Vakarautaki me Rawati na Veika Kece e Ganiti
Ena yaco dina na veivakalougatataki me idole ni noda cakacaka vakaukauwa meda rawata na noda dui ilesilesi ka vulica ka taleitaka na kosipeli vakalesui mai i Jisu Karisito.
Era sa yaco tiko na veiparokaramu kei na veitaviqaravi ni Lotu i Jisu Karisito ni Yalododonu Edaidai me kena usutu na vuvale ka tokona na Lotu, me vakadinadinataki kina na vei veisau sa kaburaki tiko yani ena vica na koniferedi raraba sa oti. E vakasalataki keda kina o Peresitedi Russell M. Nelson: “E se levu sara na ka mena yaco mai. … Gunuva ga na memu vuanikau ni tiko bulabula. Vakaceguya vinaka na yagomu. Ena yaco meda taleitaka.”
Au sa masulaka tiko ka sureta na veivuke ni Yalo Tabu meda raica vata mada e vica na veika sa mai yaco mai na veiveisau sa yaco tiko oqo ena Nona Lotu na Turaga.
Vulici ni Kosipeli e Kena Usutu na Vuvale ka Tokona na Lotu
A noqu itokani voli yani o Elder Craig C. Christensen ki na dua na koniferedi ni veiliutaki ni matabete sa oti, ka a vakayagataka kina e rua na taro rawarawa me vakamatatataka na bulataki ni ivakavuvuli e kena usutu na vuvale ka tokona na Lotu. A vakatura kina meda kakua ni taroga, “Na cava o sa vulica nikua ena Lotu me baleta na iVakabula kei na Nona kosipeli?” ena gauna eda sa lesu kina ki vale ni oti na soqoni ni Lotu ena Sigatabu, ia meda taroga ga ena noda soqoni ni Lotu “Na cava o sa vulica mai vale me baleta na iVakabula kei na Nona kosipeli ena macawa oqo?” Me muri vakadodonu na vakatatabutaki ni Siga ni Vakacecegu, na lewenivuli vovou, kei na veisautaki ni gauna ni soqoni era sa veivuke kece meda vulica na kosipeli ena noda vuvale ka vavakina ena lotu.
Vei keda yadua na lewe ni Lotu i Jisu Karisito ni Yalododonu Edaidai sa dui tu na noda ilesilesi meda vulica ka bulataka na ivakavuvuli ni Turaga ka ciqoma talega mai vei ira sa tabaki oti na vei cakacaka vakalotu ni noda vakabulai ki na bula vakacerecerei. Meda kakua ni namaka ena Lotu me vaka e dua na isoqosoqo mena vakavulica ka tukuna vei keda na ka kecega e dodonu meda kila ka cakava meda rawa kina ni yaco meda tisaipeli yalodina ka vosota ena aloqaqa me yacova na ivakataotioti. Ia, sa noda dui ilesilesi ga meda vulica na ka e dodonu meda vulica, ka bulataka sara me vaka na dodonu ni veika eda sa mai kila, ka me yaco meda vakataka na tamata sa gadreva na iVakavuvuli meda na vakataka. Ia me yaco noda vei vuvale me itikotiko cecere ni kena vulici, ka bulataki, ka me tomani tikoga.
Ni a se gone, a tekivu vulica o Josefa Simici na veika ni Kalou mai nona vuvale. Ena nona sasaga me kila na loma ni Kalou vua a vakavuna me vakasaqara kina na dina ko Josefa ena vuqa na duidui matalotu Vakarisito, ka vakasamataka vakatitobu sara na ivolanikalou, ka masulaka ena yalodina vua na Kalou. Ni sa lesu yani ki nona vale na cauravou o Josefa Simici mai na Veikau Tabu ni oti nodrau rairai vua na Tamada kei na Luvena, a vosa sara e liu vei tinana. Ni sa “laki ravi tu ena yasa ni irara, a qai taroga ko [tinana] se cava e manati [koya]. A sauma o [Josefa], ‘E sega ni dua na leqa—e sega ni dua na leqa vei au.’ A qai kaya vei [tinana], ‘Niu sa kila vakataki au.’” Na ka a sotava ko Josefa a vakarautaka e dua na iwalewale kaukauwa ni vuli vei keda yadua meda muria. Sa gadrevi talega meda na vulica vakai keda.
