Vajtswv txoj Kev Ua Siab Zoo Tam Sim No
Txawm yog peb tab tom ua siab ntev tos tus Tswv, muaj tej koob hmoov uas los rau peb tas sim ntawd.
Ntau xyoo tas los lawm, wb tus me nyuam tub uas muaj tsib xyoos los nrog kuv tham thiab hais tias, “Txiv, kuv twb kawm tau ib yam dab tsi lawm. Kuv kawm paub tias tsis ntev thaum koj hais yeej yog ib lub sij hawm ntev heev.”
Thaum tus Tswv los sis Nws cov tub qhev hais tej yam zoo li, “tshuav ob peb hnub xwb” los sis “lub sij hawm tshuav tsis deb ncua lawm,” yeej txhais tau hais tias tag nrho ib tiam neeg los sis ntev tshaj ntawd. Nws lub sij hawm, thiab Nws lub caij, yeej txawv peb li. Kev ua siab ntev tseem ceeb heev. Yog yus tsis muaj ces, peb yuav tsis muaj kev ntseeg Vajtswv txaus kom muaj sia nyob thiab tau kev cawm dim. Tiam sis hnub no kuv zaj xov hais tias, txawm peb xav tab tom ua siab ntev tos tus Tswv, muaj tej koob hmoov uas los rau peb tas sim ntawd.
Thaum cov Neeg Lamas txhom tau Amas thiab nws cov neeg, lawv thov Vajtswv pab lawv dim. Lawv tsis tau kev cawm dim tas sim ntawd, tiam sis thaum lawv ua siab ntev tos kev cawm dim, tus Tswv muab Nws txoj kev ua siab zoo thaum muab tej koob hmoov zoo tam sim no. Nws ua rau cov neeg Lamas tej siab muag nthas tas sim ntawd xwv kom lawv yuav tsis tua cov neeg lawm. Nws kuj ntxiv zog rau Amas cov neeg thiab pab ev lawv tej nras. Thaum kawg lawv raug kev cawm dim, ces lawv khiav mus rau lub nroog Xalahelas, es nyob ntawd lawv qhia cov neeg uas nyob ntawd seb lawv raug xwm dab tsi lawm. Cov neeg hauv Xalahelas xav tsis thoob, thiab “thaum lawv xav txog Vajtswv txoj kev ua siab zoo tam sim no, thiab nws lub hwj chim uas tau coj Amas thiab nws cov kwv tij tawm ntawm … txoj kev poob cev qhev, lawv tau tsa lawv tej suab thiab ua Vajtswv tsaug.”
Vajtswv txoj kev ua siab zoo tam sim no yeej los rau txhua tus neeg uas rau siab thov Nws tag siab tag ntsws. Nov hais txog cov uas taij thov vim lawv poob siab nthav, thaum lawv xav tias kev cawm dim nyob nrug deb thiab lawv yuav raug txom nyem ntev los lawm, haj yam mob siab tiag.
Twb muaj li ntawd rau tus yaj saub hluas uas nyob hauv lub qhov taub tau ntev lawm nws thiaj qw hais tias: “Au Vajtswv, koj nyob qhov twg? … Yuav yog ntev npaum li cas koj thiaj yuav ncav tes los pab … ? Muaj tseeb tiag, Vajtswv es, yuav ntev npaum li cas … ?” Thaum teb, tus Tswv tsis tau cawm Yauxej tas sim ntawd, tiam sis nws twb muab kev thaj yeeb nyab xeeb rau nws tas sid.
Vajtswv muab kev cia siab tas sim ntawd hais tias peb yuav tau kev cawm dim. Txawm yog zoo li cas, txawm yog nyob qhov twg, nyob hauv Khetos thiab dhau ntawm Khetos yeej yuav muaj kev cia siab nyob tom peb hau ntej. Nyob kiag ntawm peb qhov muag.
Tsis tas li ntawd xwb, Nws tau cog lus tseg hais tias, “Kuv txoj kev ua siab zooyuav tsis ncaim koj li.”
Qhov tseem ceeb tshaj, Vajtswv txoj kev hlub nyob ntawd tas sim ntawd. Nrog Pov Lauj, kuv hais lus tim khawv tias tsis muaj ib yam dab tsi “uas yuav muab peb cais tawm ntawm Vajtswv txoj kev hlub, uas yog Yexus Khetos.” Peb tej kev txhaum, txawm yog tej ntawd muab peb cais tawm ntawm Nws tus Ntsuj Plig rau ib ntus los, tej ntawd muab peb cais tawm tsis tau ntawm Nws txoj kev hlub tas sim ntawd.
