Toeni Luhlahp
Jisus Kraist pa Kuh luhn Pahpah Ninac
Toeni Luhlahp ke Eprel 2023
15:13

Jisus Kraist pa Kuh luhn Pahpah Ninac

Sel Elder Dieter F. Uchtdorf

Ke U luhn Mwet Sap Singucul Luo

Kahsruh tuhlihk nuhtum an in muhsaheack luhlahlfongi kacl Jisus Kraist, luhngse wosasuc Lal ac Alu Lal, ac ahkolah nuh ke moul in sulaclah ma pwacye.

Pihlacmuh, pahpah se nge ahkoo in som nuh ke miting se luhn pisaprik. Tuhlihk muhtwacn yac ahkosr se nahtuhl fahsryang kohsraclah, nukum nuknuk in mutul lal ac sruokyac puk se Sramsram ke Puk luhn Mormon.

“Efuh enenuh kom in som ke miting ah?” el siyuck.

“Mweyen nga mwet in kahsruh se ke pisaprik,” el topuk.

“Tuh kom pa pahpah tuhmuhk uh!” tuhlihk muhtwacn sacn sulpac fahk.

El sikuck muhtuhnte yak yohrohl. “Sweetheart,” el fahk, “Nga etuh lah kom luhngse nga in rit nuh sum ac kahsrekom in mutullac, tuhsruhk oyekuh nga enenuh in kahsrel pisap.”

Tuhlihk muhtwacn se nahtuhl ah topuk, “Kuh wacngihn pahpah tuhmwacl pisap in kahsrel oruh elan mutullac?”

Yohk tarilac lasr nuh suwohs mempucr puhs ma kihsackuhnlah pacl la in kuhlwacnsap ke Alu luhn Jisus Kraist misenge. Kihsackuhnlah lowos an muhtahl na pwacye.

Tuh ke tuhlihk muhtwacn se inge srihke in kahlwem kac, oasr ma muhtahl se oacna sie—ma se suc tiac kuh in aholyucklac—ke pahpah ninac se tuhfahlah tuhlihk se. El sruhlwaclah pactuhn inkuhsrao se.1 Pahpah Tuhmasr Inkuhsrao, Pahpah Wolacna, pwacyena elos engan ke tuhlihk Nahtuhl elos lutiyuck ac tuhfweyucklac sin pahpah ninac fin facluh.2

Pahpah ninac, kuloh nuh suwos ke ma nuh kwewa kom oruh in tuhfahlah tuhlihk nuhtuwos an. Ac tuhlihk, kuloh nuh suwos ke ma nuhkwewa kowos oruh in kahsruh ninac ac pahpah, oacn ke pahpah ninac nuhkewa etuh, kuht etwaclah ma uh sin tuhlihk nahtuhsr ke luhlahlfongi, finsrak, ac luhngse suc ma elos lotwelah pac sesr!3

Pahpah Ninac Sruok Kunohkohn Muhtahl se

Nuh oasr pacl se kom nuhnkuh ke kais sie pacl Pahpah Inkuhsrao El pihlacsrwaclah in suhpwacma tuhlihk Nahtuhl nuh facluh? Tuhlihk inge tuhlihk muhtwacn ac mukul nguhn Nahtuhl. Oasr finsrak lalos. Oasr finsrak lalos in muh mwet na wowo, kuhlwacng, ac pwacye. Ac ne ohinge elos tuhkuh nuh facluh tiac kuh in sifacna, wacngihn ma kuh in oruh sahyacn na tuhng enenuh kahsruh. Pacl lalos yurin God lihsrlihsryak, wi pacna lahlmwetmwet etuh lah suc elos uh ac elos ac muh mwet fuhkah. Elos muhsahelah etuh lalos ke moul, luhngse, God, ac plwacn lal wiwina ma elos liye yurin mwet raunweloslac—yohk na yurin pahpah ninac, suc, in fahk na pwacye, srihke in sokwack pac ma uh nuh selos sifacna.

