Idawehn Sises Krais sang ni Weweidki Pwoson

Sang Presiden M. Russell Ballard

Weliepen Presiden En Pwihn en Wahnpoaron Ehk Riemenko

E kak ketin wai kitail rahnet nan atail kahpwal kan. E ketin wiahng paionihr en mwohtail ko, oh E kin ketin wiahng emen emen kitail ahnsou wet.

Kalahngan en kumwail, pwihnen koul, pwehki amwail koulki ”Faith in Every Footstep.” Ngilen koulo oh lokaia ko intingdier nan 1996 [kid duwepwiki duweisek weneu] sang Brother Newell Dayley¹ ni kaunopdahn kamadipwen pahr 150 [epwiki limeisek] me wia ketamanpen paionihr ko ahr leledo nan Salt Lake Valley nan pahr 1847 [kid welipwiki pahisek isuh].

Mendahte koul pwoatet intingdier pwe en kaunopehng kamadipwo, iren kaweid ko doke sampah pwon.

Sangete mahs I kin leliki chorus:

Sang ni pwoson nan ahmw weweidwei, kitail idawehn Krais, Kauno;

Oh audaudkihda koapwoaroapwoar sang ah limpoak mehlel, kitail ehupene koul.²

Riei ohl oh lih akan, I kadehdehki me ni atail pahn idawehn Sises Krais sang ni weweidki pwoson, mie koapwoaroapwoar. Mie koapwoaroapwoar rehn Kauno Sises Krais. Mie koapwoaroapwoar ong koaros nan mouret. Mie koapwoaroapwoar en powehdi atail sapwung kan, atail pahtou kan oh luwet kan, oh atail kasongosong kan oh kahpwal kan. Mie koapwoaroapwoar nan koluhla oh alehdi mahk oh mahkehng mehteikan. I kadehdehki me mie koapwoaroapowar oh meleilei rehn Krais. E kak ketin wai kitail rahnet nan atail kahpwal kan. E ketin wiahng paionihr en mwohtail ko, oh E kin ketin wiahng emen emen kitail ahnsou wet.

Pahrwet wia kilelepen pahr 175 [epwiki isihsek limau] me wia katamanpen paionihr en mahs ko ahr leledohng nan Salt Lake Valley, me katamanehng ie ahi keinek ko, tohto irail me iang aluhsang Nauvoo leledo Salt Lake Valley. Ahi pahpa oh nohno kahlap oko me iangehr alu nan wasa patapat akan ni arail pwulopwulo. Henry Ballard sounpar rieisek [20];³ Margaret McNeil sounpar eisek siluh [13];⁴ oh Joseph F. Smith, me mwuhr wiahla kewenemen en Presiden en Mwomwohdiso wet, sounparte 9 [duwau] ahnsou e leledohng nan Salt Lake Valley.⁵

Irail lelehng kahpwal laud tohto pohn ahlo, soangen ahnsoun kepeu, soumwahu, oh soh iteren likou oh mwenge. Ni karesepe, ansou me Henry Ballard kohdo nan Salt Lake Valley, e perenkihda ah kilang “Sapwen Inouo“ ahpw e salohki pwe emen de kilang ah likouko pwe e mering. E rukila nan dihpwko rahno pwon lau e rotorotdi. Ih eri kohla ni ihmw iou ih pekihda ah likou pwehn kak doudoulahte nan ah seiloak lau ih tuhwengdi ah nohno pahpa. E inenen kapingkiheng Koht ah kak seiloak mwahu lao ih lella nimwehu.⁶

Ahi pahpa nohno kahlapoko kin idawehn Sises Krais sang ni weweidki pwoson nan arail apwal akan. I kaping ong irail arail sohte uhdi ahpw nannantihlahte mwowe. Arail weweidwei ni pwoson ko kapaiehda oh dihn mwuhr akan, duwehte ahmw weweidwei ni pwoson rahnet pahn kapaiada kadaudekomw akan.

