Mpo ete Bakoka Koyeba Yo
Mposa na ngai ya motema ezali ete bokoya koyeba Yesu na bankombo ebele mpe ete bokokoma lokola Ye.
Mwa mibu moke eleki, bomoi na ngai ebongwanaki na lolenge mosusu na ntango ya likita ya elambo na palwasi ya mboka na biso ya Arizona. Lokola losambo ya elambo elobi bolingi na biso ya “kozwa likolo na [biso moko] nkombo ya [Yesu Klisto],”1 Molimo Mosantu akundolisaki ngai ete Yesu azali na bankombo ebele. Motuna nsima eyaki na motema na ngai: “Bankombo nini ya Yesu nasengeli kozwa likolo na ngai moko na poso oyo?”
Misato ya bankombo eyaki na makanisi na ngai, mpe nakomaki yango. Moko na moko na bankombo misato oyo ezali na banguya ya Kimoklisto oyo nalingaki kokolisa koleka mpenza. Na poso oyo elandaki, nafandelaki bankombo misato oyo mpe namekaki kososola ndimbola na yango ya bizaleli mpe ntina. Uta na ntango wana, nakobaki komituna motuna wana lokola eteni ya bosanjoli na ngai moko: “Bankombo nini ya Yesu nasengeli kozwa likolo na ngai moko na poso oyo?” Koyanolaka na motuna wana mpe kolukaka komatisa bizalela ya Kimoklisto epambolaki bomoi na ngai.
Na libondeli na Ye ya monene ya Losambo, Yesu alobelaki bosolo ya ntina oyo: “Mpe oyo ezali bomoi ya seko ete bayeba yo Nzambe moko ya solo, mpe Motindami na yo, Yesu Klisto.”2 Lelo nalingi kokabola elongo na bino mapamboli mpe nguya oyo eyaka uta na boyebi Yesu Klisto na bankombo na Ye ebele.
Lolenge moko toyebaka moto songolo ezali na boyekoli nkombo na ye. Elobami ete “nkombo ya moto ezali epai ya moto yango mongongo kitoko mpe ntina na lokota nyonso.”3 Esila kokomela yo obenga nkombo ya moto songolo mabe to kobosana nkombo na ye? Mwasi na ngai, Alexis, mpe ngai na mbalakaka, tobengaki moko ya bana na biso “Lola.” Na libaku mabe, lokola bokoki koyeba, Lola ezali mbwa na biso! Na malamu to mabe, kobosana nkombo ya moto songolo elimbolaka epai ya moto yango ete olingi mpenza koyeba ye malamu te.
Yesu ayebaki mpe abengaki bato na nkombo. Na Yisalaele ya kala, Nkolo alobaki, “Bobanga te: mpo ete nasikolaki bino, nabiangaki bino na nkombo na bino; bozali ya ngai.”4 Na ntongo ya Pasika, litatoli ya Maliya ya Klisto mosekwi ezalaki makasi ntango Yesu abengaki nkombo na ye.5 Lolenge moko, Nzambe abengaki Joseph Smith na nkombo na ye mpo na koyanola losambo na ye ya bondimi.6
Na ndenge moko, Yesu apesaki bayekoli na Ye bankombo ya sika oyo ezalaki ndimbola ya lolenge, bokasi, mpe makoki na bango. Jehova apesaki Yakobo nkombo ya sika ya Yisalaele, oyo elingi koloba “moto oyo asalaka na Nzambe” to “atika Nzambe asala.”7 Yesu apesaki Yakobo mpe Yoane bankombo ya sika ya Boanerges, oyo elimbolaki “bana mibali ya nkake.”8 Kotalaka bokambi na ye ya lobi ekoya, Yesu apesaki Simona nkombo ya sika ya Sefase to Petelo, oyo elimboli libanga.9
Kaka lokola Yesu ayebaka moko na moko na biso na nkombo, lolenge moko oyo tokoyeba malamu Yesu ezali na boyekoli bankombo na Ye ebele. Lokola bankombo ya Yisalaele mpe Petelo, bankombo ebele ya Yesu ezali bankombo ya lokumu oyo esungaka biso tososola etinda na Ye, ntina, ezalela, mpe bizaleli. Ntango toyebi bankombo ebele ya Yesu, tokoya kososola malamu etinda na Ye ya bonzambe mpe ezaleli ya bolingi ya kosalisa. Koyebaka bankombo na Ye lisusu efulaka biso mingi lokola Ye—mpo na kokolisa bizaleli ya Kimoklisto oyo ememaka esengo mpe ntina na bomoi na biso.
