E mā’iti na ’outou i teie nei mahana
Te rahi o tō tātou ’oa’oa mure ’ore, tei te huru ïa tā tātou mā’itira’a i te Atua ora ’e te ’āmuira’a iāna i roto i tāna ’ohipa.
Te hōho’a Mary Poppins, nō ni’a ïa i te hō’ē hi’i peretāne—e vahine manamana ato’a.1 Nā te maoa’e e pūhi iāna i te ’utuāfare Banks ra, i te vāhi ra 17 Cherry Tree Lane, i Edwardian (Lonedona). E ha’apa’o ’oia i nā tamari’i ra, ’o Jane rāua Michael. Ma te ’eta’eta ’e te hāmani maita’i ho’i, e ha’amata ’oia i te ha’api’i ia rāua ma te tahi ri’i manamana.
Tē ha’api’i maita’i ra Jane ’e Michael, fa’aoti a’era Mary ’ua tae i te taime nō te reva i te tahi atu vāhi. I roto i te ha’uti ta’ata ora, e tāmata tōna hoa ’o Bert, te tāmā ha’apūpūra’a auahi (cheminée), i te fa’ataui i tōna mana’o. E nā ’ō ’oia : « E tamari’i maita’i ho’i rāua, e Mary. »
E pāhono mai Mary : « ’Ia mana’o pa’i ’oe, e fa’a’ohipa rahi ïa vau ’āhani e ’ere rāua i te tamari’i maita’i ? E’ita pa’i tā’u e nehenehe e tauturu mai te peu e’ita rāua e fāri’i, ’aita ho’i e ta’ata fifi a’e ’ia ha’api’i maori rā te tama ’ua ’ite i te mau mea ato’a ».
E ui Bert : « E aha ïa ? »
E parau ïa Mary : « Nā rāua iho e rave i tō muri iho ».2
Te mau taea’e ’e te mau tuahine, mai ia Jane ’e Michael Banks tātou, e mau « tamari’i maita’i » e tano te fa’a’ohipa-rahi-ra’a. ’Ua hina’aro tō tātou Metua i te Ao ra ’ia tauturu ia tātou ’e ’ia ha’amaita’i ia tātou, ’aita rā tātou e vaiiho tāmau nei iāna ’ia nā reira. I te tahi taime, mai te huru ē, ’ua ’ite tātou i te mau mea ato’a. Tītauhia ïa nā tātou iho e rave i « tō muri iho ». Nō reira tātou i tae mai ai i te fenua nei nā te fare i te ra’i ra, hou te tāhuti nei. Te mea i « muri iho », e mau mā’itira’a ïa.
Te fā o te Metua i te Ao ra i ni’a tōna ti’ara’a metua, e ’ere ïa i te fa’aravera’a i tāna mau tamari’i i te maita’i ; ’o te fa’amā’itira’a ia rātou ’ia rave i te maita’i ’e ’ia riro mai iāna te huru i te hope’a. ’Ua hina’aro noa ’oia ’ia ha’apa’o tātou ra, e fa’a’ohipa ïa ’oia i te mau utu’a maita’i ’e te mau utu’a ’ino nō te fa’ataui i tā tātou mau haere’a.
’Aita rā te Atua e ’ana’anatae ra i te fa’arirora’a i tāna mau tamari’i ’ei « ’ūrī’» rata ’e te fa’aro’o, ’o tē ’ore e ’amu i tōna tia’a i te faeara’a tiretiera ra.3 ’Aita, ’ua hina’aro te Atua i tāna mau tamari’i ’ia pa’ari i te pae vārua ’e ’ia ’āmui iāna i roto i te ’ohipa a te ’utuāfare.
’Ua ha’amau te Atua i te hō’ē fa’anahora’a e ti’a ai ia tātou ’ia riro ’ei ta’ata ’āi’a i roto i tōna bāsileia, e ’ē’a nō te fafaura’a e arata’i atu i te rirora’a mai iāna ra, i te orara’a mai tāna ra, nō te ora a muri noa atu ’ei ’utuāfare i mua i tōna aro.4 I terā tau ’e i teienei—’o te mā’itira’a a te ta’ata hō’ē te tuha’a tumu o taua fa’anahora’a ra, ’o tā tātou i ha’api’i hou te tāhuti nei. ’Ua fāri’i tātou i te reira ’e ’ua mā’iti tātou e haere mai i te fenua nei.
