Cia Li Tus
Tus Cawm Seej qhia peb kom peb muaj kev kaj siab lug thiab nyob tiaj tus thaum cov cua sib zog nplawm ib ncig peb thiab cov nplaim dej sawv thiab ua kom peb tag kev cia siab.
Thaum wb cov me nyuam tseem me peb tsev neeg mus siv sij hawm li ob peb hnub tom ib lub pas dej. Muaj ib tav su uas ib txhia me nyuam hnav lub tsho pab yus ntab hauv dej ua ntej lawv dhia mus rau hauv dej. Wb tus ntxhais ntxawm saib lawv ua li no, ua tib zoo xauj xwb. Ces nws ua siab tawv siv ib txhais tes nyem nws qhov ntswg thiab cia li dhia kiag. Ces nws ntab rau saum dej thiab qw hais tias, “Pab kuv! Pab kuv!”
Nws yeej yuav tsis raug teeb meem dab tsi vim nws lub tsho uas pab nws ntab yeej ua hauj lwm thiab nws yeej ntab lawm. Yog peb xav rub nws tawm los peb yeej ua tau. Tiam sis tam li nws xav mas nws yuav tsum tau kev pab. Tej zaum vim cov dej txias los sis nws tsis tau ua dua xwb. Nws kuj nce tau tawm los thiab peb muaj ib txoj phuam qhuav los qhwv nws thiab peb qhuas tias nws siab tawv kawg.
Txawm peb laus los sis hluas, peb sawv daws yeej raug tej lub sij hawm ceev uas ua rau peb hais tias “Pab kuv!” “Cawm kuv!” los sis “Thov, teb kuv cov lus thov!”
Yeej muaj li no nrog Yexus cov thwj tim thaum nws qhuab qhia tib neeg. Hauv Malakaus peb nyeem hais tias Yexus “mus qhia nram ntug dej Hiav Txwv Kalilais dua ib zaug: muaj neeg coob coob tuaj cuag Yexus.”1 Neeg pib coob heev ces Yexus “tau mus rau hauv lub nkoj”2 thiab hais lus rau tib neeg. Tib neeg zaum ntawm ntug dej mloog Nws siv paj lug qhuab qhia lawv.
“Ces … thaum hmo ntuj,” Yexus hais rau nws cov thwj tim hais tias, “Peb cia li hla hiav txwv mus rau sab tim ub. Lawv ncaim sawv daws mus lawm,”3 ces lawv sawv kev hla Dej Hiav Txwv Kalilais. Yexus tau mus nrhiav ib qho chaw hauv lub nkoj mus pw thiab tsaug zog. Ces “tam sim ntawd txawm muaj cua daj cua dub hlob heev ntsawj dej ntas los rau hauv lub nkoj; dej twb yuav puv lub nkoj”4.
Yexus cov thwj tim ntau tus yeej txawj nuv ntses thiab yeej paub tswj lub nkoj thaum muaj huab cua phem. Lawv yog Nws cov thwj tim uas Nws ntseeg—muaj tseeb tiag, yog cov thwj tim uas Nws hlub. Lawv tau tso lawv tej hauj lwm tseg, tej yam uas lawv nyiam ua, thiab lawv tsev neeg kom nrog Yexus mus. Lawv yeej ntseeg Nws lawv thiaj nyob hauv lub nkoj. Thiab lawv lub nkoj tab tom raug huab cua phem thiab tab tom yuav tog mus.
