Hōʼē i roto i te Mesia
Tōʼu mau hoa here i roto i te ʼohipa a te Fatu, tē tiʼaturi nei au e nehenehe tā tātou e rave maitaʼi aʼe ā ʼe ʼia maitaʼi atu ā tā tātou fāriʼiraʼa i te mau hoa ʼāpī i roto i te ʼĒkālesia.
’Ia ora na, e au mau taea’e, ’e e au mau tuahine. Mai tā mātou e parau i roto i tōʼu nei reo pōtiti i Berezilia, « Boa tarde! » Tē ’oa’oa nei au i te taera’a mai i roto i teie ʼāmuiraʼa faʼahiahia a Te ʼĒkālesia a Iesu Mesia i te Feiā Mo’a i te Mau Mahana Hopeʼa Nei i raro a’e i te fa’aterera’a a tō tātou peropheta herehia, te peresideni Russell M. Nelson. Tē maere nei au i te ha’amaita’ira’a rahi e vai nei ia tātou tāta’itahi ’ia fa’aro’o i te reo o te Fatu nā roto atu i tāna mau tāvini i ni’a i te fenua nei i teie mau mahana hope’a tā tātou e ora nei.
E mea rahi roa te mau faufaʼa natura i tōʼu nei fenua ʼāʼia i Berezilia. Te hōʼē o taua mau faufaʼa ra ’o te ʼĀnāvai tuiroʼo ïa nō Amazona, te hōʼē o te mau ʼānāvai rahi roa aʼe i te ao nei. ʼUa hāmanihia te reira e nā ʼānāvai taʼa ʼē e piti, te Solimões ʼe te Negro. Te vāhi ʼanaʼanatae, e tahe rāua to’opiti ato’a ra e rave rahi mau maile i te ātea hou te mau pape e ʼapiti ai, nō te mea e mea taʼa ʼē roa te mau haʼamataraʼa o te mau ʼānāvai, te mau tere, te mau anuvera ʼe te mau huru faʼanahoraʼa . I muri aʼe e rave rahi mau maile, e ʼāmui te mau pape i te pae hopeʼa, nō te riro ʼei hōʼē ʼānāvai taʼa ʼē i tō rāua nā tufaʼa tātaʼitahi. I muri noa mai i te ʼāpitira’a teie mau tufaʼa, e riro ai te ʼAnāvai Amazona ʼei mea pūai ’e ʼia tae anaʼe te reira i te Moana Atelenitita, e turaʼi te reira i te pape miti e au ra e ’itehia te pape ʼanāvai e rave rahi mau maile i te ātea i roto i te moana.
Mai te mau ʼānāvai Solimões ’e Negro e tahe ’āmui nei nō te faʼatupu i te ʼĀnāvai rahi nō Amazona, tē haere ʼāmui nei te mau tamariʼi a te Atua i roto i te ʼĒkālesia a Iesu Mesia nā roto mai i te mau huru oraraʼa tōtiare, te mau peu tumu, ’e te mau taʼere huru rau, nō te faʼatupu i teie autahiraʼa faʼahiahia o te Feiā Moʼa i roto i te Mesia. I te pae hopeʼa, ʼa faʼaitoito ai, ʼa pāturu ai, ʼe ʼa here ai tātou i te tahi ʼe te tahi, e ʼāmui tātou nō te haʼamau i te hōʼē pūai rahi nō te maitaʼi i roto i te ao nei. ʼEi mau ’āpeʼe nō Iesu Mesia, e tahe nei ʼei hōʼē i roto i teie nei ʼānāvai nō te maitaʼi, e nehenehe tātou e hōroʼa i te « pape ora » o te ʼevanelia i te hōʼē ao tei poʼihā.