Na inaki cecere sara ni ituvatuva ni Tamada Vakalomalagi o ya mera yaco na Luvena mera vakataki Koya cake tikoga. Sa vakarautaka kina vei keda o Koya na veigauna donu meda tubu cake ka toso tikoga ki liu. E rui bibi dina noda soli igu meda vulica ka bulataka na ivakavuvuli dina ena dua na vuravura sa rui “yavalavala” ka veilecayaki ka butobuto cake tikoga. Ena sega ni rawa meda namaka meda tiko ena soqoni ni Lotu ka vakaitavi ena kena vei parokaramu meda ciqoma na taucoko ni rarama kei na veitaqomaki vakayalo me rawa ni da “vorata rawa kina e na siga ca.”
“Sa nodrau itavi vakalou na itubutubu me rau susugi ira na luvedrau ena loloma kei na buladodonu.” Sa veivuke na iliuliu ni Lotu, qasenivuli, kei na itaviqaravi veivakauqeti ki na tamata yadua kei na vuvale mera tubu cake vakayalo. Dina ga ni da gadreva kece meda vukei meda toso ki liu ena sala ni veiyalayalati, ia sa dui noda yadudua na ilesilesi e vakatabakiduataki ena noda tara cake meda kaukauwa vinaka vakayalo ka dau gugumatua.
Vakasamataki Nifai mada, na luvei Liai na parofita, ni a gadreva me raica, rogoca, ka kila vakai koya ena kaukauwa ni Yalo Tabu na veika a vulica o tamana mai na raivotu ni vunikau ni bula. E matata sara ni a gadreva vakaidina ko Nifai ka vakalougatataki kina ni se cauravou ena nodrau ivakaraitaki kei na ivakavuvuli nona “itubutubu yalovinaka,” Ia, me vakataki Josefa Simici, sa yalona sara me vulica ka kila vakai koya ga.
Kevaka eda yavutaki, o kemuni kece kei au, ena noda kilai Jisu Karisito kei na Nona kosipeli vakalesuimai ena veika era vakatavulica se tukuna vei keda ko ira na tamata, sa qai tara cake na yavu ni noda ivakadinadina baleti Koya kei na Nona cakacaka lagilagi Edaidai ena dela ni nuku. Ena sega ni rawa meda vakararavitaka sara se kerea mai na rarama ni kosipeli kei na kila-ka maivei ira na tamata—maivei ira mada ga eda lomana ka nuitaka.
Sa ka bibi kina, na nona vakavulica na Parofita ko Josefa Simici ni sa gadrevi vei ira yadudua na Yalododonu Edaidai me kila vakai koya ga “na ituvatuva kei na inaki ni Kalou me baleta na noda lako mai ki vuravura.”
“Eda na wilika ka kila rawa beka na veika kece sa volai tu me vakatekivu mai na gauna nei Atama, me baleta na inaki ni tamata vua na Kalou kei ira na agilosi ena veigauna mai muri, e dodonu meda kila tiko vakalailai. Nida wilika na veika era sotava eso, se mai na ivakatakila e soli kivei ira ena sega ni rawa ni solia vei keda meda raica vakamatata na keda ituvaki kei na noda inaki dina vua na Kalou. Na kilai ni veika oqo ena rawati duadua ga ena veika eda na sotava mai na cakacaka vakalotu ni Kalou ka sa tuvanaki oti tu mai ena vuku ni inaki o ya.”
Na kena yaco me rawati na inaki cecere vakayalo oqo ki na tamata yadua kei na matavuvale sa dua na vuna bibi sa yaco kina na parokaramu kei na itaviqaravi ni Lotu i Jisu Karisito ni Yalododonu Edaidai me sa kena usutu na vuvale ka tokona na Lotu ena gauna digitaki oqo ni itabagauna ni taucoko ni gauna.
Na Veika Sa Yaco ena Vulici ni Kosipeli e Kena Usutu na Vuvale ka Tokona na Lotu
Meu vakalekalekataka mada e vica na ka sa yaco ena vulici ni kosipeli sa mai cecere cake na kena usutu o ya na vuvale ka sa tokona na Lotu.
E koronivuli levu duadua ni vuli ni kaulotu na noda vei vuvale; E qai tarava yani na vei koronivuli ni kaulotu era sa tiko e Provo, Manila, Mexico City, kei na veivanua tale eso. Na noda kalasi uasivi duadua ni Matawilivola ni Sigatabu ena noda vuli yadudua kei na vuli vakamatavuvale e qaravi ena noda vei itikotiko; e qai tarava yani ka veivuke talega vakalevu na kalasi ni Matawilivola ni Sigatabu e qaravi ena noda vei valenilotu.
Sa tu talega ena noda vei vuvale na valenivolavola ni tuva kawa. Na veitokoni talega ni noda cakacaka ni vakadidike ni tuva kawa sa tu talega ena noda vei valenilotu.