Peb tsis paub lawv tau ua npaum li cas kom lub nkoj tsis txhob tog, tiam sis lawv tau mus tsa Yexus thiab hais ntshai tsawv tias:
“Xib Hwb, koj tsis ntshai tsam peb tuag los?”5
“Tus Tswv es, cawm peb lauj, peb yuav tuag.”6
Lawv hu Nws ua “Xib Hwb,” thiab Nws yeej yog. Nws kuj yog “Yexus Khetos, Vajtswv tus Tub, lub ntuj thiab lub ntiaj teb Leej Txiv, Tus Tsim tag nrho ib puas tsav yam txij puag thaum chiv keeb los.”7
Yexus tau sawv hauv lub nkoj, ces tau cem cov cua thiab hais rau cov nplaim dej uas tsa siab heev hais tias, “Cia li tus. Ces cua txawm tu thiab dej txawm tsis ntas lawm.”8 Ces Yexus tus Xib Hwb Zoo, tau qhia Nws cov thwj tim thaum nws nug ob lo lus nug. Nws nug hais tias:
“Vim li cas nej ntshai ua luaj?”9
“Ua li cas nej tsis muaj kev ntseeg li?”10
Feem ntau peb sawv daws uas yog tib neeg, uas raug kev nyuaj siab, teeb meem, los sis kev cov nyom peb yuav qw qw hais tias, “Xib Hwb, koj tsis ntshai tsam peb tuag los? Cawm kuv lauj.” Joseph Smith tau thov Vajtswv hauv lub qhov taub hais tias, “Auj Vajtswv, koj nyob qhov twg? Thiab lub tsev ntaub uas npog koj qhov chaw nkaum nyob qhov twg?”11
Tus Cawm Seej yeej to taub zoo tias peb yog tib neeg xwb, vim nws qhia peb kom peb muaj kev kaj siab lug thiab nyob tiaj tus thaum cov cua sib zog nplawm ib ncig peb thiab cov nplaim dej sawv thiab ua kom peb tag kev cia siab.
Rau cov uas muaj kev ntseeg, kev ntseeg li me nyuam yaus, los sis tsuas ntseeg me me xwb12 Yexus caw hais tias, “Los cuag kuv.”13 “Ntseeg kuv lub npe.”14 “Kawm los ntawm kuv, thiab mloog kuv tej lus.”15 Nws txib hais tias, “Hloov siab lees txim thiab ua kev cai raus dej los ntawm kuv lub npe,”16 “Nej ib leeg yuav tsum hlub ib leeg, ib yam li kuv hlub nej,”17 thiab “Nco txog kuv tas mus li.”18 Yexus piav hais tias: “Kuv qhia tej no rau nej kom nej cov uas nrog kuv yuav muaj kev kaj siab lug. Neeg ntiaj teb yuav tsim txom nej: tiam sis cia li zoo siab, rau qhov kuv twb kov yeej lub ntiaj teb no lawm.”19
Kuv xav tias tej zaum Yexus cov thwj tim uas nyob hauv lub nkoj uas txav mus txav los, saib cov dej los tsoo lub nkoj thiab tab tom tshem cov dej ntawm lub nkoj xwb. Kuv xav tias lawv yeej sim tswj tau lawv lub nkoj me me ntawd. Lawv xav kom dim lub sij hawm ntawd thiab ua zoo thov kom tau kev pab.
Muaj peb coob leej uas zoo ib yam li no niaj hnub nim no. Tas sim no lub ntiaj teb, peb teb chaws, cov zej zog, thiab txheeb ze ua rau peb pom tej kev cov nyom. Tej kev ntxhov siab no ua sim peb txoj kev ntseeg seb nws loj npaum li cas thiab to taub zoo npaum li cas. Tej kev ntshai no ua rau peb xav tsis thoob thiab ua rau peb tsis nco qab Vajtswv zoo npaum li cas, ces ua rau peb pom tej kev ncaj ncees tsis zoo. Tiam sis twb yog tej lub sij hawm no uas ua rau peb txoj kev ntseeg loj tuaj thiab muaj zog.
Txawm peb tej teeb meem yog dab tsi los peb yeej rau siab ntso ua kom peb txoj kev ntseeg yuav loj hlob thiab kom peb txoj kev ntseeg Yexus Khetos yuav muaj zog. Thaum peb nco qab hais tias peb yog Vajtswv cov me nyuam thiab Nws hlub peb. Peb txoj kev ntseeg loj hlob thaum peb ua li Vajtswv txoj lus thiab rau siab ntso thiab ua raws li Yexus cov lus qhuab qhia. Peb muaj kev ntseeg ntxiv yog peb ntseeg es tsis ua siab me, zam txim es tsis txhob txiav txim, hloov siab lees txim es tsis txhob ua phem. Peb tej kev ntseeg haj yam zoo yog peb ua siab ntev thiab cia siab rau kev hlub tshua, thiab kev tshav ntuj thiab kev ua zoo los ntawm tus Mexiyas Dawb Huv.20
Txwj Laug Neal A. Maxwell hais tias, “Kev ntseeg tsis yog paub qhov tseeb tag nrho, kev ntseeg kuj yog kev tso siab rau lub sij hawm uas Vajtswv pom zoo.”21 Txoj kev ntseeg tus Tswv Yexus Khetos yeej tseem loj thiab muaj zog thaum muaj kev kub ntxhov. Nws pab peb tshem tej yam uas tsis tseem ceeb tawm. Ua rau peb muaj zog zis mus raws txoj kev khi lus tseg. Txoj kev ntseeg pab txhawb nqa peb kom dhau kev poob siab thiab pab tau peb muaj zog zis rau yav tom ntej. Nws ceeb toom peb kom thov Vajtswv kom tau kev pab los ntawm Leej Txiv thaum peb tuav tus Tswv lub npe. Thiab thaum ua zoo li peb tsis tau tej lus teb rau peb tej kev thov Vajtswv, txoj kev ntseeg ua rau peb ua siab ntev, ua siab mos siab muag, thiab muaj zog los hais tias, “Ua raws li koj siab nyiam.”22
Thawj Tswj Hwm Russell M. Nelson tau qhia hais tias:
“Peb tsis tas cia peb txoj kev ntshai kov yeej peb txoj kev ntseeg. Peb tawm tsam tej kev ntshai ntawd thaum peb txhawb peb txoj kev ntseeg.