Ahwowo sasuc

God El sang nuh sin pahpah ninac “kunohkohn muhtahl in tuhfahlah tuhlihk nahtuhlos ke luhngse ac suwohswohs, in sang enenuh lalos ke ip luhn mahno ac nguhn, ac in lotwelos in … akihlen masap luhn God.”4

Arulacna fal ma sacn nuh sin pahpah ninac se ma kwacna ngwetngwet ke fong ah.

Pweng luhk nuh suwohs pahpah ninac pa inge:

Leum El luhngse kowos.

Pwacyena lah El wi kowos.

El tu sikom.

El pa kuh lowos in kol tuhlihk nuhtuwos in oraclah sulaclah wowo.

Eis ma wo ac kunohkohn se inge ke puhlaik ac engan. Nimet srihke in ahollah mwe insewowo inkuhsrao se inge nuh sin siena mwet. Ke ma sruhlweyucklac ke wosasuc se inge nuh ke ma yohk srihpac ac mwe luti, ma kunom nuh sin God in kol tuhlihk nuhtum an ke ma na srihsrihk ke lwen nuhkwewa. Kahsruh tuhlihk nuhtum an in muhsaheack luhlahlfongi kacl Jisus Kraist, in luhngse wosasuc Lal ac Alu Lal, in ahkolah nuh ke moul in sulaclah ma pwacye. Pwacyena, pa ingacn plwacn luhn God nuh sin pahpah ninac.

Satan elac tulokihn kom, srihfe kom, srihke in ahksuhpwacrye kom.

Tuhsruhk tuhlihk nuh kwewa eis tari Kahlwem luhn Kraist suc ma tuhkuh na inkuhsrao. Ac Mwet Lahngo Elac kahsre kom, kol kom, ac ahkkweye kom. Suk kahsruh Lal. Siyuck sin Leum!

Leum Jisus Kraist

Oacna ke Jisus Kraist pa kuh luhn mwet fuhsr, Jisus Kraist El oacyacpac kuh luhn pahpah ninac.

El Ahkyohkye Luhngse

Kuhtuh pacl uh sahp kuht ac nuhnkuh muh sie na mwet kuh in oraclah wo liki kuht in kol ac luti tuhlihk nahtuhsr uh. Tuhsruhk tiac elyah lah kom oasr ac oyac meac kom puhla, oasr ma se yurum suc kom fal in oruh:

Luhngse luhn pahpah ninac nuh sin tuhlihk nahtuhlos el sie sin force fokoko fin facluh. El pa sie sin ma suhpuhs fin facluh ma wacngihn sahflahiyac.

Na ingena, sahp kom puhla muh kuhpahsr lom nuh sin tuhlihk nuhtum an tiacna arulacna fototo. Pa ngacn acn se ma kuh luhn Mwet Lahngo El tuhkuh kac uh. El onwelah mwet mas, ac El kuh in onwelah kuhphasr lasr uh. El ahkpuhsyelihk flao ac ik, ac el kuh in ahkpuhsyelihk luhngse ac engan in lohm sum.

Luhngse lom nuh sin tuhlihk nuhtum an oraclah iwac na kahsruhp se in luti ma pwacye ac muhsahi luhlahlfongi. Oraclah lohm sum an in lohm in pruhe, eis etwacack, ac luhlahlfongi; lohm in puhlakihn engan; lohm in puhla yohk srihpaciyom; lohm sin God.5 Ac “pruhe nuh sin Pahpah ke kuhiyacn insiowos nohfohn, tuh [kowos] in kuh in sesseslah ke luhngse [Lal], ma El [sang] nuh selos nuhkwewa … suc fahsr tukun Wen nahtuhl, Jisus Kraist.”6

El Ahkyohkye Srihke Srihsrihk ac Fihsrwacsr

Sie pac kuh ma oasr yurum, ekihn pahpah ninac, pa pacl lom lwen nuh kwewa, ma sikyak fahsr na uh. Mwet in kahsruh, mwet in luti, ac mwet in kahsruh ke tv tuhkuh ac som. Tuhsruhk kom kuh in mwet in kahsruh se ma muhta na oasr in moul luhn tuhlihk nuhtum an.

