Be Oltaem, Yufala I Mas Rere, mo Yufala I Mas Prea
Tedei, mi stap mekem singaot blong mi ia blong prea i go long evri pipol blong evri kantri raon long wol.
Ol dia brata mo sista blong mi. Long lasfala wik blong seves blong Hem, Jisas i bin tijim ol disaepol blong Hem blong “oltaem, yufala i mas rere, mo yufala i mas prea, sapos yufala i mekem olsem, bambae yufala i gat paoa blong ronwe long ol trabol ia, mo bae yufala i save stanap long fes blong mi, mi Pikinini blong Man.”1
Long olgeta “samting we bae i hapen” bifo Seken Kaming blong Hem, oli “[ol wo mo ol storian blong wo] … [hanggri, mo ol sik, mo ol graon i seksek, long ol defren ples.]”2
Long Doktrin mo Ol Kavenan Sevya i bin talem: “Mo evri samting bae oli muvmuv olbaot; … from fraet bae i kam long evri pipol.”3
I tru, yumi stap laef long wan taem we evri samting i stap muvmuv olbaot. Plante man oli fraet long fiuja, mo plante hat i bin tanem i go longwe long fet blong olgeta long God mo long Pikinini blong Hem, Jisas Kraes.
Ol nius ripot i fulap wetem ol stori blong fasin nogud. Fasin blong talem nogud man i kamaot onlaen. Man i nomo gat bigfala respek long ol tabu ples olsem ol simetri, ol jos, ol ples blong wosip, mo ol tabu ples blong jos.
Wan wol sik i flatem evri kona blong wol—milian blong ol pipol oli bin sik, handred blong ol taosen oli bin ded. Ol skul graduesen, ol jos seves, ol mared, misinari seves, mo plante nara impoten taem blong laef i nomo wok gud. Antap long hemia, plante pipol oli stap olgetawan mo no gat help.
Ekonomi i foldaon i givim hadtaem long fulap man, speseli long ol pikinini blong Papa long Heven we oli no strong inaf.
Yumi luk pipol oli praktisim raet blong olgeta long ol protes we i gat pis, mo yumi luk ol grup we oli kros oli mekem trabol.
Long semtaem, yumi gohed blong luk fasin blong man i go agensem narawan raon long wol.
Oltaem mi stap tingting long yufala we i stap safa, wari, fraet, o filim se yu stap yuwan. Mi wantem wanwan long yufala i save se Lod i save yu, Hem i save wari mo harem nogud blong yu, mo Hem i lavem yu—wetem ful hat blong Hem, long Hemwan, i dip, mo blong oltaem.
Evri naet taem mi prea, mi askem Lod blong blesem evriwan we oli stap harem nogud, oli harem bodi i soa, oli filim se oli stap olgetawan, mo oli no glad. Mi save ol lida blong ol nara Jos oli stap mekem semfala prea ia. Ol hat blong mifala, wanwan mo tugeta, i go long yu mo ol prea blong mifala i go long God long bihaf blong yu.
Mi spenem samfala dei las yia long notis pat blong Yunaeted Stet blong visitim ol histri ples blong Jos mo Amerika, atendem ol miting wetem ol misinari mo ol memba blong yumi, mo visitim ol lida blong gavman mo ol bisnis.
Long Sandei 20 Oktoba , mi toktok long wan bigfala grup kolosap Boston, Masajusets. Taem mi stap toktok, mi bin filim strong blong talem: “mi stap plis long yufala … blong prea from kantri ia, from ol lida blong yumi, from ol pipol blong yumi, mo from ol famli we oli stap laef long bigfala nesen ia we God i faonda blong hem.”4
Mi talem tu se, Amerika mo plante nara nesen long wol, olsem long taem we i pas finis, oli stap long wan nara impoten poen blong taem we oli nidim ol prea blong yumi.5
Plis blong mi long olgeta i no bin pat blong toktok we mi bin rere long hem. Ol toktok ia oli kam long taem mi filim Spirit i toktok long mi blong invaetem olgeta we oli stap long taem ia, blong prea from kantri mo ol lida blong olgeta.
Tedei, mi stap mekem singaot blong mi ia blong prea i go long evri pipol blong evri kantri raon long wol. Nomata olsem wanem yu prea o huia yu stap prea long hem, plis praktisim fet blong yu—nomata wanem bilif blong yu—mo prea from kantri mo ol lokol lida blong yufala. Olsem mi bin talem long Oktoba long Masajusets, yumi stanap tedei long wan bigfala kros rod long histri, mo ol nesen blong wol ia oli stap long wan bigfala nid blong kasem insperesen mo gaed we i kam long heven. Hemia i no abaot politik o polisi. Hemia i abaot pis mo hiling we i save kam long sol blong wanwan man mo woman, mo tu, sol blong ol kantri—ol siti, taon, mo ol vilej blong olgeta—tru long Prins blong Pis mo Hem we i paoa blong evri hiling, we i Lod Jisas Kraes.
