Pawg Pov Thawj Hwj: Ib Qho Chaw Kom Sib Raug Zoo

Los ntawm Txwj Laug Carl B. Cook

Los ntawm Cov Xya Caum Pawg Thawj Tswj Hwm

Tus Tswv xav kom nej pawg pov thawj hwj muaj zog. Thaum Nws muab Nws cov me nyuam sib sau ua ke, lawv yuav tsum muaj ib qho chaw rau lawv sib raug zoo thiab loj hlob tuaj.

Thaum xyoo 2010, Andre Sebako yog ib tug tub hluas uas nrhiav qhov tseeb. Txawm yog nws tsis tau thov Vajtswv ib zaug dua lawm, nws txiav txim siab nws yuav sim ua. Tsis ntev tom qab ntawd nws ntsib ob tug tub txib. Nkawb muab ib daim me nyuam ntawv uas muaj duab txog Phau Ntawv Maumoos rau nws. Andre txais kev tshoov siab thiab nug ob tug tub txib seb nkawd puas kam muag phau ntawv ntawd rau nws. Nkawd hais tias yuav pub phau ntawd dawb rau nws yog nws kam mus rau nkawd lub koom txoos.

Andre twb mus xyuas Ceg Ntseeg Mochudi, uas twb tsim ua tshiab, nyob hauv Botswana, Afikas Teb nws ib leeg xwb. Tiam sis ceg ntseeg ntawd yog ib pawg uas sib hlub, thiab sib raug zoo, es muaj yuav luag 40 tus mej zeej. Lawv qhib siab tos txais Andre. Nws twb kawm cov tub txib tej zaj lus thiab ua kev cai raus dej. Yeej zoo kawg!

Ces muaj li cas tom qab ntawd? Muaj dab tsi pab Andre rau siab ntseeg? Leej twg yuav pab nws taug txoj kev rau kev khi lus? Ib yam lus teb rau lo lus nug no yog nws pawg pov thawj hwj!

Txhua tus uas tuav lub pov thawj hwj txais kev pab los ntawm ib pawg pov thawj hwj uas muaj zog, tsis hais nws muaj xwm txheej li cas los xij. Kuv cov kwv uas tuav lub Pov Thawj Hwj Aloos es, tus Tswv xav kom nej muaj ib pawg pov thawj hwj uas muaj zog, ib qho chaw kom nej txhua leej txhua tus sib raug zoo, ib qho chaw uas tus Tswv tus Ntsuj Plig nyob, ib qho chaw uas tos txais thiab saib txhua tus hauv nej pawg rau nqi. Thaum tus Tswv muab Nws cov me nyuam sib sau ua ke, lawv yuav tsum muaj ib qho chaw rau lawv sib raug zoo thiab loj hlob tuaj.

Nej txhua tus hauv tej pawg pov thawj hwj pawg thawj tswj hwm coj kev thaum nej txais kev tshoov siab thiab muaj kev hlub thiab ua kwv ua tij nrog txhua tus mej zeej hauv nej pawg. Nej tsom ntsoov rau cov uas yog mej zeej tshiab, cov uas tsis tshua muaj siab ntseeg, los sis cov uas muaj kev xav tau tshwj xeeb. Vim nej muaj hwj chim pov thawj hwj, nej pawg pov thawj hwj muaj zog. Thiab ib pawg pov thawj hwj uas muaj zog thiab sib koom siab yeej pab tau ib tug tub hluas lub neej.

Thaum lub Koom Txoos tshaj tawm txog kev kawm txoj moo zoo hauv tsev tshiab, ib txhia xav txog cov mej zeej zoo li Andre thiab nug hais tias, “Es yuav ua li cas txog cov tub hluas ntxhais hluas uas lawv tsev neeg tsis kawm txog txoj moo zoo thiab tsis muaj ib qho chaw rau lawv kawm thiab ua raws li txoj moo zoo nyob hauv tsev? Yuav tso lawv tseg los?”