ʼUa faʼauru te Fatu i tāna mau peropheta ʼia haʼapiʼi ia tātou e nāhea tātou e pāturu ʼe ʼia here i te tahi ʼe te tahi, ’ia nehenehe ia tātou ʼia hōʼē i roto i te faʼaroʼo ʼe te tumu i roto i te peʼeraʼa ia Iesu Mesia. Mai tā Paulo i parau, o rātou atoʼa hoʼi i « bāpetizohia i roto i te Mesia ra, ’ua ’ahu ïa i tā te Mesia ra… : hōʼē ā hoʼi ʼoutou i roto i te Mesia ra ia Iesu ».1
’Ia fafau ana’e tātou i te bāpetizoraʼa e peʼe i te Faʼaora, e faʼaʼite ïa tātou i mua i te Metua ē ʼua ineine tātou i te rave i niʼa iho ia tātou i te iʼoa o te Mesia.2 ʼA tāmata ai tātou i te tītau i tōna mau huru hanahana i roto i tō tātou oraraʼa, e riro tātou ʼei mau taʼata taʼa ʼē, nā roto i te tāraʼehara a te Mesia te Fatu, ʼe e rahi noa tō tātou here i te mau taʼata atoʼa.3 E ʼite tātou i te hōʼē mānaʼonaʼoraʼa mau nō te maitaʼi ʼe te ʼoaʼoa o te mau taʼata atoʼa. E hiʼo tātou te tahi ʼe te tahi ʼei mau taeaʼe ʼe ’ei mau tuahine, ʼei mau tamariʼi nā te Atua ma te tumu hanahana, te mau maitaʼi ’e te ʼaravihi. E hinaʼaro tātou ʼia ʼatuʼatu i te tahi ʼe te tahi ʼe ʼia amo i tā te tahi mau hōpoiʼa.4
Te reira te mea tā Paulo i fa’ata’a ʼei aroha.5 ʼUa faʼaʼite Moromona, te hōʼē peropheta nō te Buka a Moromona, i te reira mai « te hina’aro [here] mau o te Mesia »,6 ’o te hōʼē ïa huru teitei roa aʼe, te hanahana roa aʼe ʼe te pūai roa aʼe nō te aroha. ʼUa faʼaʼite iho nei tō tātou peropheta, te peresideni Russell M. Nelson, i te hōʼē faʼaʼiteraʼa nō teie here mau o te Mesia ʼei aupururaʼa, te hōʼē rāveʼa faʼatumu-aʼe-hia ʼe te moʼa roa aʼe nō te here ʼe nō te ʼatuʼatu i te tahi atu mau taʼata mai tā te Faʼaora i rave.7
E hiʼopoʼa na tātou i teie parau tumu nō te here ʼe te ’atuaturaʼa, mai tā te Faʼaora i rave, ’ia au i te parau nō te faʼaitoitoraʼa, te tautururaʼa, ʼe te pātururaʼa i te mau melo faʼafāriu-ʼāpī-hia ʼe te mau taʼata e haʼamata ra i te ʼanaʼanatae i te haere mai i tā tātou mau pureraʼa.
’Ia faʼaruʼe anaʼe teie mau hoa ʼāpī i tō te ao nei ʼe ’ia fāriʼi rātou i te ʼevanelia a Iesu Mesia, ’ia ʼāpiti mai i te ʼĒkālesia, e riro rātou ʼei mau pipi nāna, tei fānau-faʼahou-hia nā roto iāna.8 E faʼaruʼe rātou i muri i te hōʼē ao tā rātou i mātau maitaʼi ʼe ʼua māʼiti i te peʼe ia Iesu Mesia, ma tō rātou ʼāʼau atoʼa, ma te ʼāpitiraʼa i te hōʼē « ʼānāvai » ʼāpī mai te ʼĀnāvai Amazona pūai---te hōʼē ʼānāvai ’o te riro ʼei pūai itoito nō te maitaʼi ʼe te parau tiʼa ’o te tahe atu i mua i te aro o te Atua. ʼUa faʼaʼite te ʼāpōstelo Petero i te reira mai te hōʼē « uʼi māʼitihia, e autahuʼa ariʼi, e nunaʼa moʼa, e feiā hoʼohia ».9 ʼA tomo mai ai teie mau hoa ʼāpī i roto i teie ʼānāvai ʼāpī, e huru moʼemoʼe riʼi rātou i te haʼamataraʼa i roto i te hōʼē vāhi matau-ʼore-hia. E ʼite teie mau hoa ʼāpī ia rātou iho i te ʼāmuiraʼa i roto i te hōʼē ʼānāvai ’e tōna iho mau haʼamataraʼa, mau anuvera ’e mau huru fa’anahora’a---te hōʼē ʼānāvai e tāna iho mau peu tumu, te taʼere ʼe te pu’e parau. E mea huru taiā teie oraraʼa ʼāpī i roto i te Mesia nō rātou. ʼA feruri na i te hōʼē taime, e aha tō rātou huru ’ia faʼaroʼo rātou nō te taime mātāmua i te mau parau mai te « pureraʼa pō ʼutuāfare », « tōmite feiā ʼāpī a te ʼepisekōpora’a », « sābati haʼapaeraʼa māʼa », « bāpetizoraʼa nō te feiā pohe », « Sōtaiete Tauturu », « Autahuʼaraʼa a Melehizedeka », « buka toʼotoru, » ʼe te tahi atu.