Nov yog tej yam uas nws muab tau “Nws foom koob hmoov kiag rau [peb].”Nim no, yog peb yuav to taub tej ntsiab cai no hauv peb lub caij nyoog, kuv xav qhia nej txog ob tug neeg uas tau ua tim khawv qhia txog Vajtswv txoj kev ua siab zoo tam sim no.
Txij li nws ua ntxhais hluas los, Emilie muaj teeb meem vim nws quav tshuaj yeeb. Qhov uas nws sim tej hom yeeb ua rau nws pib muaj yeem, nyob nyob ces nws txawm quav yeeb rau ntau ntau xyoo, txawm tias nws muaj tej lub sij hawm uas nws nyob zoo me ntsis. Emilie tau ua tib zoo zais nws qhov teeb meem, nws haj yam ceev faj muab zais cia tom qab nws yuav txiv thiab muaj me tub me nyuam.
Qhov uas pib pab nws dim qhov teeb meem no tsis zoo li ib txoj kev cawm dim hlo li. Tib pliag ntawd, Emilie tab tom ntsib kws kho mob seb nws nyob li cas, ces lub tsheb thauj neeg mob thaum muaj xwm txheej ceev txawm xa nws mus pw hauv lub tsev kho mob. Nws pib txhawj vim nws yuav ncaim nws cov me nyuam, nws tus txiv, thiab nws lub tsev.
Hmo ntawd, nyob nws ib leeg hauv ib chav tsev txias thiab tsaus nti, Emilie nyob hauv txaj quaj ib hmos. Nws tswj tsis tau nws tej kev xav ces thaum kawg, kev txhawj xeeb, kev ntshai, thiab qhov tsaus ntuj tau los kav tag nrho chav tsev thiab nws tus ntsuj plig, Emilie twb xav hais tias hmos ntawd nws yuav tuag mus. Nyob nws ib leeg xwb.
Thaum nyob li ntawd, Emilie nrhiav lub zog los sawv ntawm txaj thiab tau mus txhos caug. Nws tsis ua khav theeb li thaum nws thov Vajtswv yav tas los lawm, Emilie cia li nyoo tus Tswv thiab tau taij thov hais tias, “Au Vajtswv, kuv xav tau koj txoj kev pab. Thov pab kuv lauj. Kuv tsis xav nyob kuv ib leeg xwb. Thov koj pab kuv nyiaj mus dhau hmos no.”
Ces tas sim ntawd, ib yam li Nws ua rau Petus thaum ub, Yexus tau ncav Nws txhais tes los thiab tau tuav nkaus nws tus ntsuj plig. Emilie txawm hnov kev hlub, kev nplij siab, ua siab loj, thiab paub tias txhua yam yuav zoo. Chav tsev ntawd tsis txias lawm, nws paub tias nws tsis nyob nws ib leeg xwb, thiab yog thawj zaug txij li nws muaj 14 xyoos, uas Emilie paub tias txhua yam yuav zoo. Thaum nws “tsim dheev rau ntawm Vajtswv,”Emilie tsaug zog muaj kev nyab xeeb. Ces peb thiaj pom hais tias “yog tias nej yuav hloov siab lees txim thiab tsis txhob uas siab tawv qhawv ces, tsis ntev ces txoj kev txhiv dim yuav raug coj los rau nej.”
Txoj kev kho thiab cawm Emilie dim yeej siv sij hawm ntev kawg—tau kev kho mob, kev qhuab qhia, thiab kev ntuas rau ntau lub hlis, thaum nws txais tej no nws tau Vajtswv txoj kev ua siab zoo tam sim no ntau ntau zaus. Thiab txoj kev ua siab zoo ntawd tseem nyob nrog nws thaum nrog nws tus txiv thiab cov me nyuam mus hauv lub tuam tsev es raug muab khi ua ke rau tas mus ib txhis. Zoo li cov neeg Xalahelas, nim no Emilie ua Vajtswv tsaug rau Nws txoj kev ua siab zoo tam sim no thiab Nws lub hwj chim uas tau pab nws dim txoj kev ua tub qhev.
Nim no, xav qhia txog lwm tus neeg ntseeg lub neej. Thaum lub Ob Hlis Ntuj hnub tim 27, 2013, Alicia Schroeder zoo siab tos txais nws ob tug phooj ywg zoo, Sean thiab Sharla Chilcote, uas cia li tshwm plaws ntawm nws lub qhov rooj. Sean, uas yog Alicia tus npisov, muab nws lub xov tooj rau nws thiab hais tias, “Alicia, wb hlub koj. Koj yuav tsum tham xov tooj.”