Nō te ha’apāpū ē, e fa’a’ohipa mau tātou i te fa’aro’o ’e e ha’api’i tātou i te fa’a’ohipa tano i tō tātou ti’amāra’a ’ia mā’iti, ’ua tu’uhia hō’ē pāruru ’aramoinara’a i ni’a i tō tātou ferurira’a, ’eiaha tātou ’ia ha’amana’o i te fa’anahora’a a te Atua. ’Āhani ’aita te pāruru, e’ita ïa te mau ’ōpuara’a a te Atua e tupu inaha e’ita atura e ti’a ia tātou ’ia haere i mua ’e ’ia riro ’ei ta’ata ’āi’a ti’aturihia mai tāna i hina’aro nō tātou.
’Ua nā ’ō te peropheta Lehi : « Nō reira i fa’ati’a ai te Fatu, te Atua, ’ia rave te ta’ata mai te au i tōna iho hina’aro. ’E ’aita e ti’a i te ta’ata ’ia rave mai te au i tōna hina’aro, maori rā e arata’ihia ’oia e te tahi ’e te tahi ».5 I te tumu mau, tē vai nei terā pae e ti’a nei Iesu Mesia, te Fānau tahi a te Metua. I te tahi atu pae, tē vai nei ïa ’o Sātane, ’o Lucifero, ’o tē hina’aro i te ha’amou i te ti’amāra’a ’ia mā’iti ’e e haru mai i te mana.6
Ia Iesu Mesia ra, « e ti’a [ïa] tō tātou tei ’ō i te Metua ra ».7 I muri mai i tāna tusia tāra’ehara, ’ua « reva [Iesu]… i ni’a i te ao ra… [’e ’ua] ani i te Metua i tōna mana au, e aroha mai ai ’oia i te mau tamari’i a te ta’ata nei. » ’E nō tōna anira’a i te mana au nō te aroha, « tē ārai ra ’oia i te parau a te tamari’i a te ta’ata nei ».8
E ’ere te āraira’a a te Mesia nō tātou i mua i te Metua i te ’ohipa pāto’i. E’ita Iesu Mesia, tei fāri’i ’ia horomi’ihia tōna hina’aro i te hina’aro o te Metua,9 e pa’epa’e i te hō’ē noa atu mea maori rā te mea tā te Metua i hina’aro noa na. Tē ’oa’oa nei ’e tē pōpō nei te Metua i te Ao ra i tā tātou mau manuiara’a, ’aita e fē’a’ara’a i te reira.
Hō’ē tumu e ārai te Mesia nō tātou, ’oia ho’i, ’ia ha’amana’o a’e tātou ē, ’ua ’aufau ’oia nō tā tātou mau hara ’e ’aita e ta’ata ’aita i roto i te aroha o te Atua.10 Rātou e ti’aturi ia Iesu Mesia, e tātarahapa, e bāpetizohia ’e e tāpe’a māite ē tae noa atu i te hope’a—’ohipa ho’i e arata’i i te fa’afaitera’a11—e fa’a’ore ïa te Fa’aora i te hara, e fa’aora ho’i i te māuiui ’e e ārai ho’i nō rātou. ’O ’oia te tauturu, te tāmarū ’e te āraivavao nō tātou—nāna e ha’apāpū ’e e raupe’a (garantir) i tā tātou fa’afaitera’a ’e te Atua.12
I te tahi roa pae, ’o Lucifero ïa te fa’ahapa ’aore rā te ’auvaha ture. ’Ua fa’a’ite Ioane te Heheu parau i te pau hope’a o Lucifero : « ’E fa’aro’o atura vau i te hō’ē reo rahi i ni’a i te ra’i, i te nā-’ō-ra’a ē, Teie mai nei te ora, ’e te pūai, ’e te bāsileia o tō tātou Atua, ’e te mana o tāna ra Mesia » Nō te aha ? « ’Ua hurihia ho’i te tihotiho i tō tātou mau taea’e i raro, ’o tei tihotiho ia rātou i mua i te aro o tō tātou Atua i te ru’i ’e te ao. Pohe atura rā ’oia ia rātou i te toto o te Ārenio, ’e i te parau tā rātou i fa’a’ite ra ».13
’O Lucifero te fa’ahapa. ’Ua parau pāto’i ’oia ia tātou i te orara’a hou teie orara’a, ’e tē tāmau nei ’oia i te fa’ahapa ia tātou i roto i teie orara’a. Tē ’imi nei ’oia ’ia ’ume ia tātou i raro. Tē hina’aro nei ’oia ’ia ’oto noa tātou ē a muri noa atu. ’O ’ōna tē parau noa nei ia tātou ’aita e haere ia tātou, ’aita tātou i nava’i i te maita’i, ’aita e rāve’a fa’aora ’ia hape tātou. ’O ’oia te hāmani ’ino rahi roa, nāna e ta’ahi ia tātou i te taime tei raro tātou.