E mea ʼōhie ’ia ʼite nō te aha rātou e manaʼo ai ē ʼaita rātou e taʼa nei e tei hea rātou. I roto i taua mau huru hiʼoraʼa, e ui paha rātou ia rātou iho, « e pārahiraʼa ānei tōʼu i ’ō nei ? E tano ānei au i roto i te ’Ēkālesia a Iesu Mesia i te Feiā Mo’a i te mau Mahana Hōpe’a Nei ? Tē hinaʼaro mau ra ānei te ʼĒkālesia iāʼu ? E ʼitehia ānei iā’u te mau hoa ʼāpī ’o tei ineine i te tauturu ʼe i te pāturu iāʼu ?
Tōʼu mau hoa here, i roto i taua mau taime ra, e tiʼa ia tātou ’o tē tiʼa ra i te mau vāhi huru rau i niʼa i te tere roa nō te tiʼaraʼa pipi, ’ia faʼatae i te auhoaraʼa i tō tātou mau hoa ʼāpī, ʼia fāriʼi ia rātou i te vāhi i reira rātou, ʼe ʼia tauturu, ʼia here ʼe ʼia fa’aō mai ia rātou i roto i tō tātou oraraʼa. E mau tamāroa ʼe e mau tamāhine faufaʼa rahi nā te Atua teie mau hoa ʼāpī.10 Eʼita e nehenehe ia tātou ʼia faʼatiʼa ʼia moʼe te hōʼē noa aʼe o rātou nō te mea, mai te ʼĀnāvai Amazona e turuʼi nei i niʼa i te mau ʼānāvai e faʼaʼāmu ra iāna, e hinaʼaro tātou ia rātou mai ia rātou e hinaʼaro ia tātou, nō te riro mai ’ei hō’ē pūai rahi nō te maita’i i roto i teie nei ao.
E hopoi mai tō tātou mau hoa ʼāpī i te mau tālēni tei hōroʼahia mai e te Atua, te ʼanaʼanatae rahi, ʼe te maitaʼi nā muri mai ia rātou. E nehenehe tō rātou ʼanaʼanatae rahi nō te ʼevanelia e riro ʼei maʼi peʼe, ’ei tautururaʼa ia tātou i te faʼaoraora i tō tātou iho mau ʼiteraʼa pāpū. E hopoi atoʼa mai rātou i te mau hiʼoraʼa ʼāpī i tō tātou māramarama nō te oraraʼa ʼe te ʼevanelia.
