Kakehlailihukada, Saion
Emen emen kitail anahne ni mehlel oh kapakap teneki soahngkan me kitail kesempwalki ong pali uduk oh palingenatail.
Karasaras wia mehn kawehwe mwahu ong sapwelimen Kaun Sises Krais wiepen padahk. Kawehwe ni mengei, sapwellimen Sounkomouro karasaras akan wia soai me kin karasahdo duwen mehlel en palingehn ong dipwisou en sampah oh momour en sampah kan. Ni karasepe, rongamwahu en Kadehde Kapw akan audaudki padahk kan me karasa wein Nanleng ong weren tuhke,1 ong takai kesempwal ieu.2 ong kaunen peneinei oh tohn dodoahk en mwetuwel,3 ong lih meipwon ehk,4 oh pil soahng tohto teikan. Nan ansoun en Kauno doadoahk nan wein Kalili, pwuhk sarawi masanih me “ihte ni karasaras me e kin mahsanihong irail mehkot.”5
Udahn wehweh de iren kaweid en karasaras kin sohte nohn sansal. Ahpw, soaio kin kawehwedahte mehlelo ong me rongorongki pein ah pwoson Koht, pein ah kounop en palingeni, oh pein ah inengiong en koledi. Eri, aramas emen anahne doadoahngki ah mehn pilipil oh ansou koaros “idek, rapahki, oh letelet”6 pwe en kak diarada mehlel kan me mih nan karasaraso.
I kapakapki ni ngidingid me Ngehn Sarawio pahn kamarainih emen emen kitail ni atail pahn medewe kesempwalpen karasaras en kamadipw en kapwopwoud lapalap ehu.
Kamadipw en Kopwopwoud Lapalap Ehu
”Eri Sises … pwurehng masen ong irail ni karasaras akan, oh masanih,
”Wein nanleng duwehte nanmwariki men, me wiahda kopwopwoud en nah pwutak emen,
”Ih eri kadarpeseng nah ladu kan en luke irail koaros me konehng iang towehda kopwopwoudo: ahpw irail sohte kak kohdo.
”Mwuri, e pil kadarpeseng ekei ladu, oh kosoiaiong irail, Padahkiong irail me mih nan luhk kan, Ei, I kounopadahr mwengehn soutik: nei kou oh mahn mworourou kan kamalahr, oh sohng koaros kounopdahr: kumwail kohdo iang kopwopwoudo.
”Ahpw irail sohte wiahki mehkot, oh kokohla nan arail wasa kan, emen kohla nan ah mwetuwel, emen kohla kilang ahah kopwehn netnet ko.”7
Nan ansou pwuko, ehu ansou en peren ong mehn Suhs iei kamadipw en kopwopwoud—mwekid ehu me kin reireikihla wihk de pil kak lel la wihk riau. Soangen mwekid wet kin anahne kosonepe en ansou reirei, re kin mwadangen kehsehki aramas akan me pahn anahne iang kan, oh mehn keteman pahn kin lel irail ni rahn me kamadipwo pahn tep. Luhk sang nanmwariki ong sapwelime aramas akan ong kopwopwoud me duwe met kin duwehte poahngoak ehu. Ahpw, pali tohto en aramas me luhk ko doke sohte kohdo.8
“Soikala oh sohte iang patehng an nanmwarikio kamadipw wia mwekid en uhwongada … lapalapo oh e me kasaroh oh kamwamwahl ong lapalapo oh sapwelime pwutako. … Soik wet sang emen ohl pwehki ah mwetuwel o oh emen pwehki sang ni [doadoahk en pesnes]”9 kasalehda dahme kesempwal ong ira oh ara sohte dukieng kekehliken nanmwarikio.10
Karasaraso doulahte:
”E masaniong sapwellime ladu kan, Kopwopwoud o kounopadahr, ahpw irail akan me luhk o doke kan irail sohte warohng.
”Kohla nan ahl akan koaros, oh diarada wen aramas tohto kan, oh padahkiong irail en kohdo ni kopwopwoud et.
