaʼi » ’e ’ia « pure, ʼe ia ʼāfaro noa tō rātou haereraʼa i mua i te Fatu ».6
Nāhea « ’ia haʼapiʼi i tā [tātou] mau tamariʼi i roto i te māramarama ʼe te parau mau »,7 ʼe uiraʼa fifi paha teie nō te mea ’ua faʼaauhia te reira nō te ʼutuāfare ʼe te tamariʼi tātaʼitahi, ’ua hōroʼa mai rā te Metua i te Ao ra i te mau arataʼiraʼa nō te tāʼātoʼaraʼa o te tauturu ia tātou. E faʼauru mai te Vārua ia tātou i te mau rāveʼa maitaʼi roa aʼe e nehenehe ia tātou ’ia pāruru i tā tātou mau tamariʼi.
Nō te haʼamata, e mea faufaʼa rahi ’ia noaʼa te hōʼē hiʼoraʼa nō te faufaʼa rahi o teie hōpoiʼa. E tiʼa ia tātou ia hāroʼaroʼa i tō tātou —ʼe i tō rātou—tiʼaraʼa ʼe te tumu hanahana hou e nehenehe ai ia tātou ’ia tauturu i tā tātou mau tamariʼi ’ia ʼite ʼe o vai rātou ʼe nō te aha rātou i haere mai ai i’ō nei. E tiʼa ia tātou ’ia tauturu ia rātou ’ia ʼite ma te uiui ʼore ē e mau tamāroa ʼe e mau tamāhine rātou nā te hōʼē Metua here i te Ao ra ʼe e mau tiaʼiraʼa hanahana Tāna nō rātou.
Te piti, e mea faufaʼa rahi roa te māramaramaraʼa i te haʼapiʼiraʼa tumu nō te tātarahaparaʼa nō te pāto’i i te hara. ʼE ʼere te pāto’ira’a i te hara o te faʼaearaʼa ma te hara ʼore, e tītau rā te reira ’ia tāmau noa i te tātarahapa, i te ara ʼe te itoito. Penei a’e e tae mai te pāto’ira’a i te hara ’ei haʼamaitaʼiraʼa nō te tūra’i-pinepine-raʼa i te hara. Mai tā Iakobo i parau, « e pātoʼi atu i te diabolo, e nāna e maʼue ē atu ».8
« ’E ’ua itoito roa te mau faʼehau feiā ʼāpī… ; inaha rā, tē vai ra te parau—e taʼata haʼavare ʼore rātou… i te mau mea atoʼa e poroʼihia rātou ra. Oia ïa… i haʼapiʼihia hoʼi rātou ’ia haʼapaʼo i te mau faʼaue ʼa te Atua, ʼe ’ia haere i mua iāna mā te tiʼa ».9 ‘Ua haere teie feiā ʼāpī i te tamaʼi ma te mau i te mau viretu ʼa te Mesia ʼei mau mauhaʼa nō te ʼaro atu i tō rātou mau ʼenemi. ’Ua fa’aha’amana’o mai te peresideni Thomas S. Monson ē, « e vai tāmau noa teie pi’ira’a nō te itoito ia tātou tāta’itahi. I te mau mahana ato’a o tō tātou orara’a, tītauhia te itoito—’eiaha nō te mau ’ohipa rahi noa, pinepine roa ra nō te ravera’a i te mau fa’aotira’a ’e te pāhonora’a i te mau ’ohipa ri’i nā piha’i iho ia tātou ».10
E ʼōʼomo tā tātou mau tamariʼi i te ’ahu tamaʼi vārua ’ia haʼamau anaʼe rātou i te mau hōhoʼa nō te tiʼaraʼa pipi i te mau mahana atoʼa. Penei a’e tē haʼafaufaʼa ʼore nei tātou i te ʼaravihi o te mau tamariʼi ’ia ʼapo mai i te haʼapiʼiraʼa nō niʼa i te tiʼaraʼa pipi i te mau mahana atoʼa. ’Ua aʼo te peresideni Henry B. Eyring ia tātou ’ia « haʼamata vave ʼe ’ia haere itoito noa i mua ».11 Nō reira, te toru o te tāviri nō te tautururaʼa i te mau tamariʼi ’ia riro mai ʼei mea ’eta’eta i mua i te hara ’ia haʼamata i te ʼaruʼaruraʼa i te niniʼi atu i te mau haʼapiʼiraʼa tumu ’e te mau parau tumu o te ʼevānelia—mai roto mai i te mau pāpaʼiraʼa moʼa, te mau Hiro’a Faʼaroʼo, te buka iti Nō te Pūai o te Feiā ’Āpī, te mau hīmene Paraimere, te mau Hīmene, ʼe tō tātou iho mau ʼiteraʼa pāpū—o te arataʼi i te mau tamariʼi i te Faʼaora.
