Blong Kam Stret Evriwan Tru long Fasin blong Wet Longtaem !I Fulumap Yumi Wetem Glad!
Taem yumi putum long praktis fasin blong save wet longtaem, fet blong yumi i kam antap. Taem fet blong yumi i kam antap, glad blong yumi tu i kam antap.
Tu yia i pas, yangfala brata blong mi ,Chad, i bin go tru long vel. Taem we hem i stap muv i go long narasaed blong vel, hem i lego wan bigfala hol long hat blong tawi blong mi Stephanie; wetem tufala smol pikinini blong tufala, Braden mo Bella, mo tu, wetem ol narafala famli. Mifala i faenem kamfot long ol toktok blong Elda Neil L.Andersen long wik blong jeneral Konfrens bifo Chad i ded: “Long ol strong taem blong tes blong laef, yumi muv fored wetem longfala tingting, hiling paoa blong Sevya bae i tekem i kam long yu, laet, andastaning, pis mo hop” (“We I Karem Kil,” Liahona, Nov. 2018, 85)
Mifala i gat fet long Jisas Kraes, mifala i save se bae mifala i joen wetem Chad bakegen, !be blong lusum bodi blong hem long wol ia i soa! Fulap oli lusum olgeta we oli lavem. Hem i had blong gat fasin we i save wet long longtaem mo wet from taem ia we bae yumi mit tugeta bakegen.
Long yia afta we hem i ded, mifala i filim wan bigfala dak klaod i kavremap mifala. Mifala i lukaotem ples blong haed taem mifala stap stadi olgeta skripja blong mifala, prea moa wetem lav, mo oltaem go long tempol. Ol toktok long hym ia i tajem filing blong mi long taem ia: “Moning i girap, wol i wekap, ol klaod blong tudak i stap ronwe” (“The Day Dawn Is Breaking,” Hymns, no. 52).
!Famli blong mi i ting se long 2020 bae hem i wan gudfala yia! Mifala i stap stadi long Kam Folem Mi lesen blong mifala long buk blong Jemes long Niu Testeman, long kolosap en blong Novemba 2019, taem we stamba toktok ia i kamaot long mifala Jemes japta 1 ves 2 i rid olsem: “Ol brata mo sista. Taem plante samting oli stap kam blong traem yufala, bambae yufala i save luk olgeta olsem samting blong harem nogud.” (Josef Smit Translesen, Jemes 1:2 [ long Jemes 1:2, futnot a]). Hem i strong tingting blong mifala blong openem wan niu yia, wan niu stat blong ten yia, wetem glad, mifala i disaed se long 2020 bae mifala i “luk olgeta olsem ol samting blong harem gud.” Mifala i tingting strong long hemia mekem se long las Krismes, mifala i presen long ol brata mo sista ol T–sot we oli raetem bigwan long hem se, “Kaontem Evriwan se I Wan Glad.” Long 2020 bae i wan yia blong stap glad mo harem gud.
Be, naoia yumi stap—2020 i karem KOVID-19 wol sik, wo, plante disasta, mo jalenj long saed blong ekonomi. Maet Papa blong yumi long Heven i stap letem taem long yumi blong luklukbak mo tingting long save blong yumi long fasin blong save wet longtaem mo save wanem i raet mo rong, blong save jusum blong stap glad.
Buk blong Jemes i givim wan niu mining long mifala. Jemes japta 1 ves 3 mo 4 i gohed blong talem se:
“[Save hemia se, taem yu stap traem fet blong yu, bae i mekem yu gat fasin blong wet longtaem moa.]
“Mo yufala i mas stanap strong olwe gogo kasem en blong rod, blong bambae yufala i stret gud, yufala i no sot long wan samting.”
Long efot blong yumi blong faenem glad long medel blong ol hadtaem blong yumi, yumi fogetem se, blong gat fasin blong save wet longtaem, i ki blong letem ol hadtaem ia i wok blong gud blong yumi.
“King Benjamin i tijim yumi blong tekemaot man we i folem fasin blong wol, mo kam “wan sent tru long atonmen blong Kraes we i Lod, mo kam olsem wan pikinini, we i stap lisin, … no stap flas, … putum tingting blong hem i stap daon, … save wet longtaem, … gat plante lav, … glad blong stap biaen long evri samting” (Mosaea 3:19).
