Sel Chimal Lomekrael er a bek el Sils
A Chedam er a Babeluades a medengei el kmo kau me a ngak a ousbecha lmuut el ungil tekoi er a ngii di el chad.
A tara er a kot el bedochel el dongu el Chedam er a Babeluades oba lomekrael er a Rengelekel a okiu a remelemalt el chedam me a chedil el rubak me a mechas. A delal a demak a mle uaisei el dil. A tara teletael el dilubech er a dirk kekerei me ng diak ungil dobedebekii, el demak a milellach er ngak. A delak el mechas a ulemtab er tia el teletael, e dula el kmo, “Monte, a kumdasou e ng kmal oberaod a ngerellem el mo er ngii.”
A demak a ulenger, “Chedil, ak mellach er a rengelekek er sel soak el teletael.”
Me a mellomes a rengul delak el mechas a dula el kmo, “Me ngak me ak mo uaisei.”
A kungil medengei el kmo a demak a rirengesii tia el mellomes el tekingel a delal er sel sils.
Sel domdasou el kirel omekrael, e ng sebeched el melbedebek er a chelitakl el kid el rokui a medengelii e kmal soad—“Ngak a Ngelekel a Dios.” Sel koras er ngii a debetik a tekoi el “Morolak e, e mngesukak, morael er bita er ngak, e mngesukak el mo metik er a rael.”
Ng dirk tekoi, e ak mlo medengelii tia el koras el kmo ng kmal chedaol ulekrael el mo er a roungalek. Sel kulbedebek aika el tekoi, e ak mtebengar el kmo ng uaisei el ikal tekoi a ngara chelsel, e ng di ngarngii a lmuut el dmolech el belkul. A dersta er kid, a meluluuch er a bek el sils me a Chedam er Babeluades bo lomekrael er kid, e lolngeseu er kid, e lorael er bita er kid.
A President Dieter F. Uchtdorf a silodii el kmo: “A Demad er a Babeluades a kmasl ungil medengei a lousbech a Rengelekel er a ngii di el chad. Tia Urerel e Klebkellel el ngosukid er a bek el ngerang, el lomeskid a aike lousbech a bedenged me a reng er kid el mo ngosukid er tia el rael el lemuut el mo er Ngii.”
Ka morrenges aike el tekoi: A Chedam er a Babeluades a kmal ungil medengei aike el kau me a ngak a ousbech er a ngii di el chad. Seikid a uchul, e Ngii a mla kudmeklii a cherrungel el teletael el kirel a dersta me a dersta er kid. Ng betok a telengtengil. Ng uldimukl er a chelsel a Ngelekel Sechal me a Tngkaireng; Chedaol Reng, llach, chedaol llechukl, nglunguuch, reprofet, reapostol, rechedam me a rechedil, rubak me a mechas, roungerachel er a Ikelesia, me a lmuut el bebil—el ngii el rokui a ngosukid el muut el mo er Ngii er a tara klebesei.
Msall e kuchais er kemiu er chelechal sils a bebil er a tekoi er a ulekerreu el ngii a mla rullak el mo medengei el kmo a oubeltik el reng el Chedam a omekrael, olngeseu, e ngara bita er ngak me a telungalek er ngak? Nglunguchek me a dersta er kemiu bo lomtab aikel mla dubech el tekoi leko er kemiu el kirel a kmo a Chedam er a Babeluades a omekrael, olngeseu, e ngara bita er kemiu, e tiaikid el klemedengei, a uchul e ko mo ansing, el mednegei el kmo ng diak kom cheloit.
A llechul a Chedam er a Babeluades a ngii a kot el meklou a belkul er a chelsel tial tekoi er a ulekerreu. A Alma millekoi el kmo a “klengit a diak el sebechel mo deureng.” A di dekengei a mekngit el blekeradel e diak desemechokl er a ungil rolel a blulak el klechubechub e smisichii sel uldasou el kmo a mekngit lomeruul a locha sebechel luchul a deureng. A Samuel el Lamanite a kmal meketeklii tial tekoi: Ng dilu er a re Nephites el kmo te osiik er a deureng er a chelsel a mekngit, el ngii el teletael a kmal omtok er a llemalt el ngii a teletelel a ngike el Diak a Ulebengelel Merredel er kid.”
Me ngokiu a reprofet er Ngii, e a Chedam er a Babeluades a blechoel lomeklatk er kid el kmo a llemalt a deureng. Okesiul tiang, e a King Benjamin, a ulisechakl el kmo a Chedam er a Babeluades a “mengerchir me moruul aikel ngii a mla dmu er kemiu el mo meruul; le sel bo moruul, e ngii a di mereched lomekngeltengat er kemiu.” A kuk tara chelitakl a meskid osisiu el uleklatk:
Sera tanjiobi er ngak er a bocha le teruich me a eua rekik, e ak siluub a bebil er a ika el klengeltengat. Ak miles a bebil er a kakerous el blekerdelir a rechad er a blik. Me ng ultebengek er a ikal ngak a miles, e a kuleker, “Kid kede mo er a mission?” A osengel a delak a ulterkeklii tia el mla er a uldesuek. Uirul, er a taem er a cheldecheduch er a telungalek, e ngak me a rebebil er ngak a mlo medengei el kmo a rechad er a blimam a mlam okedong el mo oungerachel er a tara mission.
