Yufala I No Mas Fraet mo Stap Glad
Bilif blong yumi we i no seksek long doktrin ia blong gospel we i kambak, we i gospel ia blong Jisas Kraes, i lidim step blong yumi mo i givim glad long yumi.
Long ol las dei blong seves blong Hem long wol ia, Jisas i talem long ol disaepol blong Hem abaot ol agens mo ol hadtaem we bae oli gotru long hem.1 Hem i talem toktok ia blong tingting i stap kwaet: “Long wol ya bambae yufala i harem nogud tumas. Be yufala i no fraet. Mi mi winim paoa blong olgeta samting blong wol ia finis” (Jon 16:33.) Hemia i mesej blong Sevya i go long evriwan long ol pikinini blong Papa long Heven. Hemia i stamba gud nyus ia blong wanwan long yumi long laef blong yumi long wol ia.
“Blong no stap fraet,” i wan toktok blong mekem tingting i kwaet long wol ia we Kraes we i laef bakegen long ded i sendem ol Aposol blong Hem oli kam long hem. Aposol Pol i talem long Ol Man Korin: “Mifala i gat trabol, be neva tingting blong mifala i foldaon. Mifala i no save rod, be neva mifala i lus olgeta; ol man oli stap ronem mifala, be oltaem mifala i gat ol fren we oli stap givhan long mifala. Ol man oli stap kilim mifala, be neva mifala i ded olgeta.” (2 Korin 4:8–9).
Tu taosen yia afta, yumi tu, yumi “gat trabol,” mo yumi tu, yumi nidim semfala mesej ia blong no lusum hop, be blong no stap fraet mo stap glad. Lod i gat wan spesel lav mo wari long ol impoten gel blong Hem. Hem i save ol samting yufala i wantem, ol nid mo ol fraet blong yufala. Lod i gat olgeta paoa. Trastem Hem.
Lod i tijim Profet Josef Smit se: “I no gat samting o man i save spolem ol wok, mo ol plan, mo ol stamba tingting blong God, mo tu, bae oli no save stopem ol samting ia blong hapen.” (Doktrin mo Ol Kavenan 3:1). Long ol pikinini blong Hem we oli gat hadtaem, Lod i talem ol toktok ia blong mekem tingting i kwaet:
“Luk, hemia i promes blong Lod long yufala, O yufala we yufala i ol wokman blong mi.
“Taswe, yufala i stap glad, mo yufala i no fraet, from we mi Lod, mi stap wetem yufala, mo bae mi stanap wetem yufala; mo bae yufala i testifae abaot mi, we mi Jisas Kraes, se mi Pikinini blong God we i laef, se mi bin stap, se mi stap, mo se bambae mi kam” (Doktrin mo Ol Kavenan 68:5–6).
Lod i i stap stanap kolosap long yumi, mo Hem i talem:
“Wanem mi talem long wan, mi talem long evriwan, yufala i mas stap glad, ol smol pikinini; from we mi stap long medel blong yufala, mo mi no livim yufala fogud” (Doktrin mo Ol Kavenan 61:36).
“From afta plante hadtaem, ol blesing oli kam.” (Doktrin mo Ol Kavenan 58:4).
Ol sista. Mi testifae se ol promes ia, we Hem i bin givim long medel blong ol hadtaem mo ol trabol blong wanwan laef, oli blong wanwan long yufala tedei long ol trabol situesen blong yufala. Ol toktok ia oli impoten tumas, blong stap mekem yumi wanwan i tingbaot blong no stap fraet mo stap glad long ful gospel ia taem yumi stap gogohed fored tru long ol jalenj we i blong laef ia.
