Vakatitobutaki Tiko na Noda Saumaki vei Jisu Karisito
Na ivolanikalou kei na noda kila na Kalou e isolisoli—na isolisoli eda dau vakawalena ena levu na gauna. Me da karona na veivakalougatataki oqori.
Vinaka vakalevu, na nomuni itukutuku rogorogo vinaka Elder Nielson. Keimami gadreva o ya.
Kemuni na taciqu kei na ganequ lomani, a qai vakavulici keda wale tiko o Peresitedi Russell M. Nelson, “Me da kitaka e dua na ka vinaka sara e gadreva na igu. Mo tisaipeli dina i Jisu Karisito e sega ni vakavo kina. Mo vakalevutaka nomu vakabauta ka nuitaki Koya e cakacakataki.” Vei ira na vakatutu ka a solia vei keda me vakalevutaka na noda vakabauti Jisu Karisito sai koya meda dauvuli vakanamata, meda tabaluvuci keda ena ivolanikalou meda kilamatata kina na ilesilesi kei na veiqaravi i Karisito. (Raica na “Sa Tu cake tale ko Karisito; Na Vakabauti Koya ena Tosoya na Ulunivanua,” LiaonaMe 2021.)
Eda rogoca ena i Momani ni na ivolanikalou a tiki bibi ni vuvale nei Liai—e vakakina baleta ni lesuva tale ki Jerusalemi ko Nifai kei iratou na tuakana me ratou kauta mai na peleti parasa (raica na 1 Nifai 3–4).
Na ivolanikalou e vakatakila vei keda na lewa ni Kalou me vaka sara ga na Liaona vei Nifai kei tamana. Ni sa ramusu na nona dakaititi, a gadreva o Nifai me kila na vanua me laki kau kakana mai kina. Na tamana, ko Liai, e a raica na ka mokimokiti ka wilika na sa volai kina. A raica o Nifai ni cakacaka na idusidusi me vaka na vakabauta, yalodina, kei na kauwai e soli kina. A raica talega ni volavola e rawarawa ni wiliki ka solia vei rau na kila me baleta na salatu ni Turaga. A yaco me vakila ni na Turaga e vakayacora na veika lelevu mai na veika lalai. A talairawarawa o koya ki na veidusimaki ka soli mai na ka Liaona. A lako cake ki na ulunivanua ka kauta mai na kakana ki na nona matavuvale, ka ra a kune rarawa vakalevu ni a sega tu. (Raica na 1 Nephi 16:23–31.)
E vaka vei au ni ko Nifai e a gonevuli yalodina ki na ivolanikalou. Eda wilika ni ko Nifai e marautaka na ivolanikalou, vakananuma e lomana, ka volai ira me ka ni vuli ka yaga vei ira na luvena (raica na 2 Nifai 4:15–16).
E kaya o Peresitedi Russell M. Nelson:
“Kevaka me da ‘toso ki liu ka tugana ki lomamudou na vosa i Karisito, ka vosota me yacova na ivakataotioti, [eda] na rawata na bula tawamudu’ [2 Nifai 31: 20].
“Na kana magiti e uasivia cake na kena tovolei. Na kana magiti e kena ibalebale me taleitaki. Eda taleitaka na ivolanikalou ena kena vulici e na yalo vinaka ka talei kena kunei kei na talairawarawa ena yalodina. Ni da tugana ki lomadra na vosa i Karisito, era sa curuma tu na ‘dela ni yalomudou sa malumu’ [2 Korinica 3:3]. Era sa yaco me tiki bibi sara ni keda ituvaki” (“Bula ena Veidusimaki ni iVolanikalou,” Liaona, Janu. 2001).
Na Cava Eso na Ka Eda na Cakava ke sa Marautaka na Yaloda na iVolanikalou?
Ena tubu cake na noda gagadre me da lewena na vakasokumuni Isireli ena yasa ruarua ni ilati. Ena ka matau ka rawarawa me da sureti ira na noda matavuvale kei na itokani me ra rogoci ira na daukaulotu. Eda na bula kilikili, ka na tiko na noda ivolatara vakabau ni valetabu me rawa ni da lako ki valetabu me vakawasoma me vaka e rawa. Eda na cakacaka me ra kunei, vakarautaki, ka vakauta na yacadra na noda qase eliu ki valetabu. Eda na yalodina me maroroya na Siga ni Vakacecegu, lako ki lotu e vei Sigatabu me vakavouya na noda veiyalayalati vata kei na Turaga ni da vota kilikili ni taura na sakaramede Eda na gadreva meda tikoga ena salatu ni veiyalayalati, ka bula mai na vosa kecega sa lako mai na gusu ni Kalou” (raica na Vunau kei na Veiyalayalati 84:44).
Na Cava na Kena iBalebale vei Iko mo Marau Ena Veika ni Turaga?
Na marautaka na ivolanikalou e uasivi cake mai na via kania ka via gunuva na kilaka. A sotava na marau levu ena nona bula o Nifai. Ia, a sotava talega na dredre kei na rarawa (raica na 2 Nifai 4:12‑–13). “Ia,” a kaya, “Au sa kilai Koya kau sa vakararavi vua” (2 Nifai 4:19). Ni da vulica tiko na ivolanikalou, eda na kilamatata cake na ituvatuva veivakabulai kei na bula cecere ni Kalou, ka da na vakararavi ki na yalayala ka sa cakava vei keda oKoya ena ivolanikalou, kei na nodra yalayala kei na veivakalougatataki talega na parofita edai.