A ki kiliei er a klebokel el basio er a beluu er a Wyoming. A osengek er ngii, e ak kmo a klengar a mle ungil. Ng sebechek el me remei ruriul er a skuul, e remuul a urerek, e mo melengot, ngara chei, malechub ak milil ngak me a cheremek el bilis.
Kede el taem ruriul er a bo kudengelii tia el okedong, e ak mlo medengei el kmo a cheremek el bilis er a Blue a kirel di kiei. A kuleker er a demak, el km oak mekerang er a Blue. Ng mle soak el meketeklii el kmo a loruul er ngii a Dios a diak el melemalt. Ng kmal diak kubes er tia el nger. Ng dilu el kmo, “Ng diak kudengei. Ng locha diak el sebechel lobengked, me ng kirem loker er a Chedam er a Babeluades.” Tia diak el ngii a nger el mle soak.
Ak mocha menguiu er a Babier er a Mormon. E blak a renguk el meluluuch el soak el mo medengei el km oak mekera er a cheremek el bilis. A nger a dimlak di le mereched el mei; ng bai, a tokubets el uldasou a di mlara uldesuek. “Lak bo berraod el mo er a rechad er a blim. Lak bom tara berraod. Ngak a mla omekedong er tir.”
Ak mle medengei el kmo ngera soal a Chedam er a Babeluades. Tia el klemedengei a dimlak el kekeringii a ringel sel kumdasou omechei er a cheremek el bilis. E ng di, ngokiu tia el kekerei el tekoi el blok charm el kirel, e a renguk a mlo kellechakl e ngak a miltik er a budech er a kusiik er a sola a Chedam er a Babeluades.
Ak mereng a sulel a Demak er a Babeluades el kirel a klengeltengat me a deureng el kbiltik er ngii er a chedaol llechukl, nglunguuch, Chedaol Reng, me a klikiid el demak er a beluulechad el ngii a mle urrekodel er a ngerchelel el sensei er a ebangkelio el mo er a rengelekel. Te ulemekrael, olngeseu, e dirrek el mirrael er bita er ngak el ngosukak el metik er a rael—er a taem el mle kirek el meruul er a kmo ngerang el kmal meringel.
A obengkel aikel telengtengil a ulekerreu el blak basech, e a dersta er kid a ngeltengat er a roungerachel er a priesthood el omekrael e olngeseu er kid.
A President Boyd K. Packer a millekoi el mko: “A rebisop a ulekrael er a chedaol tekoi! A dersta er kid a ngarngii a lemelted el kongei malechub e ng diak de kengei a tekingir a remengetekled, e ng di lak mouketui a tekingel a bisop e rkau, a ledung er medal a seked malechub e ng mo er a dersta el chad.”
Tirkal chad a melasm el omtechei er a Rubak. A de ngeasek me a de meklou, e alsekum a Diablong a rullid el mo omdasou el kmo ng dikea rolel, e a rebisop a ngarngii lomekrael er kid. Sel kungedecheduch er a rebebil er a rebisop, e ak mla metik er a chimol tekoi el kirir tirkel kombesar le te rirebet er a oberaod el klengit. A rebisop a blechoel mereched lochotii a beltik el reng er a Chedam er a Babeluades el mo er a chad me a klemeriar reng el soal mo olngeseu er ngii sel lolasm a chad el muut lobult.
Sel kmal kot el klou a belkul el ulekerreuil a Chedam er a Babeluades a selaod er a ikakid el tekoi: “Beltik el reng er a Dios a uchul e nguldureklii a di chimong el Ngelekel Sechal.”
El mo olisechakl er kid el rokui el kmo, a Jesus Kristo a ulchotii a rael el uldersii a cherrungel el oksiu el kired el mo oltirakl er ngii. Ngii a kmal loldars a chimal loengit er kid, el mo oltirakl er Ngii. E sel lak doltirakl, el kid el rokui a mo uaisei, e Ngii omeklatk er kid el kmo Ng mlora ringel el kirel a rokui, me lak de bora ringel alsekum e kede mo ouchel a rengud er a kngtid.”
Ng meral klebokel el sengk! A ouchel reng a diak el kelebsenged; ng bai techall el mei er kid. Ng techall el omekrael e olngeseu er kid. Seikid a uchul e a chedaol llechukl a melekoi el kmo ng diak a ngera el dolisechakl ng di tal ouchel el reng.
A Chedam er a Babeluades a betok a klekedellel, e ng di ng blechoel lousbech er a tara chad el mo olngeseu er Ngii. Bek el sils e Ngii a meskid a techall el mo omekrael, olngeseu, e ngara bita er a kmo ng techang el ngesool. Ng kired loltirakl er a okesiul Osobel. Kid meng dirrek el kired le mo meruul a urerel a Chedam.
