Leoleo Mamoe Lelei, Tamai Mamoe a le Atua
E valaauina i tatou e Iesu Keriso i Lona siufofoga ma i Lona suafa. Na te saili ma faapotopoto i tatou. Na te aoao mai i tatou i le ala e auauina atu ai i le alofa.
Uso e ma tuafafine pele, na i ai se taimi sa faigata ai ona e moe ma taumafai ai e faitau faalemafaufau ni mamoe? A o feosofi ae mamoe fulufulua i luga o le pa, e te faitauina: 1, 2, 3, … 245, 246, … 657, 658 …
I lo’u la tulaga, o le faitauina o mamoe ou te le fia moe ai. Ou te popole i le misi po o le leiloa o se tasi, ma o lena mea ou te ala ai lava.
Faatasi ai ma le tamaitiiti leoleo mamoe lea na avea ma tupu, ua tatou tautino atu ai:
“O Ieova o lo’u leoleo mamoe o ia; e leai se mea ou te mativa ai.
“Na te ave au i le mea e i ai le vao mu’a ou te taoto ai: na te taitai ia te au i tafatafa o vai e tafe lemu.
“Na te faafoisia mai lo’u agaga.”
I lenei vaitau o le Eseta, tatou te faamanatu ai le Leoleo Mamoe Lelei, o Ia foi o le Tamai Mamoe a le Atua. Mai Ona suafa uma faalelagi, e leai se isi [suafa] e sili ona maaleale ma sili ona taua. E tele mea ua tatou aoao mai le faatatauga a le Faaola ia te Ia Lava o se Leoleo Mamoe Lelei ma mai molimau faaperofeta e uiga ia te Ia o le Tamai Mamoe a le Atua. O nei matafaioi ma faatusa e felagolagomai ma le mamana—o ai e sili ona fesoasoani i tamai mamoe faapelepele taitasi nai lo le Leoleo Mamoe Lelei, ma o ai e sili atu ona avea ma o tatou Leoleo Mamoe Lelei nai lo le Tamai Mamoe a le Atua?
“Aua ua faapea lava ona alofa mai o le Atua i le lalolagi ua Ia aumai ai Lona Atalii e Toatasi,” na fanaua, ma na ofo mai e le Alo e Toatasi na Fanaua a le Atua Lona soifua i le usiusitai naunautai i Lona Tama. Na molimau mai Iesu, “O a’u le leoleo mamoe lelei: e tuu atu e le leoleo mamoe lelei lona ola e sui a’i mamoe.” Na i ai ia Iesu le mana e tuu atu ai Lona soifua ma le mana e toe aumai ai. I le tuufaatasia ai ma Lona Tama, ua tulagaese ai le faamanuiaina o i tatou e lo tatou Faaola, e le gata i le avea ai ma o tatou Leoleo Mamoe Lelei ae o le Tamai Mamoe foi a le Atua.
I le avea ai ma lo tatou Leoleo Mamoe Lelei, e valaauina i tatou e Iesu Keriso i Lona siufofoga ma i Lona suafa. Na te saili ma faapotopoto i tatou. Na te aoao mai i tatou i le ala e auauina atu ai i le alofa. Se’i o tatou mafaufau i autu nei e tolu, e amata i Lona valaau mai ia i tatou i Lona siufofoga ma i Lona suafa.
Muamua, o lo tatou Leoleo Mamoe Lelei “e valaau e ia i ana lava mamoe i o latou igoa. … Ua latou iloa lona leo.” Ma, o lona lava suafa ua ia valaauina ai outou, o le suafa lava lea o Keriso.” A o tatou saili ma le manatu moni e mulimuli ia Iesu Keriso, e oo mai musumusuga ia faia ni mea lelei, alofa i le Atua, ma auauna atu ia te Ia. Pe a tatou suesue, mafaufau loloto, ma tatalo; pe a tatou faafouina e le aunoa feagaiga o le faamanatuga ma le malumalu; ma pe a tatou valaauliaina tagata uma e o mai i Lana talalelei ma sauniga, ua tatou usiusitai i Lona siufofoga.
I o tatou aso, ua fautuaina i tatou e Peresitene Russell M. Nelson ina ia valaau le Ekalesia toefuataina i le igoa na faaalia mai e Iesu Keriso: O Le Ekalesia a Iesu Keriso o le Au Paia o Aso e Gata Ai. Na fetalai mai le Alii, “Soo se mea tou te faia, ia outou faia i lo’u igoa; o lea ia outou faaigoa ai le ekalesia i lo’u igoa; ma ia outou valaau atu i le Tama i lo’u igoa ina ia faamanuia mai o ia i le ekalesia ona o a’u.” I le lalolagi atoa, i o tatou loto ma fale, tatou te valaau atu i le Tama i le suafa o Iesu Keriso. Ua faafetai ai mo faamanuiaga agaalofa o a tatou tapuaiga, suesueina o le talalelei, ma gaoioiga anoa faaleaiga e faatotonugalemu-i-le-aiga, ma lagolagoina-e-le-Ekalesia.
