Oureng el mo Remei
Mobult el bedul a llomes. Momuchel er a klebokel lomerollem. A bom uaisei, e a klengar kau a mo ungil, mo ngara deureng, e morngii a moktek er ngii.
A ki dirk, mlo omes er a President Thomas S. Monson, ngulechotii, loba klou el budech e ungil osengel e mui er a deureng, a betkil a rengul el mora Rubak e medengei el kmo a Rubak a betik a rengul er ngii. Rodam me a rodos, ak medengei el kmo a President Monson a mui ra omereng el saul el kirel a belkil a rengmiu me a nglunguchiu, me a blak el reng er kemiu el mora Rubak me a kmal ungil el ebangkelio er Ngii.
Bobbie el Mengasireng el Bilis
Betok el rak er a memong, e a tal telungalek er a Oregon a uleldingel e milil er a beluu er a Indiana—el kmeed el 2,000 miles (3,200 km) a cherridel—e ng remiid a cheremir el bilis, er a Bobbie. Me ng kmal suebek a rengrir e te mocha osiik er ngika el bilis e dimlak el betik er ngii. Ng dimlak el betik er a Bobbie.
Me te ngara klengit el reng, e merolang el mo remei, el kmal di merola el mo cheroid er ngika el cheremir.
Elolem el buil ruriul, e tial telungalek a mlo mechas a rengrir er a le betik er a Bobbie el ngara medal a tuangel er a blirir er a Oregon. “Ng dechudech, mesengaked, di chiuesel le—[ng uaia] di lurrael er tial klemanget er a omerael … el di ngii el tang.” Tial cheldechedechal a Bobbie a ulechau a rengrir a rechad er a beluu er a Merikel, meng mlo merael chisel el Bobbie el Mengasireng el Bilis.
A Bobbie a diak el di el chimol charm el mla chemas a rengrir a re scientists er a duch er ngii el metik er a rolel el mo remei. A bebil er a bangikoi a mla subek el 3,000 miles (4,800 km) er a bek el rak el mo er a ungil basio el chatter er a klengar tir. A uel a merael liueklii a Pacific Ocean el ngara Indonesia el mo el muut er a tkul a debel a California. A kuzira a mla merael er a daob er a North Pole me a South Poles el mo bedul a equator e lmuut. E sel kmal mengasireng, a suebek el charm a mla suebek er a Arctic Circle el mo er a Antartica e lmuut er a bek el rak, tia kmeed el 60,000 miles (97,000 km).
A re scientist sel losub aikal mengasireng el blekeradel, e ng di tir loker a uai kakid el ker “Te mekera medengelii a le bo er ngii?” e “Mekerang a bek el telcheroll er tir e medengelii tial teletael?”
Sel kunguiu el kirel aikal mengasireng el charm, e ak melbedebek el kmo, “Kid a rechad kede locha osiik er a osisiu el teletael—sel kmo ngera el omekrael er kid, a lechub—e sel ngii a ngoikid el mo remei er a babeluades?”
A kumerang el kmo a bek el sechal, me a redil, me a rengalek a mla melchesuar a okedong er a babeluades er a chelsel a klengar tir. Sel ngara chelsel a rengud a oureng lengelakl er a orars el mo er a rechad er a blid er a babeluades el ble dodengelterir e betik a rengud er tir.
A rebebil a locha mo oberaod el kirel tial uldasou e di tir el rulterir el mo diak el sal mesisiich lomdasou el kirel. E ng di tirkel diak bo lomelchesiu loberaod er tial uldasou a sebechir lomuchel er tial meang lomerael—el klebokel lomelukl el bedul a blai er a babeluades.
A Dios Omekedong el Mei er Kau
A klebokel el klemechel a Ikelesia er a Jesus Kristo er a Uriul-klebesei el Santo a kmo a Dios a Demad, e Ngii a omekerreu er kid, e ngarngii a rael el muut el mo er Ngii.
A Dios omekedong el mei er kau.
A Dios a medengei a bek el uldesuem, kngtil a rengum, me a meklou el urungulem. A Dios a medengei ikel betok el taem el momekedong er Ngii. A ikel betok el taem kulmechesuar er a deureng. A ikel betok el taem el mlangel er a klsabisi. Betok el taem el blo momelchesiu el dikea el sebechem, rrau a rengum, malechub e ng kesib a rengum.
