Mo Mesisiich er a Beluulechad
A mo mesisiich er a beluulechad a diak el dil ngii el tang a meskid a belkul a klengar er kid, ng bai betok el teletael er a bek el bung a ngii a meskid a belkul a ulebengelel klengar.
Betok el rak ra mla memong, e a President David O. McKay a uluchais er a klebokel tekoi el dilubech el morngii er a lengara bilas el mora Samoa. Uriul er a leiit a medal, eng “milsa ues el meral kleboekl. Mle cheroid,” ng millekoi, “e ak milsa klebokel el beluu. …A kerrekar a mle ungil a rdechel … e a bung e ungil a bngal el meliuekl. …Te rebetok el chad a [mle] bedul tial beluu. A derta er tir a ulubail er a kemangel el bail. … Di mle mereched e a kulemes er … a belngel er a mengetakl er tir, meng uaisei el di kilsa teletelel … , ak mle mereched el dongchii el Osobelek! Tial … didichel a osengel a[mle] klebokel. … [A] budech a iliuekl er ngii … ng mle chedaol!”
Ma President McKay a milemolm, “Sel beluu … a belual … ng Beluu el mo Cherechar; e a rechad loltirakl er ngii a mo kie er tial beluu el ngara budech ma diak a ulebengelel deurreng.”
A President McKay a milbedebek, “Te reua techang? [Tirka te reua techal chad?]”
Ng milsaod er sel dilubeh ra uriul:
“El kmal di ngii me sel Osobel le iliuii a uldesuek, ng ulenger e melutk el mora [llechukl] el kora teletelel aibibeob el …chemolt ra bebrir [rechad], … el llechukl ra kolt … :
“‘Tirkaikid Tirkel Mlo Mesisiich er a Beluulechad—
“El Meral Milchell el Beches!’”
Ng mla mo betok el rak el kulbedebek a ikal tekoi: “Tirka tirkel mlo mesisiich er a beluulechad.”
A klengeltengak er a Rubak el blal yaksok el mortirkel mo mesisiich er a beluulechad a ongasireng. Te mo “mukbail ra becheleleu … e [meluches a ngklir] er a hong ra klengar.” A Rubak “a mo ouchais [a ngklir] er medal [a] Chedam, me a re anghel er ngii.” Derta er tir a mo uldimukl er sel kot el okiis,”e nguu a diak a ulebengelel klengar, e “diak el bol cheroid” er a medal a Dios.
Ng meral sebeched el mo mesisiich ra beluulechad e ngmai a klengeltengat? Oi, ng sebechel.
Beltik el reng el mo er a Osobel
Tirke el mo mesisiich er a beluulechad a mekdebechii a cherrungel el beltikelreng el mora Rubak el Osobeled, el Jesus Kristo.
A chedaol cherellel, melemalt el klengar er Ngii, a diak el ngemed el Tngakireng er a Gethsemane me a Golgotha, a meskid a Okised el rokui. Ngokiu a meral ouchel reng, e ng di ta el Ngii a sebechel kikidid er a kngtid, e rullid meng sebeched el lmuut el mora Dios. “Ng betik a rengud er Ngii, leng mle kot loubeltikelreng er kid.”
A Jesus a kmo, , “Bo lungil a rengmiu; Ak mla mo mesisiich er a beluulechad.”
A uriul eng dilchelii tiang, “E soak kemiu om[dirrek] el mo mesisiich er a beluulechad.”
A mo mesisiich er a beluulechad a diak el dil ngii el tang a meskid a belkul a klengar er kid, ng bai betok el teletael er a bek el bung a ngii a meskid a belkul a ulebengelel klengar.
Ng sebechel el omuchel sel le ngalk a mesuub el meluluuch e oldanges el mengitakl, “Ak melasem el mo ua Jesus.” Eng melemolm sel ngikal chad a mesuub er a klengar ra Osobel ra Beches el Renged e melebedebek er sel klisichel a Tngakireng er a Osobel ra Babier ra Mormon.
A meluluuch, ouchel reng, e oltirakl er a Osobel, e nguu a chedaol lulengesuir a meskid a ungil klemedengei er kid el kmo ngera uchul me kede ngar tiang e kid kede mo ua techang.
