E Mafai Ona Tatou Faia Ia Lelei Atu ma Ia Tatou Lelei Atu
Ia i ai lou taulaiga i le salamo i aso taitasi ia matuā taua i lou olaga lea e mafai ona e faaaogaina ai le perisitua i le mana sili atu nai lo se isi lava taimi muamua.
O’u uso pele, e musuia le vaavaai atu i lenei faapotopotoga tele o le autau a le Alii o ē umiaina le perisitua. Oka se malosiaga tele mo lo outou lelei! Matou te alolofa ia te outou. Matou te tatalo mo outou. Matou te matuā faafetai atu mo outou.
Talu ai nei sa ou tosina atu ai i le faatonuga a le Alii na tuuina mai e ala mai i le Perofeta o Iosefa Samita: “Ia leai se mea e te fai atu i lenei tupulaga tau lava o le salamo.” O lenei folafolaga e masani ona ta’ua soo i tusitusiga paia. E uunaia ai se fesili manino: “Pe manaomia ea e tagata uma ona salamo?” O le tali o le ioe.
Ua toatele naua tagata e mafaufau i le salamo o se faasalaga—o se mea e ao ona aloese ai vagana ai tulaga sili ona matuiā. Ae o lenei lagona o le faasalaina e mafua mai ia Satani. E taumafai o ia e poloka i tatou mai le vaai atu ia Iesu Keriso, o lē tu mai ma aao mafola, ma le faamoemoe ma le naunautai e faamalolo, faamagalo, faamamā, faamalosia, ma faapaiaina i tatou.
O le upu salamo i le FaaElenei i le Feagaiga Fou o le metanoeo. O le muai fasi upu (prefix) o le meta o lona uiga o le “sui.” O le fasi upu mulia’i o le noeo e fesootai i upu Eleni e uiga ma le “mafaufau,” “iloa,” “agaga,” ma le “mānāva.”
O lea la, pe a fetalai mai Iesu ia te oe ma a’u ia “salamo,” o loo Ia valaauliaina i tatou ia sui o tatou mafaufau, lo tatou iloa, o tatou agaga—e oo lava i le auala tatou te mānāva ai. O loo Ia talosagaina i tatou ia sui le ala tatou te alolofa atu ai, mafaufau ai, auauna atu ai, faaalu ai o tatou taimi, taulimaina ai a tatou avā, aoao atu ai a tatou fanau, ma le tausiga o o tatou tino.
E leai se mea e sili atu ona saoloto, sili atu ona malualii, pe sili atu ona taua i lo tatou alualu i luma faaletagata lava ia nai lo se taulaiga masani i aso taitasi i le salamo. O le salamo e le o se mea e faa-tasi ona tupu; ae o se faagasologa. O le ki i le fiafia ma le filemu o le mafaufau. Pe a vaavaalua ma le faatuatua, e tatala e le salamo lo tatou faitotoa e maua ai le mana o le Togiola a Iesu Keriso.
Pe o e malaga ma le filiga i luga o le ala o feagaiga, pe ua see ese pe laa ese mai le ala of feagaiga, pe ua lē mafai ona vaai atu i le ala mai le mea o e i ai i le taimi nei, ou te aioi atu ia te oe ia salamo. O le lagonaina o le mana faamalosiau o le salamo i aso taitasi—o le faia ma le avea ma se tagata lelei teisi atu i aso taitasi.
A tatou filifili e salamo, ua tatou filifili e sui! Ua tatou faatagaina le Faaola e suia i tatou i o tatou lava ituaiga tagata silisili. Tatou te filifili e tuputupu a’e faaleagaga ma maua le olioli—le olioli o le togiolaina ia te Ia. A tatou filifili e salamo, ua tatou filifili ia avea atili e faapei o Iesu Keriso!
Uso e, e manaomia ona tatou faia ia lelei atu ma ia tatou lelei atu ona o loo tatou i ai i se taua. O le taua ma le agasala e moni. Ua matuā faateleina e le tiapolo ana taumafaiga e faavaivaia molimau ma taofia le galuega a le Alii. O loo ia faaauupegaina ana au i meatau malolosi e taofia i tatou mai le mauaina o le olioli ma le alofa o le Alii.
O le salamo o le ki lea e aloese ai mai le faanoanoa ua mafua mai i mailei a le tiapolo. E le o faamoemoeina e le Alii se atoatoa mai ia i tatou i lenei taimi i lo tatou alualu i luma e faavavau. Ae ua Ia faamoemoeina i tatou ia faateleina lo tatou mamā. O le salamo i aso taitasi o le ala lea i le mamā, ma le mamā na te aumaia le mana. O le mamā faaletagata lava ia e mafai ona faia i tatou e avea ma meafaigaluega mamana i aao o le Atua. O lo tatou salamo—lo tatou mama—o le a faamanaina i tatou ia fesoasoani i le faapotopotoina o Isaraelu.