Kemam el ngara Omerredel er a Young Men, e a ki medengei el kmo a rengeasek a ngeltengat sel sekum a roungalek er tir me a roungerachel er tir lomtechei er a Chedam er a Babeluades a omekrael, olngeseu, e ngara bita er tir. A edei el tekoi el ngosukid el mo teloi er a ulekerreruil a Chedam er a Babeluades el mora rebebil a:
A kot, bom teloi er a rengeasek. A President Henry B. Eyring a milketeklii tia el tekoi el kmo: “Ngarngii a bebil er a tekoi el sebeched el remuul el kmal meklou a belkul. Ng kmal muut el klou a belkul er a ikel di tekinged sel dolisechakl el ngii a okesiu er kid loltirakl a osisechakl.” A omekrael er a rengeasek a belkul a kmo ng kired el mo teloi er tir. A dechoit a temed lobengterir e ngolchotel a beltik el reng el uchul eng sebeched lolisechakl lokiu a tekinged me a omerelled.
Ongerung, e a meral omekrael er a rengeasek, e ng kired el ngosuterir el mo ultuil er a ngesou er a babeluades. Ngarngii a taem e a dersta chad a kirir el di mo tir el meruul. A Demad er a Babeluades a sebechel di bek el taem lomekrael er kid e ra ngii di el basio. A rengeasek e rkid a kirir el mo medengei el kmo ng mekera losiik a ulekrael er a Chedam er a Babeluades.
Ongedei, ng kired el mechiteterir a rengeasek me te oungerachel. Ng uaia chad el oungalek lorreked er a chimal a ngelekel e mecherei meng mesuub el merael, ng kired el mechiteterir a rengeasek me te mesuub. Tia ultuil er a kllou el reng me a beltik el reng. Ng meringel e ousbech er aklou el taem el diak el uai kid sel doruul. Te locha mo meteteremokl, e ng di kid a merael er bita er tir.
Rodam me a rodos, ngarngii a taem er a klengar kid el klengeltengat me a ulekrael a uaia le cheroid malechub e ng diak. A Elder D. Todd Christofferson, a millekoi el kirel aikaikid el taem el kmo: “A telbiliu bol chachisois me a blekongesenges er kemiu bol klemerang. E sola molengit lultuil er a klaumerang e lak moumededenger, lultuil er a ikel usbechiu, e a Dios a mo onger. Ngii a mo mesebechakl er kemiu sel moureor e mongiil. E oltirakl er sel Ngii a temel me a Teletelel e Ngii a mo a mo odersii a Chimal leko er kau, e kmo, ‘Ngak tiang.’”
Tiaikid el taem, e kullengit a ulekrael er a Chedam er a Babeluades lokiu a meral mla er a renguk el nglunguuch el kmeed el tal rak losiik er a mo nger er tia el meringel el teletael. Ak mle mui el medengei el kmo a Chedam er a Babeluades onger a meral ngara reng el nglunguuch. E ngdi a tara klebesei e ng kmal mlo suebek a renguk me a k mocha er a templo loba chimo el ker er a uldesuek: “Chedam er a Babeluades, Kau ke meral lomekerreu?”
Ak dilengchokl ruriul er a chelsel a templo er a Logan Utah el mengiil, e mlo mechas a renguk, er a lesiseb a merredel er a templo el president Vaughn J. Featherstone, el ngii a kmal sechelil a telungalek er ngak. Ng dilchor er medal e mengemedaol er kemam el rokui. Tia er a lesekak el teloi er a rebek el chad, e ng mlo diak longedecheduch, e ulengeng a medak, e dula el kmo, “Brother Brough, ngungil a rengud el mesekau e ra chelsel a templo er chelechal sils.”
Ng meral diak kubes aikel kulmelchesiu er tiaikid el telkib el taem. Tia el teletael a—uaia le ble el—Chedam er a Babeluades loldars a chimal e melekoi el kmo, “Ngak tiang.”
A Chedam er a Babeluades a meral lomekerreu e orrenges e onger a bek el nglunguchir a rengalek. Ngak el tara ngelekel, a medengei el kmo a nger er a nglunguchek a mlei lokiu a temel a Rubak. E okiu tiaikid el teletael, e ak liluut el kmal mo ungil medengei el kmo kid a ngelekel a Dios e Ngii a mla odureklid el mei me luchul el sebechel el mo melchesuar er chelechang e deluut el mo kiei lobengkel er a ta er a klebesei.
A kuchais el kmo a Chedam er a Babeluades a meral lomekrael er kid, olngeseu er kid, e merael er bita er kid. Sel doltirakl er a Ngelekel e dorrenges er a Remesiungel, el apostol me a reprofet, e kede mo metik er a rael el mo er a diak a ulebengelel klengar. El ngara ngklel a Jesus Kristo, amen.