Lepin lokaia paionihr wia koaros mehkot de pil wiewia ieu. Ni ah wia mehkot e kak wehwehki aramas emen me keieun diarada de kousoandi nan ehu wasa. Ni ah wia wiewia ehu, e kak wehwehki en ritingada de kaunopada ahlo pwe ekei en idawehn.⁷

Ni ahi kin medewe paionihr akan me kaunopadahr ahlo ong mehteikan, I kin tepte tamanda Soukohp Joseph Smith. Joseph wia paionihr men pwehki ah weweidwei ni pwoson kahreng ah kak lelahng ni mwetehn tuhke ehu wasa me e kelepwidi ni kapakap oh ritingada ahl ehu ong kitail en ahniki Sapwellimen Sises Krais rongamwahu unseko. En Joseph pwoson en “peki rehn Koht“⁸ni nimenseng en springo nan kid welipwiki rieisek (1820) ritingada ahl en Kopwurupwurdo en rongamwahu en Sises Krais me iangahki soukohp akan oh wahnpoaron akan me malipilipda en pwurehng papah pohn sampah.⁹ I ese me Sosep Smid iei soukohp en Koht. I ese me ah weweidwei ni pwoson laud elehieng en kelepwidi mwohn Koht Sahm oh Sapwellime Pwutak Kehmpoake, Sises Krais.

En Soukohp Joseph Smith ah weweidwei ni pwoson elehda en wia Sapwellimen Kauno mehn doadoahk ong ni kohdahn Pwuhk en Mormon, me wia ehu kadehdehpen Sises Krais oh Sapwellime tomw kalahngan.

I kadehde me sang en Joseph Smith pwoson oh loalepwoat ni ah sohpei kahpwal laud oh uhwong laud, e kak wiahla mehn doadoahk nin limen Kauno ni ah ketin pwurehng kauwada Mwomwohdiso en Sises Krais ong sampah.

Nan tiepene lap nekiero, I koasoaiahda duwen ahi wia doadoahk en misineri men ah kapaiehda. I kapaida ni ahi padahngki mwomwen en Samatail Nanleng pilahn en komour, kaselelo, en Joseph Smith Kaudiahl Keieuo, oh ah kawehwehda Pwuhk en Mormono. Padahk oh mahsen kopwurupwurdo ko kaweidada ahi weweidwei ni pwoson ni ahi padahk ong irail ko me inangih rong padahk kan en rongamwahu Kopwurupwurdo.

Neitail misineri kan rahnwet wia paionihr en rahn-pwukat pwe irail kin padahngki iren kaweid kaselel pwukat ong aramas nan sampah, me ritingadahr ahl en Sapwellimen Samatail Nanleng serihkan en esehla Ih oh Sapwellime Iehros, Sises Krais. Alehda rongamwahu en Sises Krais ritingadahr ahlo ong koaros en kaunopehng oh alehdi tiahk sarawi kan oh kapai kan en Mwomwohdiso wet oh tehnpas sarawi.

Tiepene Lap nekiero, Presiden Russell M. Nelson pwurehng padahngki ”me Kauno ketin kupwurki koaros pwutak pwulopwul me warehng, en kaunopehng wia ah misin” oh me ”misin ahniki manaman, ahpw en emen emen ah pilipil, ansou mwahu” ong ”serepein me pwulopwul oh kak papah.”¹⁰

Ong pwutak oh serepein pwulopwul kan, amwail weweidki pwoson pahn sewesei kumwail en idawehn Sapwellimen Koht luhk ong papah nan misin—en wia paionihr en rahn pwukat—ni amwail pahn ritingada ahlo pwe Sapwellimen Koht serihkan en diarada oh mihmi pohn ahlen inouo me pwuralahng Reh.