Lona lua, e saili ma faapotopoto mai e le Leoleo Mamoe Lelei i tatou i totonu o Lana lafu e tasi. Na Ia fetalai mai, “O ai ea so outou e ana mamoe e selau, afai e leiloa le tasi, e le tuua e ia le ivagafulu ma le iva i le vao, ae alu ma saili i le na leiloa, seia maua?”
E aapa atu lo tatou Faaola i le toatasi faapea ma le iva sefulu ma le iva, e masani lava i le taimi lava e tasi. A o tatou auauna atu, tatou te faamamaluina le ivasefulu ma le iva o ē tumau ma le lē mafaagaeetia, e tusa lava pe tatou te faanaunau atu i le toatasi ua se ese. E saili ma laveai i tatou e lo tatou Alii “mai nofoaga uma,” “mai tuluiga e fa o le lalolagi.” Na te faapotopotoina i tatou e ala i le feagaiga paia ma Lona toto togiola.
Sa ta’u atu e lo tatou Faaola i Ona soo i le Feagaiga Fou, “Ua ia te au foi isi mamoe e le o i lenei lotoa.” I Amerika, na molimau atu le Alii toetu i fanau o le feagaiga a Liae, “O outou o a’u mamoe.” Ma na fetalai atu Iesu ma e i ai foi isi mamoe o le a faalogo i Lona siufofoga. O se faamanuiaga le avea ai o le Tusi a Mamona ma se tasi o molimau o loo molimau mai i le siufofoga o Iesu Keriso!
Ua valaaulia e Iesu Keriso le Ekalesia e talia tagata uma o ē faalogo i Lona siufofoga ma tausi Ana poloaiga. E aofia i le aoaoga faavae a Keriso le papatisoga e ala i le vai ma e ala i le afi ma le Agaga Paia. Sa fesili Nifae, “afai na tatau i le Tamai Mamoe a le Atua, o lē ua Paia, ona papatiso i le vai, ina ia faataunuuina mea tonu uma, o lea la, ua lē sili atu ea ona tatau ia te i tatou, ua lē paia, ona papatiso, ioe, i le vai lava!”
I le asō, ua finagalo lo tatou Faaola o mea tatou te faia ma le tagata o avea ai i tatou o le a valaauliaina ai isi e o mai, ma mulimuli mai ia te Ia. O mai ma saili i le alofa, faamalologa, fesootaiga, ma le feagaiga o loo i ai ia te Ia, e aofia ai ia totonu o malumalu paia o le Atua, lea e mafai ai e sauniga paia o le olataga ona faamanuiaina tagata uma o aiga, ma faapotopoto ai Isaraelu i itu uma e lua o le veli.
Lona tolu, i le avea ai ma “Leoleo Mamoe o Isaraelu,” ua faaalia mai e Iesu Keriso le ala o loo auauna atu ai ma le alofa leoleo mamoe o Isaraelu. Afai e fesili mai lo tatou Alii pe tatou te alolofa ia te Ia, e pei ona Ia faia ia Simona Peteru, o le a aioi mai lo tatou Faaola: “Fafaga i a’u tamai mamoe. … Fafaga i a’u mamoe. .… Fafaga i a’u mamoe.” Ua folafola mai e le Alii afai e fafaga e Ana leoleo mamoe Ana tamai mamoe ma mamoe, e “le toe fefefe [i latou o i Lana lafu], latou te le matatau foi, e leai so latou e le iloa.”
Na lapatai mai lo tatou Leoleo Mamoe Lelei e lē tatau i Leoleo Mamoe o Isaraelu ona momoe, pe taapeape pe mafua ai ona se ese mamoe, pe vaaia ni a tatou lava auala mo ni a tatou lava manuia. O Leoleo Mamoe Lelei e faamalosia, faamalolo, fusia lē ua gau, toe au mai lē ua tuliesea, saili i lē ua se.
Ua lapatai mai foi le Alii e uiga i auauna, o ē “le manatu foi o ia i mamoe,” ma “perofeta pepelo o e e o mai ia te outou i ofu faamamoe, ae i totonu o luko feai lava i latou.”
