Dina Savasava, iVunau Savasava, kei na iVakatakila Savasava
Yalovinaka cakava na koniferedi oqo me ia na kana magiti ena itukutuku ni Turaga mai vei ira na Nona italai.
Kemuni na taciqu kei na ganequ, au kidavaki kemuni ki na koniferedi raraba! Sa ka rekitaki dina meu sotavi kemuni nikua! Au sa dau nanumi kemuni voleka ni veigauna ena loma ni ono na vula sa oti oqo. Au a masu baleti iko ena vukumu . Ena veimacawa sa oti au a masu vagumatua me yaco na koniferedi oqo me gauna ni vakanananu kei na ivakatakila vei ira era vakasaqara na kalougata oqo.
Keimami marau na mai vosa tale vakadua vei kemuni mai na Vale ni Koniferedi. E vuqa na idabedabe era lala tu, ia na nodra tiko eso na lewe ni Matasere ni Tabernacle sa itosotoso totoka ki liu. Keimami kidavaki kemuni kece vakabibi ena koniferedi saravi oqo, ena vanua cava ga.
Eda sa valuta tiko na vakacaca ni COVID-19 kei na kena veimataqali. Vinaka vakalevu na muria tiko na neimami ivakasala kei ira na vuniwai kei na vakailesilesi ni matanitu ena nomuni dui vanua.
Keitou na vakayacora na koniferedi raraba yadua ena veidusimaki ni Turaga.1 Na ituvatuva sa mai duidui ena veiyabaki sa oti. Niu a se tamata gone sara, na koniferedi a dau caka me tolu se va na siga. E muri, na koniferedi a vakalailaitaki me rua na siga. Na itukutuku yadua—ena gauna oya vakakina na gauna oqo—sa vua ga ni masu yalodina kei na vakavakarau levu vakayalo.
O ira na Vakaitutu Raraba kei na Vakailesilesi Raraba ena Lotu era na vosa vakatabakidua baleta na noda iVakabula, o Jisu Karisito, Nona loloma veivueti, kei na Nona kaukauwa veivueti tawayalani. Se bera mada vakadua ena itukutuku kei vuravura me kilai na noda iVakabula ni sa bibi ka ganita vakalevu sara na tamata vakayadua. Raitayalotaka na totolo ni yaco na veisaqasaqa levu e vuravura taucoko—kei na kena ena noda dui bula—ena wali rawa kevaka meda digitaka kece meda muri Jisu Karisito ka rogoca Nona ivakavuvuli.
Ena yalo oqori, au veisureti mo ni rogoca e tolu na ka ena koniferdedi oqo: na dina savasava, ivunau savasava i Karisito, kei na ivakatakila savasava. Veibasai ki na vakatitiqa eso, e tiko dina na ka oqo o ya na dodonu kei na cala. E tiko dina na dina e taucoko—na dina tawamudu. Dua na mate ca nikua oya ni vica ga na tamata era kila na vanua e tiko kina na dina.2 Au sa vakadeitaka ni veika o na rogoca nikua kei na mataka sa lewe ni dina savasava.
Na ivunau savasava i Karisito sa ka kaukauwa. E veisautaka na bula ni tamata yadua e kila vinaka ka vakasaqara me tekivutaka ena nona bula. Na ivunau i Karisito e vukea meda kunea ka tudei tiko ena salatu ni veiyalayalati. Na tudei tiko ena salatu dodonu e tuvai matau ena yaco me lavaki keda meda ciqoma na ka kece e nona na Kalou.3 E sega na ka e yaga vakalevu cake mai na taucoko ni ka e Nona na Tamada!
iOtioti, na ivakatakila savasava ki na veitaro ni yalomu ena yaco na koniferedi oqo me veivakaiyautaki ka tawa guilecavi. Kevaka o se bera ni kerea na veisobuti ni Yalo Tabu me vukea mo rogoca na ka e gadreva na Turaga mo rogoca ena rua na siga oqo, au sureti iko mo cakava. Yalovinaka cakava na koniferedi oqo me ia na kana magiti ena itukutuku ni Turaga mai vei ira na Nona italai. Vulica na sala mo na bulataka ena nomu bula.
Oqo na Lotu i Jisu Karisito ni Yalododonu Edaidai. Eda sa Nona tamata ni veiyalayalati. A kaya na Turaga ni na vakusakusataka na Nona cakacaka ena kena gauna,4 ka sa vakayacori tiko ka toso totolo sara. Eda kalougata meda vakaitavi ena Nona cakacaka tabu oqo.
Au sa vakatikora na kalougata vei ira kece era vakasaqara na rarama, kila-ka, kei na dina cecere. Au sa kaya kina niu lomani kemuni yadua, ena yaca tabu i Jisu Karisito, emeni.