”Eri ladu kan kohla seli nan ahl akan, oh kihpene me tohto wen me re kak diar, me suwed oh mwahu koaros: eri kopwopwoudo audaudkihda aramas tohto.”11
Tiahk nan ansou pwuko iei me aramas me wiahda kamadipwo—nan karasaras et, me iei nanmwarikio—pahn kaunopada likou ong aramas lukodoh akan. Songen likou en kopwopwoud wet me mengei, iei likou puhp ehu me koaros me iang rahno pahn likawih. Ni mwohmw wet, lapalap de semwehmwe pahn kasohrala, oh koaros ni kamadipwo pahn kak kosokosoi pene ni arail soahnge tehieu.12
Koaros me luhk sang nan ahl akan en iang towehda kopwopwoudo sohte pahn ahneki ansou mwahu en alehdi likou me mwahu ong kounopdahn dodohk wet. Ihme kahrehda, nanmwarikio ketikiong irail likou kei me sangete nan sapwelime wasahn likou. Koarusie ahneki ansou mwahu en likawihda likou en aramas lapalap.13
Ni ansou me nanmwarikio ketilong wasahn kopwopwoudo, e kasawih aramas akan nan pokono oh mwadangete kasawihada me emen irail sohte likawih ah likou en kopwopwoudo. Ohlo eri pakahrdo mwowe, eri nanmwarikio peidek reh: ”Kempokepahi, dahme karehda ke sohte iang likawih likou en kopwopwoudo? E sohla kak koasoai.”14 Iet me Nahnmwarkio idek, “Dahme karehda ke sohte likawihki ahmw likou en kopwopwoudo, nan ah mie ehu me kohiong uhk?”15
Ohlet sohte likou mwahu ong ni songen dodohk kesempwal wet, oh lepin pwuloi ”Oh e sohte kak koasoai” kasalehda me sohte ah kahrepe mwahu.16
Elder James E. Talmage kihda kosoi wet me pid kesempwalpen en ohlo wiewia ko: ”Ohl luhkdo me sohte likoudaho dipikihda soukautih, sohte ahnki wahu, de mwohmw suwed kan, me sansal sang irair wet. Ni tapio nanmwarikio inenen mwahuieng, oh idekte mwomwen ohlo ah pidelong apw sohte alehdi likouo. Ma ohlo kak kawewehda duwen mwomwehu, de ma mie kahrepe me e pahn kak kihda, e udahn pahn kak kosoi; ahpw kitail esehier me e sohla kak kosoi. Sapwelimen nanmwarikio poahngoako kohiong koaros me nah ladu kan diar; ahpw emen emen irail pahn pidelong ni wenihmw en tehnpaso; oh mwohn arail pahn lel wasahn kamadipwo, wasa me nanmwarikio pahn tuhwong irail, koaros pahn likouda mwahu; oh me sohte likoudaho, miehte ekis wasa tohrohr me e pidelongie; oh sohte daulih silepehn kehlo, ih aramas me wailong men.”17
Soun inting Souleng men, John O. Reid, intingihdi me pwehki ohlo ah soikala en iang likawihda likou en kopwopwoudo kasaledahr lapalahn eh ”mwamwahliki nanmwarikio oh sapwelime pwutako.” Kaidehn sohte ah likou en kopwopwoudo; ahpw, e pilada en dehr likawih. E uhwongada oh soikala likawih likou en kamadipwo. An nanmwarikio ah mwekid oh koasondi inenen mwadang: ”Pirehdi peh oh neh kan, oh wahlasang me, oh koskieng ih nan wasa rotorot; wasa me e pahn sengiseng oh ngih tehterok.”18
En nahnmwarikio ah koasondi ong ohlo kaidehn pwehki ah sohte likou en kopwopwoudo—ahpw pwehki ”ohlo, ni mehlel, koasoanehdi en dehr likouda. Ohlo … men ahneki waupen eh pahn patehng kamadipw en kopwopwoudo, ahpw … sohte men idahwen tiahk en nanmwarikio. E men wia pein nsene. Ah sohte likou mwahuo kasalehda wen loale eh uhwong nahnmwarikio oh sapwelime kosondi kan.”19
Tohto Me Lukodo, ahpw Malaulau Me Pilipilda
Karasaraso imwikihla iren pwuhk sarawi wet: ”Pwe me tohto lukodo, ahpw malaulau me pilipilda.”20
Joseph Smith wiadahr kasansalada wet nan iretikitik ehu sang Madiu nan ah kawehwehda Pwuhk Sarawio: ”Pwe tohto me lukodo, ahpw malaulau me pilipilda; eri koaros sohte ahneki likou en kopwopwoudo.”21
Eri luhk ong kamadipw en kopwopwoudo oh pil pilipil en ale ni kamadipwo wiahte ehu ahpw wekipeseng. Luhko ong ohl oh lih koaros. Aramas emen kak alehdi luhko oh mwohndi ni kamadaipwo—ahpw sohte pilipilda en ale pwehki e sohte ahneki likou me pwungehng kopwopwoudo ni ah sohte ahneki pwoson Kaun Sises oh Sapwelime mahk lapalapo. Eri, kitail ahneki koaros luhk sang rehn Koht oh pein atail pasapeng ong pwukoaho, oh me tohto pahn lukodo ahpw me malaulau pahn pilipilda.22
Atail pahn iang de wiahla emen me pilipilda sohte kin audahte kohdohng kitail. Ahpw, kowe oh ngehi kak pilada en pilipilda sang ni atail pahn pilada mwahu atail pilipil en sampah.