’Ua haʼapiʼi-maoro-hia tātou, nāhea tātou e tauturu i tō tātou mau hoa ʼāpī ’ia ʼite i te fāriʼi-pōpoura’a ’e te here i roto i te ’Ēkālesia a Iesu Mesia. E hinaʼaro rātou e toru mea nō te faʼaea pūai ʼe te itoito i roto i tō rātou oraraʼa :
ʼA tahi, e hinaʼaro rātou i te mau taeaʼe ʼe te mau tuahine i roto i te ʼĒkālesia tei ʼanaʼanatae mau ia rātou, te mau hoa mau ʼe te pāpū ’o tā rātou e nehenehe e fāriu tāmau atu, ’o te haere nā piha’i iho ia rātou, ʼe ’o te pāhono i tā rātou mau uiraʼa. ’Ei melo, ʼia ara ʼe ʼia ’imi noa tātou i te mau mata ʼāpī e ti’a ai, ’ia haere anaʼe tātou i te mau faʼaʼoaʼoaraʼa ʼe i te mau rururaʼa a te ʼĒkālesia, noa atu e aha tā tātou mau hōpoiʼa, mau ʼohipa, ʼaore rā mau mānaʼonaʼoraʼa. E nehenehe tātou e rave i te mau mea ʼōhie nō te tauturu i teie mau hoa ’āpī ʼia tauahihia ’e ʼia fāriʼihia i roto i te ʼĒkālesia, mai te aroha-maitaʼi-raʼa ia rātou, te ʼataʼata-māite-raʼa ia rātou, te pārahiraʼa i piha’i iho ia rātou nō te hīmene ʼe nō te haʼamori, te faʼaʼitera’a ia rātou i te tahi atu mau melo, ’e tē vai atu ra. ’A ’īriti ai tātou i tō tātou ’ā’au i tō tātou mau hoa ’āpī nā roto i te tahi o teie mau rāve’a, tē ha’a ra tātou ma te vārua nō te aupurura’a. ’Ia aupuru ana’e tātou ia rātou mai tā te Fa’aora i rave, e’ita rātou e riro ’ei « ta’ata ʼeʼē i roto i tō tātou mau ’āua ». E ’ite rātou ē e nehenehe rātou e tomo mai ’e e fa’ahoa i te mau hoa ’āpī, ’e te mea hau roa atu i te faufa’a rahi, e ’ite rātou i te here o te Fa’aora nā roto i tā tātou aupurura’a mau.
Te piti, e hinaʼaro te mau hoa ʼāpī i te hōʼē ʼohipa---te hōʼē rāveʼa nō te tāvini ia vetahi ʼē. Te tāviniraʼa ’o te hōʼē ïa o te mau ʼohipa māramarama a te ʼĒkālesia a Iesu Mesia i te Feiā Moʼa i te mau Mahana Hopeʼa nei. ’O te hō’ē fa’anahora’a i reira tō tātou faʼaroʼo e tupu pūai ai. E tiʼa i te hoa ʼāpī tātaʼitahi ʼia fāriʼi i taua haʼamaitaʼiraʼa ra. Noa atu e hōpoiʼa nā te ʼepisekōpo ʼe te ʼāpoʼoraʼa pāroita i te hōroʼa i te mau piʼiraʼa, ʼaore roa rā e mea e ’ōpani ia tātou ʼia ani i tō tātou mau hoa ʼāpī ’ia tauturu ia tātou i te tāvini ia vetahi ʼē ʼaore rā nā roto i te mau ʼōpuaraʼa tauturu.
Te toru, e ti’a roa ʼia « faʼaʼamuhia te mau hoa ʼāpī i te parau maitaʼi a te Atua ra ».11 E nehenehe tātou e tauturu ia rātou ’ia here ʼe ’ia haʼamātau ia rātou i te mau pāpaʼiraʼa moʼa ʼia taiʼo ʼe ʼia tuatāpapa anaʼe tātou i te mau haʼapiʼiraʼa ’e ’o rātou, ma te hōroʼa i te haʼamāramaramaraʼa nō niʼa i te mau ʼāʼamu ʼe te tātararaʼa i te mau tāʼo fifi. E nehenehe atoʼa tātou e haʼapiʼi ia rātou e nāhea ʼia fāriʼi i te arataʼiraʼa nā roto i te tuatāpapa-tāmau-raʼa i te pāpaʼiraʼa moʼa. Taʼa ʼē noa atu te reira, e nehenehe tā tātou e fārerei i tō tātou mau hoa ʼāpī i roto i tō rātou iho ʼutuāfare ʼe ʼia ani ia rātou ’ia haere mai i tō tātou iho ʼutuāfare i te mau taime taʼa ʼē atu i tā tātou mau hora pureraʼa ʼe te mau faʼaʼoaʼoaraʼa, ’ei tautururaʼa ia rātou ʼia ʼāmui mai i roto i te ʼānāvai pūai o te autahiraʼa o te Feiā Moʼa.