Japta 6 blong Prijim Gospel blong Mi i tijim ol stamba fasin blong Kraes we yumi save folem: “Fasin blong save wet longtaem i paoa blong save akseptem blong wan samting i tekem taem, trabol, samting we i kam agens, o safaring we i no kros wetem, o harem nogud, o wari. Hem i fasin blong save mekem tingting blong God mo akseptem taem blong Hem. Taem yu save wet longtaem, yu save holemtaet ol samting we oli kam hevi long yu, mo yu save fesem enemi long wan kwaet fasin mo wetem hop” (Preach My Gospel: A Guide to Missionary Service, rev. ed. [2019], 126).
Yumi save luk wok blong save wet longtaem tu, long laef blong wan long ol disaepol blong Kraes, Saemon, Man Kanahan. Ol Silot oli wan grup blong Ol Man Jiu we oli go agens long ol rul blong Ol Man Rom. Muv blong Silot i yusum vaelens agensem ol Man Rom, ol man we oli joen tugeta wetem Ol Man Jiu, mo Ol Man Sadusi taem oli stap stilim mo spolem ol samting mo stap gohed long ol narafala aktiviti we oli helpem stamba wok blong olgeta (luk long Encyclopedia Britannica, “Zealot,” britannica.com). Saemon, Man Kanahan i wan Silot ( luk long Luk 6:15). Traem pikjarem se Saemon i stap traem blong temtem Sevya blong i faet, i lidim wan grup blong ami, o blong mekem man i konfius long Jerusalem. Jisas i tijim:
“Mo olgeta we oli no stap flas bae oli kasem blesing, from bae oli kasem wol ia. …
“Mo olgeta we oli gat sore long man, bae oli kasem blesing from bae oli kasem sore. …
“Mo olgeta evriwan we oli mekem pis, bae oli kasem blesing, from bae oli singaotem olgeta. ol pikinini blong God” (Matiu 5:5, 7, 9).
Maet Saemon i bin lavem mo talem strong ol tijing blong hem wetem paoa mo lav, be ol skripja oli talem se, tru long wanem i stap hapen mo ol eksampol blong Sevya, lukluk blong hem i jenis. Wok blong hem olsem wan disaepol blong Kraes i kam stamba lukluk blong hem long ol efot blong laef blong hem.
Taem we yumi mekem mo kipim ol kavenan wetem God, Sevya i save helpem yumi blong “bon bakegen; yes, oli mas bon long God, oli mas jenis long [wan] fasin blong wol mo fasin blong foldaon blong olgeta we oli stap long hem, i go long wan stret mo gud fasin, from God i bin pemaot olgeta, mo oli kam ol boe mo ol gel blong hem” (Mosaea 27;25).
Aot long ol evri hadwok blong taem blong yumi long sosol saed, saed blong relijin, mo politik, letem fasin ia blong stap olsem disaepol blong Kraes i kam hadwok ia we i moa impoten long evri nara samting. “From we long weaples we ol gudgudfala samting blong yufala i stap long hem, … yufala tu i stap long ples ya.” (Matiu 6:21). Yumi no fogetem tu se, iven afta we ol fetful disaepol oli bin “mekem ol samting we God i wantem,” ol “tingting blong [olgeta] i [mas] longfala” (Hibrus 10:36).
Semmak olsem fasin blong traem fet blong yumi i mekem fasin blong save wet longtaem insaed long yumi, taem yumi traem blong save wet longtaem, fet blong yumi bae i kam antap. Taem fet blong yumi i kam antap, glad blong yumi tu i kam antap.
Long manis Maj we i jes pas, nambatu gel blong mitufala, Emma, olsem, fulap narafala misinari long Jos, oli mas go stap olgetawan. Plante long ol misinari oli kam long haos. Plante misinari oli stap wet blong oli mekembak ol misin asaenem blong olgeta Plante oli no kasem ol blesing blong tempol bifo oli go aot mo wok long fil. Tangkyu, ol elda mo sista. Mifala i lavem yufala
Emma mo kompanion blong hem long Nedalan oli traehad long ol fasfala wik—i had tumas mekem se fulap taem oli filim blong krae. Wetem sam janis nomo we oli save mit wetem ol narafala man mo smol taem nomo blong go aotsaed, fasin blong Emma blong dipen long Lod i kam antap bigwan. Mifala i prea wetem hem onlaen, mo askem olsem wanem mifala i save help. !Hem i askem blong mifala i konek wetem ol fren we hem i stap tijim olgeta onlaen!