Presiden Nelson wiahier paionihr men nan Mwomowhdiso wet. Ni ah wia Wahnpoaron men e seiloaklahr oh ritingadahr sahpw tohto ong kalohkpen rongamwahu wet. Mwurinte ah wiahla soukohp oh Presiden en Mwomwohdiso wet, e peki rehtail en “kalaudehla [atail] kehl en palingehn en alehdi kaudiahl.”¹¹ E pil nannantihengete padahngkiheng kitail ia mwomwen atail pahn kakehlaka atail kadehdehkan. Nan sarawi mwotomwot ehu ong me laud ahpw pwulopwul kan, e koasoaia:

“I peki rehmwail en kaunda amwail kadehde kan. Koadoahke. Ahnikihla. Apwalih Mwahu. Apwalih keneinei pwe en kak keirda. …

“[Eri] kasik manaman kapwuriamwei kan en wiawi nan ahmw mour.”¹²

E ketin kaskaskuhlih kin kitail mwomwen atail pahn kak uhtohr ni palingehn. Presiden Nelson padahngkiehr, “nan rahn akan me kokohdo, palingenitail sohte kak pweida ma sohte mehn kaweid, kahluwa, kaloalamwahu, oh pepehm en Ngehn Sarawi ahnsou koaros.”¹³

I kadehdehki me President Russell M. Nelson me wia soukohp en Koht nan sampah rahnwet.

Atail Sounkomour, Sises Krais, wia paionihr keieun kaselel nan kaunopadahn ahlo. Ni mehlel, E ketin wia “ahlo“¹³ ong pilahn en komouro en kak pweida pwe kitail en kak koluhla, oh sang atail pwosonla Ih, pwurala rehn Sahmo Nanleng.

Sises ketin mahsanih, “Ngehi me ahl, ngehi me mehlel, ngehi me mour; sohte me kak kolahng Semei ma soh ngehi.”¹⁵ E ketin inoukidahr me E sohte pahn ketin likidmelieikitailla; E pahn ketdo rehtail nan atail kasongosong kan.¹⁶ E ketin lukei kitail en “{kohdo [Reh] ki ahmw mohngiong unsek, oh [E] pahn kamwahwih [iukala].”¹⁷

I kadehdehki me Sises Krais iei atail Sounkomour oh atail Soundoar, weliapatail rehn Sahmo. Samatail Nanleng ritingadahr ahlo ong kitail en pwuralahng Reh sang ni atail pahn idawehn Sapwellime Iehros Kempoakeho, Sises Krais, sang ni pwoson nan atail weweidwei.

Ahi pahpa oh nohno kahlap ako oh ekei paionihr en mahs ako sohpei soangen kahpwal tohto ni arail seiloakdo dake kuruma, mehn wisik kan, oh alialu kolahng Salt Lake Valley. Kitail pahn iang lelehng kahpwal nan atail seiloak en mour wet. Kitail sohte pwupwuhs kuruma de dakedake kuruma pweipweidi kan pohn nahna ukada kan oh wasa ais loal; kitail songosong duwehte irail en powehdi kasongosong oh kahpwal akan en atail ahnsou wet. Mie wasa kitail pahn alu ie; mie atail nahna—oh pil ekei pak dohl—me kitail en daur. Mendahte kasongosong akan rahn pwukat weksang en paionihr ko, irail sohte wia kahpwal tikitik ong kitail.

E kesempwal kitail en idawehn atail soukohp oh katengehdieng patehn nehtail akan pohn ahlen inou en pwosono pwe kitail en duwehte paionihr en mahs ako.

Kitail en idawehn Sises Krais sang ni atail weweidki pwoson. Kitail anahne papah Kauno oh papah emen emen. Kitail anahne kakehlailih palingenatail sang ni atail pahn momourki oh wauneki atail inou akan. Kitail en dehr kesehla pepehm kesempwal en momourki kosonned ko. Sehdan kin songen kaluwetehla atail poadidi oh atail limpoak ong Koht oh atail Kaun Sises Krais. Menlau tamataman ma emen aramas pahn salongasang ahlo, kitail sohte kak salongala sang atail Sounkomouro. Pwehki kapai en koluhla, kitail kak sohpeilahng Ih. E pahn ketin sewesei kitail en esehla, keirda oh weliakapwala sang ni atail pahn nantiheng mihmihte pohn ahlen inouo.

Kitail en idawehnla nan lipwen elueluwen Sises Krais oh, sang ni weweidwei ni pwoson, kilenglahngete Ih, ni atail katengehdiengete nehtail kan pohn ahlen inouo, iet iei ahi kapakap ni mwaren Sises Krais, amen.