Ma te ʼiteraʼa i te mau tauiraʼa ʼe te mau tāmataraʼa e faʼaruruhia e tō tātou mau hoa ʼāpī i te riroraʼa ʼei melo nō te ʼutuāfare a te Atua, ʼei mau taeaʼe ʼe ’ei mau tuahine nō tātou, e nehenehe tātou e faʼaʼite e nāhea tō tātou haʼavīraʼa i taua iho mau tāmataraʼa ra i roto i tō tātou oraraʼa. Nā te reira e tauturu ia rātou ʼia ʼite ē eʼita rātou e tiʼa o rātou anaʼe ra ʼe e haʼamaitaʼi mai ïa te Atua ia rātou ’a faʼaʼohipa ai rātou i te faʼaroʼo i roto i tāna mau fafauraʼa.12
ʼIa ʼāpiti anaʼe na ʼānāvai Solimões ʼe Negro, e riro te ʼānāvai Amazona ʼei mea pūai ʼe te ʼūʼana. ʼOia atoʼa, ʼia hōʼē anaʼe tātou ʼe tō tātou mau hoa ʼāpī, e riro te ʼĒkālesia a Iesu Mesia ʼei mea pūai aʼe ʼe ʼei mea pāpū aʼe. ’Ua māuruuru rahi māua tōʼu hoa here ’o Rosana i te mau taʼata atoʼa tei tauturu ia māua ’ia ʼāmui mai i roto i teie ʼānāvai ʼāpī e rave rahi mau matahiti i teienei, i tō māua fāri’ira’a i te ʼevanelia a Iesu Mesia i roto i tō māua fenua ʼāi’a nō Berezilia. I roto i te roara’a o te mau matahiti, ʼua ʼaupuru mau teie mau taʼata faʼahiahia ia māua ʼe ʼua tauturu ia māua ʼia tāmau noa i te tahe i roto i te parau tiʼa. ’Ua māuruuru rahi māua ia rātou.
ʼUa ʼite maitaʼi te mau peropheta i roto i te Ao Tōʼoʼa o te Rā e nāhea ’ia tāpeʼa maitaʼi i te mau hoa ʼāpī ʼia tahe itoito ʼāmui i roto i teie ʼānāvai ʼāpī nō te maitaʼi e tae atu i te ora mure ʼore. ʼEi hiʼoraʼa, nō tōna ʼiteraʼa i tō tātou tau ʼe tōna ʼiteraʼa ē e faʼaruru tātou i teie mau huru tāmataraʼa,13 ʼua tuʼu Moroni i te tahi o taua mau taʼahiraʼa faufaʼa rahi ra i roto i tāna mau pāpaʼiraʼa i roto i te Buka a Moromona :
« ’E oti rātou i te fāri’ihia i roto i te bāpetizo, ’e i te ravehia ’e te tāmāhia ho’i nā roto i te mana o te Vārua Maita’i, ’ua ’āmuihia ïa rātou i te feiā o te ’ēkālesia a te Mesia, ’e ’ua pāpa’ihia tō rātou mau i’oa, ’ia ha’amana’ohia ’e ’ia fa’a’amuhia rātou i te parau maita’i a te Atua ra, e tāpe’ahia ai rātou i ni’a i te ’ē’a ti’a, ’e e vai noa ai rātou ’ei feiā ara i te pure ma te ti’aturi ana’e i te maita’i o te Mesia, ’o te tumu ’e te fa’aotira’a o tō rātou fa’aro’o ra.
