Bo Dekau Beltik el Reng el uai Ngii el Betik a Rengul er Kid
A dosiou e dousubes ra rebebil loba meral beltik el reng, e kede mukar e mo mesisiich er a ringel el dechelebangel.
Sel mle Ulebongel el Belsoil, e a Osobel a milsterir a roltirakl er Ngii a beches a llach, el kmo:
“Beches el llach ak beskemiu, Bom kau beltik el reng, el uai ngak el betik a renguk er kemiu, me kom dirrek el mo kau beltik el reng.
“Tiakid a rokui el chad a mo medengei el kmo komoltirakl er ngak, alsekum e kom kau beltik el reng.”
A roltirakl ra Osobel a nguu a beches el llach el mo meruul a betok, el ngarbab el tekoi, e dirrek el chedaol tekoi. Tial beches el llach ma ongtil a sebeched el kmo ng klou a belkul el tekoi el “uai ngak el betik a renguk er kemiu.”
A Beltik el Reng a ngara Omeruul; A Beltik el Reng a Omesiou
“A beltik el reng a dmolech el domelchesiu, ma rengud ma uldesued. Sel ngarbab lokesiu ra beltik el reng ra Dios el mora Rengelekel a de betik er ngii ra Tngakireng er a Jesus Kristo.”“Le Dios a betik a rengul ra beluulechad,” ng milluches a Johanes, “me ng uldureklii a ngelekel Sechal, me tirkel oumerang er ngii a diak el bol riid, e bai mo oba diak a ulebengelel klengar.” “A beltik el reng el mora Dios ma chad a ngii a blekerdelir a roltirakl ra Jesus Kristo.”
Sesei el rak ra memong, e a kot el klou el sechal ngelekel a ngelekam, el Jose, elmle eua rekil, a mililil ngii ma bechik. Me te kadereuakl e kmal ungil a rengrir el terung, e ngkal ngelekel a ngelekam a mle oker, “Chedil, ng betik a rengum er ngak?”
Ng mle onger, “Ochoi, e Jose, Ng betik a renguk er kau.”
Eng lmuut loker ra tara ker: “Ke mekerang e medengei el uase ng betik a rengum er ngak?”
Ng milsaod aikel lomelchesiu el kirel e silbedii ra ikel rokui el bla lruul el mo er ngii ma ikel lomdasou a mo meruul el kirel.
A uriul a bechik a mle oker ra Jose a osisiu el ker, luldimukl er tial meringel el ker: “Ke mekerang e medengei el uase ng betik a rengum er ngak?”
Ng kmal mle blak a rengul longer ngii, el kmo, “Ng betik a renguk er kau le ak omelchesiu er ngii ra renguk.” A beltik el reng ra Jose el mora delal mechas a ochotii el kmo a beltik el reng a uldimukl ra omeruul ma dmolech el domelchesiu el ngii el reng.
A King Benjamin a mle olisechakl, “Chelechang, a kmal louchais er kemiu aikal tekoi me kom subii; el kmo sel mosiou er a rebebil er a rechad e ko mesiou el mora Dios.”
Chelechal beluulechad el klou a chelebuul ra kakerous el teletael, e ng sebeched el di text lobengkel a kekerei el siasing ma tekoi ra chelsel malechub e dochotii a siasing ma tekoi el “Betik a renguk e rkau” a ungil e klou a belkul. E ng betok er kid a kired el mo mechei a rua dengua er kid e, tuobed el mo, olngeseu er tirkel ngesool. A beltik el reng el diak ra omeruul a di uai a klaumerang el diak ra omeruul; ng diak loureor.
A Beltik el reng A Osubes
A mui el beltik el reng ra Kristo, el blechoel el beltik el reng, a diak eldi relid el mo ngara omeruul ma omesiou ng dirrek el meskid a klisiched el mo ousubes, el diak el iior er a tellemall. Msall e kuchais er kemiu ra teletael el kmal klou a le ngildechii ra klengar ngak. A Ted ma Sharon, delal ma demal a Cooper, a mla meskak a kengei louchais ra teletael el dilubech el mora telungalek er tir ra kmeed el etui el rak ra memong. A kuchais er tial teletael el ua ak Ted, el demal a Cooper:
Ng mle August 21, 2008, e mle kot el sils ra skuul, e a tedei el obekul a Cooper ra, Ivan, Garrett, ma Logan, a mlara basio ra bas el mengiil mo ngmasech ra bas. A Cooper, el mle eua rekil a mlara rrat er ngii; e a bechik, ra Sharon, a di merael.
A bechik a mlara bital rael e olechau ra Cooper me bol iull ra bitang. Osisiu el taem, a mlai a mekekokil touchakl e subechii ra Cooper.
Ak ngluu okedong ra retonari el kmo a Cooper a mla merot ra mlai. A kulereched el mor tial basio ra bas el mo omes er ngii. A Cooper a milchiuaiu el dengarch ra bebul a chudel, el meringel er ngii outeliil, e diak a telemall el deues ra bedengel.