Long ol las manis we i pas, mi bin kasem sam strong tingting we i kam long mi se bes wei blong helpem situesen we i stap long wol naoia, hem i blong evri pipol i dipen fulwan long God mo tanem hat blong olgeta i go long Hem tru ol prea we i tru. Blong putum tingting blong yumi i stap daon mo lukaotem insperesen blong heven blong save stanap strong kasem en o winim wanem we i stap long fored blong yumi, i wei ia nomo we i sef mo gud blong yumi muv i go fored wetem strong tingting tru long ol trabol taem ia.
Ol skripja oli haelaetem ol prea we Jisas i bin mekem, mo tu, ol tijing blong Hem abaot prea long taem blong seves blong Hem long wol ia. Bae yu tingbaot Prea blong Lod:
“Papa blong mifala. Yu yu stap long heven. Nem blong yu i tabu.
“Mifala i wantem we olgeta man oli ona long yu, mo we yu yu kam king blong olgeta man, Mo we olgeta man long wol ia oli mekem ol samting we yu yu wantem, olsem we olgeta long heven oli stap mekem.
“Plis yu givim kaekae long mifala, i naf blong tedei.
“Mo fogivim mifala long ol sin blong mifala, olsem we mifala i stap fogivim ol man we oli mekem i nogud long mifala.
“Yu no letem ol samting oli kam traem mifala tumas, mo yu blokem Setan i no kam spolem mifala: [From kingdom, mo paoa, mo glori, i blong yu blong oltaem.] Amen.”6
Prea ia we i naes mo stret, oli ripitim oltaem truaot long Kristin fasin, i mekem i klia se i stret blong singaot stret “Papa blong mifala, yu yu stap long heven” blong kasem ol ansa long ol trabol we i stap kasem yumi. Nao, letem yumi prea from help ia we i kam long heven.
Mi invaetem yu blong yu prea oltaem.7 Prea from famli blong yu. Prea from ol lida blong ol nesen. Prea from olgeta we oli stap long fored blong stap fesem olgeta jalenj we oli stap hapen long laef naoia, long saed blong envaeromen, politik, mo ol sik we i stap tajem ol pipol raon long wol, ol rij mo ol pua, ol yangfala mo olfala.
Sevya i bin tijim yumi blong no putum limit olgeta we yumi stap prea from olgeta. Hem i talem: “Yufala i mas lavem ol enemi blong yufala, mo yufala i mas prea from olgeta we oli stap mekem i nogud tumas long yufala.”8
Long kros long Kalvari, ples we Jisas i bin ded from sin blong yumi, Hem i praktisim wanem we Hem i bin tijim taem Hem i prea: “Papa, fogivim olgeta ia; from oli no save samting we oli stap mekem.”9
Blong prea wetem tru hat from olgeta we yumi tingting long olgeta olsem ol enemi blong yumi, i soem bilif blong yumi se God i save jenisim hat blong yumi mo hat blong ol narawan. Ol prea olsem oli mas mekem tingting blong yumi i strong blong mekem ol jenis we i nid blong mekem long laef blong yumiwan, ol famli, mo ol komuniti.
I nomata weaples yu stap long hem, wanem lanwis yu toktok long hem, o jalenj yu fesem, God i harem mo ansarem yu long wei mo taem blong Hem. From se yumi ol pikinini blong God, yumi go long Hem blong askem help, pis, mo mekem ol tingting blong hat blong yumi i niu bakegen blong save mekem defren long wol.
Blong stap prea from jastis, pis, ol pua, mo ol sik oltaem i no inaf. Afta we yumi nildaon long prea, yumi nid blong girap mo mekem wanem yumi save mekem blong help—blong helpem tugeta, yumiwan mo ol narawan.10
Ol skripja oli fulap wetem ol eksampol blong ol pipol blong fet we oli joenem prea wetem aksen blong mekem samting i defren long laef blong olgetawan mo ol narawan. Olsem eksampol, long Buk blong Momon, yumi rid abaot Inos. Yumi faenem se “i gat samples tu aot long tri pat blong sot buk blong hem i tokbaot gud wan prea, o plante prea, mo las pat blong stori i talem wanem hem i mekem olsem risal blong ol ansa we i bin kasem.”11
Yumi gat plante eksampol blong olsem wanem prea i mekem samting i defren long Jos histri blong yumi, i stat wetem fas prea blong Josef Smit we i prea wetem voes, long wan smol bus kolosap long haos blong ol papa mo mama blong hem long Springtaem blong 1820. Taem Josef Smit i prea from fogivnes mo blong Spirit i lidim hem, heven hem i open. Tedei, yumi stap swim long ol blesing we Profet Josef mo ol nara fetful Lata-dei Sent man mo woman we oli prea mo wok blong stanemap Jos Ia blong Jisas Kraes blong Lata dei Sent.
