Siv Peb lub Zog ntawm Sab Ntsuj Plig
Ib yam li kev nyeem thiab kawm txog tej leeg nqaij yuav tsis pab kom cov no muaj zog, kev nyeem thiab kawm txog kev ntseeg yog tias peb tsis ua tej yam pab xyaum peb txoj kev ntseeg ces peb txoj kev ntseeg yuav tsis loj hlob tuaj.
Kuv zoo siab rau qhov kuv muaj hmoov txais ib lub cev nqaij daim tawv, uas yog ib lub txiaj ntsim zoo kawg los ntawm peb Leej Txiv Saum Ntuj Ceeb Tsheej. Peb lub cev muaj ntau tshaj 600 leeg nqaij. Ntau txoj leeg nqaij no yuav tsum ua zog ua es xaws xais lawv thiaj muaj zog txaus pab peb ua neej nyob. Peb muaj cai siv peb lub paj hlwb nyeem ntawv txog peb tej leeg nqaij, tiam sis yog peb xav tias ua li no xwb yuav ua rau tej no muaj zog, peb yeej yuav poob siab. Peb tej leeg nqaij tsuas loj hlob tuaj thaum uas peb siv tej ntawd.
Kuv twb kawm paub hais tias tej txiaj ntsim ntawm peb sab ntuj plig yeej ua tib yam li ntawd. Tej no yuav tsum xyaum ua xwb lawv thiaj loj hlob tuaj. Piv xam hais tias, kev ntseeg tsis yog ib txoj kev xav los sis ua raws li lub siab nyiam xwb; nws yog ib txoj ntsiab cai uas toob kas kev ua hauj lwm thiab yus pom hauv phau vaj lug kub hais tias yog kev xyaum ua. Ib yam li kev nyeem thiab kawm txog tej leeg nqaij yuav tsis pab kom cov no muaj zog, kev nyeem thiab kawm txog kev ntseeg yog tias peb tsis ua tej yam pab xyaum peb txoj kev ntseeg ces peb txoj kev ntseeg yuav tsis loj hlob tuaj.
Thaum kuv muaj 16 xyoo, kuv tus tij laug hlob, Ivan, uas thaum ntawd muaj 22 xyoos, los tsev thiab qhia peb tsev neeg ib zaj xov. Nws twb txiav txim siab los ua kev cai raus dej hauv Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Peb niam txiv ntsia nws zoo nkaus li nws vwm me ntsis, thiab kuv tsis tshua to taub hais tias nws tab tom ua dab tsi. Ib xyoos tawm tom qab ntawd, nws qhia peb ib zaj xov loj me ntsis: nws txiav txim tias nws yuav mus ua ib tug tub txib rau lub Koom Txoos, uas txhais tau hais tias peb yuav tsis pom nws rau ob xyoos tom qab ntawd. Kuv niam txiv tsis tshua txaus siab rau qhov no; tiam sis, kuv pom hais tias nws yeej txiav txim siab lawm kuv thiaj qhuas nws thiab pom zoo rau nws txoj kev txiav txim ntawd.
Ntau hli tom qab ntawd, thaum nws tab tom ua tub txib, kuv tau muaj cib fim yos teb chaws nrog kuv ib co phooj ywg. Peb xav ua koob tsheej vim peb twb kawm ntawv high school tas thiab peb xav mus ua si nram hiav txwv.
Kuv sau ib tsab ntawv rau kuv tus tij laug uas mus ua tub txib lawm, qhia nws hais tias peb yuav mus yos teb chaws li cas thaum lub caij ntug sov. Nws sau ntawv hais tias nws nyob hauv lub zos uas nyob ze qhov chaw kuv yuav mus ua si ntawd. Kuv txiav txim siab tias yog ib qho tswv yim zoo yog kuv yuav nres thiab mus xyuas nws. Yuav yog ntev ntev tom qab ntawd kuv mam li paub hais tias cov neeg hauv yus tsev neeg yuav tsum tsis txhob mus xyuas cov tub txib.
Kuv tau npaj txhij txhua. Kuv nco qab tias thaum kuv caij lub tsheb npav xav txog tej kev lom zem uas Ivan wb yuav muaj hnub uas ci ntsa iab ntawd. Kuv xav tias wb yuav noj tshais, sib tham, ua si tom hiav txwv, ziab tshav ntuj—wb yuav muaj kev lom zem kawg!
