A Ouchel Reng a Blechoel Lungil
Sel taem el domakes er a rael er a ouchel reng, e kede oleker er a mengikiid el klisichel Osobel el mera klengar er kid.
Sesel rak ra mla memong, ea President Gordon B. Hinckley a mlo omes er a klekool ra football er a daingak. Ng mla er sei el mo ouchais el mor tial seked el tial okedecheraol a mo mengkeklii a meketeketa el coach, el di kmedung mo merek ra ngerchelel. Tial chelechad ra klekool a mle blak a rengrir el sorir el mo kats el kirel a coach er tir. A bol merek a tedobech er tial klekool ea President Hingckley a blo lolengit er ngii el mora delmerab er tir el mo meleko sesel tekoi el melisiich a rengrir. Tial tekoi a rirtechii a rengrir me te mlo ousekool e mokats.
Chelechal sils, e ak mo mengedecheduch er tirkel locha simbai el diak el bol kats er a klechad. A klemerang, a kmo, kid el rokui a “mla ruebet ra klengit, me te mlo cheroid er a klebkellel a Dios.” Altang te ngarngii a re di kats er a klekool, ng diak el uaisei er tial klengar. Engdi a kuuchais el kmo a Osobel el Jesus Kristo a rirelii a cherrungel el Tngakireng e milskid a sengk er a ouchelreng—el roled el lemuut el mora cherrungel el omekellomes el urunguled e kats er tial klengar.
Ouchel Reng a Meskid a Deureng
Ke de blechoel lomdasu er a ouchel reng klengitelreng. Engdi uldesuel a Rubak a uldasu er a deureng, e diak el klengitelreng! A ouchel reng a kiderid e ngosukid. Ng klengit a meskid a klengitelreng. A ouchel reng a tungeled el tuobed! El Elder D. Todd Christofferson a mileketeklii: “Sel lak a ouchel reng, eng diak de ngoriakl malechub e bo dungil er a klengar. … Ng kmal di oikiu a Ouchel reng e kede nguu sel krasia er a Jesus Kristo e losebelid. A ouchel reng … a mekrolid el mo mimokl, klou a rengud, e budech.” A klemechek el mora rokui—tokuni a re ngeasek—a kmo a ouchel reng a ungil tekoi.
Sel dosaod er a ouchel reng, eng diak di dosaod er a moungil er a blakelreng el meruul er kid el moungil. A meral ouchel reng a diak el dil tiaikid—ngii a mukdubech lokiu a klaumerang er a Rubak el Jesus Kristo me a klisichel el mo ousubes a kngtid. El ulsisecheklid a Elder Dale G. Renlund, “A lak a Olsobel, … ea ouchel reng a diak a belkul ng kuk di melodech a blekeradel.” Ng sebeched el di kid e ngmodeh a blekerdeled, ng di tal Osobel a sebechel nguubet a cheiisch e kmider a chelngeled, e ngosukid el mo er sel rael er a blekongesenges loba kllou el reng me a klisiich. A deureng er a ouchel reng a lmuut el ngarbab er a deureng er a ungil klengar. Ng deureng er a klausubes, er a lmuut el mo beches, me a merael el mo kmeed er a Dios. Sel tal omnguu tial deureng, eng diak a ngariou er tiang el mo soam.
A meral ouchel reng a rullid el mo tibir el mo bekongesenges—ngmo telbiled, lomuchel er a techolbchelid e omekbeches er a bek el sandei er a belsilel a Rubak, el chedaol belsoil. Seikid a bodenguu a yaksok el kmo ng sebeched el “blechoel loba Reng er ngii el mo [obengked],” lobengkel a ikel rokui el deureng me a budech el ngii a mei lokiu Ngii el blechoel lobengked. Tiaikid a rdechel a ouchelreng, e tiaikid a rulii me a ouchel reng a deureng!
