Cia Li Zoo Siab
Peb txoj kev ntseeg cov lus qhuab qhia ntawm Yexus Khetos txoj moo zoo yeej coj peb txoj hau kev thiab ua rau peb muaj kev xyiv fab.
Nyob hauv tej hnub kawg ntawm Nws lub neej hauv lub ntiaj teb no, Yexus Khetos tau qhia Nws cov Thwj Tim txog tej kev tsim txom thiab kev txom nyem uas lawv yuav raug. 1 Nws tau nplij lawv lub siab li no hais tias: “Neeg ntiaj teb yuav tsim txom nej: tiam sis cia li zoo siab, rau qhov kuv twb kov yeej lub ntiaj teb no lawm” (Yauhas 16:33). Nov yog tus Cawm Seej zaj lus rau tag nrho peb Leej Txiv Saum Ntuj Ceeb Tsheej cov me nyuam. Nov yog txoj moo zoo rau peb txhua tus hauv peb lub neej no.
“Cia li zoo siab” yog kev nplij siab uas tib neeg xav tau hauv lub ntiaj teb uas tus Khetos uas tau sawv rov los txib Nws cov Thwj Tim thiab. Tus Thwj Tim Povlauj tau hais rau cov Neeg Kauleethaus hais tias, “Peb niaj hnub raug kev nyuaj siab, tiam sis peb tsis poob siab; muaj qee zaus peb kawg tswv yim, tiam sis peb tsis tws kev” (2 Kauleethaus 4:8–9).
Ob txhiab xyoo tom qab ntawd peb kuj “niaj hnub raug kev nyuaj siab” thiab peb xav tau zaj lus no kom tsis txhob poob siab tiam sis cia li zoo siab. Tus Tswv yeej hlub thiab txhawj txog Nws cov ntxhais uas muaj nqis heev. Nws paub nej lub siab nyiam thiab nej tej kev ntshai. Tus Tswv muaj hwj chim tag nrho. Cia li tso siab rau nws.
Tus Tswv tau qhia tus Yaj Saub Joseph Smith hais tias “yeej rhuav tsis tau tej hauj lwm, thiab tej tswv yim, thiab tej hom phiaj ntawm Vajtswv, thiab tej ntawd yeej yuav tsis ploj mus” (Lus Qhuab Qhia thiab Kev Khi Lus 3:1). Hais rau Nws cov me nyuam uas nyuaj siab, tus Tswv tau nplij lawv li no:
“Saib seb, qhov no yog txoj kev cog lus ntawm Leej Txiv rau koj yog hais tias koj rau siab ntseeg mus ntxiv.
“Yog li ntawd, cia li zoo siab, thiab tsis txhob ntshai, vim kuv uas yog tus Tswv twb nyob nrog nej, thiab yuav sawv ntawm nej ib sab; thiab nej yuav ua pov thawj txog kuv, uas twb yog Yexus Khetos, hais tias kuv yog Vajtswv tus uas muaj txoj sia nyob Leej Tub, hais tias yeej muaj kuv, hais tias tseem muaj kuv, thiab hais tias kuv tseem yuav los” (Lus Qhuab Qhia thiab Kev Khi Lus 68:5–6).
Tus Tswv sawv ze peb, thiab Nws tau hais tias:
“Yog kuv hais dab tsi rau ib tug ces kuv hais rau sawv daws, cia li zoo siab, cov me nyuam yaus; vim kuv nyob nrog nraim nej, thiab kuv tsis tau tso nej tseg” (Lus Qhuab Qhia thiab Kev Khi Lus 61:36).
“Vim tom qab dhau tej kev txom nyem ntau ces tej koob hmoov yuav los” (Lus Qhuab Qhia thiab Kev Khi Lus 58:4).
Kuv cov muam, kuv ua tim khawv tias tej lus cog tseg no, uas tau txais thaum lawv raug tej kev tsim txom thiab tej kev nyuaj siab, yog hais rau nej txhua tus thaum nej raug tej xwm txheej niaj hnub no. Tej lus no muaj nqis heev rau peb thiab kom peb nco qab tias peb yuav tsum zoo siab thiab muaj kev xyiv fab vim peb muaj txoj moo zoo thaum peb mus tom ntej nyob hauv tej teeb meem ntawm lub neej no.
Kev tsim txom thiab kev nyuaj siab yeej yog tej yam uas peb raug hauv lub neej no. Kev tawm tsam yog ib feem ntawm Vajtswv txoj hau kev kom pab peb loj hlob tuaj, 2 thiab hauv lub neej no, Vajtswv cog lus rau peb tias nyob mus ib txhis li kev tawm tsam yuav tsis kov yeej peb. Nrog Nws txoj kev pab thiab peb txoj kev rau siab ntseeg thiab kev nyiaj mus tom kawg, peb mam li kov yeej. Ib yam li lub neej no, txhua yam kev tsim txom yuav tsis kav ntev. Hais txog tej kev tsis sib haum xeeb ua ntej kev tsov rog, lub Teb Chaws Amelikas tus thawj tswj hwm Abraham Lincoln tau hais ib lub tswv yim puag thaum ub rau txhua tus hais tias “qhov no los kuj yuav dhau mus.” 3
Tej yam uas tsim txom peb hauv lub ntiaj teb no li kuv hais—uas yuaj rau peb muaj kev zoo siab—los tej lub sij hawm raug txhua leej txhua tus, ib yam li tib neeg coob uas rau tej xwm txheej los ntawm phaum mob COVID-19. Ib yam li natwd, nyob hauv lub Teb Chaws Amelikas muaj neeg coob uas raug kev ntxub ntxaug thiab kev sib cav sib ceg uas yeej muaj thaum yuav xaiv tsa ib tug thawj tswj hwm, tiam sis zaum no los muaj kev kub ntxhov tshaj yav tas los.