Famli blong mifala i stat blong konek onlaen, wan afta wan, wetem ol fren blong Emma long Nedalan. Mifala i invaetem olgeta blong joen wetem mifala long Kam Folem Mi stadi blong mifala evri wik, wetem ol famli blong mifala we oli stap longwe. Floor, Laura, Renske, Freek, Benjamin, Stal, mo Muhammad oli kam fren blong mifala. Sam long ol fren blong mifala long Nedalan oli bin kam insaed “long smol get” (3 Nifae 14:13). Ol narawan tu, oli stap luk “hamas nao rod ia i stret, mo get ia i smol, we oli sapos blong gotru long hem” (2 Nifae 31:9). Oli ol brata mo sista blong mifala long Kraes. Evri wik mifala i “luk olgeta olsem ol samting blong harem gud” taem mifala i wok tugeta long progres blong mifala long rod blong kavenan.
Mifala “i mas stanap strong olwe kasem en” (Jemes 1:4) from mifala i no save mitim mifala olsem ol famli memba blong wod blong wan sisen. Be mifala i kaontem olgeta olsem glad blong famli blong mifala’ fet we i stap kam antap tru long ol niu teknoloji koneksen mo Kam Folem Mi stadi long Buk blong Momon.
Presiden Russell M. Nelson i promes se, “Ol strong efot we i gohed oltaem blong mekem wok ia—iven long ol taem we yu save filim se yu no gat tumas sakses long hem—bae i jenisim laef blong yu, hemia blong famli blong yu, mo wol ia” (“Go Fored wetem Fet,” Liahona, Mei 2020).
Ples we yumi stap mekem ol tabu kavenan wetem God—tempol—i klos blong wan sot taem nomo. Ples we yumi stap kipim olgeta kavenan wetem God—hom—!hem i open! Yumi gat janis ia long haos blong stadi mo tingting hevi long ol naesfala tempol kavenan ia. Iven sapos we i no save kam insaed long tabu spes ia long “hat blong … man bae i stap glad bigwan from ol blesing we bae mi kapsaetem” (Doktrin mo Ol Kavenan 110:9).
Plante oli lusum wok, ol narawan oli lusum ol janis blong wok. Be mifala i glad, tugeta wetem Presiden Nelson, we i jes talem: “Ol fas ofring we i kam long ol memba, we oli givim folem tingting blong olgeta nomo, oli kam antap, wetem ol kontribusen long ol yumaniterian basket tu we oli givim folem tingting blong ogleta. … Tugeta bae yumi winim hadtaem ia. Lod bae i blesem yu taem yu stap gohed blong blesem ol narafalawan” (Russell M. Nelson’s Facebook page, post from Aug. 16, 2020, facebook.com/russell.m.nelson).
“Yufala i no harem nogud” i wan komanmen we kam long Lod, blong no stap fraet (Matiu 14:27).
Samtaem yumi no save wet taem yumi ting se yumi stap “mekem evri samting i stret” mo yumi no kasem ol blesing we yumi wantem tumas blong i hapen. Inok i wokbaot wetem God blong 365 yia bifo hem mo ol pipol blong hem oli go antap long heven. Tri handred mo sikstifaef yia blong traehad blong mekem evri samting i oraet, mo afta, !hem i hapen! (Luk long Doktrin mo Ol Kavenan 107:49.)
Ded blong brata blong mi, Chad, i kam afta sam manis we oli rilisim mitufala blong stap prisaed ova long Yuta Ogden Misin. Hem i wan merikel we taem mifala i stap laef long Saot blong Kalifonia, aot long ol 417 misin we mitufala save go givim seves long hem long yia 2015, oli givim wok blong mitufala i lukaot long Not blong Yuta. Misin hom hem i 30 minit draev i go long haos blong Chad. Oli talem se Chad i gat kansa afta we mitufala i risivim misin kol blong mitufala. Iven long wan taem we i testem mitufala plante, mitufala i save se Papa blong yumi long Heven i tingbaot mitufala, mo i stap helpem mitufala blong faenem glad.
Mi witnesem paoa blong Sevya Jisas Kraes we i pemaot man, we i mekem man i kam tabu, we i mekem man i gat tingting i stap daon mo i mekem man i stap glad. Mi witnesem se taem yumi stap prea long Papa blong yumi long Heven long nem blong Jisas Kraes, bae Hem i ansa long yumi. Mi witnesem se taem yumi harem, lisin, mo folem voes blong Lod mo ol Profet blong Hem we i stap laef, Presiden Russell M. Nelson, yumi save “stanap strong olwe kasen en,” mo “!kaontem evriwan i wan glad!” Long nem blong Jisas Kraes, amen.