Te faʼatupuraʼa i te mau peu tāmau nō te pure, te taiʼoraʼa i te pāpaʼiraʼa moʼa, te pureraʼa pō ʼutuāfare, ʼe te haʼamoriraʼa i te Sābati, e arataʼi te reira i te maitaʼi, te haʼavīraʼa iāna iho, ʼe te mau faufaʼa morare pūai—’oia hoʼi, te parau-tiʼa pae vārua. I teie mahana i roto i te ao nei, te moʼe roa atura te parau-tiʼa, e tiʼa i tā tātou mau tamariʼi ’ia taʼa pāpū e aha te parau-tiʼa mau ʼe te faufaʼa o te reira—ʼa faʼaineine-ta’a-’ē ai tātou ia rātou ’ia rave ʼe ’ia haʼapaʼo i te mau fafauraʼa moʼa i te bāpetizoraʼa ʼe i roto i te hiero. Mai tā te ’Ia Poro Haere i Tā’u Nei ’Evanelia e haʼapiʼi mai nei, « e faʼaineine te haʼapaʼoraʼa i te mau parau faʼaau i te mau taʼata [te feiā ʼāpī atoʼa] ’ia rave ʼe ’ia tāpeʼa i te mau fafauraʼa moʼa ».12
’Ua haʼapiʼi o Elder Jeffrey R. Holland ē, « ’Ia paraparau anaʼe tātou nō niʼa i te haʼapaʼoraʼa i te mau fafauraʼa, te paraparau ra ïa tātou nō niʼa i te ʼāʼau ʼe te vārua o tā tātou fā i roto i te oraraʼa tāhuti nei ».13 Tē vai nei te mana taʼa ʼē i roto i te raveraʼa ʼe te tāpeʼaraʼa i tā tātou mau fafauraʼa ʼe tō tātou Metua i te Ao ra. ’Ua ʼite te ʼenemi i te reira, nō reira ʼoia i haʼapouri ai i te manaʼo nō te raveraʼa i te fafauraʼa.14 Te tautururaʼa i te mau tamariʼi ’ia hāroʼaroʼa, ’ia rave, ʼe ’ia tāpeʼa i te mau fafauraʼa moʼa, o te tahi atu ïa tāviri nō te faʼatupuraʼa i te hōʼē uʼi ’eta’eta i mua i te hara.
Nāhea tātou ’ia faʼaineine i tā tātou mau tamariʼi ’ia rave ʼe ’ia tāpeʼa i te mau fafauraʼa moʼa ’ia tomo atu ʼe ’ia haere atu i mua nā niʼa i te ’ēʼa nō te fafauraʼa ? Te haʼapiʼiraʼa i te mau tamariʼi ’ia tāpeʼa i te mau fafauraʼa ʼōhie i tō rātou ʼāpīraʼa e hōroʼa te reira ia rātou te mana ’ia tāpeʼa i te mau fafauraʼa moʼa ’ia paʼari rātou.