Mwa mibu eleki, Mokambi Russell M. Nelson ayekolaki makomi nyonso na ntina ya Yesu Klisto na Topical Guide.10 Nsima abengisaki bilenge banzemba bayekola makomi moko oyo. Na oyo etali bankombo ebele ya Yesu, Mokambi Nelson alobaki, “Koyekola makambo nyonso Yesu Klisto ezali na kosambelaka mpe kolukaka makasimpo na kososola nini moko na moko ya bankombo na Ye ya lokumu ekeseni mpe bankombo elimboli yango moko mpo na yo.”11
Kolandaka libiangi ya Mokambi Nelson, nabandaki komatisa mokanda na ngai moko ya bankombo ebele ya Yesu. Mokanda ezali sikawa na bankombo 300, mpe nayebi ezali na ebele oyo naino namoni te.
Lokola ezali na bankombo mosusu ya Yesu oyo ebombami kaka mpo na Ye,12 nalingi nakabola bankombo mitano mpe bankombo ya lokumu oyo ezali motuya epai ya moko na moko na biso. Nabengisi bino bomatisa mokanda na bino moko ya bankombo ntango boyei koyeba Yesu na bankombo ebele ya Ye. Nakosalaka bongo, bokomona ete ezali na bankombo mosusu—na ndimbola na yango ya bizalela ya Kimoklisto—oyo okolinga kozwa likolo na yo moko lokola moyekoli ya liyokani ya Yesu.13
Ya yambo, Yesu azali Mobateli mpate Malamu.14 Lokola, Yesu ayebaka mpate na Ye,15 “abengaki mpate na ye na nkombo,”16 mpe, lokola Mwana mpate ya Nzambe, abonzaki bomoi na Ye mpo na mpate na Ye.17 Lolenge moko, Yesu alingaka biso tozala babateli mpate malamu, mingi mingi na mabota na biso mpe misala ya lisalisi bandeko mibali mpe basi. Lolenge moko tolakisaka bolingo na biso mpo na Yesu ezali na koleisaka mpate na Ye.18 Mpo na mpate oyo ekoki koyenga-yenga, babateli mpate malamu basengeli kokende na zamba mpe koluka mpate oyo ebungi, nsima kotikala na yango kino ekozonga na bokengi.19 Lokola babateli mpate malamu, mpe lokola makambo ya mboka ekoki kopesa nzela, tosengeli koluka kolekisa ntango ebele na kosungaka bato na mabota na bango. Na mosala na biso ya kosalisa, esengeli tokoma mpe tosalela tekinoloji mpo na kopesa ntina, kozwa esika te, ya bokutani na moto.20
Ya mibale, Yesu azali Nganganzambe Monene ya Makambo Malamu Ekoya.21 Koyebaka ete kobakama na ye na ekulusu ezalaki bobele ya banngonga moke, Yesu alobaki: “Nalobelaki bino makambo oyo, ete na ngai nde bokozwa kimya. Kati na mokili bokozala na mitungisi: kasi bozala na esengo malamu; ngai nasili kolonga mokili.”22 Lelo, lokola mokili na biso ezali mbala na mbala ya kobeba mpe ya kokabwana, ezali na mposa monene mpo na biso tosakola mpe tosalela bolamu, bondimi mpe elikya. Atako mimekano kani oyo eleki, bondimi ntango nyonso esengeli kotala liboso na biso ya lobi ekoya,23 kotondisama na elikya, ekopesa biso ndingisa ya kokokisa libiangi ya kozala na esengo.24 Kosalela nsango malamu na esengo esungaka biso tokoma bayekoli ya makambo ya malamu ekoya lobi.
Nkombo mosusu ya bankombo ya lokumu ya Yesu ezali ete Azali Lolenge moko, Lobi, Lelo, mpe Libela.25 Kozala ntango nyonsoi ndenge moko ezali ezaleli ya Kimoklisto. Ntango nyonso Yesu asalaki bolingi ya Tata na Ye,26 mpe loboko na Ye ezali ntango nyonso ya kotandama mpo na kosunga biso, kosalisa mpe kobikisa biso.27 Ntango tozali ntango nyonso kosalela nsango malamu, tokokoma mingi koleka lokola Yesu.28 Atako mokili ekutani na mitungisi ya minene na oyo bato balingaka ntango wana bato bazali kobendana nsima to liboso komemamaka na mopepe nyonso ya malongi,29 kobika nsango malamu ntango nyonso esungaka biso totelema ngwi mpe toningana te na ntango ya mipepe makasi ya bomoi.30 Tokoki lisusu kolakisa bompikiliki na kondimaka libiangi ya Mokambi Nelson ya “kolengela ntango mpo na Nkolo.”31 Makasi monene ya molimo ewutaka na biloko ya mike mpe pete32 lokola komatisa “bizaleli bisantu mpe makambo ya malamu”33 ya losambo, boyamboli, boyekoli makomi, mpe lisungi na basusu mikolo na mikolo.