A Ouchel Reng Obengkel a Blakelreng
Ng meral soak sel cheldechedechal a ririid el ngalek.Ngarngii a dolchesuar er sel klou a belkul el taem er se er ngikal ririid “bo lolchesuaer er ngii.” El dengchokl ra blil a babii, e oureng omko “meng sebechel mekekii a delel er a ikal kelel a babii,” ng mocha medengei el kmo ngmla okngemed er a diak a belkul a daisang ma klengar er ngii el dirrek. Ngoumerang el kmo a demal a lmuut el nguu—a lak el bol ngelekel e alta eng mo mesiungel—ng tilbir el mo mecherei a blekerdelel el ulemtok e mocha remei.
Ak blechoel lomdasu er sel omerolel kngal ngalek el mo remei. Ngarngii a ta el blol omengbangl e omdasu, “Ng kol uangera bo lomukai er ngak a Demak?” Altang liluut lomakes el telkib el bedul a babii. Ko momdasu er tial cheldecheduch el kmal mo ngodech alsekum meng mle kimer. Engdi a klaumerang a rirelii meng di milrael, mea klaumerang a luleba demal meng di mad el tmuil el mengiil el klou a rengul, el mo er sel sils:
“Ng dirk mle cheroid er a blai, ea demal a mesang, meng kmal mlo chubur, meng rirurt el mong el mechulii ngiil ngelekel, e turengur a medal.
“Ma ngelekel a dula el kmo, Chedam, ak mla mor a klengit el omtok er kau ma Dios; meng dikea, le kirek el okedongall el ngelekem.
“E a lechub a demal a ulemekedong er a re mesiungel, Mguu sel kot el ungil bail el mei e bilii, e mlia kebkab er a chimal e motuu a oeacher er ochil: …
“Ele ngikal ngelekek a mlad, e mla lmuut el me chad, ng ririid, e kede mla metik er ngii.”
Ouchel reng a Mo er a Rokui el Chad
Rodam me a rodos, ke de rokui el ririid. Ng kired el mo “melchesuar er kid”—el kirel betok er a tang—e ngiltii sel rael el ngoikid el lemuut el mo remei. Tia omelilt el doruul er ngii ra bek el sils, er a klengar er kid el rokir.
Ke de blechoel el omkesiu a ouchel reng er a meringel klengit lousbech a “meringel bult.” Eng di a ouchel reng a mora rokui el chad—tirkel ngara “ngodech el rael e [mla] remiid” metirkel tir a “a mla soiseb er [a] melemalt e ibutek el rael” e chelecha e te ousbech el “merael bedul medal.” A ouchel reng a ngoikid el mora meral rael e orreked er kid meke er di ngarngii. Ng mo er tirkel mocha omuchel loumerang, tirkel dimla oumerang, me tirkel tir a kirir el lmuut lomuchel el mo oumerang. El ulelsisechakl a Elder David A. Bednar: “A rebetok er kid a ungil medengei el kmo a Tngakireng a mora rengarngii a kngterir, ng diak sal loumerang, el kmo, kede medenge el kmo a Tngakireng a mora re santo—el mora rungil chad me a redil el tir a olengesenges, klikiid, e … melasem el mengai el mo ungil.”
Ak dirk mlo oldingel er a basio er a re mo missionary er a lekerd a rebeches el missionary. Ng rirtechii a renguch er a kumes er tir e metebengii a llomes er a mederir. Te ungil osengir e ungil a rengrir e semeriar. Seikid eng mle rengak a uldasu: “Te mla chormii a klaumerang el soiseb er a chouchel reng. Tiakid a uchul mete mui er a deureng me a omengiil.”
Ng diak du el mko te mle mui er a meringel el klengit er ngara mong, eng di ak kumdasu e te mle medengelii a tetelel ouchelreng; te mla subii a ouchelreng el ungil, me te mle kldmokl e semeriar el mo omerk er tial klumech er a deureng el mora beluulechad.
Tiaikid a duubech sel bo dolchesiu ra deureng er a ouchelreng. Kamomes er sel okesiul a Enos. Ng dirrek el mlarngii sel taem eng mlo “melchesuar er ngii,” ma uriul er a “le mengubet a kngtil,” ea rengul a di mle mereched el mo chemau a mo klungiolir a rebebil. A Enos a chilitii a klengar er ngii loleker ra rokui el chad el mo ouchel a rengrir a mo “oldeu el kirel el kuk ngarbab er a tekingel a beluulechad.” A ouchel reng a rulii tiaikid; ng meltii a rengud el bedul a rebebil er kid, e le kedemedengei el kmo a deureng el domelchesiu er ngii a kirel mora rokui el chad.