Ol hadtaem mo ol jalenj, oli ol nomol eksperiens blong laef long wol ia. Fasin blong agens i wan pat we i nid blong stap insaed long tabu plan ia blong stap helpem yumi blong kam antap,2 mo long medel blong wokbaot ia, yumi gat ol toktok blong God we i mekem tingting i kwaet, se, long longfala lukluk ia blong taem we i no save finis, bae Hem i no letem fasin blong agens blong i winim yumi. Wetem help blong Hem mo fetful fasin blong yumi, mo fasin blong stap strong, bae yumi win. Olsem laef ia long wol we oli pat long hem, evri hadtaem oli blong sot taem. Long ol trabol we oli bin kam bifo long wan nogud wo, presiden blong Yunaeted Stet, Ebraham Linkon i bin waes mo talem long ol pipol blong hem abaot wan waes toktok blong bifo se, “hemia tu, bae i pas i gowe.”3
Olsem we yu save, ol agens blong laef long wol ia we mi stap tokbaot—we i mekem se i had blong stap glad mo no fraet—samtaem oli kam long yumi olsem i go long plante narawan, olsem ol milian man we oli stap gat hadtaem tru long ol nogud wok blong KOVID 19 wol sik ia. Semmak, insaed long Yunaeted Stet, plante milian oli stap safa tru long wan taem blong nogud filing mo raorao we oltaem i stap kam wetem ol ileksen blong presiden; be taem naoia, i wan we i moa nogud long hemia bifo we yumi save tingbaot.
Long tingting blong mi, wanwan long yumi i stap gat hadtaem wetem sam samting we i kam agens long laef long wol ia, olsem fasin blong stap pua, lukluk kala blong skin, nogud helt, lusum wok mo ol tingting we i harem nogud, ol pikinini we oli mestem rod, ol nogud mared, o no gat mared, mo ol risal blong sin—blong yumiwan, o blong ol narawan.
Be yet, long medel blong evri samting ia, yumi gat kaonsel ia we i kam long heven blong no stap fraet mo stap glad long ol prinsipol mo promes blong gospel ia, mo ol frut blong ol wok blong yumi.4 Kaonsel ia, oltaem hem i bin blong ol profet mo blong yumi evriwan. Yumi save hemia aot long ol eksperiens ia blong olgeta blong bifo, mo wanem Lod i bin talem long olgeta
Tingbaot ol situesen blong Profet Josef Smit. Sapos yumi lukluk olgeta tru long ol ae blong ol samting we oli kam agens, laef blong hem i wan puawan, i gat hadtaem, samting i fasfas, famli i harem nogud, mo i ded from bilif blong hem. Taem hem i bin safa long kalabus, waef blong hem mo ol pikinini blong hem mo ol nara Sent oli safa ol strong hadtaem taem we ol man i bin ronem olgeta i go aot long Misuri.
Taem we Josef i bin prea from help, Lod i ansa:
“ Boe blong mi, bae pis i stap long sol blong yu; ol samting we oli kam agensem yu mo ol hadtaem blong yu, oli blong smol taem nomo;
“ Mo afta, sapos yu mekem gud blong stap strong, God bae i leftemap nem blong yu long heven; mo bae yu win ova long evri enemi blong yu” (Doktrin mo Ol Kavenan 121:7–8).
Hemia i bin kaonsel ia we i blong hemwan mo i blong taem we i no save finis we i bin helpem Profet Josef blong holemtaet hem blong no fraet mo stap glad, mo blong gat lav mo stap tru long ol pipol blong hem. Ol semfala kwaliti ia, oli mekem ol lida mo ol paeonia we oli kam afta oli kam strong moa, mo oli save mekem yufala i kam strong moa tu.
!Tingting long ol fasfala memba ia! Bakegen mo bakegen, oli ronem olgeta long wan ples i go long nara ples. Laswan, oli fesem ol jalenj blong stanemap hom blong olgeta, mo Jos long wan waelples.5 Tu yia afta long ol fas grup blong ol paeonia oli kasem vale ia Bigfala Sol Lek, ol paeonia oli stil traehad blong traem laef long graon ia we i nogud. Plante long ol memba oli bin stap krosem ol ples yet, o stap gat trabol yet blong kasem samting blong krosem ol ples. Be yet, ol lida mo ol memba oli bin gat hop mo oli bin stap glad.