’Āhani tē ha’api’i ra Lucifero i te hō’ē tama ’ia haere ’e ’ua marua ’oia, e tuhi ïa ’oia i terā tama ma te fa’autu’a ’e ma te parau atu ē, faufa’a ’ore e tāmata fa’ahou ā. I te rāve’a a Lucifero, e tae mai te mana’o paruparu ’e te tapineva—i te hope’a ’e pauroa te taime. ’O teie metua nō te ha’avare te ’āfa’ifa’i ha’avare rahi hope14 ’e tē ha’a patatoa (rusé) nei ’oia nō te ha’avare ’e nō te fa’a’ōnevaneva ia tātou, « nō te mea tē tītau nei ’oia ’ia ro’ohia te ta’ata i te ’ati mai iāna ihora ».15
’Āhani tē ha’api’i ra te Mesia i te hō’ē tama ’ia haere ’e ’ua marua ’oia, e tauturu ïa ’oia i terā tama ’ia ti’a mai ma te fa’aitoito ’ia haere ā.16 ’O te Mesia te tauturu ’e te tāmarū. I tāna rāve’a e tae mai te ’oa’oa ’e te tīa’i māite—i te hope’a ’e pauroa te taime.
E mau arata’ira’a e vai ra i roto i te fa’anahora’a a te Atua, tei parauhia i roto i te mau pāpa’ira’a mo’a, te mau fa’auera’a. E ’ere teie mau fa’auera’a i te mana’o topa noa mai ’aore rā te tahi noa pu’e ture e fa’ahepo nō te ha’api’i ia tātou ’ia ha’apa’o. ’Ua tū’ati te reira i te fa’atupura’a i te hīro’a paieti ’e te ho’ira’a i tō tātou Metua i te Ao ra ’e te fāri’ira’a i te ’oa’oa vai maoro. E ’ere te ha’apa’ora’a i tāna mau fa’auera’a i te ha’apa’o-matapō-ra’a ; ’ua ’ite tātou ’e ’ua mā’iti tātou i tōna ’ē’a ho’ira’a. Hō’ē ā hōho’a fa’anahora’a nō tātou ’e nō ’Adamu rāua ’Eva, « ’e oti a’era te rāve’a ora i te fa’a’itehia mai e te Atua ia rāua, i hōro’a mai ai ’oia i te mau fa’aue ia rāua ra ».17 Noa atu te hina’aro o te Atua ’ia vai tātou i ni’a i te ’ē’a nō te fafaura’a, tē vaiiho nei ’oia i te ti’amā ia tātou ’ia mā’iti.
’Oia roa, tē hina’aro nei te Atua, tē tītau nei ’oia ’e tē rave nei ’oia i terā fa’aterera’a ē, nā tāna mau tamari’i tāta’itahi e mā’iti nō rātou iho. E’ita ’oia e fa’ahepo ia tātou. Nā roto i te ti’amāra’a ’ia mā’iti, tē fa’ati’a nei te Atua i tāna mau tamari’i « ’ia rave rātou i tei au i tō rātou hina’aro, ’e ’ia ’ore rātou ’ia ravehia ».18 Nā te ti’amāra’a ’ia mā’iti e fa’ati’a ia tātou ’ia mā’iti e haere i ni’a i te ’ē’a, ’aore rā ’aita. E fa’ati’a te reira ia tātou ’ia haere ’ē atu, ’aore rā ’aita. Mai te fa’ahepo-’ore-ra’a ’ia ha’apa’o, e’ita e fa’ahepohia ’ia ha’apa’o ’ore. E’ita te ta’ata e nehenehe e fa’ahaere ’ē ia tātou i te ’ē’a maori rā nā tātou e tauturu atu. (I teienei, ’eiaha tātou e ’āno’i ato’a mai ia rātou tei haru-’ē-hia te ti’amāra’a ’ia mā’iti. ’Aita rātou i rāpae i te ’ē’a ; ’o rātou tei hāmani-’ino-hia. Tei ia rātou te hāro’aro’a, te here ’e te aumihi o te Atua.)