“Cia li pib ua li no rau nej cov me nyuam. … Ua rau lawv paub txog nej txoj kev ntseeg, tsis hais thaum nej raug txom nyem los yog. Cia siab rau peb Leej Txiv Saum Ntuj Ceeb Tsheej uas hlub peb thiab Nws Leej Tub, tus Tswv Yexus Khetos nkawd ob leeg xwb. … Qhia txhua tus tub thiab ntxhais tias nws yog Vajtswv tus me nyuam, uas tau muab tsim los ntawm Vajtswv tus yam ntxwv, uas muaj ib lub hom phiaj dawb huv. Txhua tus muaj kev cov nyom uas yuav tsum kov yeej thiab muaj kev ntseeg uas yuav tsum txhawb nqa.”23
Tsis ntev tas los no kuv hnov 2 tug me nyuam uas muaj plaub xyoos hais lus txog nkawd txoj kev ntseeg Yexus thaum nkawd teb lo lus nug no “Yexus pab koj li cas?” Ib tug hais tias, “Kuv paub Yexus hlub kuv vim Nws tuag rau kuv. Thiab nws hlub cov neeg laus.” Tus thib ob hais tias, “Nws pab kuv thaum kuv tsis zoo siab los sis chim. Nws pab kuv thaum kuv poob dej.”
Yexus hais tias, “Yog li ntawd, tus uas hloov siab lees txim thiab los cuag kuv ib yam li ib tug me nyuam yaus, kuv txais yuav tus ntawd, vim Vajtswv lub nceeg vaj yog rau cov uas zoo li no.”24
“Rau qhov Vajtswv hlub neeg ntiaj teb kawg li, nws thiaj txib nws tib Leeg Tub los rau hauv ntiaj teb. Tus uas ntseeg nws Leej Tub, tus ntawd yuav tsis tuag, tiam sis yuav tau txoj sia ntev dhawv mus ib txhis.”25
Tsis ntev tas los no, Thawj Tswj Hwm Nelson cog lus hais tias “kev ntshai yuav ploj thiab kev ntseeg yuav loj tuaj tom qab ntawd” thaum peb “pib mloog thiab ua raws li tus Cawm Seej tej lus tiag tiag.”26
Cov viv ncaus thiab nus, peb tej kev cov nyom tas sim no tsis yog qhov chaw xaus. Yam li peb yog cov mej zeej hauv Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg, peb tau cog lus hais tias peb tau ris Yexus Khetos lub npe. Peb ntseeg tias Nws muaj hwj chim thiab cia siab rau Nws tej kev cog lus. Peb yuav tsum zoo siab tias, peb tus Tswv thiab tus Cawm Seej yeej paub peb tej teeb meem. kev txhawb xeeb thiab kev tu siab. Ib yam li Yexus nyob nrog Nws cov thwj tim thaum ub, Nws yeej nyob hauv peb lub nkoj! Kuv ua tim khawv tias Nws tau txo nws txoj sia kom peb tsis txhob puas tsuaj. Thov kom peb ntseeg Nws, ua raws li Nws tej lus txib, thiab muaj kev ntseeg es hnov thaum Nws hais tias, “Cia li tus.”27 Los ntawm Yexus Khetos lub npe dawb ceev zoo, amees.