E ng di ng diak el iior er a reksi er a klengar kau—alsekum e ke mla touchakl, reuebt, omelchesiu el telemall a rengum, kesib a rengum, motelechakl, malechub e ke chellebed—bo modengei el kmo kau a diak di le kau el tang. A Dios a melemolem lomekedong er kau.
A Osobel oldars er a Chimal kirem. A omerellel, el mo er tirkel chad er a omenged el tir a dilechor er a tkul a Daob er a Galilee, e Ngii oba cherrungel el beltik el reng e mengedecheduch er kau: “Mei, e moltirakl er ngak.”
Omko ke mo orreges er Ngii, e Ngii a mengedecheduch er kau er chelechal sils.
Sel om ngara rolel a oltirakl—sel morael bedul a Chedam er a Babeluades—e ngarngii a kmo ngerang el ngara kau el mo oterkeklii er kau el kmo ke mla rongesii okedong er a Osobel e oterkeklii a rengum el bedul a llomes. Ng mo ouchais er kau el kmo ke ngara melemalt el rael, el ngara omerollem el mo remei.
Ngulemuchel er a uchelel a rokui el tekoi, e a reprofet er a Dios a mla mengelechel er a rechad el mo “olngesenges er a ngerel a Rubak el Dios, … e oltirakl a llechul me a teletelel … , [e] mo obult el mo er [Ngii] loba rokir el rengum, me a rokir el bedengem.”
A chedaol llechukl osischeklid a betok el uchul e ng kired el meruul el uaisei.
Chelechal sils, e msall e kdung a eru el uchul e ng kired lobult el mo er a Rubak.
A kot: A klengar kau a mo kebekakl.
Ongerung: A Dios a mo ousbech er kau el mo uchul a ungil klengar el mo er a rebebil.
A Klengar Kau A Mo Kebekakl
A kuchais el kmo sel domuchel e dolemolem er tial meang lomerael el bedul a Dios, e a klengar kid a mo kebekakl.
Tia diak el belkul a kmo a klengar kid a mo mimokl er a klengit el reng. Kede rokui el medengelterir a remui er a klaumerang loltirakl er a Kristo el mlo er a meringel el ongarm me a chelbirukel lomeruul el kirir— a Jesus Kristo a siliseb er a klou el ringel er a ngii di el chad. El uaia Chedam el “rullii a sils meng dmiich el mo er a remekngit me a rungil,” e Ngii a dirrek el mechei ongarm me ng skeng el mo er a remelemalt me a rediak el melemalt. E a mera er ngii, a le bebil er a taem e a klengar kid a uaia le sal meringel le kid el melasm el kiei loltirakl er a klechelid er kid.
A otirekled er a Osobel a diak el cheroid a rokui el ringel. E ng di, ng choroid aikel olibesongel el ngara delongelem me a ngeso el Chedam er a Babeluades a soal lomeskau. Ngii a mo obengkem. Ngii a mo omekrael a blekeklem. Ngii a mo merael er bita er kau e dirrek el tikeuauo sel msal loberedang.
Ke mo chuarm a klebokel el redechel a Reng el uaia: “beltik el reng, deureng, budech, outekangel, blekokeuii, me a klungiaol, [me a] klaumerang.”
A ikal redechel a reng a diak el belkul a kmo ke mo ungil besum er tial beluulechad, mo obdois a klungiolem, malechub e bo meteet. Aika mei lultuil er a otireklem er a Osobel, e sebechel ngosukid er a chelsel aikel meringel el taem.
A ringel me a ongarm er tial klengar a sebechel lomekdakt e olsebek a rengud, e ng di tirkel lodars a rengrir el mo er a Dios e mo iliuekel er a budech er Ngii. A deureng er tir a diak el ngemed. Te diak bol cheloit malechub e lak a kmo tir.
“Bo multuil er a Rubak loba rengum el rokir,” ng melekoi chedaol llechukl, “e lak multuil er a di klemedengei er kau. A rokui el tekoi e modersau el mo er ngii, e ngii a mo omekrael er kau.”
Tirkel tir orrenges er a okedong e osiik er a Dios, tirkel meluluch, oumerang, e merael er a rolel a Osobel el blal kudmeklii—luldimukl a lemesibas er a bebil er a taem—a mo nguu a chelellakl el budech el kmo a rokui el tekoi a dmak el oureor el mo uchul a klungiolir.”
Le Dios a “mesterir a klisichir a re mesikang e choisois a klisichir a re mechitechetong.”