I rāpae ana’e rā tātou i te ’ē’a, e ’oto te Atua nō te mea ’ua ’ite ’oia ē, pāpū roa i te hope’a, e arata’i te reira i te ’oa’oa iti a’e ’e i te ’erera’a i te ha’amaita’ira’a. I roto i te mau pāpa’ira’a mo’a, tē parauhia nei te haere-’ē-ra’a i te ’ē’a, te hara, ’e te ’oa’oa iti a’e ’e te ’erera’a i te ha’amaita’ira’a e tae mai, ’ua parauhia ïa te fa’autu’ara’a. Nō reira, ’aita te Atua e fa’autu’a nei ia tātou ; e fa’ahope’ara’a te fa’autu’ara’a nō tā tātou iho mau mā’itira’a, ’eiaha tāna.
’Ia ’ite tātou ē tei rāpae tātou i te ’ē’a, e nehenehe tā tātou e fa’aea i rāpae, ’aore rā, maoti te tāra’ehara a Iesu Mesia, e nehenehe tātou e mā’iti ’ia ho’i i muri ’e ’ia ho’i mai i ni’a i te ’ē’a. I roto i te mau pāpa’ira’a mo’a, tē parauhia nei te fa’aotira’a e taui ’e e ho’i mai i ni’a i te ’ē’a, te tātarahapara’a. ’Ia ’ore tātou e tātarahapa, te aura’a ra, tē mā’iti nei tātou ’eiaha e fa’ati’a ia tātou iho i te mau ha’amaita’ira’a tā te Atua i hina’aro e hōro’a mai. Mai te peu « ’aore [tātou] i fa’ati’a i te ’oa’oa i te mea i ti’a na ia [tātou] ’ia fāri’i », e ho’i ïa tātou « i tō [tātou] iho vāhi, ’ia ’oa’oa i te reira mea ’o tē ti’ahia e [tātou] ’ia fāri’i »19—tā tātou mā’itira’a, ’eiaha tā te Atua.
Noa atu ā te maoro tātou i rāpae i te ’ē’a, noa atu ā te ātea ’ē tātou i te ’ōverera’a, i te taime tātou e fa’aoti e taui, e tauturu mai te Atua ia tātou ’ia ho’i mai.20 I te hi’ora’a a te Atua, ’ia ho’i mai tātou i ni’a i te ’ē’a nā roto i te tātarahapara’a ’e te haere-ti’a-ra’a i mua i te ti’a-māite-ra’a i te Mesia, mai te huru ra ïa, ’aita tātou i rāpae a’enei.21 ’Ua ’aufau te Fa’aora nō tā tātou mau hara ’e ’ua fa’aora ho’i ia tātou i te fa’aitira’a ’oa’oa ’e te fa’aitira’a ha’amaita’ira’a i mua ia tātou. ’O te fa’a’orera’a hara ïa i roto i te mau pāpa’ira’a mo’a. I muri iho i te bāpetizora’a, e he’e pauroa te mau melo i rāpae i te ’ē’a—tē vai ra e ’ōu’a roa atu. Nō reira, e ’ere te fa’a’ohipara’a i te fa’aro’o ia Iesu Mesia,’e te tātarahapara’a, ’e te fāri’ira’a i tōna tauturu ’e te noa’ara’a te fa’a’orera’a hara, i te ’ohipa nō te hō’ē noa taime, nō te orara’a tā’āto’a rā, e ’ohipa nā ni’a iho noa, fa’ahou ’e fa’ahou ā. Mai te reira ïa tātou e « tāpe’a noa ē tae noa atu i te hope’a ».22
Tītauhia ’ia mā’iti ’o vai tā tātou e tāvini.23 Te rahi o tō tātou ’oa’oa mure ’ore, tei te huru ïa tā tātou mā’itira’a i te Atua ora ’e te ’āmuira’a iāna i roto i tāna ’ohipa. ’Ia tūtava tātou iho i te rave i « tō muri iho », tē ha’api’ipi’i ra ïa tātou i te fa’a’ohipa tano i tō tātou ti’amāra’a ’ia mā’iti. Mai te parau a nā peresideni rahi tahito e piti o te Sōtaiete Tauturu : « ’Eiaha na tātou ‘mai te pēpe e tītau noa i te fa’anā ’e te a’o pauroa te taime’ ».24 ’Aita, ’ua hina’aro te Atua ’ia riro tātou ’ei ta’ata pa’ari ma te mana’o pa’ari, ’e ’ia fa’atere tātou ia tātou iho.