E olioli lo tatou Leoleo Mamoe Lelei pe a tatou faaaogaina le faitalia a tagata taitoatasi ma le faamoemoe ma le faatuatua. E vaavaai atu i latou o i Lana lafu i lo tatou Faaola ma le lotofaafetai mo Lana taulaga togiola. Ua tatou osi feagaiga ia mulimuli ia te Ia, e le o le filemu, tauaso, pe “matamuli,” ae o le manao ma o tatou loto ma mafaufau atoa ia alofa atu i le Atua ma o tatou tuaoi, tauave avega a isi ma olioli i le fiafiaga o isi. A o tuuto saoloto atu e Keriso Lona finagalo i le finagalo o le Tama, o lea ia tatou tauave ai foi ma le migao i o tatou luga Lona suafa. Tatou te saili atu ma le fiafia ia auai i le galuega o le faapotopotoina ma le auauna atu i fanau uma a le Atua.
Uso e ma tuafafine, o Iesu Keriso o lo tatou Leoleo Mamoe Lelei atoatoa. Ona sa Ia tuuina mai Lona soifua mo i tatou ma ua toetu nei ma le mamalu, o Iesu Keriso foi, o le Tamai Mamoe atoatoa a le Atua.
O le Tamai Mamoe a le Atua mo le taulaga sa faaataata mai i le amataga. Na ta’u atu e le agelu ia Atamu o lana taulaga “o se faatusa lea o le taulaga a le Toatasi na Fanaua e le Tama,” lea e valaauliaina ai i tatou ia “salamo ma valaau atu i le Atua i le suafa o le Alo e faavavau.”
O Tama Aperaamo, o lē na faavaeina faamanuiaga o feagaiga mo malo uma o le lalolagi, na tofo i le uiga o le ofoina atu o lona atalii e toatasi.
“Ona fai atu lea o Isaako i lona tama o Aperaamo, ua faapea atu, Lo’u tama e; ona tali mai lea o ia, Lo’u atalii e, o a’u lenei. Ona fai atu lea o ia, Faauta i le afi ma fafie: ae o fea le tamai mamoe …?
“Ona tali mai lea o Aperaamo, Lo’u atalii e, e aumai e le Atua se tamai mamoe māna.”
Na muai vaaia ma olioli aposetolo ma perofeta i le misiona na muai faauuina a le Tamai Mamoe a le Atua. Na molimau mai Ioane i le Lalolagi Tuai ma Nifae i le Lalolagi Fou e uiga i “le Tamai Mamoe a le Atua,” “ioe, o le alo lava o le Tama Faavavau[,] … le Togiola o le lalolagi.”
Na molimau mai Apinati i le taulaga togiola a Iesu Keriso: “O i tatou uma, e pei o mamoe, ua se ese; ua tatou taitasi ma liliu atu le tagata i lona lava ala; ma ua faafafa e le Alii i ona luga amioletonu a i tatou uma.” Na ta’ua e Alema le taulaga maoae ma mulimuli a le Alo o le Atua o le “mea e tasi e sili atu ona taua nai lo ia mea uma.” Ua faamalosiau mai Alema, ia “Maua le faatuatua i le Tamai Mamoe a le Atua”; “o mai ia, ma aua le fefefe.”
Na faasoa mai e se uo pele le ala na ia maua ai lana molimau faapelepele e uiga i le Togiola a Iesu Keriso. Sa ia ola a’e ma talitonu o le agasala e aumaia i taimi uma faasalaga mamafa na mafua mai ia i tatou lava ia. Sa ia ōle atu i le Atua ia malamalama i le avanoa e maua ai le faamagaloga faalelagi. Sa ia tatalo ia malamalama ma iloa le auala e mafai ona faamagalo ai e Iesu Keriso i latou o ē salamo, pe mafai faapefea e le alofa mutimutivale ona faamalieina le faamasinogatonu.
I se tasi aso sa taliina ai lana tatalo i se aafiaga liuaina faaleagaga. Na tamoe mai i fafo o le faleoloa se alii talavou atuatuvale o loo siiina ni taga meaai na gaoia se lua. Sa ia tamoe atu i se auala pisi, tuliloa atu e le pule o le faleoloa, lea na mauaina o ia ma amata ona ee ma tauaimisa. Nai lo le lagonaina o le faamasinoina o le alii talavou fefe e pei o se gaoi, sa faafuasei lava ona faatumulia la’u uo i le agaalofa tele mo ia. Sa aunoa ma le fefe po o le popole mo lona lava saogalemu, sa ia savali sa’o atu ai i alii e toalua ia o loo finau. Sa ia faapea atu, “O le a ou totogia meaai. Faamolemole tuu o ia e alu. Faamolemole tuu mai ou te totogiina meaai.”