Sa aoao e le Alii le Perofeta o Iosefa Samita e faapea “o aiā a le perisitua ua fesootai e lē mavavaeeseina ma mana o le lagi, ma o mana o le lagi e lē mafai ona pulea pe faaaogaina tau lava i mataupu autu o le amiotonu.”
Ua tatou iloa mea o le a tatou maua ai le avanoa tele atu i mana o le lagi. Ua tatou iloa foi mea o le a faalavelave i lo tatou alualu i luma—o mea e manaomia ona tuu e lē toe faia e faateleina ai lo tatou mauaina o mana o le lagi. Uso e, saili ma le agaga tatalo ia malamalama po o a mea na o loo faalavelave i le ala o lou salamo. Ia iloa po o a mea na e taofia oe mai le salamo. Ona sui lea! Salamo! E mafai e i tatou uma ona faia ia lelei atu ma ia tatou lelei atu nai lo se isi lava taimi muamua.
O loo i ai ni auala maoti ia e mafai ona tatou faaleleia. O le tasi o le auala tatou te taulimaina ai o tatou tino. Ou te tu ma ofo i le vavega o le tino o le tagata. O se foafoaga ofoofogia, e taua i lo tatou agai faasolosolo i luga i lo tatou gafatia sili faalelagi. E lē mafai ona tatou alualu i luma e aunoa ma [le tino]. I le tuuina mai ai ia i tatou o le meaalofa o se tino, ua faatagaina ai i tatou e le Atua ia faia se laasaga taua i le avea atili e faapei o Ia.
Ua malamalama Satani i lenei mea. Ua lē fiafia o ia i le mea moni, ona o lona tetee i le muai olaga ua tumau ai lona lē agavaa i lenei faamanuiaga, ma tuua ai o ia i se tulaga tumau o le lotoleaga ma le ita. O lea o le tele, pe afai e le o le anoano o faaosoosoga na te tuu i o tatou ala e mafua ai ona tatou faaleaga o tatou tino po o tino o isi. Ona ua pagatia Satani e aunoa ma se tino, ua ia manao ai ia tatou pagatia ona o o tatou tino.
O lou tino o lou malumalu patino lea, na foafoa e faofale ai lou agaga e faavavau. O lou tausiga o lena malumalu e taua. Ou te fesili atu nei ia outou, uso e, o sili ea lou naunau e fai ou laei ma teuga o lou tino ia fiafia i ai le lalolagi nai lo le faafiafiaina o le Atua? O lau tali i lenei fesili e avatu ai se feau tuusao ia te Ia e uiga i ou lagona e faatatau i Lana meaalofa ofoofogia ia te oe. I lenei faaaloalo mo o tatou tino, uso e, ou te manatu e mafai ona tatou faia ia lelei atu ma ia tatou lelei atu.
O le isi auala e mafai foi ona tatou faia ia lelei atu ma ia tatou lelei atu ai o le auala tatou te faamamaluina ai tamaitai i o tatou olaga, e amata i o tatou taitoalua ma afafine, o o tatou tina ma tuafafine.
I masina ua alu, sa ou maua ai se tusi lotonutimomoia mai se tuafafine pele. Sa ia tusi mai: “Ua [ou lagonaina ma la’u fanau teine] o loo matou i ai i se tauvaga matautia mo le gauaiga lē faalavelaveina a lo’u toalua ma ona atalii, i taaloga 24/7, taaloga vitio, fefaatauaiga o mea fou, [ma le] iloiloga ma le matamataina le muta o taaloga uma e mafai ona mafaufauina. E foliga mai ua lē toe taua i matou i lo’u toalua ma atalii ona o o latou taimi ua faamuamua tumau i [taaloga ma isi faafiafiaga].”
Uso e, o lou tiute muamua ma le sili o sē umia le perisitua o le alofa ma lou popole lea mo lou toalua. Ia tasi ma ia. Ia avea ma ana soa. Ia faafaigofie mo ia ona manao ia fai o ia ma ou au. E leai se isi faanaunauga i le olaga e tatau ona ave i ai le faamuamua i lo le fausiaina o se mafutaga e faavavau ma ia. E leai ma se mea i le TV, se masini feaveai, po o se komepiuta e sili atu ona taua nai lo lona tulaga manuia. Ia fai se sailiiliga o le auala o loo faaalu ai lou taimi ma po o fea foi o tuuto atu i ai lou malosi. O iina o le a ta’u atu ai ia te oe le mea o loo i ai lou loto. Tatalo ia ogatusa lou loto ma le loto o lau avā. Saili ia aumaia ia te ia le olioli. Saili atu i lana fautuaga ma faalogo i ai. O ona manatu o le a faaleleia ai au amioga.
