Mo er a Resechelei me a Remesuub er a Ikelesia
A msiik chedaol ocholt, mo ngariou a rengum, menguiu, e meluluuch, e ouchel a rengum, e a babeluades a mo obok e kau a mo medengei el kmo a Jesus a Kristo.
Ng mle Ongeim el ureor er a sueleb, er a September 16, 1988, er sel Vicente López Ward er a Buenos Aires, Argentina, e ak miltecholb el mo chedal a Ikelesia er a Jesus Kristo er a Uriul-klebesei el Santo. A kmal ungil sechelik, er a Alin Spannanus, a millecholb er ngak er tial sils, me ng kmal mlo ungil a renguk, e kebekakl, e semeriar el muut el mesuub.
Chelchal sils, eng soak louchais a bebil er a suobel el ngak a siluub ruchei er ak metecholb— suobel el kureng meng ngosuterir tirkel lorrenges e ng di dirkak el bol chedal a Ikelesia. Ak meluluuch ma rengmiu bo lobok lokiu Chedaol Reng el uai ngak.
A kot, sel dekebetech lobengterir a remisionari
Ngera uchul me a chad el diak a oberaod el ringel, me a usbechellel, malechub a keril a semeriar lomes e orrenges a suobel er a remisionari? A kuk denguu er ngak, eng mle beltik el reng—beltik el reng el mo ra redil, el redil el ngklel a Renee. Ng kmal mlo soak el redil, e mle soak el mo bechil. Ng mle ngodech e olab a ngarbab el llach er tirkel rokui el redil el bla kudengelterir. Eng di ng kmal mlo soak el redil me ak millekoi a chebechiil er ngii—e ng dilu el kmo ng diak!
Ng mlo rrau a renguk. A kulemdasou el kmo a kungil chad! Ak mle ungil sechal, el lluich ma eua rekik, el mla tuobed er a daingak e ungil a urerek. Ng millekoi a soal mo meruul el tekoi— el mo bechil a chad el ngii a sebechel nguu el mo er a templo, me a diak a ulebengelel telungalek— me ng mle kotouar er a ongtik. Ng mle soak el melemolem er a delongelam, me a kilengei el mo orrenges er a remisionari. Tiang locha ungil uchul e kede mo mesuub lobengterir a remisionari? Ng mle, ungil er ngak.
Sera kot el kebetech lobengterir a remisionari, e ng dimlak sal medengei a betok er a ikel ble lolekoi, e mera er ngii, ng locha dimlak sal ungil lorrenges. A renguk a mle chelsimer el kirel a beches el klechelid. Ng mle soak lochotii er tir el kmo te cheleuid e dirrek el mo sebechek el meltii a rengul a Renee el mo bechik.
Chelechal sils e a rengelekek a mla ngara mission ma re dirk ngara mission, me ak mla mo medengelii sel ringel el tirkal ngeasek el sechal me a ngeasek el redil a mor ngii sel lolisechakl er a ebangkelio er a Jesus Kristo. Chelecha e a kureng el ulekum ak mle ungil lorrenges e omtab osischeklel a Elder Richardson, me a Elder Farrell, me a Elder Hyland, el kmal mle ungil misionari el ulisechakl er ngak.
A leuasiei, e a kot el suobel, Ak dmu er kemiu a resechelik me a remesuub er a Ikelesia: sel tal mkebetech lobengterir a remisionari, e bol blak a rengmiu; le te chemoit a rak er a klengar tir el kiriu.
Ongerung, Mo er a Ikelesia
Sera kot el taem el kbora Ikelesia, e ak rirenges a betok el tekoi el dimlak kungil medengei. Te ngera re Beehives? Ngera Aaronic Priesthood? e ngera Relief Society?
Alsekum e tia kot el taem er kau el ngara Ikelesia e kora rrau a rengum er a kmo ngerang el diak msal ungil medengelii, lak ko bekikl! Ngak mak dirrek el mlara rraureng. Eng di ak dirk medengelii sel kulmelchesiu er ngii, beches el kumelchesiu er a budech me a deureng. Ng dimlak kudengelii er sel taem, eng di a Chedaol Reng a milngelulau er a dingak ma renguk, “Tiaikid a klemerang.”
Msall ek deli tial suobel er a chelsel a chimol cherrungel el tekoi alsekum eng rrau a rengum, e lak ko bekikl—molbedebek er a sel kau a mle omelchesiu er ngii; ngara Dios el mei.
Ongedei, Menguiu er a Babier er a Mormon
Uriul er a tela el omesuub lobengterir a remisionari, eng dimlak el sal blak a renguk. Ak mle omelchesiu el dirkak nguu a mesisiich lolchotel a klemerang er a ebangkelio.
A tara klebesei, e a Renee a uleker ngak, “Ke menguiu er a Babier er a Mormon?”
Ak dulang el kmo, “Ng diak.” Ak mesuub lobengterir a remisionari; tiang diak lungiang?
Ngmocha merael a iuechel a medal, a Renee e dula er ngak el kmo ngii a medengei el kmo a Babier er a Mormon a klemerang e silodii el kmo, alsekum eng soak el mo medengelii a klemerang, e a di tal rolel—e ka molangch el kmo ngerang—a bo kunguiu er ngii! E oker!
Monguiu, e molbedebk er a renguk, e “moker er a Dios, el Diak a Ulebengelel Chedam, el ngara ngklel a Kristo, … el meral ngarngii er a rengum, el blak a rengum, lultuil er a klaumerang er a Kristo” (Moroni 10:4) el kmo a Babier er a Mormon a klemerang, e tiang a meral Ikelesia.