A Alma a silodii el ua tiang: “Ng klou [a] milngodechra rengrir, e te ngilai a [rengrir el meriou] e ngilai a klaumerang er tir lotuil ra merang e ngar el Dios … e [millemolm] el mekedung el mora ulebongel.”
Sel dolisiich er kid er a beluulechad e kede medengei el kmo kede mo obengelii a Demad ra Babeluades. Sel blak a rengud el moungil e ouchel a rengud ra kengtid a dikea el lorrob ngbai mesmechokl me a “klengit el bekekerkard … [a mo] beches el ua yuki.”
Ngercheled el mo er a Dios
Tirkel kiei el ua teletelel a beluulechad a meringel er tir el obengelii a Dios— el ua ngalk loungil klebesei ra delengcheklir a rechad er a blil el tir a mlo ra beluu, meng ngara deurreng el ka le delodau, diak lomdasu el kirel a mo dubech sel le mei a rechad er a blil ruriul ra luich ma e ua el sikang.
A beluulechad, a denguu er ngii, a bai lemuut el soal meruul ra rengul a chelsengsang el chad er a bai lolsisechakl er ngii.
A mo mesisiich er a beluulechad a diak el teloi, ra klou el mekemad ngbai di chelebengel a tal el chad, eldi ngii loldechelakl, a ikel ongarem ma blekeradel el seluk er ngii.
A mo mesisiich er a beluulechad a belkul a a belkul a mengai el mo mengeluolu er sel ngarbab el llach: “Bo le betik a rengum er a Rubak el Dios er kau er a rengum el rokir, ma klengar er kau el rokir, ma uldesuem el rokir, ma klisichem el rokir.”
Ngkel meluches a tekoi ra klechelid el C. S. Lewis a silodii el uai tiang: A “Kristo a kmul kmo ‘Beskak el Rokir. Ngdiak el soak a betok er a temem ma itekngel a ududem ma idisel a urrerem: Ng soak Kau. ’”
A mo mesisiich er a beluulechad a uldimukl er ngii sel durrekodel a telbiled el mora Dios—techolb me a telbiil er a templo me a yaksok el mo kedung el bechiil. A mo mesisiich er a beluulechad a mekrolid ra klengariou el reng el mora tebel ra chedaol belsoil ra bekl el sandei, lolengit a klausubes e yaksok elmo “dobedebekii e mengeluolu a llechul” me bol sebeched el “blechoel loba Reng er ngii [lobengked].”
A beltik el reng er kid el kirel Chedaol sils a diak el dil bol merek sel le mechesimer a chesmerel a ikelesia ngbai mekengii a chesmerel a klebokel el sils el dolenguul er a blechoel doruul el urered, mesuub, meluluuch, e oldingel ra re chedad ma rechad e lousbech a ngeseu. Ra bai le kora berraod e mlo iit leng merko ikelesia, loureng el mo metik a osongel er ngara tv ruchei ra lomuchel a klekool ra futbol, a uldesued a kirel di ngara osobel me a Chedaol el Sils er Ngii.
A beluulechad a melmolm loldengelengel er a betok lolengibesereng ma omengitikaik el tekoi.
A mo mesisiich er a beluulechad a oumerang ersel chimol ngor el lomeklatk, mengelaod, omtebechel, omekelomes, e meskid a budech el “diak el uai sel beskid a beluulechad.”
Diak di Domdasou el Kired
A mo mesisiich er a beluulechad a belkul a omes er a re bebil, el medengelii sel longerung el llach: “Ngkel el kot el ngarbab er kemiu a mo sibmiu.” A deuil a rengul a bechid a lmuut el klou a ultutelel er a soad. Olengeseu ra rengeleked el mo mesisiich loubeltik el reng er mora Dios e mengeluoleu a llechul a kot el ngarbab el ngerachel. Ke de bekeruraru er a kloked el ngii a klengeltengat er a ongeltacher, tenget ra sengerenger, me a uldars el mora re ngesool. Me a antena er kid a bedul babeluades, e a Rubak a omekrael er kid el mor tirkel sebeched el ngosuterir.