Srihke lom an sahp kom liye muh srihklac kapsra nuh ke puhsra luhlahp tuhlihk intum an lohng facluh. Kuhtuh pacl uh kom ac puhla muh srihklac ma kom oraclah. Tuhsruhk esam lah “ke ohiyac srihsrihk Leum El kuh in sang ma yohk.”7 Sie ekuh in sucu, sie sramsram ke wosasuc, kuh sie srihkasrak wowo tiac kuh in ekuhlah moul luhn tuhlihk nuhtum an ke pacl sacn na, oacna nuh ke tul in af se in oruh fihtac se in kapwack. Tuhsruhk fin ma srihsrihk ac fihsrwacsr inge fahlwacna, lwen nuh ke lwen, tuhfahlah tuhlihk nuhtum an wo liki na sronot se.8

Pa ingacn inkacnek luhn Leum. El sramsram nuh sum ac tuhlihk nuhtum an ke puhsra srihsrihk, tiac puhsren puhlahl.9 El onwelah Naaman tiac ke “sie ma upac” tuhsruhktuh ke ma na fihsrwacsr, in oul na oul.10 Tuhlihk nuhtin Israel engankihn kihn mongo quail yen mwesis, tuhsruhk ma se ma sang moul nuh selos pa manna ma usrnguck srihsrihk ac fihsrwacsr se—mongo nwaclos lwen nuh kwewa.11

Tamuhlwel ac tahmtahel, mongo nwacsr uh wo ac sun ke oreklac e lohm ah uh. Luhlahlfongi ac etuh lasr uh wo ke karihngihnyuck ke ohiyac fihsrwacsr uh, ngalis pacl sefanna fahsr, in srihk ac ke pacl fihsrwacsr, oruh wi na fahsr luhn pacl uh ke moul lom.12

Pacl nuh kwewa el pacl in eis etwacack. Kahs ac mukwikwi lwen nuhkewa el kuh in mwe kolyuck se in oraclah sulwaclah.13

Kom tiac kuh in sa liye fahkon kampare lom an. Tuhsruhk nimet fuhlweack. Leum El fahk lah ma nuh kwewa ac fah tuhkuh ke pacl la. Pwacnwacng tiac tohtohlah in oruh ma wo, mweyen kom akiyac pwelucng ke orekma wowo se.14 Orekma wowo fuhkah se sahyacn orekma in kahsruh tuhlihk sacohk nuhtin God luti lah suc na pwacye elos uh ac muhsahi luhlahlfongi lalos kacl Jisus Kraist, wosasuc Lal, ac Alu Lal? Jisus Kraist Elac ahkinsewowo ac ahkyohkye srihke lom an.

El Use Fwackyuck

Sie pac inkacnek kuh ma Leum El kahsruh pahpah ninac tuhkuh ke mwe sang luhn fwackyuck nuh se sifacna. El rahrahlac in okaclah Nguhn Lal in kol pahpah ninac.

Ke kom sikalweni in pruhe ac lihpsre Nguhn, El ac fah sensenkihn kom liki mwe sensen kom tiac liye.15 El ac ahkkahlwemye nuh sum mwe sang, kuhiyaclos, ac elyah lalos.16 God Elac kahsre kom in liye tuhlihk nuhtum an oacna ke El liyaclos—lihkihn ataclos nuh lin insiaclos.17

Ke kahsruh luhn God, kom kuh in etuh tuhlihk nuhtum an ke atac nwacsnwacs ac kahto oacna inkuhsrao. Nga suli kom in sruokyac nguhsr luhn God in kol sucu lom an ke fwackyuck nuh sum sifacna uh. Suk kolyuck Lal ke pruhe lom.18

Eklac na Yohk

Sahp kahsruh yohk srihpac se ma Jisus Kraist El sang nuh sin pahpah ninac pa “eklac na yohk” lin insiom.19 Ma usrnguck se ma kuht nuh kwewa enenuh.

