Kisakis en Kangoang
I kangoangei kumwail en nanantihengete warehng pwurala rehn Sahm Nanleng oh Sises Krais.
Riei ohl oh lih akan, I kapingki ei pil iang patehng kumwail nan kapokon lap wet en Mwomwohdiso en Sises Krais en Souleng en Imwin-Rahn akan. Se kin kehn wen amwail pwoson oh limpoak nan wasa koaros me kumwail mihmi ie. Se pil kehlailkidahr padahk, kadehde kehlail kan, oh melkahka kaselel kan.
I kangoangeikumwail en nanantihengete warehng pwurala rehn Sahm Nanleng oh Sises Krais. Sohte lipilipil iawasa kumwail mihmi ie nan ahlen inouo, kumwail pahn lel eng kahpwal me pid kasongosong en paliwar en mourwet oh doadoahk en uhweng kan en Sehdan.
Ahi nohnohu kin indahng ie ni ahi kin kaulimki uwen apwal en mehkot, “Hal, ei udahn e apwal. Ih pahn mwomwe. Mourwet wia sikeng ehu.”
E kak koasoaia ni meleilei, pil ni ah sirei, pwehki e ese soahng riau. Mendahte kahpwaloko, dahme pahn keioun kesempwal iei en lela pwe en mihmi rehn Sahmo Nanleng. Oh e ese me e kak wia met sang ni ah pahn pwoson ah Sounkomouro.
E kehn me Kauno ketin karanih. Nan rahn akan me e esehier me e kereniehngehr mehla, e koasoaiahieng ie duwen Sounkomouro ni ah wenohn nan ah perehu. Mie ehu wenihmw en ehu pere mih limwahn ah pehto. E kin mas kouruhr oh kilenglahng wenihmwo ni ah kin koaskoasoai malamal me e pahn kilang Ih ansou keren. I tamtamante ahi kin kilkilang wenihmwo oh medemedewe perehu palio.
Met e miher nan wein ngehn. E kin kilkilangete kisakis me e mwahukio mendahte pahr ekei me e lelehng kasongosong en paliwar oh pein ah kahpwal kan.
Sohso en kangoang me e kihdieng kiht pahn keioun sansal nan Moroni 7, wasa me Mormon kangoange emen nah pwutak oh nah aramas akan. E wia sohso en kangoang ehu ong kadaudok kan iei me duwehte en ahi nohno ong ah peneinei. Mormon kihdieng kisakis en koangoang wet ong koaros me ahniki ineng en warehng, sang ni koasongosong kan en mourwet, ong mour soutik.
Mormon tapihada nan keioun ire tikitik kan en Moroni 7 ni ah kadehdehki Sises Krais, tohnleng kan, oh Ngehn en Krais, me kin mweidehng kitail en ese mwahu oh suwed oh kak pilada me pwung.
E kin kiheng Sises Krais mwohn mehkoaros, me duwehte koaros me kin pweida ni arail kin kangoange irail akan me nananti kohda pohn ahl me kolahng nanleng:
“Pwe sohte emen kak komourla, iet me sang mahsen en Krais, ihte ma irail pwoson mwareo; eri, ma mepwukat sohralahr, pwoson pil sohralahr; oh meh suwedieng aramas, pwe re pahn duhduwehte likamw sohte doarepen mour wiawi.
“Ahpw kilang, riei kehmpoake kan, I ese mehkot mwahu me pid kumwail, pwe I ese me kumwail pwoson Krais pwehki sang ni amwail karakarahk; pwe ma sohte amwail pwoson Ih ah kumwail sohte warehng iang kileledi nan tohn sapwelime mwomwohdso.”1
Mormon kasawiada me arail karakarahk me wia kilelepen kehlail en arail pwoson. E kasawihada me irail ahniki likilik ong Sounkomouro. E koangoange irail ni ah kilang arail pwosono. Mormon wenlahte nan ah kangoange irail ni ah sewesei irail en kilang me arail pwoson oh karakarahk pahn kakehlaka arail koapwoaroapwoar oh kamehlele me re kak pweida nan arail kahpwal akan.