Ouchel reng a Dolemolem Losiik er Ngii er tial Klengar
Ng ngarngii a sechelik el mlukeroul er a telungalek er a Uriul-klebesei el Santo el dimlak lomais el ngara ikelesia. Sera le kekerel chad, eng dirrek el mlo “melchesuar er ngii” e tilbir el mo mengedmokl er ngii el mo missionary.
Ng kmal mle ungil el missionari. Sera ulebongel sils el lorolung el moremei, e a mission president a mle mengedecheduch er ngii e ulengit er ngii me lochotii a klaumerang er ngii. Meng rirelii, uruil er a le kebechull loumekikngit el reng, e a president a dilu el kmo, “Elder, kau a sebechem lobes ma lechub e ke otngakl a rokui el kau a mla ouchais er a di chelsel a sesel buil alsekum eng diak molemolem el meruul aikel tekoi el melisiich er a klaumerang er kau er sera kot luchul.”
A uriul ea sechelik a dilu er ngak el kmo ng meluluuch e menguiu a chedaol llechukl er a bek el sils er sera lemei el ngara mission. Meng blechoel el “mukeroul er a ungil tekingel a Dios” el mla orkedii er a “chelsel a meral rael.”
Kemiu el mengedmokl er kemiu el mo missionary me kemiu el merma remei, mnguu tial suobel! A nguu a klaumerang a diak el selebch, ng kirem el mengedmokl e melisiich er ngii. El rokui el mssionary a medengei, sel bo merek el melolk er a rrat, eng meriou, malsekum me ke mo merek el melisiich er a klaumerang er kau, eng mo mechitechut. Tial osisiu el osisechakl a dirrek el osisiu el mora ouchel reng—ke de meruul er ngii er tial klengar er kid el rokir, el diak el dil-ta-el taem el merkong.
Mo er tirke losiik a klausubes—ngeseasek, mesobil el mekekerel chad, chedam ma chedil, chedam el rubak ma chedam el mechas, oi, ma dirrek el rulmechell ra redelad ma redemad—ak kuleker er kemiu el me bemrei. Chelechang temed lomuchel. Lak becherei tial sils er kau er a chouchel reng.
Mesel, tal om tibir el rulii, e molemolem loltirakl er tial rael. A Demad a mengiil, el soal melai er kau. A chimal a blerk “el tal sils” el kirem. Ng klou obomnguu er ngii ririul.
Ka molatk a ikal tekingel a Nephi: “Misei ng kiriu el loutekangel di merael mo ruchei el mla tibir a rengum el kirel a Kristo, e bleketakl ongilem, me a beltikelreng el mo er a rokui el chad. Malsekum, e ko moutekangel merael mo ruchei el di urrekodel, er a tekingel a Kristo, e outkangel mo er a ulebongel, ea Edam a dilung el kmo: Ko mo nguu a diak a ulebengelel klengar.”
Sel bebil ea omerael a ual kemangel—ng diak el ngerang, ng rael el bedul a diak a ulebengelel klengar. Engdi tia sebechel mui ra deureng lomerael alsekum kede oltirakl er ngii loba klaumera er a Jesus Kristo e oureng lokiu a Tngakireng er Ngii. A kuuchais el kmo seikid el taem el domakes ra rael er a ouchelreng, e kede siotai er a mengikiid el klisichel Osobel el mera klengar er kid. Tial klisiich a mo melisiich er kid, mok a uldesued, e smisichid er a blakelreng er kid el merael bedul uchei, lokiu a bek el blekeklel, el mo er sel klebokel el sils el bocha derei er a blid ra babeluades e rongesii a Demad er a Babeluades el melekoi el merkid el kmo “Ng kma lungil.” El ngara ngklel a Jesus Kristo, amen.