Peb yeej yuav tsis tso! Tsis kam tso leej twg tseg! Tus Tswv hlub txhua tus tub hluas thiab ntxhais hluas. Peb, cov uas tuav lub pov thawj hwj, yog tus Tswv txhais tes. Peb yog lub Koom Txoos txoj kev txhawb nqa cov uas kawm hauv tsev. Thaum twg tsis tshua muaj kev txhawb nqa hauv tsev, tej pawg pov thawj hwj thiab lwm tus thawj coj thiab phooj ywg yuav saib xyuas thiab txhawb nqa txhua tus thiab txhua tsev neeg.

Kuv twb pom muaj qhov no. Twb muaj li no rau kuv tus kheej. Thaum kuv muaj rau xyoo, kuv niam kuv txiv sib nrauj thiab kuv txiv tso kuv niam tseg kom saib xyuas tsib tug me nyuam yaus. Kuv niam pib ua hauj lwm kom tu tau peb. Nws yuav tsum ua ob txog hauj lwm tau ib ntus, thiab nws yuav tsum kawm ntawv ntxiv. Yeej tsis muaj sij hawm rau nws tu peb. Tiam sis niam tais, yawm txiv, cov dab laug, cov niam tais, npisov, thiab cov neeg qhia tom tsev twb los pab kuv niam uas zoo li ib tug tim tswv.

Thiab kuv muaj ib pawg pov thawj hwj. Kuv yeej zoo siab ua kuv cov phooj ywg tsaug—kuv cov kwv tij—uas hlub kuv thiab txhawb nqa kuv. Kuv pawg pov thawj hwj yog ib qho chaw rau kuv sib raug zoo. Tej zaum ib txhia xav tias ntshe tsis tsim nyog pab kuv thiab ntshe kuv ua tsis taus zoo vim kuv tsev neeg zoo li ntawd. Tej zaum yog li ntawd thiab. Tiam sis kuv tej pawg pov thawj hwj tau pab kuv ntau. Kuv pawg pov thawj hwj tau txhawb pab kuv thiab foom koob hmoov suav tsis txheeb rau kuv lub neej

Muaj neeg nyob ib puag ncig peb uas ntshe lwm tus xav tias tsis tsim nyog pab lawv. Tej zaum peb txhua tus zoo li ntawd. Tiam sis peb txhua tus muaj ib pawg pov thawj hwj, uas yog ib qho chaw rau peb txais dag zog thiab pub dag zog rau lwm tus. Ib pawg pov thawj hwj yog qhov chaw kom “sawv daws pab ib tug thiab ib tug pab sawv daws.” Yog ib qho chaw rau peb ib leeg qhia ib leeg, pab lwm tus, thiab koom siab ua kwv tij thaum peb ua hauj lwm rau Vajtswv. Yog ib qho chaw uas muaj txuj ci tseem ceeb.

Kuv xav qhia nej txhua tus txog tej txuj ci tseem ceeb uas muaj nyob hauv Andre pawg pov thawj hwj hauv Mochudi. Thaum kuv hais zaj no, cia li xav txog tej ntsiab cai uas ua rau txhua pawg pov thawj hwj muaj zog yog lawv ua raws li tej no.

Tom qab Andre ua kev cai raus dej, nws twb nrog ob tug tub txib mus thaum nkawd qhia plaub tug tub hluas ntxiv, es lawv kuj ua kev cai raus dej. Tam sim no muaj tsib tug tub hluas. Lawv ib leeg tau pib txhawb ib leeg lub zog thiab pab lwm tus hauv ceg ntseeg ntawd.

Ib tug tub hluas thib rau, Thuso, tau ua kev cai raus dej. Thuso tau qhia txoj moo zoo rau nws peb tug phooj ywg, thiab tsis ntev muaj cuaj tug tub hluas.

Cov thwj tim ntawm Yexus Khetos yeej sib sau li no—ob peb tug thaum ib lub sij hawm, raws li lawv cov phooj ywg caw lawv ua. Puag thaum ub, thaum Adales nrhiav tau tus Cawm Seej, nws twb mus tsuag tsuag rau nws tus tij laug Ximoos thiab “coj nws mus cuag Yexus.” Ib yam li ntawd, tom qab Filis los ua Khetos ib tug thwj tim, nws caw nws tus phooj ywg Nathana-ees kom “tuaj saib.”