Ke kihtihn pacl, nuhnkuh ke elyah se inge: Kom oasr ke alu ah, lihpsre sramsram se kacn sucu se. Mwet se sramsram ah ahkuhtweyac lohm suwohs ac sucu ma suwohsna. Mukul tuhma ac muhtwacn kiyac tiac wi akuhkuhin uh. Tuhlihk elos tui tilac riti ma suhmuhslah ke pacl in orek homework. Ac on soko “Luhngse Sie sin Sie”20 onkihnyuck kom lohng. Met liki mwet se sramsram ah som nuh ke ip se ma mwet nuh kwewa engan in kahsruh ahknwacsnwacsyelah acn in yihyih ah, kom nuhnkuh tari, “Sucu luhk ah muhkahimtacl.”

Pain kowos tamuhlwel ac tahmtahel, relax! Mwet nuh kwewa ma wi alu uh nuhnkuh oacpacna! Pwacye lah, pahpah ninac nuh kwewa elos elyah muh elos tiacna oraclah wo.

Ke ohiyac sacn, oasr mwe kahsruh na muhtahl se nuh sin pahpah ninac: Pa Jisus Kraist. El pa ohiyac se ma kuh in ekuhlah insiac.

Ke kom tuhkuh fototoi nuh sin Mwet Lahngo ac mwe luti Lal, El ac usot kom in liye muhnahs lom. Fin luhlahlfongi kacl Kraist ke inse puhsisacl, Elac oruh muhnahs in fokokoi.21 El pa mwet pahluh luhn God.

Kalmac pa kom petsac elah sucu lom an suwohs? Muoh. Tuhsruhk kom ac wolac liki meet ah. Ke kuhlwacng luhn Mwet Lahngo, kuhtasrihk na kuhtasrihk fahsr, ac asri in kom ma enenuh yurin pahpah ac ninac se: luhngse luhn God ac tuhlihk Nahtuhl, muhtweng, tiac nuhnkuh kac sifacna, luhlahlfongi ke Kraist, ac puhlaik in sulaclah ma wo

Jisus Kraist El Sang Kahsruh yurin Alu Alu Lal

Kampare lasr in muhsahi luhlahlfongi kacl Jisus Kraist tuhkuh ke lohm ah, siyacna kais sie. Ac ma inge Alu uh kahsruh. Sahyacn na sang ma suhmuhslah muhtahl ac kahs luhn mwet pahluh, Alu luhn Mwet Lahngo kahsruh ke mwe kahsruh puhs nuh sin pahpah ninac ac tuhlihk in oraclah sulaclah wowo.

Mwe Ahkkweye Mwet Fuhsr: Mwe Kolyuck in Oraclah Sulaclah

  • Mwe Ahkkweye Mwet Fuhsr: Mwe Kolyuck in Oraclah Sulaclah tiac sang tahk ke ma wo ac ma koluk. El luti ma pwacye ne tok ma ac kahsruh oruh sruhlwaclah wo infulwacn moul ac mwe luti luhn Jisus Kraist. Riti nuh sin tuhlihk nuhtum an. Lwelah elos in sramsram kac. Kahsruh elos in eis ma pwacye pahtpaht ac lucng inge in kol sulaclah lalos.22

  • Toeni luhn FSY el mwe kahsruh wowo pac. Nga finsrak tuhlihk fuhsr nuh kwewa in wi. Nga suli mwet fuhsr wo matwac nuh kwewa in wi toeni inge ekihn mwet luti ac kahsruh. Nga suli pahpah ninac in muhsahi nguhn fokoko ma tuhlihk fuhsr inge us nuh lohm selos ke toeni luhn FSY inge.

  • Oasr mwet luti, mwet kol, ac mwet in kahsruh tuhlihk ac mwet fuhsr ke Alu luhn Jisus Kraist luhn Mwet Luhlahlfongi ke Lwen-sahflah. Kom kwacna ilyak ke pacl na yohk srihpac se nuh ke moul luhn tuhlihk fuhsr in muhsahi ac tahpuhk luhlahlfongi ac etuh lalos. Kuhtuh suwos mwet fuhsr lolacp. Kuhtuh sonna oasr tuhlihk nahtuh. Engan in kuhlwacnsap lom nuh sin tuhlihk nuhtin God El muhtahl ye muhtuhn God.23

Nimet Fuhlweack nuh ke Ma Usrnguck inge

Kawuck sacohklacna luhk, tamuhlwel ac tahmtahel sacohk wiyuck, muhsahi luhlahlfongi ke tuhlihk se el oacpacna yukiyac ros se in kapwack. Kom tiac kuh in ul lah kac ngacn in loesaclihk. Kom tiac kuh in srihke in ikacslah ros mutul sacn in fahrngwelihk. Ac kom tiac kuh in pihlesruh ros sacn ne finsrak kihn elan kapwack ac fahrngwelihk kahto.

