Loloma ni Kalou: Sa Ka Rekitaki Duadua Ki Na Yaloda
Na loloma ni Kalou e sega ni kune ena ituvaki duidui ni noda bula, ia ena Nona tiko ena noda bula.
Kemuni na ganequ kei na taciqu, o ni kila na taucoko ni nona lomani iko na Kalou, na Tamada Vakalomalagi? O sa vakila na Nona loloma titobu e Yalomu?
Na gauna o sa kila vinaka kina na taucoko ni nomu lomani mai vua nomu itubutubu vakalomalagi, ena veisautaka na veika kece. E veisautaka na veika o vakila me baleti iko ni ko digidigi cala. E veisautaka na veika o vakila ni o sotava na ibolebole. E veisautaka na nomu rai ena ivakaro ni Kalou. E veisautaka na nomu rai baleti ira tale eso, kei na levu ni veika o rawa ni cakava me veiduitaitaki.
E vakavulica o Elder Jeffrey R. Holland: “Na imatai ni vakaro levu duadua ni veigauna tawamudu o ya meda lomana na Kalou ena noda igu, yaloda, nanuma, kei na kaukauwa kecega—oqori na imatai ni vunau levu duadua. Ia na imatai ni dina cecere ni veigauna tawamudu oya ni Kalou e lomani keda ena Nona igu, yalona, vakasama, kei na kaukauwa.”1
E rawa vakacava meda kila vakayadua na dina tawamudu vakaitamera oya?
A vakaraitaki vua na parofita o Nifai e dua na raivotu ka kaukauwa na kena vakadinata na loloma ni Kalou. Na nona raica na vunikau ni bula, e kerea o Nifai me kila na kena ibalebale. Sauma mai e dua na agilosi ena nona vakaraitaka vei Nifai e dua na koro, e dua na marama tina, kei na dua na gone dramidrami. Na gauna e raica kina na koro o Nasareci kei na marama tina yalosavasava o Mary, keveta tiko na luvena o Jisu e ligana, qai vunauca na agilosi, Raica na Lami ni Kalou, Io, na Luvena na Tamada Tawamudu“2
Ena gauna tabu oya, e kila kina o Nifai na nona sucu na iVakabula, e vakaraitaka kina na Kalou na nona taucoko ni nona loloma dina. Na loloma ni Kalou, e vakadinadinatataka o Nifai “e sovaraki koya yani ki na yalodra na luve ni tamata.”3
E rawa ni da raitayaloyalotaka na loloma ni Kalou me vaka na cina caudre mai ena dua na vunikau ni bula, ka sovaraki koya yani ki vei yasai vuravura ki na yalodra na luve ni tamata. Na rarama kei na loloma ni Kalou e vakasinaita na Nona veibuli.4
E so na gauna eda dau nanuma ni rawa ga me vakilai na loloma ni Kalou ni oti na noda muria tiko na itautauri kaukamea ka kania tiko na vuata. Ia, na loloma ni Kalou e sega ni ciqomi walega vei ira era lako mai ki na vunikau ia sa okoya na kaukauwa saraga e vakauqeti keda me da vakasaqara na vunikau.
“Io, o koya, sa gadrevi vakalevu duadua kina mai vei ira na ka kecega,” Vakavulica o Nifai, ka tukuna cake na agilosi, “Io, sa ka rekitaki duadua ki na yalo.”5
Ruasagavulu na yabaki sa oti, e dua na lewe ni noqu vuvale lomani e biuta na Lotu. E vuqa na nona taro sega ni saumi rawa. Na watina, e lewe ni lotu vou, a dina tuga ena nona vakabauta. Rau sasagataka vakaukauwa me maroroi na nodrau vakamau ena veiduidui e lako cake mai.
Yabaki sa oti a vola o koya e tolu na taro ebaleta na Lotu ka e dredre tiko me cokonaki kina ka vakauta sara ki na rua na veiwatini e nona itokani tu mai ena vica na yabaki sa oti. E sureta me ratou raica vakamatua na taro oya ka vakarautaka me wasea na nodrau vakasama ena gauna ni nodratou vakayakavi vata.
Ni oti na nona veisiko kei ratou na itokani oqo, e curu ki na rumu me tekivu cakacaka. Na veitalanoa ena yakavi oya kei na loloma e ratou vakaraitaka vua na nona itokani e lako taumada mai ena nona vakasama. E qai vola ni a tarovi o koya mai na cakacaka e cakava tiko. E kaya: “E dua na rarama e vakasinaita na yaloqu. E sega ni ka vou na noqu vakila na titobu ni veivakararamataki, io na gauna oqo e tomana tiko ga na vakila kaukauwa oya au se sega ni vakila e liu ka taura e vica na miniti na kena yaco tiko. Au dabe duadua vakanomodi ena vakila oqo, ka au qai mai kila ni nona loloma na Kalou e vakaraitaki tiko vei au. … Au vakila e dua na yalo vakalou e tukuna vei au meu lesu ki Lotu ka vakaraitaka na loloma ni Kalou ena veika au vakayacora ekea.”