Afai e i ai sou manao ia salamo ona o le ala o loo e taulimaina ai tamaitai e sili ona latalata ia te oe, amata nei loa. Ma ia manatua o lou tiutetauave lena e fesoasoani ai i tamaitai i lou olaga ia maua faamanuiaga ia e oo mai i le ola ai i le tulafono a le Alii o le ola mamā. ‘Aua ne’i avea oe ma mafuaaga e lē mafai ai e se tamaitai ona mauaina ona faamanuiaga o le malumalu.
Uso e, e manaomia uma ona tatou salamo. E manaomia ona tatou ō ese mai nofoa faamalū, tuu i lalo masini faatonutonu, ma feala i luga mai le moegase faaleagaga. Ua oo i le taimi e faamoulu ai le ofutau atoatoa o le Atua ina ia mafai ona tatou auai ai i le galuega aupito sili ona taua i luga o le fogaeleele. Ua oo i le taimi e “sasau atu [ai a tatou] selesaito, ma selesele ma o [tatou] manatu atoa, mafaufau atoa, ma le malosi atoa.” O mana o le tiapolo sa le’i salalau atu ma le malolosi tele nai lo le mea ua i ai i nei aso. I le avea ai ma auauna a le Alii, e le mafai ona tatou momoe a o vevela ai lenei taua.
O loo manaomia e lou aiga lau taitaiga ma le alofa. O loo manaomia e lau korama ma i latou i lau uarota po o le paranesi lou malosi. Ma o i latou uma e feiloai ia te oe e manaomia ona iloa pe faape’i foliga ma amioga o se soo moni o le Alii.
O’u uso pele, na filifilia outou e lo tatou Tama ia o mai i le lalolagi i lenei taimi taua ona o lou lototoa faaleagaga i le muai olaga. Ua i ai faatasi oe ma alii sili ona lelei ma totoa ua o mai i le lalolagi. Na iloa e Satani po o ai oe ma po o ai oe mai le muai olaga, ma e na te malamalama i le galuega e tatau ona faia a o le’i toe afio mai le Faaola. Ma i le mavae o le faitau afe o tausaga o le faiga o lona poto faitogafiti, ua atamai ai le tiapolo ma e lē mafai ona sui o ia.
Ma le lotofaafetai, o le perisitua ua tatou umia e matuā malosi atu nai lo mailei a le tiapolo. Ou te augani atu ia te outou ia avea ma alii ma alii talavou e manaomia e le Alii ona avea ai outou. Ia i ai lou taulaiga i le salamo i aso taitasi ia matuā taua i lou olaga lea e mafai ona e faaaogaina ai le perisitua i le mana sili atu nai lo se isi lava taimi muamua. Ua na o le pau lava lenei o le auala o le a e tausia ai oe lava ia ma lou aiga ia saogalemu faaleagaga i aso luitauina o i luma atu.
E manaomia e le Alii ni alii o ē e faamuamuaina le tulaga manuia o isi nai lo i latou lava. E manaomia e Ia ni alii o ē galulue ma le faamoemoe ia lagonaina ma le manino le siufofoga o le Agaga. E manaomia e Ia ni alii o le feagaiga o ē tausia a latou feagaiga ma le amiosa’o. E manaomia e Ia ni alii o ē naunau e tausia i latou lava ia mamā mai feusuaiga [eleelea]—ni alii agavaa e mafai ona valaau atu i ai i se taimi vave e tuu atu ni faamanuiaga faatasi ma ni loto mamā, mafaufau mamā, ma ni lima e loto [e auauna atu]. E manaomia e le Alii ni alii e loto e salamo—o alii e i ai le naunautaiga e auauna atu ma avea o se vaega o le autau a le Alii o ē umia ma le agavaa le perisitua.
Ou te faamanuia ia te outou ina ia avea ma na alii. Ou te faamanuia ia te outou i le lototele e salamo ai i aso taitasi ma aoao le auala e faaaoga ai atoa le mana o le perisitua. Ou te faamanuia ia te outou ia fesootai atu le alofa o le Faaola i lou toalua ma lau fanau ma i latou uma e iloa oe. Ou te faamanuia ia te oe ina ia faia ia lelei atu ma ia e lelei atu. Ma ou te faamanuia ia te oe a o e faia nei taumafaiga, o le a e vaai i vavega i lou olaga.
O loo tatou i ai i le galuega a le Atua Silisili Ese. O Iesu o le Keriso. O i tatou o a La auauna. Ou te molimau atu ai i le suafa o Iesu Keriso, amene.