Ak mlo terrob ra bita ra Cooper e melekoi el melisiich ra rengul el kmo “Ng di mo UNGIL besul. Msisichii a rengum.” Osisiu el taem ea oungerachel ra chelechad ra ngarbab el prist, el Nathan, a mlei ngii ma bechil. A bechil a millekoi el kmo ki bsang a Cooper a klengeltengat ra priesthood. Aki ngilai chimomam e locha ra bdelul a Cooper. Ak diak kudengei ak dilung er tial klengeltengat, e ng a kmal medengelterir a rebebil ra rechad el mle iliuekl er kemam, e tiakid el taem ak mocha medengei el kmo a Cooper a diak el sobel.
A Cooper a mla helicopter el mora ospitar eng di, ng dimlak, el sobel. Ak mlo omelchesiu ra Chedam ra Babeluades el melekoi er ngak el kmo a ngerchelek el mora Cooper er tial beluulechad a mla mo merek e chelechang ea Cooper a Obengkel.
Ng mlarngii a temam lobengkel a Cooper ra ospitar. A roureor a kidlmeklii meng sebecham lobengkel e melmesumech er ngii a obengkel telkib el taem, el kleuokl er ngii, el mo er sel somam el taem.
Aki merolang el mo remei, e a bechik el kmal mekngit a rengul me ngak a mocha mesaod ra ngkel chad lulmekall ra mlai. Ng dimlak ki modengelii, e di kiei ra bita er kemam ra osisiu el ward el ki mngarngii.
A bol kukuk e ng kmal mle meringel er kemam le ki meral mlara klou el klengit el reng. Ak mlo outubaruach e meluluuch el meral blak a renguk el meluluuch el diak el uai a ngaramong. Ak mle olengit ra Chedam ra Babeluades lokiu a ngklel a Osobel me lenguu tial oberaod el klengit el reng. E Ngii a ngiluu.
A uriul er tial osisiu el sils a tara counselor ra stake presidency a kildmeklii a taem el bo kim kebetech kemam me ngika el ngeasek el buik—el mle omekall ra mlai—ma rechad ra blil er a blil ngkal counselor. Sera lobok a chesimer, eng mle ketengam el kaseues. A bisop er ngak a milngelulau er ngak el kmo, “Morael bedul ngii.” A Sharon me ngak a milchulii ma ki mle kaiuechull el rokui. Aki mlo kaidelengelangel el mle kemanget el taem. Aki silbedii el kmo a dilubech el teletael a kmal meral mle aksident.
Ng mle ongasireng el teletael el mora Sharon me ngak, el di mle diul omelchesiu el uaisei. Okiu a chubechub ra Dios, eng mlo sebecham el ngiltii a melemalt el rael, di chimol rael, e mo betik a rengmam ra ngkal ngeasek el chad.
Aki kmal mla mo ungil kaodengei ma telungalek er ngii ra ikal mereko el rak. Ng mla ouchais er kemam a meklou el tekoi el mla dubech ra klengar ngii. Aki dirrek el mora templo lobengkel ra longedmokl er ngii el mora mission.
Rodam me a rodos, a Ted a kmal ungil medengei el kmo a Chedam ra Babeluades a betik a rengul er kemam. Ngii a medengei el kmo sel dousubes, e mo mecherei a berraod, a kmal klebokel el di uai a lulsubes er kid. Tial klebokel el teletael a mei lokiu okesiu er ngikel ngarbab el Okesiu. Chelsel a Babier er a Mormon, e a Alma ouchais el kirel Osobel el kmo, “Ngii a mo chemol, a ringel ma ongarm ma ongetikaik el bek bedengel; ma rokui el tekoi bol mekedmokl el kmo ngii a mo chemol a ringel ma secherir a rechedal.”
Rodam ma rodos, tia kid a meral ungil cheldecheduch ra meral beltik el reng ma klausubes. Osisiu, e kid, a sebeched el metik er a deureng sel dosiou e dousubes ra rebebil. A Gregory, tara ngelekel a ngelekam, a belchoel melekoi el kmo, “Kid kede uangerang el telungalek?” E di ngii longer el kmo, “Kid a ngara deureng el telunaglek!”
A President Thomas S. Monson a mla mellach er kid, el kmo: “Bo domes a klengar kid e bol blak a rengud el mo oltirakl okesiu ra Osobel el mo bekokeuii, chubechub, e dou beltik el reng.”
Ak medengei el kmo a Chedam ra Bebeluades ma Ngelekel, el Jesus Kristo, a betik a rengrir er kid e sorir el lolngeseu er kid el mo ngara omeruul sel dou beltik el reng el mora rebebil el uai Tir el betik a rengrir e rkid. Ak medengei el kmo sel dosiou e dousubes ra rebebil loba meral beltik el reng, e kid a sebeched el mesumech a rengud e ngmai a klisiich el mo mesisiich ra ikel ongarm el me rekid. Aikang a kulekoi el ngara ngklel a Jesus Kristo, amen.