Ma kom kuh ac enenuh in oruh nuh sin fihl kapwack se inge pa sang fohk wowo, fihsrwacsr ma oasr kof inkuhsrao puhtat nuh kac. Eslah fihtac ac oacna sie ma sang kohsraclah faht inkuhsrao ah. Sokwack inkacnek se ma wo emeet nuh kac in kapwack. Muhtweng tuhpan lwelah fihl kapwack se inge in oraclah sulaclah moklweyuck nuh selos ac lwelah God Elan oruh ma usrnguck Lal. Ma tuhkuh sikyak kac uh ac arulacna kahto mwe lut se ac mwe engan liki nuh kwewa ma kom oraclah nuh sum sifacna.

Ke plwacn luhn Pahpah Inkuhsrao, kuhpahsr luhn sucu uh ma ne tok ma pahtpaht. Srihpac sacn pa oruh, ekihn pahpah ninac, kom tiac fuhlweack, finne kom tiacna pwacr ke kuhtuh ma sikyak tari.

Kacl Jisus Kraist, Master luhn Onweyuck ac Mwet Lahngo, kuh in oasr muhtwacwacack sasuc se; El kwacna sang finsrak.

Jisus Kraist pa kuhiyacn sucu.

Jisus Kraist pa kuhiyacn mwet fuhsr.

Jisus Kraist pa kuhiyacn pahpah ninac.

Ke ma inge nga fahkwack ke inen Jisus Kraist, amen.

Mwe Kahsruh

  1. “Ke insiacn pahpah ninac nuh kwewa oasr kena in luti tuhlihk nahtuhl ma wowo. Pa inge ip usrnguck ke plwacn luhn Pahpah Inkuhsrao. El kena tuhlihk Nahtuhl in tuhkuh nuh facluh, ukwe atac ma pahtpaht ke sucu luhn inkuhsrao. Sucu uh pa ip fihsrwacsr oreklac luhn tohkohsrahi ma pahtpaht, ac na El oruh ma inge nuh ke ip fihsrwacsr se met fin facluh. Finne sucu facluh loes liki in suwohswohs, elos sang nuh sin tuhlihk nuhtin God finsrak wowo emet in painyuck nuh ke facluh ke kain in luhngse fin facluh sefanna ma apkuhran in oacna sie nuh ke ma kuht puhlakihn inkuhsrao—luhngse luhn pahpah ninac. Sucu uh oacyacpac pa atac wo emet in karihngihn ac akacsruhi ma wo ac ip pwacye ma kuh in kol kuht in fohlohk nuh ye muhtuhn God” (Henry B. Eyring, “Gathering the Family of God,” Liahona, Mei 2017, 20).

  2. Ahok, kuht etuh lah luhngse luhn God tiac kuh in ahkfahsryeyucklac “fin faclu, ou elos oru inkusrao” (Matthew 6:10). Kunohkohn luhn pahpah ninac se kuht liye muh tiacna yohk srihpac kapsra nuh ke liye luhn God. Pwacye El liye ma ingacn. El tuhng ke mwe ahsor ac ahkngal nuh kwewa ke kuhpahsr luhn sucu. Ne ohinge El tiac fuhlweack sucu uh. Ac El fin ac tiac, ke srihpen oasr plwacn wolacna luhn God nuh sin moul luhn tuhlihk Nahtuhl. Ac infulwacn plwacn sacn pa sucu uh.

  3. Liye Matthew 18:1–5; Mosiah 3:19.

  4. “Sucu: Sie Mwe Fahkwack nuh fin Facluh,” ChurchofJesusChrist.org; liye pac Doctrine and Covenants 68:25–28.