E faʼa’ite atu vau i te hō’ē hiʻoraʼa ʼōhie : I roto i te hōʼē pureraʼa pō ʼutuāfare, ’ua ui te hōʼē metua tāne, « E aha tō tātou huru ʼei ʼutuāfare ? » ’Ua amuamu ʼo Lizzie e pae matahiti ē, te ʼaʼa rahi nei ʼe tē faʼaʼinoʼino nei tōna tuaʼana tamāroa o Kevin iāna. ’Ua fāriʼiriʼi Kevin ē ’ua ti’a ʼo Lizzie. ’Ua ui te metua vahine ʼo Kevin iāna e aha tāna e nehenehe e rave ’ia au maitaʼi aʼe ʼoia ʼe tōna tuahine. ’Ua feruri ʼe ’ua faʼaoti Kevin ē e fafau ʼoia ia Lizzie eʼita ʼoia e ʼaʼa iāna i te hōʼē mahana tāʼātoʼa.
I te hopeʼa o te mahana i muri atu ’a haʼaputuputu mai ai te mau taʼata atoʼa nō te pure ʼutuāfare, ’ua ui te pāpā ʼo Kevin iāna e aha tōna huru. ’Ua pāhono atu o Kevin « pāpā, ’ua tāpeʼa vau i tāʼu parau ! » ’Ua fāriʼi Lizzie ma te ʼoaʼoa ’e ’ua haʼapoupou te ʼutuāfare ia Kevin.
ʼI muri ʼiho, ’ua parau te metua vahine ʼo Kevin ē mai te mea ’ua nehenehe iāna ’ia tāpeʼa i tāna parau nō te hōʼē mahana, nō te aha e ore ai e nehenehe iāna ’ia nā reira e piti aʼe mahana ? ’Ua fāriʼi o Kevin ’ia tamata faʼahou i te reira. ’Ua maʼiri e piti mahana, ’ua manuia Kevin i te tāpeʼaraʼa i tāna parau, ʼe ’ua hau roa atu o Lizzie i te māuruuru. I tō tōna metua tane uiraʼa iāna nō te aha ʼoia i tāpeʼa maitaʼi ai i tāna parau, ’ua parau Kevin, « ’Ua tāpeʼa vau i tā’u parau nō te mea ’ua parau vau e nā reira vau ».
Te tāpeʼa-maitaʼi-raʼa i te mau fafauraʼa naʼinaʼi e arataʼi atu i te ’ēʼa nō te parau-tiʼa. Te peu tāmau nō te tāpeʼaraʼa i te parau o te faʼaineineraʼa pae vārua ïa nō te mau tamariʼi ’ia fāriʼi i tā rātou fafauraʼa mātāmua nō te bāpetizoraʼa ʼe te hōroʼaraʼa o te Vārua Maitaʼi, i reira rātou e fafau ai ’ia tāvini i te Atua ʼe ’ia haʼapaʼo i Tāna mau faʼaueraʼa.15 E haere ’āpiti noa te mau parau fafau ʼe te mau fafauraʼa.
ʼI roto i te buka ʼa Daniela, tē haʼapiʼi mai nei tātou nō niʼa i te pātoʼiraʼa ʼo Sadaraka, Meseka ʼe ’o Abede-nego ’ia haʼamori i te ʼidolo ʼa Nebukanesa.16 ’Ua faʼaara te ariʼi ē e tuʼuhia rātou i roto i te hōʼē umu auahi ura mai te mea eʼita rātou e haʼapaʼo. ’Ua pātoʼi rātou ʼe ’ua parau :
« ’Ia hinaʼaro ʼoia iho, ʼe tiʼa ïa i tō mātou Atua e haʼamori nei ’ia faʼaora ʼoia ia mātou i te umu auahi ura ra…
’Ia ʼore rā ʼoia ’ia hinaʼaro, ʼe ʼore ā mātou e haʼamori i tō ’oe ra mau atua ».17
« ’Ia ʼore rā ». ʼA feruri nā i te auraʼa o teie nā taʼo e toru e nāhea te reira e tūʼati ai i te tāpeʼaraʼa i te mau fafauraʼa. ʼAita teie nā feiā ʼāpī e toru i haʼamau i tō rātou haʼapaʼoraʼa i niʼa i tō rātou faʼaoraraʼa. E noa atu eʼita rātou e faʼaorahia, e tāpe’a noa ā rātou i tā rātou fafauraʼa i te Fatu nō te mea ’ua parau rātou e nā reira rātou. E tiʼa ia tātou ’ia tāpeʼa noa i tā tātou mau fafauraʼa noa atu e aha tō tātou huru oraraʼa. E mau hiʼoraʼa maitaʼi teie nā feiā ʼāpī e toru, mai te mau faʼehau feiā ʼāpi, nō tā tātou mau tamariʼi ’ia pāto’i i te hara.