Nyob hauv Mochudi, ib tug tub hluas thib 10 tau koom lub Koom Txoos. Cov tub txib nrhiav tau tus thib 11. Thiab tus tub hluas thib 12 tau ua kev cai raus dej tom qab nws pom tias txoj moo zoo tau ua li cas rau nws cov phooj ywg.

Cov mej zeej ntawm Ceg Ntseeg Mochudi zoo siab kawg. Cov tub hluas no “tau hloov siab los ntseeg tus Tswv, thiab … koom siab hauv lub koom txoos.”

Phau Ntawv Maumoos yog ib yam tseem ceeb rau lawv txoj kev hloov siab los ntseeg. Thuso nco qab hais tias, “Kuv pib nyeem Phau Ntawv Maumoos … txhua lub sij hawm kuv khoom, nyob hauv tsev, nyob hauv tsev kawm ntawv, txhua qhov chaw.”

Oratile xav paub txog txoj moo zoo vim nws cov phooj ywg coj yam ntxwv zoo. Nws piav hais tias: “Zoo li [lawv] twb hloov siab tom qab ib me pliag xwb. Kuv xav tias … yog los ntawm me nyuam … phau ntawv uas lawv tau pib nqa mus … hauv tsev kawm ntawv. Kuv twb pom tias lawv tau hloov los ua neeg zoo. … [Kuv] kuj xav hloov siab thiab.”

Ceg Ntseeg Mochudi

Twb siv ob xyoos xwb es 12 tug tub hluas no tag nrho tau sib sau ua ke thiab ua kev cai raus dej. Lawv puav leej yog tib tug mej zeej ntawm lub Koom Txoos nyob hauv nws tsev neeg. Tiam sis lawv txais kev txhawb nqa los ntawm lawv tsev neeg hauv lub Koom Txoos, tsis hais Thawj Tswj Hwm Rakwela, lawv ceg ntseeg tus thawj tswj hwm; Txwj Laug thiab Muam Taylor, ib khub tub txib laus, thiab lwm tus mej zeej hauv ceg ntseeg ntawd.

Tij Laug Junrio, ib tug thawj coj hauv lawv pawg pov thawj hwj, tau caw cov tub hluas no tuaj rau nws lub tsev thaum hnub Sunday tav su thiab qhia lawv. Cov tub hluas tau kawm cov vaj lug kub ua ke thiab muaj tsev neeg hmo ua ke.

Mus xyuas cov mej zeej

Tij Laug Junior tau coj lawv mus xyuas cov mej zeej, tib neeg uas cov tub txib qhia, thiab lwm tus uas xav tau neeg tuaj xyuas lawv. Tag nrho 12 tug tub hluas tau nce Tij Laug Junior lub tsheb thauj khoom. Nws tau tso lawv ob peb tug rau ib lub tsev thiab tau rov qab tuaj tos lawv.

Txawm yog cov tub hluas no pib kawm txog txoj moo zoo xwb thiab xav tias lawv tsis tshua paub ntau, Tij Laug Junior hais kom lawv qhia ib yam los sis ob yam uas lawv twb paub lawm rau tib neeg uas lawv mus xyuas. Cov tub hluas uas tuav lub pov thawj hwj tau qhia, thov Vajtswv, thiab pab saib xyuas lub Koom Txoos. Lawv twb ua lawv tej dej num pov thawj hwj thiab muaj kev xyiv fab vim lawv pab lwm tus.

Pawg Kwv Tij

Andre hais tias, “Peb tau ua si ua ke, luag ua ke, quaj ua ke, thiab ua kwv ua tij.” Muaj tseeb tiag, lawv hu lawv tus kheej ua “Pawg Kwv Tij.”

Lawv txhua tus tau cuab hom phiaj hais tias lawv yuav mus ua tub txib. Vim nyias yog tib tug mej zeej ntawm lub Koom Txoos hauv nyias tsev, lawv muaj teeb meem ntau uas lawv yuav tsum kov yeej, tiam sis lawv ib leeg tau pab ib leeg kom kov yeej.