Alicia tus txiv, Mario, yog tus uas nyob hauv xov tooj. Nws nyob puag tom hav zoov nrog nws ib co me nyuam muaj caij cov tsheb saum daus. Twb muaj xwm txheej ceev lawm. Mario raug mob sab kawg, thiab nkawd tus me nyuam tub uas muaj 10 xyoo, Kaleb, twb tuag lawm. Thaum Mario qhia nws tus poj niam tias nkawd tus tub Kaleb tuag, Alicia ib ce xoob tas thiab muaj kev tu siab kawg nkaus uas peb sawv daws feem coob yuav tsis paub txog. Nws txawm vau hlo rau pem teb. Nws ib ce tuag tas vim nyuaj siab kawg, Alicia tsis muaj cuab kav hais lus los sis txav hlo li.
Npisov thiab Muam Chilcote tsa nws hlo thiab tuav nws. Lawv quaj thiab tu siab nrho nrog nws. Ces Npisov Chilcote tau muab ib txoj koob hmoov rau Alicia.
Yus yuav tsis to taub tias muaj xwm dab tsi tom qab ntawd yog tias yus tsis to taub Yexus Khetos txoj Kev Theej Txhoj thiab Vajtswv txoj kev ua siab zoo tam sim no. Npisov Chilcote maj mam tso nws ob txhais tes saum Alicia taub hau, tsa suab hais lus npo kua muag. Alicia hnov ob yam zoo li Vajtswv Kiag hais lus rau nws. Qhov xub thawj, nws hnov nws lub npe, Alicia Susan Schroeder. Ces nws txawm hnov tus npisov hu Vajtswv tus uas Muaj Hwj Chim Loj Tshaj txoj cai los. Lub sij hawm ntawd—thaum hnov nws lub npe thiab Vajtswv lub hwj chim—Alicia tau hnov kev kaj siab lug, kev hlub, kev nplij siab uas piav tsis tau, thiab xyov yog li cas thiaj tau hnov kev xyiv fab. Thiab nws tseem muaj li ntawd.
Txawm li ntawd los, Alicia, Mario, thiab nkawd tsev neeg tseem tu siab thiab nco me Kaleb. Nws nyuaj kawg! Thaum twg kuv nrog lawv tham, Alicia yuav pib los kua muag thaum nws qhia seb nws hlub thiab nco nws tus me tub npaum li cas. Nws tseem los kua muag thaum nws qhia seb tus Txhiv Dim uas li cas txhawb nqa nws dhau qhov teeb meem no, pib thaum Yexus xa Nws txoj kev ua siab zoo tam sim no thaum uas nws twb poob siab nthav lawm.
Kuv yeej paub hais tias muaj tej yam hauv lub neej no uas ua rau peb muaj kev nyuaj siab thiab kev ntxhov siab uas ua rau peb txais tsis tau los sis tsis nco qab xav txog los sis nco kev cawm dim uas peb tau ib yam li Emilie thiab Alicia. Kuv twb raug tej no ntau zaus thiab. Kuv hais lus tim khawv tias, thaum muaj tej kev cov nyom, qhov uas peb nyiaj mus dhau yeej yog peb txoj kev qhia tseeb hais tias muaj Vatjswv txoj kev ua siab zoo tam sim no ntag. Nco qab ntsoov, haiv neeg Ixayees thaum ub tau kev cawm dim “los ntawm tib tug Vajtswv uas tau ceev lawv cia”ib hnub dhau ib hnub.
Kuv ua tim khawv hais tias Yexus Khetos yog tus Txhiv Dim, thiab los ntawm Nws lub npe, kuv cog lus hais tias thaum twg nej rau siab thov Nws tas siab tas ntsws, Nws yuav cawm nej dim txhua yam uas tsim txom los sis sim ua rau nej lub neej los sis kev zoo siab puas tsuaj mus. Tej zaum nej yuav tos txoj kev cawm dim ntawd ntev tshaj li nej lub siab nyiam—tej zaum yuav ntev tshaj ib sim neej los sis ntev tshaj ntawd. Yog li ntawd, kom pab nplij nej siab, pab nej muaj siab loj, thiab muab kev cia siab rau nej, xwv kom ntxiv dag ntxiv zog rau nej mus txog hnub dim, kuv muab rau nej thiab hais lus tim khawv txog Vajtswv txoj kev ua siab zoo tam sim no es hais li ntawd los ntawm Yexus Khetos lub npe, amees.