Ena dua na yakavi, keirau a sureti kei na watiqu ki na nona vale e dua na itokani. Na nodrau gonetagane, ko Tevita, a se sega vakadua ni rogoca na italanoa ni iVola Tabu baleti Tevita kei Kolaiaci, ka vinakata me rogoca. Niu tekivu tukuna na italanoa, a tarai koya na sala e a vakamavoataka ka ravuta na kai Filisitia ko Tevita ena nona vakabauta na yaca ni Kalou ni Isireli ena dua na irabo kei na dua vatu ka sega na iseleiwaue ligana (raica na 1 Samuela 17).
Ni raici au tiko ena mata lumisa lelevu, a tarogi au deivaki mai, “Ko cei na Kalou?” Au vakamacalataka vua ni Kalou e Tamada Vakalomalagi ka da vulica baleti Koya ena ivolanikalou.
Ka qai tarogi au okoya, “Na cava na ivolanikalou?” Au tukuna vua ni ivolanikalou era vosa ni Kalou ka na kunea eloma na italanoa totoka eso ka na vukei koya me kila vakavinaka cake na Kalou. Au kerei tinana me vakayagataka na iVolatabu ka tiko e nona vale ka kua ni laiva me laki moce ko Tevita me wilika mada vua na italanoa taucoko. A marautaka dina ena nona rogoca. Na ivolanikalou kei na noda kila na Kalou e isolisoli—na isolisoli eda dau vakawalena ena levu na gauna. Me da karona na veivakalougatataki oqori.
Niu a veiqaravi tiko vakaulotu niu a cauravou, au kunea ni neirau veivakatavulici vata kei na ivolanikalou, e vukica na bula ni levu na tamata. Au qai raica na kaukauwa e tu kina ka rawa ni veisautaka vakacava na noda bula. Na tamata yadua ka keirau vakatavulica vei ira na kosipeli vakalesui mai e tamata duidui ka duatani a nona gagadre. Na ivolanikalou tabu—io, na parofisai ka ra vola na parofita savasava—e kauti ira mai ki na dua na vakabauta na Turaga kei na veivutuni ka veisautaka na yalodra.
Na ivolanikalou e vakasinaiti ira ena marau ni ra ciqoma na veivakayarayarataki, veidusimaki, lomani, kaukauwa, kei na isau ni veika era gadreva. E levu vei ira era lewa mera caka veisau ki na nodra bula ka tekivu muria na ivakaro ni Kalou.
A vakauqeti keda o Nifai me da marautaka na vosa i Karisito, baleta na vosa i Karisito sa tukuna vei keda na veika kece me da kitaka (raica na 2 Nifai 32:3).
Au sureti kemuni me tu na nomuni ituvatuva tudei ni vuli mai na ivolanikalou. Na Lako Mai, Mo muri Au e dua na ivurevure cecere ka noda me vakatavulici ka vulici kina na kosipeli, vakatitobutaka na noda saumaki vei Jisu Karisito, ka vukea me da vakataki Koya. Ni da vulica na kosipeli, eda sega walega ni vakasaqara tiko na itukutuku vou; eda vinakata me da sa “buli vou” (2 Korinica 5:17).
Na Yalo Tabu e dusimaki keda ki na dina ka vakadinadinataka na dina o ya (raica na Joni 16:13). E vakararamataka na noda vakasama, ka vakavoutaka na noda kila-ka, ka tara na lomada ena ivakatakila mai vua na Kalou, na ivurevure ni dina kecega. Na Yalo Tabu e vakasavasavataka na yaloda. E vakauqeti keda ena gagadre meda bula ena dina, ka qai kayalo vei keda na sala meda cakava kina. “Na Yalo Tabu ena vakavulici [keda] ena ka kecega” (Joni 14:26).
Ni tukuna tiko na vosa ka a vakatakila vua na Parofita o Josefa Simici, a kaya na noda iVakabula:
“Na vosa kece oqo era sa sega ni vu mai na tamata se vakatamata, ia sa mai vei au;
“Ni sa domoqu ka vosataka [na veivosa oqo] vei kemudou; ni sa solia vei kemudou ena Yaloqu …;
“O koya, dou sa rawa ni vakadinadinataka ni dou sa rogoca na domoqu” (Vunau kei na Veiyalayalati 18:34–36).
E dodonu me da vakasaqara na veitokani ni Yalo Tabu Na lalawa oqo sa dodonu me vakatulewataka na noda digidigi ka dusimaka na noda vakanananu kei na ivalavala. E dodou me da vakasaqara na ka kece ka na sureta na vakadre ni Yalo ka cata na cava ga ka gole tani mai na idre oqo.
Au vakadinadinataka ni o Jisu Karisito sa Luvena lomani na Tamada Vakalomalagi. Au lomana na noqu iVakabula. Au vakavinavinakataka na ivolanikalou kei ira na Nona parofita bula. O Peresitedi Nelson e Nona parofita. Ena yacai Jisu Karisito, emeni.