Iven we Ol Sent oli no bin stap gud yet insaed long niu hom blong olgeta, long Oktoba 1849 Jeneral Konfrens, oli bin sendem wan niu grup blong ol misinari oli go long Skadinavia, Franis, Jemani, Itali mo Saot Pasifik.6 Long wanem we bae yumi ting se i wan prapa nogud taem long laef blong ol, ol paeonia ia oli girap i go long nara level. Mo jes tri yia afta, oli singaotem nara 98 blong stat blong karem Isrel i kambak tugeta. Wan long ol lida blong Jos i bin eksplenem se ol misin ia, “plante taem oli no longfala; ating 3 kasem 7 yia i taem ia we eni man bae i no stap wetem famli blong hem.”7
Ol sista, Fas Presidensi i wari abaot ol jalenj blong yufala. Mifala i lavem yufala mo prea from yufala. Long semtaem, mifala i talem tangkyu se ol jalenj blong laef ia—no kaontem ol etkwek, ol faea, ol wota we oli ron, mo ol hariken—plante taem, oli no kasem mak blong wanem olgeta bifo oli bin fesem.
Long medel blong ol had taem, toktok we i mekem tingting i kwaet, oltaem hem i : “yufala i stap glad, from we bambae mi lidim yufala i go. Kingdom i blong yufala mo ol blesing blong hem, oli blong yufala, mo ol rij samting blong taem we i no save finis, oli blong yufala” (Doktrin mo Ol Kavenan 78:18). ?Olsem wanem hemia i hapen? ?Hao nao hemia i bin hapen long ol paeonia? ?Hao hemia bae i hapen long ol woman blong God tedei? Sapos yumi folem tok blong profet, “ol get blong hel bae oli no win agensem yumi,” Lod i bin talem olsem tru long wan revelesen long Epril 1830. Lod i talem: “ … Lod God bae i ronemaot ol paoa blong tudak long fored blong yufala, mo bae i mekem ol heven oli seksek blong gud blong yufala, mo blong glori blong nem blong hem” (Doktrin mo Ol Kavenan 21:6). “ Smol grup, no fraet; mekem gud; letem wol mo hel i kam wan agensem yufala, from we sapos yufala i stanap antap long strong ston blong mi, bambae oli no save win” (Doktrin mo Ol Kavenan 6:34).
Wetem ol promes blong Lod, yumi “ leftemap hat blong [yumi] mo stap glad” (Doktrin mo Ol Kavenan 25:13), mo “ wetem glad hat mo hapi fes” (Doktrin mo Ol Kavenan 59:15), yumi go fored long kavenan rod ia. Plante long yumi i no fesem ol desisen we oli bigbigwan tumas, olsem blong lego hom blong go mekem paeonia long wan ples we yumi no save long hem. Ol desisen blong yumi, i abaot evri dei fasin blong laef, be olsem Lod i talem long yumi, “Taswe, yufala i no taed blong mekem gud samting, from we yufala i stap putum fandesen blong wan bigfala wok. Mo aot long ol smol samting, ol samting we oli bigwan oli kamaot” (Doktrin mo Ol Kavenan 64:33).
I gat paoa we i no gat limit long doktrin ia blong gospel ia blong Jisas Kraes we i kambak long wol. Bilif blong yumi we i no seksek long doktrin ia i lidim step blong yumi mo i givim glad long yumi. Hem i givim laet long maen blong yumi, mo i givim paoa mo tras long ol aksen blong yumi. Laet mo daereksen ia mo paoa, oli ol promes presen we yumi bin kasem long Papa blong yumi long Heven. Taem yumi andastanem hemia mo mekem laef blong yumi i folem nomo doktrin ia, wetem tabu presen ia blong fasin blong sakem sin, bae yumi save stap glad taem yumi kipim yumiwan i stap long rod ia we i go long ples ia we i no save finis—we yumi joen bakegen mo kam stap wetem papa mo mama blong yumi long heven we oli gat lav.
“Maet yufala i stap fesem ol bigfala jalenj tumas,” Elda Richard G. Scott i tijim. “Samtaem, oli bigwan tumas, oli strong tumas, mekem se yumi filim se oli bitim paoa blong yumi blong kontrolem olgeta. No fesem wol ia yufalawan. ‘I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu’ [Ol Proveb 3:5]. … Tingting i stap finis se laef i wan jalenj, i no blong yu foldaon, be blong yu gat sakses taem yu winim ol jalenj.”8
Evri samting ia oli pat blong plan blong God Papa mo Pikinini blong Hem, Jisas Kraes, we mi testifae abaot Tufala taem mi prea se yumi evriwan bae i gohed strong i go kasem tabu ples long heven, long nem blong Jisas Kraes, amen.