A nguibes ra tekoi ra beluulechad a diomes ra soal, el kedidai a rengul el melekoi: “Momes er ngak e mongaisisiu er ngak ma tonarii er ngak! Ka momes a kloklek! E mesekak el kmal klou a belkuk el chad!”
A beluulechad a blechoel bechecherd a rengul, diak el semeriar, soal a betook el ngerang, e osiik a deureng er a seked, e sel kuk bo de mesisiich er a beluulechad a meskid a klengariou el reng, klechubechub, klou el reng, chubechubechad er a rechad el ngodech er kid.
Selbechakl lokiu a Reprofet
A mo mesisiich er a beluulechad a belkul a kmong blechoel el ngarngii a bebil ra doumerang el beluulechad omtelub. A Osobel a dilu el kmo:
“Alsekum ma beluulechad a chetil kau, e modengei el kmo ng mle chetil ngak ruchei ra bol chetil kau.”
“Alsekum e ke ua beluulechad, e a beluulechad e soal a uai ngii.”
A President Russell M. Nelson a millekoi er chelechal tutau, “A remeral oltirakl er a Jesus Kristo a kongei el ngodech, diak el medakt el mengedecheduch, e mo ngodech er a rebek el chad er a beluulechad.”
A chedal a Kristo a diak el mesim alsekum e a klaumera er ngii a dimlak el nguu a obdois el er a tal telael el chad el beches el sechelei er a Facebook.
A mo mesisiich er a beluulechad a diak de sal simbai er a delongeled el ngara internet e bai kerekikl er a delongeled kid me a Dios.
A Rubak a mesebechakl er kid a dorrenges sel lomekrael er kid a ngar el profet er Ngii ma re apostol.
A President Thomas S. Monson a millekoi: “A beluulechad a sebechel el mo chetituokel. … [Mesel de bora templo], … eng mengai el mo sebeched el mo mesisiich er a bek el ringel me a bek el ngibesereng. … Ke de mukbeches e mo diak de mesim.”
Chelecha el di lorael a ngibesereng, ongesang, ma chelbirukel, ea beluulechad a melasem el mengeblad er a remekedung me lobes a ikel betok chedaol tekingel a reng el ngilai ra uchelel, el ual di ble luldesuir malechub eng klebelung el milcheblad er ngii.
A mo mesisiich er a beluulechad a momelatk, ngii mesel merta rengud, ma taem el dulchesuar er a beltikelreng me a llemesel a Osobel. A Elder Neal A. Maxwell a silodii a tara a ikal blekeradel el uai tiang: “Ak mla mukngeltengat, e medengei el Dios a medengei el kmoak medengei el mla mukngeltengat.” Ma altang eng telkib el taem el bla lobes er kid a Dios, engdi kid a diak ke dobes.
A mo mesisiich er a beluulechad a diak el belkul a kmo kede kie chellileakl, el selbechakl er a chelebirukel ma ringelel a klechad. Tia bai, ungil techall me kede moungil medengelii a klaumerang, el ngoikid elmo kmeed er a Osobel ma ikel telbilel.
Ma altang e a mo mecherrungel el klengar a diak el metkmokl er tial klengar, sel mo mesisiich er a beluulechad a sichedekl a urunguled meng di ngar ma tara klebesei e “kede dechor ra medal a [Osobeled]; [e] mesa medal el dmeu a rengud,” e rongesii a ngerel: “Mei, kau el ngeltengat er a Demak, bemtuu ra renged el kletmokl el kirem.”
Okesiu er a Elder Bruce D. Porter
Sera December 28 er tial mlo merek el rak, e a betik er a rengmam e sechelimam el General Authority el Elder Bruce D. Porter, a rirekir a klengar er ngii. Ng mle okolem ma eua rekil.