Hais txog yus ib leeg, peb txhua tus muaj tej kev cov nyom los ntawm lub neej no, xws li tsis muaj nyiaj, muaj neeg ntxub yus haiv neeg, kev mob kev nkees, kev poob hauj lwm los yog kev poob siab, cov me nyuam uas tsis ntseeg lawm, kev sib yuav uas tsis zoo los sis tsis tau sib yuav, thiab tej yam uas raug los ntawm kev txhaum—peb li los yog lwm tus li.
Tiam sis, nyob hauv tag nrho tej yam no, peb muaj Vajtswv tej lus uas hais kom peb cia li zoo siab, thiab muaj kev xyiv fab los ntawm tej ntsiab cai thiab tej lus cog tseg ntawm txoj moo zoo thiab tej txiv uas txi los ntawm peb tej hauj lwm. 4 Cov lus qhia no yeej yog li no, rau cov yaj saub thiab peb txhua tus. Peb paub li no los ntawm cov uas ua neej nyob ua ntej thiab tus Tswv tau hais li cas rau lawv.
Cia li nco txog tus Yaj Saub Joseph Smith tej xwm txheej. Thaum yus xav txog tej teeb meem, yus pom tias nws lub neej yog kev txom nyem, kev tsim txom, kev poob siab, kev tu siab hauv nws tsev neeg thiab thaum kawg nws raug tua tuag. Thaum nws raug kaw, nws tus poj niam thiab me nyuam thiab lwm tus Neeg Ntseeg tau raug tej yam nyuaj heev thaum lawv raug ntiab tawm ntawm Missouri mus.
Thaum Joseph thov kom txais kev nplij siab, tus Tswv teb hais tias:
“Kuv tus tub, koj cia li nyob kaj siab lug; koj tej kev nyuaj siab thiab koj tej kev txom nyem yuav muaj nyob ib nyuag ntus xwb;
“Thiab tom qab ntawd, yog koj ua tib zoo nyiaj mus, Vajtswv yuav tsa koj mus nto ntuj; koj yuav yeej tag nrho koj cov yeeb ncuab” (Lus Qhuab Qhia thiab Kev Khi Lus 121:7–8).
Nov yog cov lus qhia uas tau pab tus Yaj Saub Joseph tseem muaj kev zoo siab thiab pab nws cov neeg hlub thiab tso siab rau nws. Tej yam no kuj tau txhawb nqa cov thawj coj thiab cov pioneer uas muaj tom qab ntawd thiab yuav txhawb nqa nej lub dag zog zoo ib yam.
Cia li xav txog cov mej zeej ntawd! Lawv pheej raug ntiab tawm ntawm ib qho mus rau ib qho. Thaum kawg lawv kov yeej qhov teeb meem uas yog kev txhim tsa lawv tej tsev thiab lub Koom Txoos nyob hauv roob moj sab qhua. 5 Ob xyoos tom qab thawj pawg pioneer tuaj txog lub hav ntawm pas dej Great Salt Lake, tseem nyuaj rau cov pioneer tau noj tau haus nyob hauv qhov chaw ntawd. Cov mej zeej feem coob tab tom taug kev mus hla tiaj tuaj los sis tseem khaws nyiaj txiag thiab khoom txaus ua li ntawd. Tiam sis cov thawj coj thiab cov mej zeej tseem muaj kev cia siab thiab zoo siab.
Txawm yog cov Neeg Ntseeg tsis tau tsa lawv tej tsev tshiab lawm los, nyob hauv lub tuam rooj sab laj thaum lub Kaum Hli Ntuj xyoo 1849 muaj ib co tub txib uas tau txib mus rau Scandinavia, Fabkis, Yelemes, Italis, thiab South Pacific. 6 Txawm muaj neeg xav tias lawv nyob theem qis tshaj plaws, cov pioneer tau mus siab heev. Thiab peb xyoos tom qab ntawd, muaj 98 tus uas tau hu kom pib muab Ixayees sau los ua ke. Ib tug thawj coj hauv lub Koom Txoos piav hais tias tej ntiag tug hauj lwm no “feem ntau, yuav tsis ntev: ntev kwv yees li 3 mus txog 7 xyoo yuav ntev tshaj ib tug txiv neej yuav tsis pom nws tsev neeg.” 7
Cov muam, Thawj Pawg Thawj Tswj Hwm txhawj txog nej tej teeb meem. Peb hlub nej thiab thov Vajtswv pab nej. Tiam sis, peb kuj ua Vajtswv tsaug vim tej xwm txheej uas peb raug—uas tsis yog av qeeg, hluav taws, dej nyab, thiab huab cua phem—tsis yog loj npaum li peb cov poj koob yawm txwv raug.
