Rai sobu yani ki Gaunisala
Na vakanamata ki na veika bibi sara—vakabibi na veika “ki gaunisala,” na veika tawamudu—sai idola ni itosotoso ni bula oqo.
Niu sa yabaki 15, au a taura e dua na ivolatara ni vuli draiva, ka vakatarai au meu draiva ena dua na motoka ke tiko kei au e dua noqu itubutubu. Ni tarogi au o tamaqu keu via laki draiva, sa dua na ka na noqu marau.
A draiva me vica na maile ki na taudaku ni tauni ki na dua na gaunisala balavu, dodonu, yasa rua ni gaunisala ka lakova e lailai na tamata—e dodonu meu tukuna, rairai na vanua ga e vakila kina ni taqomaki. E kele yani ena baba e yasa ni sala, ka keirau veisau idabedabe. E vakatavulici au vakalailai ka qai tukuna vei au, “Toso malua yani ki gaunisala la draiva ga me yacova niu tukuna mo kele.”
Au a muria vakaimatailalai na nona ivakaro. Ia ni oti e 60 na sekodi, e kaya mai, “Luvequ, kelea na motoka. Ko cakava tiko meu viavia lua. Ko veigoleyaki tiko e loma ni gaunisala taucoko. E taroga o koya, “Na cava o vakaraica tiko?”
Au tukuna kei na vuturi lailai, “Au raica tiko na gaunisala.”
Ka qai kaya na ka oqo: “Au wanonova tiko na matamu, ia ko raica ko raica tiko ga na mua iliu ni motoka. Kevaka o raica tiko ga na ka e tu sara ga e matamu, ko na sega ni draiva vakadodonu.” Ka qai vakabibitaka, “Rai sobu ki na gaunisala. Oya ena vukei iko mo draiva vakadodonu.”
Me vaka e dua na yabaki 15, au nanuma ni lesoni vinaka ni draiva oya. Au sa qai raica mai ni lesoni uasivi talega ni bula. Na vakanamata ki na veika bibi sara—vakabibi na veika “ki gaunisala,” na veika tawamudu—sai idola ni itosotoso ni bula oqo.
Ena dua na gauna ena nona bula ni iVakabula, a gadreva o Koya me tiko duadua, kao “sa cabe taudua ko koya ki na ulunivanua me laki masu.”1 A talai ratou yani na Nona tisaipeli kei na ivakasala me ratou takosova na wasawasa. Ena buto ni bogi, na waqa ka kauti ratou tiko na tisaipeli e a sotava e dua na cava cudrcudru. A lako yani o Jisu me vakabulai ratou ena sala duatani sara. Na itukutuku ena ivolanikalou e wiliki vakaoqo, “Ia ena ikava ni wase ni bogi sa lako vei ira ko Jisu, a sa lako voli e dela ni wai.”2 Ni ratou raici koya, e ratou sa tekivu rere, ni ratou nanuma ni vatuka ka torovi ratou tiko mai e dua na mataqali yalobula se yalo. Ko Jisu, ni vakila na nodratou taqaya ka vinakata me vakamaravutaka nodratou vakasama kei na lomadratou, a kaci yani vei iratou, “Dou vakacegu; koi Au ga; kakua ni rere.”3
Ko Pita e sega walega ni yalo vakacegu ia e a vakayaloqaqataki talega. Ena yaloqaqa ka vakawasoma me siosio, e a kaci yani vei Jisu, “Na Turaga, kevaka sai kemuni, kacivi au meu bau yani vei kemuni e dela ni wai.”4 A sauma mai ko Jisu ena Nona veisureti kilai ka rogo tu ga “Lako ga mai.”5
Ko Pita, e marau vakaidina ena ka oya, e kaba mai na waqa sega ki loma ni wai ia ki dela ni wai. Ni vakanamata tiko vua na iVakabula, e rawa ni cakava na ka dredre, na lako mada ga e dela ni wai. A sega taumada ni vakarerei o Pita mai na cava. Ia na “kaukauwa”8 ni cagi e yaco me vagolei koya tani, ka sese na nona vakanamata. Sa suka mai na rere. E qai yaco, ni sa seyavu na nona vakabauta, ka sa tekivu me lutu dromu. “Sa kaci sara, ka kaya, na Turaga, ni vakabulai au.”7 Na iVakabula, ka dau rawarawa me veivakabulai, a dolele yani ka laveti koya me taqomaki.
E vuqa sara na lesoni me vulici mai na itukutuku ni cakamana oqo, ia au na cavuta e tolu.
Raimatua vei Karisito
Na imatai ni lesoni: raimatua vei Jisu Karisito Ni dei tiko na matai Pita me raimatua vei Jisu, e rawa ni lako e dela ni wai. Na cava, na biau, kei na cagi e sega ni rawa ni vakataotaki koya ni dei tikoga na nona raimatua vua na iVakabula.
Noda kilamatata na noda icavacava ni inaki e vukea na noda digia meda raimatua kina cava. Eda na sega ni rawa ni cakava e dua na qito qaqa ke da sega ni kila na noda lalawa, se rawa ni da bulataka e dua na bula vakaibalebale kevaka eda sega ni kila na kena inaki. E dua na veivakalougatataki cecere ni kosipeli vakalesui mai i Jisu Karisito sai koya ni sauma, mai na vica tale na ka, na taro “Na cava na inaki ni bula?” “Na noda inaki ni noda bula oqo sai koya meda marau ka vakavakarau meda lesu ki na iserau ni Kalou.”8 Ni da nanuma tiko na noda tiko e vuravura meda vakavakarau me lesu ka laki bula kei na Kalou ena vukea meda raimatua ki na veika e muataki keda vei Karisito.