Menlau tehk lepin lokaia pilipilda sang nan iren pwuhk kan sang Doctrine and Covenants.
”Kilang, tohto me pahn lukodo, ahpw malaulau me pahn pilipilda. Eri dahme karehda irail sohte pilipilkihda?
”Pwehki arail mongiong kan tengediongehr ni dipwisou en sampah, oh kesempwaliki wahu en aramas.”23
Ih kamehlele me wehwehn ire tikitik pwukat inenen dehde. Koht sohte kolokol ahd en irail akan me E pereniki me kitail kak kasik me edetail kan pahn ehu rahn kapatapatehng. E sohte kin itehdi “me pilipildahr” ong mehte depe. Ahpw, atail mongiong kan, atail ineng kan, atail kesempwaliki inou sarawi kan en rongamwahuo oh tiahk sarawi kan, atail kin peikiong kosonned akan, oh, me keieu kesempwal, sapwelimen Sounkomouro mahk me kin pilada ma kitail iang wia sapwelimen Koht me pilipildahr men.24
“Pwe se kin loaloapwoationg aht doadoahk en nting, pwe en koangoangehki nait seri kan, oh pil riat akan, en kamehlele Krais, oh en kapwung kihtala rehn Koht; pwe se ese me iei sang kalahngan en Koht me se komourkihla, mwurin soahng kan koaros me se kak wia.”25
Nan kediropw en nan atail mour oh pingiping en sampah me kitail koukouson loale, kitail kak manokehla dahme udahn kesempwal sang ni atail pahn kapwaiada pein insenetail, wahkila pweida kan, atail indand, oh wia me dehde men en wia mehkot keioun kesempwal ong kitail. Atail kesempwalikihla ”dipwisou en sampah” oh ”indand en aramas” kak elehda atail luhsang pein sohso.26
Inou oh Kadehde
I pahn kapwurehiong kekehlik sang Kauno ong Sapwelime aramas akan nan Kadehde Mering sang soukohp Akkai: ”E mahsanih me met mahsen sang rehn Kauno; Medewe mahs amwail wiewiahkan.”27
Emen emen kitail anahne kasawih ni mehlel oh kapakap soahngkan me kitail kesempwalki ong ni pali uduk oh palingehn pwe en kasalehda soahngkan nan atail mour me kak kauhdi kapai tohtokan me Sahm Nanleng oh Sounkomouro kupwurki ketkihdo pohtail. Oh ni mehlel Ngehn Sarawio pahn sewese kitail en kak kasawihada pein kitail.28
Ni atail pahn rapahki kisakis en ngehn ong mesetail kan en kilang oh salengetailkan en rong,29 I inouki me kitail pahn kapaida ong kehl oh mehn tenek en kakehlailih atail inou sarawikan me pahn ehu ong Kaun me ieiaso. Kitail pil pahn alehdi manaman en me sarawi nan atail mour kan30—oh ni imwio pahn koaros luhk ong oh pilipilda ong sapwelimen Kauno Kamadipw.
”Pirida, pirida; kakehlailihukada, Saion.”31
”Pwe Zion pahn linganla, oh sarawihla; ah wasa kan pahn tehlap la; ah sdeik kan pahn kakehlailla; ei, met ih indahng uhk, Zion pahn kesihkerda oh likawiada ah likou kaselel kan.”32
I kadehde ni pohpohl duen sarawi oh mehlel en Koht ieias, Samatail Soutuk, oh Sapwelime Iehros, Sises Krais. I kadehde me Sises Krais iei atail Sounkomour oh Soundor oh E ketin Ieias. Oh ih pil kadehde me Sahm oh Naho pwarohng kisin pwutak Joseph Smith, me karehda Kapwurupwurdohn sapwelimen Sounkomour rongamwahuo ni imwin rahn akan. Ih men emen emen kitail en rapahki oh paiekihdi mahs en kilang oh saleng en rong, I kapakapki ni mwahr sarawi en Kaun Sises Krais, ahmen.