Ak mle kot e lmo medengelii a Bruce er sera kim ngalk er a skuul ra Brigham Young University. Ng mle tara meduch e mellomes a rengul. Uriul er a letobed er a daingak ra Harvard University, ra omesubel beluu ra Rosia. E a uldesuel me a loluches a Bruce a milsang ngar bab el deruchall el mle sebechel rulii meng metuchakl, eng di a ilteet me a chetengakl er a beluulechad a dimlak el ilkelkii osengel. A mla ra rengul a di kirel Osobel, Jesus Kristo; me a kldemel, el Susan; me a rengelekel ma rengelekel a rengelekel.
A Bruce a milechell el ngarngii a secherel a kidney er ngii. Ng mlora botk, e ng di omerolel a taem eng liluut el merael mo mechitechub.
Uriul er a Bruce le nguu okedong el mora General Authority er sera 1995, e ak kidilak el mesou kemam ma retelungalek er kemam er a Frankfurt, Germany, el urerel a mle kirel a Russia me a Eastern Europe.
A klengar ra Elder Porter a kmal milngodech er sera 1997 ra kidney ma bedengel lorael elmo mechitechut. A telungalk er a Porter a liluut el mora Salt Lake City.
A ikel bekord el 22 el rak losiou el ngar Okeuid, e a Bruce a mlara osbitar el betok el taem e ngara ospitar, uldimukl a tacher el bokt. A re toktang a millekoi ra Susan leru el taem el kmo a Bruce a diak el ngar el ta el kesus, engdi ng silobel.
A Bruce a mlara omesilk el mesilk a resechel el mlo ngelakl er a teruich ma eru el rak ra le General Authority. Chelsel sel taem, e tial lomesilk a ngarngii el eim el klebesei ra ta el sandei el leua el zikang sel ta el bora ukeruul mel sebechel el mesiou ra ngerchelel sel le melomes e le ngara ongdibel sel le weekend. Sel lak el bo lungil a bedengel ruriul ra le nguu a klengeltengat er a priesthood, e a Bruce a mlo rrau a rengul, engdi ng medengei el kmong techa loumerang er ngii.
Sera 2010, e a Bruce a ngiluu a kidney ra ngelekel ra David. Chelechal taem e a bedengel a mlo sebechel mukar. Ng mle ongasireng, leng milkdebechii a beches el klisiich, ma uiriul eng mlo sebechel ngii ma Susan el lmuut el mo ra betik er a rengul el Rosia el ngara Area Presidency.
Sera December 26 er tial mlo merek el rak, ruriul ra lolemolm eldi smecher el ngara ospitar ra Salt Lake City, eng ngulengit ra re toktang me lorael. A Bruce a millekoi ra Susan el “kmong medengei lokiu a Reng el diak a ngera el sebechir a re toktang el rullii el mo osobelii a klengar er ngii. Ng medengei … el kmo a Demad ra Babeluades a mo nguu el mo remei. Ng mle mui ra budech.”
Sera December 28, e a Bruce a mlo remei ra blil. Kesai el sikang ruriul, eng ileuekl ra re telungalk er ngii, e ngara budech e luetang el mora blil ra babeluades.
Tela el rak er a memong, e a Bruce a milluches el mora rengelekel:
“Sel klaumerang el kubang er a klemerang ma beltkil a rengul a Jesus Kristo a blechoel el lomekrael ra klengar er ngak. …Ngii [a] klikiid, el smiich el sioning el mlara Reng el kmo ngii a ngar, e ngii a Osebelek e Sechelik ra bek el taem ra usbechek.”
“A chelbengeled … a mo medengelii [a Osobel] … e, okiu a klaumerang er ngii, el mo mesisiich er a ongarem ma ongitikaik er tial beluulechad.”
“Me bo de mekedung e de blechoel, loumerang er Ngii.”
A Bruce Douglas Porter a mlo mesisiich er a beluulechad.
Mei me desisichid el melasem el mo blak a rengud el mo mesisiich er a beluulechad, e diak domechei a meklou el tellemall e mo klou a rengud er a mekekere tekoi el toucheklid, el semeriar el orreched e bekerurau er a ngelseuid el mora rebebil. Sel mui loumerang er a Osobel, e ak yaksok er kemiu a klou el budech er tial klengar ma klou e techellem er a diak a ulebengel beluu, el ngara ngklel a Jesus Kristo, amen.