O le uunaia ai e le Agaga Paia ma le faatumulia i se alofa na te le’i lagonaina muamua, na fai atu ai la’u uo, “Na pau le mea sa ou manao e fai o le fesoasoani ma faasaoina le alii talavou.” Na fai mai la’u uo na amata ona ia malamalama ia Iesu Keriso ma Lana Togiola—o le auala ma le mafuaaga ma le alofa mama ma le atoatoa o le a naunau ai Iesu Keriso e ositaulaga e avea ma ona Faaola ma Togiola, ma pe aisea na ia manao ai ia avea ai o Ia.
Leitioa tatou pepese ai:
I le avea ai ma Tamai Mamoe a le Atua, ua silafia e lo tatou Faaola le taimi tatou le lagona ai le tuuatoatasi, faata’uvaaina, lē mautonu, po o le fefe. I se faaaliga, na vaai Nifae i le mana o le Tamai Mamoe a le Atua ua “[alu ifo] i luga o le au paia o le ekalesia a le Tamai Mamoe, ma luga o tagata o le feagaiga a le Alii.” E ui o le a “faataapeapeina i luga o le lalolagi atoa … sa faaauupegaina i latou i le amiotonu ma le mana o le Atua i le mamalu tele.”
O lenei folafolaga o le faamoemoe ma le faamafanafana e aofia ai o tatou aso.
Pe na o oe le tagata o le Ekalesia i lou aiga, a’oga, fale faigaluega, po o alalafaga? E i ai ni taimi e lagona ai le laitiiti pe maotua o lau paranesi? Na e siitia atu i se nofoaga fou, atonu ma se gagana po o tu ma aga e lē masani ai? Atonu o ou tulaga faaleolaga ua suia, ma o mea e te le’i mafaufauina ua fetaia’i ma oe i le taimi nei? Ua faamautinoa mai e lo tatou Faaola ia i tatou, po o a lava o tatou tulaga, po o ai lava i tatou, i upu a Isaia: “Na te sapaia tamai mamoe i ona lima, ma tauave i latou i lona fatafata, na te taitai filemu i mamoe ua fananau.”
Uso e ma tuafafine, e valaau mai lo tatou Leoleo Mamoe Lelei ia i tatou i Lona siufofoga ma i Lona suafa. Na te saili, faapotopoto, ma afio mai i Ona tagata. E ala mai i Lana perofeta soifua ma i tatou taitoatasi, Na te valaaulia ai tagata uma ia saili le filemu, faamoemoega, faamalologa, ma le olioli i le atoatoaga o Lana talalelei toefuataiina ma i Lana ala o le feagaiga. E ala i le faataitaiga, Na te aoao mai ai ia leoleo mamoe o Isaraelu ia auauna atu i Lona alofa.
I le avea ai ma Tamai Mamoe a le Atua, o le misiona paia a Iesu na muai faauuina ma olioli ai aposetolo ma perofeta. O Lana Togiola, e lē i’u ma faavavau, e totonugalemu lea i le fuafuaga o le fiafia ma le faamoemoega o le foafoaga. Na faamautinoa mai ia i tatou Na te tauaveina i tatou i talaane o Lona fatu.
Uso e ma tuafafine pele, tau ina ia tatou mananao ia “avea o ni soo lotomaualalalo o le Atua ma le Tamai Mamoe,” atonu i se aso ia tusia o tatou igoa i le tusi o le ola a le Tamai Mamoe, ia usuina le pese a le Tamai Mamoe, ia valaauliaina i le tausamaaga a le Tamai Mamoe.
I le avea ai ma Leoleo Mamoe ma se Tamai Mamoe, Ua Ia valaau mai: toe O Mai “i le malamalama moni … o [lou] Togiola, … [lou] leoleo mamoe sili ma le faamaoni.” Ua Ia folafola mai “ona o lona alofa tunoa e mafai ai ona [tatou] atoatoa ia Keriso.”
I lenei vaitau o le Eseta, tatou te vivii atu ia te Ia:
“Ua tatau lava le Tamai Mamoe!”
“Osana i le Atua ma le Tamai Mamoe!”
Ou te molimau atu e uiga ia te Ia, lo tatou Leoleo Mamoe Lelei atoatoa, o le Tamai Mamoe atoatoa a le Atua. Na te valaauina i tatou i o tatou igoa, i Lona suafa—o le suafa paia o Iesu Keriso—amene.