Ib tug dhau ib tug, txhua tus tub hluas tau txais kev hu mus ua tub txib. Cov uas tau mus ua ntej tau sau ntawv rau cov uas tseem npaj, qhia thiab yaum lawv kom xav mus pab lwm tus. Kaum ib tug tub hluas twb mus ua tub txib.

Cov tub hluas no twb tau qhia txoj moo zoo rau lawv tsev neeg. Cov niam tsev, cov muam, cov kwv tij, cov phooj ywg, thiab cov neeg uas lawv qhia thaum ua tub txib, lawv puav leej tau hloov siab los ntseeg thiab ua kev cai raus dej. Twb tau muaj tej txuj ci tseem ceeb thiab tib neeg coob tau txais koob hmoov.

Kuv xav tias nej ib txhia xav tias yuav muaj txuj ci tseem ceeb li no nyob hauv Afikas Teb xwb, ib qho chaw uas yeej zoo rau kev muab Ixayees sib sau ua ke. Tiam sis, kuv ua tim khawv tias tej ntsiab cai uas lawv siv hauv Ceg Ntseeg Mochudi los muaj tseeb hauv txhua qhov chaw. Txawm nej nyob qhov twg los, nej tej pawg yuav loj tuaj los ntawm kev rau siab ntseeg thiab kev qhia txoj moo zoo. Txawm yog ib tug thwj tim xwb qhia ib tug phooj ywg, los ib tug yuav los ua ob tug. Ob tug yuav los ua plaub tug. Plaub tug yuav los ua yim tus. Thiab yim tus yuav los ua kaum ob tug. Tej ceg ntseeg yuav los ua tej pawg ntseeg.

Pawg Ntseeg Mochudi

Tus Cawm Seej qhia hais tias, “Rau qhov yog muaj ob los sis peb leeg tuaj nyob ua ke qhov twg tuav kuv lub npe thov, kuv yuav nrog lawv nyob qhov ntawd.” Leej Txiv Saum Ntuj Ceeb Tsheej tab tom npaj tib neeg nyob ib puag ncig peb lub siab. Peb muaj peev xwm ua raws li tej kev tshoov siab, cev tes pab lwm tus, qhia qhov tseeb, caw lwm tus nyeem Phau Ntawv Maumoos, thiab hlub thiab txhawb nqa lawv thaum lawv kawm txog tus Cawm Seej.

Twb dhau 10 xyoo txij thaum Mochudi Pawg Kwv Tij tau pib koom ua ke, es lawv tseem yog ib pawg kwv tij.

Katlego hais tias, “Txawm peb txhua tus nyob deb heev los, peb ib leeg tseem pab ib leeg.”

Kuv thov Vajtswv tias peb yuav ua raws li tus Tswv hais kom peb koom siab nrog Nws hauv peb tej pawg pov thawj hwj xwv kom peb tej pawg yuav los ua ib qho chaw rau peb sib raug zoo, ib qho chaw rau peb sib koom ua ke, ib qho chaw uas loj tuaj.

Yexus Khetos yog peb tus Cawm Seej, thiab nov yog Nws txoj hauj lwm. Kuv hais lus tim khawv txog qhov no los ntawm Yexus Khetos lub npe, amees.

Lus Cim

1. Saib Mark thiab Shirley Taylor, muab sau ua ke, The Band of Brothers (Mochudi Branch conversion stories and testimonies, 2012–13), 4, Church History Library, Salt Lake City.

2. Kev sib tham ntawm tus kheej, Letanang Andre Sebako, Band of Brothers cov ntaub ntawv pab, 2011–19, Church History Library, Salt Lake City.

3. Thawj Tswj Hwm Boyd K. Packer hais tias: “Thaum ib tug txiv neej tuav lub pov thawj hwj, nws yeej koom ib qho uas loj dua li nws tus kheej. Yog ib yam uas nyob sab nraum nws tus kheej uas nws tso siab plhuav rau” (“The Circle of Sisters,” Ensign, Nov. 1980, 109–10).