Na kalasi bibi ni vakavakarau ki valetabu e yaco tale tikoga ena noda vei vuvale; e qai tarava yani ka bibi talega me vakayacori na kalasi ni vakavakarau ki valetabu ena kena gauna eso ena noda vei valenilotu.
E rui bibi talega ena gauna oqo meda okata me yaco noda itikotiko me noda ivakadei me vaka ga ni da “tiko ena vanua tabu” . E vakatalega kina na kena bibi me vulici na kena usutu na vuvale ka tokona na Lotu meda qaqaco vinaka kina vakayalo ka meda taqomaki talega kina nikua, kei na veisiga ni mataka.
Na Vulici ni Kena Usutu na Vuvale ka Tokona na Lotu kei na Vakavakarau ki Valetabu
Yalovinaka raica na kena vakayagataki na ivakavuvuli ni “kena usutu na vuvale ka tokona na Lotu” ki na noda dui vakavakarau yadua kei na noda bula kilikili meda ciqoma na cakacaka tabu vakalotu kei na veiyalayalati ena vale ni Turaga.
Sa dina sara, ena mana vakalevu ni vakayacori mai na vakavakarau ki valetabu ena noda dui vuvale. Ia e vuqa na lewe ni Lotu era sega ni vakadeitaka rawa na veika dodonu me tukuni kei na ka me kua ni tukuni e tautuba me baleta na veika e vakayacori e loma ni valetabu.
E vakamacalataka ko Peresitedi Ezra Taft Benson na vuna e yaco tiko kina na veilecayaki oqo:
“Na valetabu e vanua dokai ka rokovi, kei na cakacaka vakalou ena valetabu era sa cakacaka dokai ka rokovi. Ena vuku gona ni kena ituvaki tabu eda sega kina ni doudou ena so na gauna meda tukuna vakaveitalia tu na veika e baleta na valetabu kivei ira na luveda kei ira na makubuda.
“Na ka sa qai yaco, ko ya ni vuqa era sega ni kadre rawa e lomadra na gagadre dina mera gole ki valetabu, se era sa lako rawa kina, ia a sega ni levu na itukutuku era dikeva rawa me vakavakarautaki ira yani ki na kena itavi kei na veiyalayalati era na laki vakayacora.
“Au vakabauta ni na vukei ira vakalevu kevaka era kila vakavinaka sara se mai na kena itukutuku mera vakavakarautaki ira kina ki valetabu ko ira noda itabagone… [ka] na kadre e lomadra na yalo mera gadreva dina mera vakasaqara nodra veivakalougatataki ni matabete me vaka a vakasaqara o Eparama.”
Ena vukei keda e rua na idusidusi meda kila vinaka kina na veika a vakamatatataka tiko o Peresitedi Benson.
iDusidusi #1 Me vaka ni da lomana na Turaga, e dodonu meda na tukuna tiko e veigauna Nona vale tabu ena yalo vakarokoroko. E sega ni dodonu meda vakatakila se vakamacalataka na vei ivakatakilakila bibi era sema tiko ki na veiyalayalati eda laki ciqoma ena vei cakacaka tabu ni valetabu. Me kua talega nida veitalanoataka na itukutuku bibi eda yalataka vakayadudua ena loma ni valetabu meda kakua ni tukuna.
iDusidusi #2 Na valetabu e vale ni Turaga. Na veika kece e loma ni valetabu e dusimaki keda vua noda iVakabula, ko Jisu Karisito. Eda na rawa ni veitalanoataka na vei inaki taumada kei na vunau kei na ivakavuvuli era sema ki na vei cakacaka vakalotu kei na veiyalayalati ni valetabu.
E veivakasalataki o Peresitedi Howard W. Hunter: “Meda wasea vata kei ira na luveda na veika vakayalo eda vakila ena valetabu. Ka meda gumatua tikoga ka vakavulici ira vakavinaka cake sara ena veika dodonu eda rawa ni tukuna me baleta na vei inaki eso ni vale ni Turaga.”