’O te mā’itira’a ’ia pe’e i te fa’anahora’a a te Metua te rāve’a hō’ē noa nō te riro ’ei ta’ata ’āi’a i roto i tōna bāsileia ; i reira noa e ti’a ai iāna ’ia ti’aturi ia tātou nō te ’ore e ani i te hō’ē mea ’aore e ti’a i tōna hina’aro.25 ’Ia ha’amana’o rā tātou ē, « ’aita ho’i e ta’ata fifi a’e ’ia ha’api’i maori rā te tama ’ua ’ite i te mau mea ato’a ». Nō reira tītauhia ’ia vai ineine tātou ’ia ha’api’ihia i te mau haere’a a te Fatu e te Fatu iho ’e tāna mau tāvini. E nehenehe tātou e ti’aturi ē, e mau tamari’i herehia tātou e nā metua i te ra’i26 ’e ’ua tano « te fa’a’ohipa-rahi-ra’a », ’e ’ia ’ite tātou ē, e ’ere roa atu te aura’a o te parau « tātou iho » ’o « tātou ana’e ».
Mai tā te peropheta Iakoba o te Buka a Moromona i parau, tē nā reira ato’a nei au :
« ’E tenāna, ’ia ’oa’oa tō ’outou ’ā’au, ’e e ha’amana’o ē, e mea ti’amā ’outou ’ia rave noa atu i tei au i tō ’outou hina’aro—’ia rave i te ’ē’a o te pohe mure ’ore, ’e ’aore rā, i te ’ē’a o te ora mure ’ore.
« ’E teienei, e ta’u mau taea’e [’e mau tuahine] here, e fa’afaite ’outou ia ’outou iho i te hina’aro o te Atua, ’e ’eiaha i te hina’aro o te diabolo… ’ia ha’amana’o ’outou ē, i muri a’e i tō ’outou fa’afaitera’ahia i te Atua, e nā roto ïa i te aroha rahi o te Atua e fa’aorahia ai ’outou ».27
Nō reira, ’a mā’iti i te fa’aro’o i te Mesia ; ’a mā’iti i te tātarahapara’a ; ’a mā’iti ’ia bāpetizohia ’e ’ia fāri’i i te Vārua Maita’i ; ’a mā’iti ’ia fa’aineine māite nō te ’ōro’a ’e nō te rave ti’amā i te reira ; ’ā mā’iti ’ia rave i te mau fafaura’a o te hiero ’e ’ā mā’iti ’ia tāvini i te Atua ora ’e i tāna mau tamari’i. Nā tā tātou mau mā’itira’a e fa’aoti ’o vai tātou ’e ’o vai tā tātou e riro mai.
Tē fa’aoti nei au ma te fa’ahiti fa’ahope i te ha’amaita’ira’a a Iakoba : « ’E tenāna, ’ia fa’ateitei te Atua ia ’outou… mai te pohe mure ’ore ho’i nā roto i te mana o te tāra’ehara, ’ia fāri’ihia ’outou i roto i te bāsileia mure ’ore o te Atua, ’ia ’ārue ’outou iāna nā roto i te aroha o te Atua ».28 I te i’oa o Iesu Mesia, ’āmene.