Na raimatua vei Karisito e kaciva na bula vakaivakarau, vakabibi me baleta na itovo vakayalo lalai ka rawarawa e vukea meda yaco me tisaipeli vinaka cake. Ena sega na itutu vakatisaipeli ni sega na ivakarau.
Na noda raimatua vei Karisito ena matata cake ni da rai sobu ki gaunisala ki na vanua eda via yaco kina ka ko cei eda via vaka ka qai soli gauna e veisiga me cakava na veika ka na vukea meda yaco ki kea. Na raimatua vei Karisito e rawa ni vakarawarawataka noda vakatulewa ka solia na idusidusi ena sala me vakayagataki vinaka duadua kina na noda gauna kei na ivurevure.
E dina ni levu tu na ka e ganita na noda raimatua, eda vulica mai na nona ivakaraitaki o Pita na bibi ni dei tiko vei Karisito me uto ni noda raimatua. Ena vu ga mai vei Jisu Karisito duadua na kena rawa meda lesu ka laki bula kei na Kalou. Eda vakararavi ki na loloma soliwale i Karisito ni sasaga tiko me vakataki Koya ka vakasaqara na Nona veivosoti kei na kaukauwa veivqaqacotaki ni da tau leka.
Qarauna na Vagolei tani
Na ikarua ni lesoni: qarauna na veivakavagolei tani. Ni vagolea tani o Pita na nona raimatua mai vei Jisu kina na cagi kei na biau ka sabica tiko na yavana sa tekivu lutudromu.
E levu na ka e tu “e mata ni motoka” ka rawa ni vagolei keda tani mai na noda rai matua vei Karisito kei na vei ka tawamudu ka “tiko e gaunisala”. Na tevoro e dau veivagoleitani levu. Eda vulica mai na tadra nei Liai ni vosa mai na vale levu ka cecere e segata me bacani keda ki na veika ka na kauti keda tani mai nai lakolako ni vakavakarau me lesu ka laki bula kei na Kalou.9
Ia e tiko e levu tale na veivagolei tani lalai sega ni laurai rawarawa ka rawa ni vuni leqa talega. Me vaka e dau tukuni, “Na ka ga e vinakati me qaqa kina na ca oya me ra kua ni cakava e dua na ka o ira na tamata vinaka.” Na meca e kenai rairai ni via kauti ira na tamata vinaka me ra kakua ni kitaka e dua na ka, se mera vakayalia na nodra gauna ena veika ka na vagolei ira tani mai na nodra lalawa kei nai naki cecere. Me ivakaraitaki, e so na ka kara dau veivakawelei bulabula ni vakayagataki vakarauta ena rawa ni veivakawelei vuni leqa kevaka e sega ni vakaivakarau. E kila vinaka tu na vunica na veivakawelei e sega ni dodonu me ca se vakasisila me vakayacoka.
E Rawa Ni Da Vueti.
Na itolu ni lesoni: e rawa ni da vueti. Ni sa tekivu lutudromu o Pita, qai kaci mai, “Na Turaga, ni vakabulai au. Sa qai dodoka sara na ligana ko Jisu, a sa taura.”10 Ni da sa kunea eda sa lutu sobu tiko, ni da sotava na leqa, se ni da lako sese, e rawa talega ni da vueti mai Vua.
Ena na mata ni leqa se vakatovolei, e rawa ni ko vakataki au ka nuitaka ni na totolo na noda vueti. Ia mo nanuma ni a mai vukei ratou na tisaipeli na iVakabula ena i ka va ni yadra ena bogi—ni oti na nodratou buno tiko ena lomaloma ni bogi ena cava.11 Eda na rawa ni masu kevaka me sega ni totolo mai na veivuke, ena rawa beka ni yaco mai ena i karua ni yadra se nai katolu madaga ni yadra ni bogi vakaitukutuku. Ni sa dodonu me da wawa, mo vakadeitaki ni na wanono tiko mai na iVakabula, na wanonova tiko me da kakua ni vosota na ka e sega ni rawa ni da colata.12 Vei ira ka ra wawa tiko ena i ka va ni yadra ena bogi, e rairai ena loma ni nodra rarawa, kakua ni guce. Na vueti e dau lako vakaidina mai vei ira na yalodina, se ena bula vakayago se ena tawamudu.
Ena so na gauna na noda lutudromu e dau lako mai na noda caka cala kei nai valavala ca. Kevaka ko sa kunea ni ko lutudromu tiko ena vuku ni veika oqori, mo digia na digidigi rekitaki mo veivutuni.13 Au vakabauta ni lailai na ka e dau marautaka na iVakabula me vaka na nodra vueti na saumaki ka lesu ki Vua.14 Na ivolanikalou e vutucoqa ena ivakaraitaki ni tamata era lutu ka cala ia era veivutuni ka yaco me dei ena vakabauti Karisito. Au kila na italanoa oqori era tu ena ivolanikalou me vakananumi keda ni nai loloma ni iVakabula vei keda kei na nona kaukauwa me vueti keda e tawayalani. E sega walega ni marau na iVakabula ni da veivutuni, ia eda ciqoma talega oi keda na marau.
iTinitini
Au sureti kemuni mo ni nakita na “rai sobu ki gaunisala” ka vakalevu taka na nomu rai matua ena veika e bibi sara. Meda tauri Karisito me uto ni noda raimatua. Ena maliwa ni veivakagolei tani kecega, na veika “e mata ni motoka,” kei na covulaca ka wavoliti keda, Au vakadinadinataka ni sai Jisu na noda iVakabula kei na noda Dauveivueti kei na noda Dauveivakabulai. Ena yaca i Jisu Karisito, emeni.