Givhan
Bae yumi stat yusum wan niu mo moa tabu wei blong kea mo givhan long ol narawan.
Tangkyu long Elda Gong mo Elda Soares from hat we i talemaot fet blong yutufala. Mifala i talem tangkyu long yutufala mo dia kompanion blong yutufala.
Ol dia brata mo sista. Oltaem yumi stap lukaot blong Lod i lidim yumi long hao yumi save helpem ol memba blong yumi blong obei long ol komanmen blong God, speseli tufala bigfala komanmen ia, blong lavem God mo ol neiba.
Blong plante manis, mifala i bin stap lukluk long wan moa gud wei blong givhan long ol nid long saed blong spirit mo laef blong ol pipol blong yumi, long wei blong Sevya.
Mifala i disaed blong tekemaot hom tijing mo visiting tijing olsem we yumi save long hem. Be, yumi riplesem mo stat yusum wetem wan niu mo moa tabu wei blong kea mo givhan long ol narawan. Bae yumi singaotem ol wok ia, i simpol, i “givhan.”
Wei blong givhan we i wok, i posibol tru long presen blong ol sista, mo tru long bigfala paoa blong prishud. Yumi evriwan i nidim kaen proteksen olsem blong fesem ol waes trik blong enemi.
Elda Jeffrey R. Hollandblong Kworom blong Olgeta Twelef Aposol, mo Sista Jean B. Bingham, Jeneral Presiden blong Rilif Sosaeti, bambae oli eksplenem hao ol brata blong prishud mo ol sista blong Rilif Sosaeti mo ol Yang Woman we oli givim wok long olgeta, bambae wok folem blong givim seves mo lukaotem ol memba blong Jos raon long wol.
Fas Presidensi mo olgeta Twelef Aposol oli agri fulwan blong sapotem mesej blong tufala. Wetem tangkyu mo wetem prea, yumi stap openem niufala japta ia long histri blong Jos. Long nem blong Jisas Kraes, amen.