Ya minei, Yesu azali Mosantu ya Yisalaele.34 Bomoi ya Yesu ezalaki ndakisa ya bosantu. Ntango tozali kolanda Yesu, tokoki kokoma mosantu na Yisalaele.35 Tokolaka na bosantu ntango tokendaka mbala na mbala na tempelo, esika eye “Bosantu na Nkolo” ekomami na bikuke nyonso ya boyingeli. Ntango nyonso tosanjolaka na kati ya tempelo, tolatisamaka na likoki ya nguya monene mpo na kosala mabota na biso bisika ya bosantu.36 Mpo moto oyo azali na mokanda ya boyingeli na tempelo esantu te, nabengisi bino bokutana na episikopo na bino mpe bomilengela bino moko mpo na kokota to kozonga kuna na esika esantu wana. Ntango tolekisi kati na tempelo ekomatisa bosantu na bomoi na biso.
Nkombo ya nsuka ya Yesu ezali ete Ye azali Moyengebene ya Sembo mpe ya Solo.37 Kaka lokola Yesu azalaki moyengebene ya sembo mpe ya solo ntango nyonso, mposa na Ye ya motema ezali ete tolakisa makoki oyo na babomoi na biso. Ntango bondimi na biso etungisami, tokoki kobelela epai ya Yesu, “Nkolo, bikisa ngai,” kaka lokola Petelo ntango abandaki kozinda na mopepe ya mbu ya Galilea.38 Na mokolo wana, Yesu akitaki mpo na kosunga moyekoli oyo azalaki kozinda. Asalaki lolenge moko mpo na ngai, mpe Akosala lolenge moko mpo na yo. Kotika Yesu ata moke te—Akotika yo ata moke te!
Ntango tozali bayengebene mpe solo, tolandi libiangi ya Yesu ya “Bokangama na ngai,” oyo ekoki lisusu kolimbolama “botikala na ngai.”39 Ntango tozali kokutana na mituna, ntango totiolami mpo na bondimi na biso, ntango misapi ya batioli etiami likolo na biso na baoyo bafandi na bandako minene mpe milai ya mokili oyo, totikala bayengebene na bondimi mpe totikala ya solo. Na bantango oyo, tokundolaka libondeli ya Yesu, “Tala epai na ngai na makanisi nyonso; ntembe te, kobanga te.”40 Ntango tosali bongo, Ye apesaka biso bondimi oyo esengeli, elikya mpe makasi ya kotikala elongo na Ye.41
Bandeko mibali mpe basi, Yesu alingi biso toyeba Ye mpo ete Ye azali bobele se nkombo moko na nse ya lola na nzela eye tokoki kobikisama.42 Yesu azali nzela, solo mpe bomoi—moto moko te akoki kozonga epai ya Tata longola se na Ye.43 Yesu azali bobele nzela se moko! Mpo na ntina oyo, Yesu alobi, “Boya epai na ngai,”44 “Bolanda ngai,”45 “Botambola na ngai,”46 mpe “Boyekola epai na ngai.”47
Na motema na ngai mobimba, natatoli na ntina ya Yesu Klisto—ete Azali na bomoi, ete Alingaka bino, mpe ete Ayebi bino na nkombo. Azali Mwana ya Nzambe,48 Mwana se moko ya Tata.49 Azali libanga na biso, Likonzi, Ekimelo na biso, Ebombamelo na biso mpe Mokangoli na biso.50 Azali Pole oyo Engengaka na Molili.51 Azali Mobikisi na biso52 mpe Mosikoli na biso.53 Azali Lisekwa mpe Bomoi.54 Mposa na ngai ya motema ezali ete bokoya koyeba Yesu na bankombo ebele mpe ete bokokoma lokola Ye ntango bokolanda bizaleli na Ye ya bonzambe na bomoi na bino. Na nkombo ya Yesu Klisto, amene.