“Le a remelemalt a ruebet el euid el taem, me tir a di lmuut el mekiis.”
A Rubak el bekokeuii a oker:
Kau ng soam el mo medengelii a diak a ulebengelel deureng?
Ng soam el mo melchesuar er a rengum a budech lengelakl er a di klemedengei er kau?
Me beltii a rengum el bedul a llomes.
Momuchel er a klebokel lomerollem el mo remei.
Sel bo morul el uaisei e a klengar kau a mo kebekakl, mo ngara deureng, e mo klou a moktek er ngii.
Dios a Mo Ousbech er Kau
Ng uaisei, el diak el sebechem el kuk kmal mo cheroid er tial rael el mo er a Chedam er a Babeluades le ng dikau el mo metik el kmo tial lomerael a diak di le kirel a klengar kau e le merekong. Ng diak, tial rael a mekrolau el mo klengeltengat er a klengar er a rebebil er a rengelekel a Dios—rodam me a rodos er kau. E sel klebekelel tial lomerael a kmo sel mosiou er a Dios, e momekereu e molngeseu er a rebebil er a rechad, e ng di kau el mo mesa klungiolel a klengar kau, el ngii a diak betebengar.
Ke locha mesekau el diak msal usbechall; ke locha omdasou el kmo ng diak mngerang er a klengar er a tara rechad. Ng blechoel, el sel domes er kid, e kede di mes a chelitechetechut me a telitur kid. Kede locha omdasou el kmo ng kired el kmal mo “ua ngerang” e a Dios a mo ousbech er kid—kmal mo mellomes a rengud, kmal mo meteet, kmal mo klebokel, kmla mo klou a duch er kid, e kmal mo chedaol. A klengeltengat a mei el diak el sal iior er a duch er kau ng bai iior er a omelilt er kau. E a Dios er a beluulechad el rokir a mo oureor lobengkem, e mengisois er a blak el reng er kau er a moktek er Ngii.
A Urerel a di mla ngoriakl lultuil er tiakid el kou a belkul tekoi: ngultuil er a mekekerei el tekoi e a meklou el tekoi a dubech.”
Sera loluches el mo er a Resanto el mlara Korinth, e a Apostol el Paulus a miltebengar el kmo ng diak el betok el chedal a ikelesia risei a mle mellomes a rengrir er a tekoi er a klechad. E ng di tia dimlak a belkul, le “Dios a mla melilt er a rolngesonges er a tekingel a beluulechad el mo olisechakl a mesisiich el tekoi.”
A reksi er a urerel a Dios a mui er a rechad el ulemdasou el kmo te melaingesonges. Ng di te uleba ngariou el reng e mesiou, lultuil er a chubechub er a Dios, me te ngiluu a yaksok er Ngii el kmo a chimorir a mo Chimal, e Ngii a mo kaba er tir … , e tir a mo mesebechakl er Ngii e … Ngii a [mo] mesebechakl er tir.”
Tial mlo merek el summer e a telungalek er kemam a mlarngii a techellir el mo oldingel a bebil er a basio er a uchelel a Ikelesia er a Beluu er a Merikel. Ng ko er a ua de kiei er tiaikid el taem er a reksi. A rechad el bla kunguiu el kirir—a rua Martin Harris, Oliver Cowdery, me a Thomas B. Marsh—a liluut el ua bol meral chad er a renguk er a ki morael er a ikel lurrael er ngii e ki molbedebek er a klengar tir el mlo chuarm el kirel a teketekel a rengedel a Dios.
Ng kmal betok el teletael a ngilsuterir el mlo uchul a Olutel a Ikelesia er a Jesus Kristo. E ng di te dirrek el di mle chad, el mechitechur, e diak el cherrungel—el di uai kau me a ngak. A rebebil er tir a mlo omtok er a Profet Joseph Smith e mlo cheroid er a Ikelesia. Uriul, e te betok er tirkaikid el osisiu el chad a mlengodech a rengrir, e mlo oba ngariou el reng, e liluut el me teloi er a Resanto.
Kede locha mo soad el merritel er tirkal odam me a rebebil el ulebengterir. Kede locha melekoi el kmo, “Ng kmal diak bok cheroid er a Profet Joseph.”