« E ʼua ʼāmui pinepine rātou ʼia haʼapae i te māʼa, e ʼia pure, ʼe ʼia parau te tahi i te tahi i te maitaʼi o tō rātou mau vārua ».14
Tōʼu mau hoa here i roto i te ʼohipa a te Fatu, tē tiʼaturi nei au e nehenehe tā tātou e rave maitaʼi aʼe ā ʼe ʼia maitaʼi atu ā tā tātou fāriʼiraʼa i te mau hoa ʼāpī i roto i te ʼĒkālesia. Tē ani nei au ia ʼoutou ʼia feruri i te mea tā tātou e nehenehe e rave ’ia maita’i atu ā tā tātou fāriʼira’a ʼe tauturura’a ia rātou, ma te haʼamata i teie iho sābati i mua nei. ʼA ara ’ia ʼore tā ʼoutou mau tītauraʼa i roto i te ʼĒkālesia ’ia haʼafifi i te fāriʼiraʼa i te mau hoa ʼāpī i roto i te mau pureraʼa ʼe te mau ʼohiparaʼa a te ʼĒkālesia. E mea faufaʼa rahi hoʼi teie mau vārua i mua i te aro o te Atua ʼe e mea faufaʼa rahi aʼe rātou i te mau faʼanahoraʼa ʼe te mau ʼohiparaʼa. Mai te mea e ʼaupuru tātou i tō tātou mau hoa ʼāpī ma tō tātou ʼāʼau tei ’ī i te here mau mai tā te Faʼaora i rave, tē fafau atu nei au ia ʼoutou, i tōna ra iʼoa ē, e tauturu ’oia ia tātou i roto i tā tātou mau tautoʼoraʼa. ʼIa haʼa anaʼe tātou ʼei mau tāvini itoito, mai tā te Faʼaora i rave, e fāriʼi tō tātou mau hoa ʼāpī i te tauturu e hinaʼarohia e rātou nō te faʼaea pūai noa, ’e te itoito, ʼe te haʼapaʼo e tae noa atu i te hopeʼa. E ʼāmui mai rātou ia tātou ’a riro ai tātou ʼei hōʼē nūnaʼa pūai nā te Atua ʼe e tauturu rātou ia tātou ʼia hopoi atu i te pape ora i te hōʼē ao e hinaʼaro rahi nei i te mau haʼamaitaʼiraʼa a te ʼevanelia a Iesu Mesia. E ʼere atu ra ïa teie mau tamariʼi a te Atua « i te taʼata ʼeʼē ʼe te purutia, hōʼē atoʼa rā tō rātou ʼoire e te feiā moʼa ».15 Tē fafau atu nei au ia ʼoutou ē e ʼite rātou tē pārahi nei tō tātou Faʼaora, ’o Iesu Mesia, i roto i tāna iho ʼĒkālesia. E tāmau noa rātou i te tahe ’e o tātou mai te hōʼē ʼānāvai i roto i te puna ora nō te maitaʼi atoʼa e tae noa atu e fāriʼihia rātou ma te rima mahora e tō tātou Fatu ra ’o Iesu Mesia ; ’e e faʼaroʼo rātou i te Metua ’ia parau mai ē, « e ora mure ʼore tō ʼoutou i reira ra ».16
Tē ani nei au ia ʼoutou ’ia ʼimi i te tauturu a te Fatu nā roto i te hereraʼa ia vetahi ʼē mai iāna i here ia ʼoutou. E pe’e nā tātou i te a’o i hōro’ahia mai e Moromona : « Nō reira, e au mau taea’e here, e pure atu i te Metua ma te pūai hope o te ’ā’au ’ia ’ī ’outou i teie nei aroha, o tāna i hō mai i te ta’ata ato’a e pe’e mau i tāna tamaiti ia Iesu Mesia ».17 Nō teie mau parau mau, te fa’a’ite pāpū nei au ʼe tē na reira nei au i te i’oa o Iesu Mesia, ’āmene.