E sa qai vakasamataka na nona taro. E vakila o koya na Kalou e vakadonuya na nona taro, ka vakadeitaka kune matata ena sau ni taro me kakua ni tarova na nona mua ki liu.6 Me wasea o koya na loloma ni Kalou vei ira kece na tamata ni tomana tiko na nona vakasaqaqara. Na nona bulataka na vakila e lako mai vua, e vakila kina e dua na veiwekani voleka kei Josefa Simici, okoya a tukuna ni oti na iMatai ni Raivotu, “Na yaloqu e vakasinaiti ena loloma, e vuqa na siga au reki ena marau vakaitamera.”7
E ka totoka, ni vica ga na vula oti oya, e ciqoma tale o lewe ni matavuvale oqo na veikacivi vata ga a ciqoma ena ruasagavulu na yabaki sa oti. Na imatai ni gauna e ciqoma kina na veikacivi, e vakayacora na nona itavi vaka lewe ni Lotu dina. Na taro e qai lako mai sa sega ni “Meu rawa ni vakayacora vakacava na veikacivi oqo? ka sa “Meu vakaraitaka vakacava na loloma ni Kalou ena noqu veiqaravi?.” Ena veitorovi vou oqo, e vakila kina o koya na reki, vakaibalebale, kei na dina ni veitiki ni nona veikacivi.
Taciqu kei na ganequ, me da ciqoma vakacava na kaukauwa ni loloma ni Kalou e dau vakavu veisau? E sureti keda na parofita o Moronai, meda “masuta na Tamada ena yalomudou taucoko me vakasinaiti kemudou ena loloma oqo, ka sa solia vei ira era sa muria na Luvena ko Jisu Karisito ena yalodina.”9 E sega ni sureti keda walega o Momani me da masu me da vakila kina na loloma ni Kalou vei keda ka me da masuta me da kila na dina ni loloma ni Kalou vei keda vakaikeda.9
Ni da ciqoma na Nona loloma, eda na kune marau ena noda sasaga ni loloma kei na veiqaravi me vaka e cakava o Koya, noda vakataki “muria na Luvena, o Jisu Karisito vakaidina.”10
Na loloma ni Kalou e sega ni kune ena veitikina e baleta na noda bula, ia ena Nona tiko ena noda bula, Eda kila na Nona loloma ni da vakila na kaukauwa e levu cake mai na noda vakataki keda kei na kena dau sureta na vakacegu, ka soli vakasala na Yalo Tabu. Eso na gauna ena dredre me da vakila na nona loloma. E rawa ni da masu ka kerea me tadola na matada me da raica na Ligana ena noda bula ka raica talega na Nona loloma ena serau ni nona veibuli.
Ni da vakasamataka na iVakabula kei na nona veisorovaki sega ni yalani rawa, eda na rawa ni kila na Nona loloma vei keda. Eda lagata ena vakarokoroko na qaqa ni sere nei Eliza R. Snow: “Me baleta na noda, “Na Nona dra sa tiri mai; Yaloqu me savai.”11 Na yalo malumalumu nei Jisu ena vosota tu na veivakararawataki levu e drodrova na yaloda, dolava na utoda ka vakasaqara na veivosoti ena Ligana me vakasinaiti keda ena gagadre me da bula vakataki Koya.10
Vola o Peresitedi Russell M. Nelson,“Na noda dina ena iyalayala me da bula vakataki Koya, ena qai tubu na dina ka vakalou na noda loloma.”12
E qai tukuna na luvei keirau: “Noqu yabaki 11, keirau nanuma me calata e veimama ni kalasi ni Lalai kei noqu itokani. Na gauna keirau yaco kina ki kalasi, e vakidacala vei keirau, ni sa kidavaki keirau mai o qasenivuli ena yalo marau. Sa tekivu sara me masu ka cavuta na neimami vakavinavinaka vua na Turaga ni keimami yaco mai ki kalasi ena neimami digidigi ni bula galala. Au sega ni nanuma rawa na lesoni ena siga oya se na yacai qasenivuli, io, sa oti e tolusagavulu na yabaki, se tarai au ga na loloma dina e vakaraitaka vei au na qasenivuli oya.”
Lima na yabaki sa oti au raica e dua na ivakaraitaki ni loloma vakalou noqu tiko ena dua na kalasi ni Lalai e Rusia. Au raica e dua na yalewa yalodina tekiduru e matadrau e rua na gone ka wasea na nona vakadinadina me vaka ga o rau ga e bula tiko e vuravura, o Jisu madaga e rawa ni mate ena vukudrau ga.
Au vakadinadinataka ni noda Turaga ka iVakabula e mate ena vukuda yadua. E vakaraitaki ni Nona Loloma sega ni yalani rawa vei keda kei na Tamana.
“Au Sa Kila ni Bula Tu. Na iVakabula Tui Sau! Sa bula me lomani au.”14
Me tadola na yaloda ka ciqoma na loloma dina ni Kalou e noda ka kaburaka na Nona loloma oya ena noda bula kei na veika eda cakava. Ena yaca tabu i Jisu Karisito, emeni.