“Pil kapwurehieng, riei kempoakehko, I pahn koasoaiahieng kumwail me pid koapwoaroapwoar. Ia mwomwen ahmw kak alehdi pwoson, ma ke sohte ahniki koapwoaroapwoar?
“Oh dahme kumwail en kin koapwoaroapwoariki?” Kilang I ndahiong kumwail me kumwail pahn ahniki koapwoaroapwoar sang ni tomwpen Krais oh manaman en sapwellime iasadao, pwe kumwail en iasada ong mour soutuk, oh met pwehki amwail pwoson ih sang ni inouo.
“Eri, ma ohl emen ahniki pwoson e anahne ahniki koapwoaroapwoar; pwe ma sohte pwoson pahn sohte koapwoaroapwoar.
“Oh kapwurehieng, kilang I indahieng kumwail me e sohte kak ahniki pwoson oh koapwoaroapwoar, ihte ma e ohpampap, oh mohngiong karakarahk,”2
Mormon eri kangoange irail ni ah kadehdehki me irail miher pohn ahlen alehdi kisakis en arail mohngiong en direkihla sapwelimen Krais limpoak mwakelekel. E padahkieng irail doadoahk en pwoson Sises Krais, me iei ohpampap, karakarahk, Ngehn Sarawi, oh koapwoaroapwoar tengeteng en alehdi kisakis laud en mour soutik. E kangoange irail ni mwohmw wet:
“Pwe sohte me kak uh mwohn Koht, ihte irail kan me ohpampap oh mohngiong karakarahk; oh ma ohl emen ohpampap oh mohngiong karakarahk, oh wehkada sang ni manaman en Ngehn Sarawi me Sises iei me Krais, e anahne ahniki limpoak mehlel; pwe ma e sohte ahniki limpoak mehlel ih sohte men; eri e anahne ahniki limpoak mehlel.”3
Pwurehng tamanda ansouo, met I kilang ia mwomwen kisakis en limpoako—en Krais limpoak mwakelekelo,—kakehlakahda, kahluwa, utungada oh wekidala ahi nohnohu nan ah kahpwal akan ni ah kohkohla nanleng.
“Oh limpoak mehlel kin kanengamah, oh e kadek, oh sohte kin kailok, oh sohte kin pohnmwahso, sohte kin medemedewe pein ih, sohte kin mengeien lingernger, sohte medewe me suwed, oh sohte perenki mehkot suwed ahpw perenki me mehlel, alehda mehkoaros, kamehlele mehkoaros, koapwoaroapwoarki mehkoaros, nantiheng nan mehkoaros.
“Eri, kempoakepahi kan, ma sohte amwail limpoak unsek, sohte mehkot kumwail, pwehki limpoak unsek kin pweida. Eri, tengediong ni limpoak unsek, iei ihme keieu laud sang koaros, pwe mehkoaros sohte pahn pweida—
“Ahpw limpoak unsek iei limpoak mehlel en Christ, oh e kin mihmi kohkohlahte; oh mehmen me kin kolokol lao lel ni imwin rahno, e pahn kin mwahu ong ih.
“Eri, kompoakepahi kan, kapakap ong Sahmo sang ni kehl en amwail mohngiong kan koaros, pwe kumwail en kak audaudkihda limpoak wet, me e ketikihongehr pohn koaros me kin idawehn mehlel sapwellime Ieroso, Jesus Christ; pwe kumwail en kak wiahla sapwellimen Koht serihkan; pwe ni ansou me e pahn ketin pwarodo, kitail pahn duwehla ih, pwe kitail pahn kilang ih nin duwen ih; pwe kitail en kak ahneki koapwoaroapwoar wet; pwe kitail en mwakelekelda duwehte ih me ketin mwakelekel.”4
I kapingki kangoangen en Mormon karasaras mwahu oh padahk kan. I pil kapaikihda en ahi nohnohu sohsohu. Soukohp akan sang Adam leledo rahn pwukat, sang ni arail padahk kan oh karasaras kan, kakehlailihie dahr.