Me a ongedei el suobel, er a chelsel a cherrungel el tekoi a kmo: sel mngai aikal tekoi—Babier er a Mormon—e bo monguiu er ngii e moker er a Dios el kirel a klemerang, e bo moruul er ngii!
Ulebongel, Ouchel reng
Sel ulebongel el tekoi el soak louchais er ngii a kirel a ouchel reng. Uriul er a bla ksuub aikel rokui el suobel er a remisionari, e ak millemolem lomelchesiu el kmo ng diak a ngii di el ngerang el kirek el melodech er a klengar ngak. Ng bai Elder Cutler, el ngeasek, e medengei el misionari el telkib el medengei a tekoi er a Sebangiol, el tara klebesei e ng dilu er ngak el kmo, “Joaquin, mei e dedak el menguiu er a Alma 42, e dodekiar a ngklem sel donguiu.”
Ng kora mle klebelung, e ng di ak di kilngei a tekingel a Elder Cutler e menguiu er a kot el verse 1: “Chelecha, e kau el ngelekek er a [Joaquin], a kumtab e ngarngii a lmuut el kmo ngerang el diak el bleketakl er a uldesuem, e diak el sebechem el mo medengelii.” E a, tial bades a tekoi el mei er ngak.
E mocha menguiu er aongeru el bades 2: “Chelecha, e kau el ngelekek er a [Joaquin], ak mo smodii tial tekoi lekor kau,” e mocha mesaod el kirel a Rebetel a Adam.
E a ongeua el bades 4: “Me chelecha e kede mla mesa, el kmo ngarngii a taem el kirel a [Joaquin] el mo ouchel a rengul.”
A ki millemolem el mekekokemam el menguiu, a bek el bades, el mol muut er a ikel kldei el ulebongel el bades. E mlo mechas a renguk er a mesisiich el klisiich. Tial hong a millekoi el directly kirek, me ak mocha medidelangel e menguiu, “Me chelechang e, [Joaquin] el ngelekek, a kulengit me lak el rrau a rengum er a ikal tekoi, bai dil kngtim a olsebek er a rengum, el tiaikid el sebek reng er kau a rullau el mo … ouchel a rengum” (verse 29).
Chelecha ak mla momedengei el kmo ng mle soak el mo ngmai chedaol ocholt el di diak el blak a renguk el kirel. Mol muut er seikid el taem eng dirkak kungedecheduch el mo er a Dios, le kulemdasou el kmo a omengedecheduch el mo er a chad el diak desang a kora klebelung. Ng mle kirek el mo ngariou a renguk e meruul aikel kirek el meruul, luldimukl a le kora mle klebelung el tekoi er a uldesuek.
Seikid el sils e ak milkengii a renguk el kirel Chedaol Reng, e mlo ouchel a renguk, e soak el mo metecholb! Uchei er tiang, e a kulemdasou el kmo a ouchel reng a kora mekngit el tekoi, el di mora remeruul a klengit me a remeruul a chelbirukel, e ng di ak di mle mereched el mtebengar er a kuk ngodech el llomes—el bai ungil tekoi el tometemii a rael el kirel a ulekerulek me a deureng el mei er ngak.
A Elder Cutler a ngar tiang er chelechal sils, e soak loureng a sulel el milok osengek. A bek el teletael er a omelilt el bla kuruul a ultuil er tiaikid el taem el blol ngariou a renguk, e miluluuch lolengit a klausubes, me a Tngakireng er a Jesus Kristo a mlo tebedechel a klengar ngak.
Me tial suobel, er a chelsel a cherrungel el tekoi a kmo: Bo mouchel a rengum; ng diak a ngera el ngoikau el mo kmeed er a Rubak el Jesus Kristo el uaia blak el reng el mengodech.
Kemiu el dirk mesuub, sechelei er a Ikelesia, alsekum e ko morrenges er chelechal sils, e kemiu a kmal di kmeed el mochu er a deureng. Kom kmal kmedung!
Msall ek sioati er kemiu, el kmal loba renguk el ngara chelsel a renguk el rokir: bo mnguu a techolbechelid! Ng kot el ngarbab el tekoi el kau a kudmeklii. Ng diak lengedechii a klengar kau ng dirrek el klengar er a rengelekem me a rengelkir a rengelekem.
A Rubak a mla omekngeltengat er ngak er a telungalek. Ak mlo bechil a Renee, e ngar ngii a teua el klebokel el ngelekam. Ng techolbechelid er ngak a uchul, e ak, uaia profet Lehi er a recheuodel, el mle siotai er tir el mo nguu a rdechel sel kerrekar er a klengar, el ngii a beltik el reng er a Dios (mesa 1 Nephi 8:15; 11:25). Ng sebechek el ngosuterir el mei er a Kristo.
Ma kulngeit me molbedebek er a teletael dilubech er a ngak, el (1) bol blak a rengmiu lorrenges er a remisionari, (2) bora ikelesia e molbedebek aikel chedaol tekoi el momelchesiu, e (3) monguiu er a Babier er a Mormon e moker er a Rubak el kirel a klemrang er ngii, e a (4) bo mouchel a rengmiu e bo mnguu a techolbechelid.
A kuchais er kemiu el kmo alsekum e ng mo blak a rengmiu el kirel chedaol ocholt, e mo ngariou a rengmiu, e menguiu, e meluluuch, e ouchel a rengmiu, e a babeluades a mo obok me ko mo medengei, el uai ngak el medengei, el kmo a Jesus a ngii a Kristo, Ngii a Osobelek e Osebeliu. El ngara ngklel a Jesus Kristo, amen.