Ng uaisei el locha klemerang, e ng di kid a diak desal ungil medengelii a klengar er tiaikid el taem, me a tiaikid el teletael. Ng diak, te dimlak el cherrungel el chad, e ng di ng smisichid el mo medengei el kmo a Dios a di ulusbech er tir. Ngii a mle medengei a klisichir me a chelitecheterir, e Ngii a milsterir a klou el techall el mo kudmeklii a telkib er a urerel Oluut.
Ng meral klebokel el bo dodengei el kmo, ng uaisei el diakde cherrungel, e ng di alsekum a rengud a obult el mo er a Dios, e Ngii a mo bekerurau e bekokeuii e mo ousbech er kid el kirel a moktek er Ngii.
Me tirkel betik a rengrir e mesiou er a Dios me a rebebil, e oba ngariou el reng e mui el meruul a Urerel, a mo mes a meang el tekoi el dubech er a klengar tir me a klengar er a rebetik er a rengrir.
A techall a mo ngarngii.
A reanghel a mo remedemiu e kudmekli a rael.
Me ng diak el iior er a deruchellem er a buai malechub a Ikelesia, a Dios a mo ousbech er kau alsekum e ngarngii er a rengum. Ngii a mo choisois a melemalt el blak el reng er kau e mult a omerellem el mo obdois el klungiaol.
Ng Diak el Sebeched el Mong el Diak a Moktek er Kid
Kid, a dersta er kid, “a kakerous e ngodech el chad” er tial beluulechad. E a chelsel a betok el tekoi, e kid a kmal cheroid er a blid. E ng di ng diak el belkul a kmo kede omelchesiu el mla remiid malechub e kede cheloit.
A oubeltik el reng el Chedam er a Babeluades a mla meskid a Llomes er a Kristo. A sel kmal delalm er a chelsel a rengud, a sel kmo ngera el oldubech osenged me a rengud el bedul Ngii er tial omerolled el muut el mo remei er a blid er a rengedel a celestial.
Tia ultuil er a blak el reng. Ng diak el sebechem el mo risei a lak molasm el mesuub er Ngii, e mo medengei a Tekingel, e oltirakl, e momakes el bedul uchei.
Ng diak, a klengar a diak di lengii lomesiull er ngii. Me a diak el skoki el di ngii lomekall er ngii.
Ng diak el sebechem el ko er a di meleolt a rengum er a klengar e mousbech el kmo ke di obengkel tial omerael el mo er sel moureng el mo er ngii. A roltirakl a kirir lomtok er a berius.
Ng diak a ngodech loungerachel er a omerollem. A Osobel a mo ngosukau e kdmeklii a rael el kirem, e ng di a blak el reng el mo oltirakl er Ngii e oltirakl a Llechul a kmal di ngara kau. Tia kmal di ngerchelem, e techellem.
Tia kmal ngarbab el teletael el mei er kau.
A kulengit me mrengesii okedongel Osobelem.
Moltirakl er Ngii
A Rubak a mla kudmeklii a Ikelesia er a Jesus Kristo er a Uriul-klebesei el Santo el mo ngosukau er a blak el reng er kau el mo mesiou er a Dios me a rebebil. A moktek er ngii a mo mengelechel, olisechakl, mesebechakl, e omekellomes. Tial ungil Ikelesia a meskau a techall el mo chubechub, e olngeseu er a rebebil, e omekbeches e oltirakl a chedaol telbiil. Ng mla mekedmokl el mo omekngeltengat er a klengar kau e smisichii a delengcheklem, me a buai, me a beluu.
Mei, e bom teloi er kemam e multuil er a Rubak. Modars a duch er kau el mo er tial klebokel el Urerel. Bo molngeseu, e molisiich, e momekungil, e molngeseu er tirkel tir a sorir el mo melchesuar e oureng el mo remei er a babeluades. Bo dedak el rokui er tial klebokel lomerael mo remei er a babeluades.
A ebangkelio a klebokel el klumech er a ongiil, ungil reng, me a deureng. Tiaikid a rael el mekrolid el mo remei.
Sel sekum e kede kongei er a ebangkelio lultuil er a klaumerang me a omerull, er a bek el sils me a bek el sikang, e kid a telkib el mo kmeed er a Dios. A klengar kid a mo kebekakl, e a Rubak a mo ousbech er kid er a chelsel a mengasireng el teletael el mo omekngeltengat er tirkel ngara bita er kid el mo uchul a kedmeklel a moktek er Ngii. Aikang a kuchais e meskemiu a klengeltengat el ngara chedaol ngklel a Jesus Kristo, amen.