Thaum peb raug teeb meem nyuaj heev, Vajtswv yeej nplij peb lub siab hais tias, “cia li zoo siab, vim kuv yuav coj nej kev. Lub nceeg vaj yog nej li thiab tej koob hmoov uas nyob haud yog nej li, thiab tej kev nplua nuj nyob mus ib txhis yog nej li” (Lus Qhuab Qhia thiab Kev Khi Lus 78:18). Ua li cas ho muaj tau li no? Tau ua li cas thiaj muaj li no rau cov neeg pioneer? Yuav ua li cas thiaj muaj li no rau Vajtswv cov poj niam niaj hub no? Tus Tswv tau hais li no nyob hauv kev tshwm sim thaum lub Plaub Hlis Ntuj xyoo 1830 hais tias “tej qhov rooj ntawm ntuj txiag teb tsaus yuav kov tsis yeej nej” yog peb ua raws li cov yaj saub qhia. Nws hais tias, “Muaj tseeb tiag, … tus Tswv Vajtswv yuav ua kom tej hwj chim ntawm txoj kev tsaus ntuj yaj ploj ntawm nej mus, thiab ua kom lub ntuj co nto kom zoo rau nej, thiab nws lub npe lub yeeb koob” (Lus Qhuab Qhia thiab Kev Khi Lus 21:6). “Yog li ntawd, tsis txhob ntshai, pab me nyuam yaj; cia li ua tej uas zoo; cia lub ntiaj teb thiab ntuj txiag teb tsaus los koom ua ke tawm tsam neb, vim yog neb cog rau saum kuv lub pob zeb, ces lawv yuav kov tsis yeej” (Lus Qhuab Qhia thiab Kev Khi Lus 6:34).
Vim tus Tswv tau cog lus rau peb li no, peb “cia li zoo siab thiab xyiv fab” (Lus Qhuab Qhia thiab Kev Khi Lus 25:13), thiab “nrog lub siab luag nyav thiab lub ntsej muag luag ntxhi” (Lus Qhuab Qhia thiab Kev Khi Lus 59:15), peb mus tom ntej ua raws li peb tej kev khi lus. Peb feem coob tsis txiav txim siab txog tej yam loj kawg nkaus li, xws li kev ncaim peb tej tsev mus rau ib thaj av uas tsis muaj leej twg paub. Peb txiav txim siab txog tej xwm txheej uas muaj niaj hnub, tiam sis raws li tus Tswv qhia peb, “Tsis txhob nkees ua tej yam zoo, vim nej tab tom teeb lub hauv paus ntawm ib txoj hauj lwm loj. Thiab los ntawm tej yam me yuav muaj tej yam uas loj tawm los” (Lus Qhuab Qhia thiab Kev Khi Lus 64:33).
Yeej muaj hwj chim nyob hauv cov lus qhuab qhia ntawm Yexus Khetos txoj moo zoo. Peb txoj kev ntseeg cov lus qhuab qhia ntawd coj peb txoj hau kev thiab ua rau peb muaj kev xyiv fab. Cov lus qhuab qhia ntawd ua rau peb muaj tswv yim thiab txhawb peb dag zog thiab paub tias peb ua qhov yog. Cov lus qhia thiab tswv yim thiab hwj chim yog tej txiaj ntsim uas peb tau txais los ntawm peb Leej Txiv Saum Ntuj Ceeb Tsheej. Thaum peb to taub thiab ua raws li cov lus qhuab qhia ntawd, tsis hais lub txiaj ntsim uas yog kev hloov siab lees txim, peb yuav zoo siab thaum peb taug txoj kev mus rau peb txoj koob hmoov mus ib txhis—uas yog kev rov qab nyob thiab txais kev tsa nto nrog leej niam leej txiv saum ntuj ceeb tsheej uas hlub peb.
Txwj Laug Richard G. Scott qhia hais tias, “Tej zaum nej raug tej teeb meem loj heev. Tej lub sij hawm tej teeb meem ntawd tsis tu tsis tseg ua rau nej xav tias nej tswj kav tsis tau dab tsi. Tsis txhob raug tej no nej tus kheej xwb. ‘Cia siab rau tus Tswv kom kawg koj lub siab lub ntsws. Tsis txhob cia siab rau koj tej kev txawj ntse (Paj Lug 3:5). … Vajtswv twb paub tias lub neej no yuav nyuaj, tsis yog kom nej yuav swb, tiam sis kom nej yuav vam meej tom qab nej kov yeej tas.” 8
Tag nrho tej no yog los ntawm Vajtswv Leej Txiv thiab Nws Leej Tub Yexus Khetos txoj hau kev, kuv ua tim khawv li no, thiab thov kom peb yuav rau siab ntxiv mus txog thaum peb mus rau peb lub tsev saum ntuj ceeb tsheej, los ntawm Yexus Khetos lub npe, amees.