Thaum lub tsheb npav tuaj txog, kuv pom Ivan sawv ntawd nrog lwm tus tub txib, ob leeg hnav tsho dawb thiab coj kas las vas. Kuv tawm ntawm tsheb, wb sib khawm, thiab nws txawm coj kuv mus ntsib nws tus khub. Tham li ntawd xwb, kuv txawm qhia kuv tus tij laug seb hnub ntawd kuv xav ua si li cas, tiam sis kuv tsis tau paub hais tias Ivan twb npaj siab ua lwm yam. Nws ntsia kuv, luag nyav, thiab hais tias, “Ua li! Tiam sis, wb yuav tsum xub ua ob peb yam hauj lwm tso. Koj puas kam nrog wb mus ua tej ntawd?” Kuv kuj pom zoo, vim kuv xav tias peb tseem yuav muaj sij hawm txaus mus tom hiav txwv tom qab ntawd.
Hnub ntawd, rau ntau tshaj 10 xuab moos, kuv taug tej kev hauv zos nrog kuv tus tij laug thiab nws tus khub. Kuv luag nyav rau tib neeg tas hnub. Kuv hais nyob zoo rau cov neeg uas kuv tsis tau ntsib dua. Peb nrog txhua leej txhia tus tham, khob tib neeg cov qhov rooj, thiab tau mus xyuas cov neeg uas kuv tus tij laug thiab nws tus khub tab tom qhia.
Thaum mus xyuas ib yim neeg, kuv tus tij laug thiab nws tus khub tab tom qhia txog Yexus Khetos thiab txoj kev cawm seej. Ivan txawm nres thiab ntsia kuv. Kuv xav tsis thoob, thaum nws thov kom kuv qhia seb kuv xav li cas txog tej yam uas nkawd tab tom qhia. Chav tsev ntawd txawm ntsiag tos, thiab sawv daws ntsia kuv nruj heev. Tsis paub yuav hais li cas li, tab sis mas kuv tau hais ob peb lo thiab seb kuv xav li cas txog tus Cawm Seej. Kuv tsis paub seb tej uas kuv hais ntawd puas zoo los sis tsis zoo. Kuv tus tij laug tsis tau kho kuv cov lus li cas; tiam sis, nws tsuas ua kuv tsaug vim kuv tau qhia seb kuv xav li cas.
Thaum ua hauj lwm ua ke li ntawd, kuv tus tij laug thiab nws tus khub tsis tau siv ib na this qhia ib zaj lus rau kuv, tab sis mas kuv kawm paub ntau tshaj txhua yam uas nws tau qhia kuv yav tas los lawm. Kuv pom cov neeg uas txais tus ntsuj plig qhov kaj hauv lawv lub neej tus xeeb ceem hloov hlo kiag. Kuv pom lawv txais chaw cia siab hauv tej zaj lus qhia ntawd, thiab kuv kawm seb yuav tsum pab lwm tus neeg li cas thiab kom tsis txhob nco qab xav txog kuv tus kheej thiab tej yam uas kuv xav ua. Kuv tab tom ua raws li tus Cawm Seej qhia hais tias: “Yog leej twg xav nrog kuv mus, tus ntawd yuav tsum tswj nws lub siab.”
Thaum ntsia yav nram qab, kuv pom hais tias kuv txoj kev ntseeg tau loj hlob hnub ntawd vim kuv tus tij laug tau cia kuv los xyaum ua. Kuv xyaum ua thaum peb nyeem tej nqes vaj lug kub, nrhiav neeg uas xav kawm, hais lus tim khawv, pab lwm tus neeg, thiab tej yam zoo li ntawd. Hnub ntawd peb yeej tsis tau mus ziab tshav ntuj, tiam sis kuv lub siab yeej tau qhov kaj uas los saum ntuj ceeb tsheej los. Kuv tsis tau pom cov xuab zeb tom hiav txwv, tiam sis kuv hnov kuv txoj kev ntseeg txhawv tuaj zoo li ib lub me nyuam noob uas hlav tuaj. Kuv tsis siv hnub uas ci ntsa iab ntawd ua ib tug neeg yos teb chaws, tiam sis kuv tau kawm tej yam zoo, thiab txawm tsis paub li, kuv yog ib tug tub txib lawm—tab txawm kuv tsis yog ib tug mej zeej hauv lub Koom Txoos li!