4. Thawj Tswj Hwm Russell M. Nelson piav tias yuav ua li cas kom txais kev tshwm sim thiab hais tias, “Thaum nej ua li no ib hnub dhau ib hnub, ib hlis dhau ib hlis, ib xyoos dhau ib xyoos, nej thiaj yuav “loj hlob es txawj ua raws li tej kev tshwm sim.” (“Kev Tshwm Sim rau lub Koom Txoos, Kev Tshwm Sim rau Peb lub Neej,” Liahona, Tsib Hlis Ntuj 2018, 95; kuj saib Teachings of Presidents of the Church: Joseph Smith [2007], 132)

5. Saib Handbook 2: Administering the Church (2010), 8.3.2.

6. Lwm tus pab thiab, tsis hais cov hauv pawg npisov thiab cov qhuab qhia. Txwj Laug Ronald A. Rasband qhia tias ib yam uas pab vim tau hloov tej pawg Pov Thawj Hwj Mekixedes, li tau hais thaum lub Peb Hlis Ntuj hnub tim 31, xyoo 2018, yog kom “pab tus npisov muab kev lav ris ntxiv rau pawg txwj laug thiab Koom Haum Niam Tsev ob tug thawj tswj hwm kom tus npisov thiab nws ob tug pab cuam muaj sij hawm tsom ntsoov rau lawv tej dej num tseem ceeb tshaj—xws li kev saib xyuas cov ntxhais hluas thiab cov tub hluas uas tuav lub Pov Thawj Hwj Aloos” (“Saib Seb! A Royal Army,” Liahona, Tsib Hlis Ntuj 2018, 59). Cov tim tswv kuj yuav pab. Cov uas tuav lub Pov Thawj Hwj Aloos tuav cov yuam sij ntawm cov tim tswv txoj kev txhawb pab (saib Lus Qhuab Qhia thiab Kev Khi Lus 13:1; kuj saib Dale G. Renlund thiab Ruth Lybbert Renlund, The Melchizedek Priesthood [2018], 26) Txwj Laug Jeffrey R. Holland hais tias: “Feem ntau [cov tim tswv uas txhawb pab] los peb tsis pom. Tej lub sij hawm peb pom tau. Tiam sis pom los tsis pom lawv yeej nyob ze. Tej lub sij hawm lawv txais kev txib ua tej yam loj thiab tseem ceeb rau tag nrho lub ntiaj teb. Tej lub sij hawm lawv zaj lus yog rau ib tug neeg xwb. Tej lub sij hawm ib tug tim tswv lub hom phiaj yog kom ceeb toom. Tiam sis feem ntau lawv nplij yus lub siab, muab kev hlub tshua rau yus, thiab coj thaum muaj kev nyuaj siab” (“The Ministry of Angels,” Liahona, Kaum Ib Hlis Ntuj 2008 29). Yog nej xav tau kev pab li no, nej yuav tsum “thov, thiab nej yuav tau txais” (Yauhas 16:24).

7. Saib Russell M. Nelson, “Tej Lus Qhib Rooj Sab Laj,” Liahona, Kaum Ib Hlis Ntuj 2018, 7–8.

8. Saib Alexandre Dumas, The Three Musketeers (1844).

9. Saib Handbook 2, 8.1.2.

10. Saib Yauhas 1:40–42.

11. Saib Yauhas 1:43–46.

12. 3 Nifais 28:23.

13. Saib D. Todd Christofferson, “Phau Ntawv Maumoos lub Hwj Chim” (kev qhia cov thawj tswj hwm rau qhov chaw tshaj tawm txoj moo zoo, Rau Hli Ntuj 27, 2017).

14. Thuso Molefe, nyob hauv Taylor, The Band of Brothers, 22.

15. Oratile Molosankwa, nyob hauv Taylor, The Band of Brothers, 31–32.

16. Lucas Rakwela, Mochudi, Botswana.

17. Mark thiab Shirley Taylor, Idaho, USA.

18. Cilvester Junior Kgosiemang, Mochudi, Botswana.

19. Saib Lus Qhuab Qhia thiab Kev Khi Lus 20:46–47, 53–54.

20. Kev sib tham ntawm tus kheej, Letanang Andre Sebako, Band of Brothers cov ntaub ntawv pab.

21. Lus Qhuab Qhia thiab Kev Khi Lus 6:32.

22. Katlego Mongole, nyob hauv “Band of Brothers 2nd Generation” (tsis tau muab luam tawm), 21.