  5. Liye “Learning at Home Is Founded on Relationships,” Teaching in the Savior’s Way: For All Who Teach in the Home and in the Church (2022), 30–31; liye pac Doctrine and Covenants 109:8.

  6. Moroni 7:48.

  7. 1 Nephi 16:29; liye pac Alma 37:6–7.

  8. Liye “Learning at Home Consists of Small, Simple, Consistent Efforts,” Teaching in the Savior’s Way, 31. Prestuhn David O. McKay el luti: “Lwelah kuht in tiac nuhnkuh lah, ke srihpen kuhtuh [ma uh] … kuht liye muh srihk ac wacngihn kalmac, [lah] elos tiacna yohk srihpac. Moul, tukun ma nuh kwewa, el oreklac ke ma na srihsrihk. Moul lasr uh, oasr lasr uh, in mahno, oreklac ke kihmkihm srihsrihk luhn heart. Lwelah kihmkihm srihsrihk ke heart uh in tui, ac moul fin facl se inge tui. Faht luhlahp se inge kahsruh na fokoko se nuh ke facl se inge, tuhsruhk kuht eis mwe insewowo ke ip srihsrihk [kac] ke srihpen tuhkuh nuh sesr kahlwem srihsrihk, suc, fin tuhkuh ma na fohn se, ac nwacklah facluh ke kahlwem. Fong lohsr oreklac ke ma sahrsahr suc kahlwem muh itu srihsrihk; na oruh mwet Christian pwacye se el oreklac ke orekma srihsrihk ma oacna Kraist ma ahkfahsryeyuck ke ao se, mihnit se—in lohm se” (Teachings of Presidents of the Church: David O. McKay [2003], 219).

  9. Liye Helaman 5:30.

  10. Liye 1 Tohkohsrah 17:1–7.

  11. Liye Exodus 16.

  12. Liye “Preparing Your Children for a Lifetime on God’s Covenant Path,” Fahsruh, Fahsr Tukuk—Nuh sin Kais Sie Ac Sucu: New Testament 2023, appendix (digital only).

  13. Liye “Learning at Home Can Be Planned but Also Spontaneous,” Teaching in the Savior’s Way, 31; 1 Peter 3:15.

  14. Liye Doctrine and Covenants 64:32–33.

  15. Liye Matthew 2:13.

  16. Liye Alma 40:1; 41:1; 42:1.

  17. Liye 1 Samuel 16:7.

  18. Liye 1 Nephi 15:8.

  19. Alma 5:13.

  20. Liye “Love One Another,” Hymns, no. 308.

  21. Liye Ether 12:27

  22. “Ma ac wo nuh sin tuhlihk, kunohkohn in sang kolyuck nuh ke moul se inge an yurin pahpah ninac. Elos etuh kuhiyacn, kahlwem, ac etuh luhn kais sie tuhlihk. Pahpah ninac sislah pacl lalos nohfohn in suk in oraclah ac sruokyac akuhpahsri wowo nuh sin kais sie tuhlihk nahtuhlos. Elos oasr ke an na wo se emeet in oraclah sulaclah suwohs ke ohiyacn tuhfahlah tuhlihk nahtuhlos” (James E. Faust, “The Weightier Matters of the Law: Judgment, Mercy, and Faith,” Ensign, Nohfuhmpuh. 1997, 54).

  23. Luo mwe kahsruh ma yohk srihpac in etweyuck: Oasr ke internet Fahsruh, Fahsr Tukuk mwe kahsruh se inge oasr section sasuc se kac sifac an pa “Preparing Your Children for a Lifetime on God’s Covenant Path.” El ahkuhtweyac ma fihsrwacsr, nuhnak ke lohm se ma kuh in kahsruh tuhlihk in ahkolah nuh ke pacptais ac kuhtuh wuhlweacng ac akwuck. Ac ahksasucyeyacn Teaching in the Savior’s Way oasr section se kac sifac an pa “Home and Family” ma ahkuhtweyac lah mwe luti ke ohiyacn Kraist lutiyuck fuhkah in lohm se (liye sra puk 30–31).