Sang ni wahu ong irail kan me I ese oh arail peneinei kan, I piladahr me I sohte pahn songen kasalehda mengihtik kan en arail kahpwal akan de koasoaiahda arail kisakis kesempwal kan Ahpw soahng kan me I kilangehr kangoangeiedahr oh wekidielahr en mwahula.
Ni keperpen kauwehla ah onopek mwahu, I pahn kapatahieng ehu repoht mwotomwot me pid kangoangen ahi pwoud. I wia met ni keneinei. Ih lih emen me sohte kin men alehdi de perenki aramas en kepinga.
Se pwopwoudkiher sounpar 60 [weneisek]. Pwehki irairo met I wehwehki ia wehwehn iren pwuhk sarawi pwukat; pwoson, koapwoaroapwoar, ohpampap, dadaurete, sohte rapahki pein insenomw, perenki me mehlelo, sohte medewe me suwed, oh mwohn koaros, limpoak mehlel.5 Met pil kahrehieng ien kak kadehdehki me aramas kak doadoahngki soangen madamadau kaselelko koaros nan arail mour nan ehu ehu rahn ni arail pahn keirdahsang kalokolok kan en mourwet.
Tohto kumwail me rongorong ese soangen aramaset. Tohto kumwail wia soangen aramaset. Kitail koaros anahne soangen kangoang en karasaras mwahuet oh kempoakepahtail me limpoak.
Ma komw patehng emen ni omw wia lih de ohl en papah men; komw wia weliepen Kauno. Medewe dahme E pahn ketin wia de mahsanih. E pahn ketin luke irail en kohdo Reh. E pahn ketin kangoange irail. E pahn ketin mahsanih oh kepinga tepin wekideklahkan me irail anahne wia. Oh E pahn ketin wia karasaras keioun unsek ong irail en alasang.
Sohte emen kak alehda soahngo met, ahpw ni omw pahn rongorong padahk kan en kapokon wet, ke kak ese me ke miher pohn ahlo. Atail Sounkomouro mwahngih omw kahpwal akan ni mengihtik. E ketin mwahngih ahmw koahiek en keirda ni pwoson, koapwoaroapwoar, oh limpoak mehlel.
Kosonned kan oh inou kan me E ketkiehng uhk kaidehn kasongosong kei pwe en kaun uhkada. Irail wia kisakis en kakehlailih iuk ong alehdi kisakis koaros en Koht oh en pwurala rehn Sahm Nanleng oh Kauno, me poakehng kumwail.
Sises Krais pwainlahr pweinen dipatail kan. Kitail kak alehdi kapai en mour soutik ma atail pwoson Ih pahn itarehng koluhla oh duwehla serihmen, mwakelekel oh onopehngehr alehdi me keiou laud nan Sapwelimen Koht kisakis kan.
I kapakapki me kumwail pahn alehda Sapwelime luhk oh me kumwail pahn ehukiheng mehteikan me pil wia Sapwelimen Sahm Nanleng seri.
I kapakapki neitail misineri kan nan sampah pwon. Pwe irail en kak inengieng en kangoangehki emen emen en ahniki oh kamehlele me luhko iei Sises Krais sang Sapwelime sounpapah kan me aledahr Mwarehu.
I kadehdehki me E ketin ieias oh kaukaweid Sapwelime Mwomwohdiso wet. I wia Sapwelime soun kadehde. Presiden Russell M. Nelson iei Sapwelimen Koht soukohp ieias ong sampah pwon. I ese me mepwukat mehlel. Ni lengileng sarawi en Sises Krais, amen.