Nāhea ’ia faʼaʼohipa i teie mau hiʼoraʼa maitaʼi i roto i tō tātou ʼutuāfare ? ’Ia faʼaʼohipa tātou i « te faʼaue nā niʼa iho i te faʼaue, te aʼo nā niʼa iho i te aʼo »,18 e tauturu tātou i te mau tamariʼi ’ia tamata ’ia manuia i roto i te mau mea haʼihaʼi. ’A tāpeʼa ai rātou i tā rātou mau fafauraʼa, e ʼite rātou i te Vārua i roto i tō rātou oraraʼa. ’Ua haʼapiʼi mai Elder Joseph B. Wirhtlin ē, « te ʼutuʼa hopeʼa roa o te parau-tiʼa o te hoaraʼa tāmau o te Vārua Maitaʼi ».19 I reira « te tiʼaturiraʼa o tā tātou mau tamariʼi e pūai roa ai i muʼa i te aro ʼo te Atua ».20 Nā roto mai i te ʼāpoʼo pape nō te parau-tiʼa e pihaʼa mai ai te hōʼē uʼi mana rahi ʼe te ’eta’eta i mua i te hara.
Te mau taeaʼe ʼe te mau tuahine, ʼa tāpeʼa piri mai i tā ʼoutou mau tamariʼiriʼi---’ia piri roa mai ’ia nehenehe ia rātou ’ia ʼite i tō ʼoutou huru faʼaroʼo i te mau mahana atoʼa, ʼe ’ia hiʼo ia ʼoutou ’ia tāpeʼa i tā outou parau ʼe mau fafauraʼa. « E feiā peʼe rahi te mau tamariʼi, nō reira ʼa hōroʼa ia rātou te tahi mea faʼahiahia nō te peʼe atu ».21 Tē tauturu mau nei tātou i te haʼapiʼi ʼe i te aupuru i te hōʼē uʼi ’eta’eta i mua i te hara nō te Fatu nā roto i te haʼapaʼoraʼa i te mau parau fafau ʼe te mau fafauraʼa.
Tē fa’aʻite pāpū nei au ʼe te arataʼi nei Iesu Mesia i teie nei ʼĒkālesia. ’A haʼapiʼi, ’a arataʼi, ʼe ’a here ai ʼoutou i te mau tamariʼi mai te au i tā te Faʼaora, e fāri’i ia ʼoutou i te heheuraʼa nō ʼoutou iho nō te tauturu ia ʼoutou ’ia faʼatupu ’e ʼia faʼaineine i te mau tamariʼi itoito ʼe te ’eta’eta i mua i te hara. Tāʼu pure ’ia tāvevo tā tātou mau tamariʼi i te mau parau ʼa Nephi : « ’Ia rurutaina vau ’a fatata mai ai te hara ? »22 Tē faʼaʼite pāpū nei au ē ’ua ʼaufau tō tātou Faʼaora i te mau hara a tō te ao nei 23—nō te mea ’ua parau ʼOia e nā reira ʼOia,---ʼe tē here nei ʼOia ia tātou o te ʼore roa e noaʼa ia tātou i te hāroʼaroʼa24—nō te mea ’ua parau ʼOia e nā reira ʼOia. Nā roto i te i’oa ʼo Iesu Mesia ra, ’āmene.