Tej Cib Fim uas Pab Ntxiv Zog rau Tej Leeg Nqaij ntawm Sab Ntsuj Plig
Vim muab txoj moo zoo Txum Tim Rov Qab Los, peb thiaj yuav to taub seb peb Leej Txiv Saum Ntuj Ceeb Tsheej ua li cas thiaj pab peb ntxiv zog rau peb tej txiaj ntsim ntawm sab ntsuj plig. Tej zaum Nws yuav cia peb muaj cib fim xyaum ua kom tej txiaj ntsim no loj tuaj tsis yog cia li muab tej ntawd pub rau peb yog peb tsis xyaum ntawm sab ntsuj plig thiab sab cev nqaij daim tawv. Yog peb mloog Nws tus Ntsuj Plig, peb yuav paub txog tej lub cib fim no thiab txawm ua tej ntawd.
Yog peb xyaum kom ua siab ntev, tej zaum peb yuav nrhiav pom hais tias peb yuav tsum xyaum ua ntev mus peb thiaj tau lus teb. Yog peb xav haj yam hlub cov kwv tij zej zog, ces peb mam xyaum ua li ntawd thaum peb mus zaum ze ib tug neeg tshiab hauv lub koom txoos. Txoj kev ntseeg zoo tib yam li ntawd: thaum tej kev tsis ntseeg los hauv peb lub paj hlwb, ces peb yuav tsum tso siab plhuav rau tus Tswv tej kev cog lus peb thiaj muaj cuab kav mus lawm tom ntej. Ua li no, peb xyaum siv peb tej leeg nqaij ntawm sab ntsuj plig thiab pab kom tej ntawd ntxiv zog rau hauv peb lub neej.
Tej zaum thaum xub thawj mas nws yeej yuav nyuaj, thiab tej zaum yuav yog ib qho teeb meem loj heev. Tus Tswv cov lus, uas tus yaj saub Maulaunais hais, yeej qhia txog peb niaj hnub nim no hais tias: “Thiab yog tias tib neeg los cuag kuv, kuv yuav ua kom lawv paub txog lawv txoj kev qaug zog. Kuv muab txoj kev qaug zog rau tib neeg xwv kom lawv yuav txo hwj chim; thiab kuv lub hwj chim yeej txaus rau tib neeg txhua tus uas txo lawv lub hwj chim rau kuv; yog tias lawv txo lawv lub hwj chim rau kuv, thiab ntseeg kuv, ces kuv yuav ua kom tej uas qaug zog los ua tej uas muaj zog rau lawv.”
Kuv muaj kev ris txiaj heev rau kuv tus tij laug Ivan, uas tsis yog qhia txoj moo zoo rau kuv xwb tiam sis nws twb caw kuv los ua raws li txoj moo zoo qhia thiab nco qab xav txog kuv tej kev qaug zog. Nws pab kuv ua raws li tus Xib Hwb lo lus caw uas hais tias: “Los, nrog kuv mus”—mus taug kev li tus Cawm Seej taug, nrhiav ib yam li tus Cawm Seej nrhiav, thiab hlub ib yam li tus Cawm Seej hlub. Ntau hlis, tom qab kuv ua tub txib li no, kuv tau txiav txim los ua kev cai raus dej thiab tau mus ua tub txib tiag.
Cia peb ua raws li Thawj Tswj Hwm Russell M. Nelson kev caw los cuag tus Cawm Seejthaum uas peb nco qab txog tej leeg nqaij ntawm sab ntsuj plig thiab pib xyaum ua tej ntawd kom loj hlob tuaj. Nov yog kev sib xeem khiav uas kav ntev mus, tsis khiav ceev xwb, ces yuav tsum nco qab txog tej yam me me ntawm sab ntsuj plig uas yuav ntxiv dag ntxiv zog rau tej leeg nqaij ntawm sab ntsuj plig. Yog peb xav kom peb txoj kev ntseeg yuav loj hlob tuaj, ces cia peb ua tej yam uas xav tau txoj kev ntseeg ntawd.
Kuv hais kuv zaj lus tim khawv tias peb yog Leej Txiv Saum Ntuj Ceeb Tsheej cov me nyuam uas Nws hlub heev. Nws tus Tub, Yexus Khetos, hlub peb. Nws los nyob hauv ntiaj teb no los qhia txoj kev rau peb thiab txawm tso Nws lub neej tseg kom peb tau chaw cia siab. Tus Cawm Seej caw peb kom ua raws li Nws tus yam ntxwv uas zoo tag nrho, kom peb muaj kev ntseeg ruaj khov rau Nws thiab Nws txoj Kev Theej Txhoj, thiab kom peb siv peb txhua lub txiaj ntsim ntawm sab ntsuj plig los ua tej yam zoo. Nws yog txoj hau kev. Nov yog kuv zaj lus tim khawv los ntawm Yexus Khetos lub npe, amees.