Oltaem mi tingbaot ol prea blong ol fetful woman olsem Mary Fielding Smith we, wetem help blong God, i gat strong tingting blong lidim famli blong hem aot long ol fasin blong givim hadtaem, long Ilinoa i go long sef ples long vale ia we famli blong hem oli kam antap gud long laef long saed blong bodi mo spirit. Afta tru prea long ni blong hem, hem i girap mo wokhad blong winim ol hadtaem mo blesem famli blong hem.
Prea bae i leftemap yumi mo karem yumi i kam tugeta olsem wanwan man mo woman, olsem famli, olsem wan Jos, mo olsem wan wol. Prea bae i givim ol paoa long ol saentis mo helpem olgeta blong faenemaot ol stik mersin mo meresin we bae i endem wol sik ia. Prea bae i givim kamfot long olgeta we oli lusum wan we oli lavem. Bae i lidim yumi blong save wanem blong mekem blong save protektem yumiwan.
Ol brata mo sista. Mi askem strong long yufala blong dabolem komitmen blong yufala blong prea. Mi askem strong long yufala blong yufala i prea insaed long ol rum blong yufala, long ol evri dei wokbaot blong yufala, long ol haos mo, wod blong yufala, mo, oltaem, long hat blong yufala.12
Long bihaf blong ol lida blong Jos Ia blong Jisas Kraes blong Ol Lata-dei Sent, mi talem tangkyu from ol prea blong yufala blong mifala. Mi askem strong blong yufala i gohed blong prea blong mekem se bae mifala i save kasem insperesen blong lidim Jos ia tru long ol hadtaem ia.
Prea i save jenisim laef blong yumi wanwan. Taem yumi stap prea wetem wan tru hat, yumi save kam antap moa mo helpem ol narawan blong mekem semmak.
Mi save paoa blong prea tru long eksperiens blong miwan. I no longtaem i pas, mi stap miwan long ofis blong mi. Mi jes go tru wan operesen long hospital nomo from han blong mi. I blak mo i blu, i solap, mo i soa bigwan. Taem mi stap sidaon long desk blong mi, mi no save tingting stret long ol impoten samting from soa ia we mi stap filim.
Mi askem Lod blong helpem mi mi tingting stret blong mekem se mi save finisim wok blong mi. Mi stanap mo gobak long ol hip blong ol pepa we i stap long tebol blong mi. Long semmak taem ia nomo, maen blong mi i kam klia mo tingting i stret, mekem se mi save finisim ol impoten samting we i stap long fored blong mi.
Maet had situesen blong wol we i stap naoia bae i luk olsem i bigwan tumas taem yumi tingting long plante samting mo ol hadtaem we i stap. Be hem i strong testemoni blong mi se sapos yumi prea mo askem Papa long Heven from ol blesing mo gaed we yumi nidim, bae yumi kam blong save olsem wanem yumi save blesem famli blong yumi, neba, komuniti, mo iven ol kantri we yumi stap laef long hem.
Sevya i bin prea mo afta Hem i “go olbaot i stap mekem ol gudfala wok”13 i fidim ol pua, i leftemap tingting mo givim sapot long olgeta we oli stap long nid, mo i givhan wetem lav, fogivnes,pis, mo spel long evriwan we oli kam long Hem. Hem i gohed blong givhan long yumi.
Mi invaetem evri memba blong Jos, mo tu, ol neba blong yumi mo ol fren blong ol nara fet grup raon long wol, blong mekem folem kaonsel we Sevya i bin givim long ol disaepol blong Hem: “Be oltaem, yufala i mas rere, mo yufala i mas prea oltaem”14 from pis, from kamfot, from sefti, mo from ol janis blong givim seves long wan narawan.
!Paoa blong prea i bigwan tumas mo wol i nidim bigwan ol prea blong yumi blong fet long God mo long Pikinini blong Hem tedei! Letem yumi tingbaot mo talem tangkyu from paoa blong prea. Long nem blong Jisas Kraes, amen.