Mai na vei tabatamata me vakatekivu mai vua na Parofita ko Josefa Simici kivei Peresitedi Russell M. Nelson, e sa rabailevu cake sara na veika era vakatavuvulitaka tiko mai na iliuliu ni Lotu ena inaki vakaivunau ni vei cakacaka vakalotu ni valetabu kei na kena veiyalayalati. E dua na ivurevure ni wai bulabula e tiko ena veika era sa tabaki, ka rogoci, se ena vidio, kei na vei iwalewale tale eso me vukea noda vulica na cakacaka vakalotu ni inisitori, edaumeni, vakamau, kei na vei cakacaka vakalotu eso ni veivauci. Sa tu talega na itukutuku me baleta noda muria na iVakabula ena kena ciqomi ka rokovi na veiyalayalati me maroroi kina na lawa ni talairawarawa, na lawa ni solibula, na lawa ni kosipeli, na lawa ni tiko savasava, kei na lawa ni veivakatabui. E dodonu vei ira taucoko na lewe ni Lotu mera kila vakavinaka tiko na veiyaya totoka era sa vakarautaki tu ena temples.ChurchofJesusChrist.org.
E vakamacalataka ko Peresitedi Russell M. Nelson ni vakatautauvatataki na kedrau bibi na vei inaki tabu ni soqoni ni valetabu kei na vei itukutuku vakamareqeti ni valetabu e tabaka na Lotu e dodonu vinaka, matata, ka rawa ni soli raraba. “Au sa vakatura vei ira na lewenilotu … mera wilika na veivosa ena Bible Dictionary e baleta na valetabu, me vakataka na ‘Lumuta,’ ‘Veiyalayalati,’ ‘Solibula,’ kei na ‘Valetabu.’ E rawa talega vua e dua e gadreva me wilika na Lako Yani, wase 26–29, kei na Vunau ni Soro, wase 8. Na Veiyalayalati Makawa, vakakina na vola i Mosese kei na Eparama ena Mataniciva Talei, era vakamacalataka na itekitekivu ni cakacaka ni valetabu kei na inaki vakalou ni kena cakacaka vakalotu.”
Raitayalotaka mada ke taroga oqo o luvemu, “E dua e tukuna vei au mai koronivuli ni duatani sara na mataqali isulu e daramaki tiko e loma ni valetabu. E dina beka oqo?” E tiko e dua na vidio lekaleka ena churchofjesuschrist.org/temples e vakatokai na “Sacred Temple Clothing.” E vakamacalataki ena ivurevure totoka oqo ni ko ira na turaga kei na marama ni gauna makawa era vakamareqeta vakabibi eso na ivakatagi, na iwalewale duidui ni masu, kei na isulu e vakatakarakarataka na vei vakasama titobu vakalotu, na ivakatakilakila, kei na ituvaki ni nodra vakasama me vakamacalataki kina nodra yalodina tu vua na Kalou. O koya gona, e tokona na Lotu na vakavakarau e kena usutu na vuvale me rawati na veivakalougatataki lagilagi ni valetabu mai na ivakasala taumada kei na ivurevure totoka me vakataka na vidio oqo. E vuqa tale na itukutuku yaga sa vakarautaki tu vei iko .
Ni da sasaga meda lako ena yalomalumalumu ni Yalo ni Turaga, eda na vakalougatataki meda kila vinaka sara ka rawata ena noda itikotiko me tautauvata kina na veika e dodonu kei na veika e sega ni dodonu meda tukuna me baleta na vei cakacaka tabu vakalotu ni valetabu kei na kena veiyalayalati.
Yalayala kei na iVakadinadina
Au kila ni so vei kemuni ko ni lomatarotaro tiko se na rawa beka ni yaco na nomu vulica na kosipeli me kena usutu na vuvale ka tokona na Lotu. De rairai ko iko duadua ga na lewe ni Lotu ena nomu vuvale, se sega ni dau veitokoni na watimu, se ko itubutubu dua, se ko tiko duadua ka se bera ni vakawati se ko iko e dua na Yalododonu Edaidai ko sa sere, ka tu beka nomu taro ena sala cava me yaga vei iko na ivakavuvuli oqo. O drau dua beka na veiwatini o drau veiwanonovi tiko ka taroga, “E rawa beka ni daru cakava oqo?”
Io, e rawa ni drau cakava! Au sa yalataka ni na drodrovi iko yani na veivakalougatataki qaqa me laurai ena nomu bula. Ena tadola na katuba. Ena cila na rarama. Ena toso cake nomu igu ni rawaka mo cakacaka vakaukauwa ka dauvosota.
Au vakadinadinataka ni na yaco dina na veivakalougatataki me idole ni noda cakacaka vakaukauwa meda rawata na noda dui ilesilesi ka vulica ka taleitaka na kosipeli vakalesuimai i Jisu Karisito. Sa qai rawa dina meda “vakarautaki [meda] rawata na veika kece e dui ganiti [keda].” Au sa yalataka ka vakadinadinataka ena yaca tabu ni Turaga ko Jisu Karisito, emeni.