Te hāmani maita’i, te aroha ’e te here
E te mau taea’e, e mata na tātou i te hi’opo’a i tō tātou orara’a ’e ’ia fa’aoti e pe’e i te hi’ora’a o te Fa’aora nā roto i te rirora’a ’ei ta’ata maita’i, te here ’e te aroha.
E au mau taea’e here, tē ’oa’oa nei au i te ha’amaita’ira’a ’ia paraparau atu ia ’outou i roto i teie ha’aputuputura’a nā te ao ato’a nei o te feia fa’aro’o tei mau i te autahu’ara’a a te Atua. I teie pō e paraparau atu vau i te hō’ē tumu parau tā’u i paraparau nā mua a’e nei.
’Ua pāpa’i te peropheta Moromona i te hō’ē o te mau huru faufa’a o te Fa’aora ’e ’o tei tītauhia i tāna mau pipi ’ia pe’e. ’Ua parau ’oia ē :
« ’E ’o te marū ’e te ha’eha’a te ’ā’au, ’e te fā’i ’oia na te mana o te Vārua Maita’i e, ’o Iesu ’o te Mesia ïa, ’ia vai ato’a te aroha i roto iāna e ti’a ai ; ’aita ho’i ’ōna i aroha e au ’oia i te ’aore ; nō reira ’ia tupu tōna aroha e ti’a ai.
« E fa’a’oroma’ira’a roa tō te aroha, ’e te hāmani maita’i, e ’ore te aroha e fē’i’i, e ’ore te aroha e fa’arahi, e’ita e ’imi i te maita’i nōna iho, e’ita e riri vave.
« Nō reira, e au mau taea’e here, ’aore o ’outou e aroha, ’aita roa a ’outou e faufa’a, e ’ore ho’i te aroha e mou. Nō reira ’a tā’ati i te aroha, ’o tei hau i te mau mea ato’a ra, e mou ho’i te mau mea ato’a ra—
« ’O te aroha rā, ’o te hina’aro mau ïa i te Mesia, e ’ore roa ïa e mou ; ’e ’o te ’itea te aroha i roto iāna i te mahana hope’a ra, e maita’i ïa tōna ».1
E te mau taea’e, ’aita tātou e fa’atura ra i te autahu’ara’a o te Atua mai te mea ē, ’aita tātou e fa’a’ite i te maita’i i ni’a ia vetahi ’ē.
’Ua riro mau tō’u hoa rahi ’e te ’āpiti ’o Elder Joseph B. Wirthlin ’ei ta’ata hāmani maita’i. ’Ua parau ’oia ē :
« Te hāmani maita’i ’o te faufa’a tumu ïa o te orara’a tiretiera. Te hāmani maita’i ’o te huru ïa o te hō’ē ta’ata nō te Mesia i ni’a ia vetahi ’ē. E mea ti’a i tā tātou mau parau ’e te ’ohipa i roto i te ravera’a ’ohipa, i te fare ha’api’ira’a, i te fare purera’a e i roto iho ā rā i tō tātou ’utuāfare, ’ia ’ī i te maita’i.
« ’Ua riro Iesu, tō tātou Fa’aora, ’ei hi’ora’a tumu nō te hāmani maita’i ’e nō te aroha ».2
Tē ha’api’i mai nei te mau pāpa’ira’a mo’a ia tātou ē, te fa’aohipara’a ti’a o te autahu’ara’a, tei te huru ïa o to tātou ha’apa’ora’a i te mau parau tumu o te hāmani maita’i, te aroha ’e te here. I roto i Te Parau Ha’api’ira’a ’e te mau Parau Fafau, tē tai’o nei tātou :
« E ’ore roa e nehenehe ’e e ’ore roa ho’i e ti’a ’ia ha’amauhia te hō’ē mana ’e ’aore rā te hō’ē vāhi iti a’e nō te tura nā roto i te autahu’ara’a, maori rā nā roto i te tāparura’a… nā roto i te marū ’e te ha’eha’a, ’e nā roto i te here mau ra ;
« Nā roto i te [hāmani maita’i], ’e te ’ite ateate ra, ’o te fa’arahi roa i te vārua ma te fa’ahua ’ore, ’e ma te ha’avare ’ore i roto i tōna ’ā’au ».3
E te mau taea’e, e mata na tātou i te hi’opo’a i tō tātou orara’a ’e ’ia fa’aoti e pe’e i te hi’ora’a o te Fa’aora nā roto i te rirora’a ’ei ta’ata maita’i, te here ’e te aroha. ’Ia nā reira ho’i tātou, e vai ïa tātou i roto i te hō’ē ti’ara’a maita’i a’e nō te ti’aoro i te mau mana o te ra’i no tātou iho, nō tō tātou ’utuāfare ’e nō tō tātou mau hoa rātere i roto i teie tere fifi i te tahi taime nō te ho’i i roto i tō tātou ’utuāfare i te ra’i ra. ’O tā’u ïa pure nā roto i te i’oa o Iesu Mesia, ’āmene.