Enenweyuck Mwet Ahkiwe Mwet Uh
Oasr sukohsohk in sulaclah lom in sulaclah lokoalok kuh in auliyak. Nga kwacfe kom in sulaclah in mwet in ahkiwe mwet uh, ingena ac pacl nuhkwewa.
Tamuhlwel ac tahmtahel sacohk wiyuck, nga engan in wi kowos. Ke mahlwem ohnkohsr somlah inge, kowos kwacna oasr in nuhnak luhk uh ac ke pruhe luhk uh. Nga pruhe tuh Nguhn Muhtahl in fahkoht ma suc Leum El kena kowos in porongo ke nga sramsram nuh suwos ingena.
Ke nga tuh oruh internship ke laslas ke yac puhs somlah ah, nga kahsruh doctor in laslas tahi niyac fohnlah ke ikoac ma misac ac kuh pac in maelihk. Laslas sac upac. Na, in weacng tuhfal sac, sie sin mwet ke u sac oruh ma se tuh tiac wo, ac doctor in laslas sac kasrkuhsrak kohuyak. Ke pacl se el foloyak ah, el kihpackuhnlah mitmit in laslas ma nwacnwaclah ke germs. Puhtatlac tuhwi fin pouk!
Mwet nuhkwewa ke rum in laslas sac—sahyacn doctor mongsa sac—tuh lut ke ma sensen ac kuhnaustwen nuh ke mukwikwi ke laslas. Nga srui lah nga tiac maskuhnwack. Tuhsruhk ma se sikyak inge oan na sihk paht. Ke ao sac na, nga olwelah nuh sihk sifacna muh oacna sie ma sikyak ke rum in laslas luhk uh, nga fah tiacna mongsa kofllah in kutong ma nga puhlakihn. Nga oacyacpac uli ke lwen sac in tiacna kasrkuhsrak kihpackihn kuhtwena ma—lah e mitmit in laslas se kuh kahs ke kasrkuhsrak.
Finne ingena, yac singucul tohkoh, nga motko lah fin mitmit in laslas se ma tuh puhtatlac nuh fin pouk ah fohkfohk liki na lokoalok pwacsin ke ohiyacn sramsram lasr ac inmahsrlon mwet puhs misenge. Ohiyac ac elah wo oacna in wacngihnlac ke lusen pacl loes se inge ke srisri mwet ac akuhkuhin yohk.
Kahskahs koluk, sukok srihpac koluk, ac sramsram koluk kacn mwet sahyac uh kwacna orek. Puhs mwet pihsrlac etuh la, mwet orekma ke masap, ac mwet eye sahyac suc kwacna fuhlahkihn kahs in ahkkoluk. Nga arulacna elyah kac lah puhs mwet luhlahlfongi muh wo na in sruhnga, selngawi oacna sie mwet suc tiac insese nuh selos. Puhs mwet ma oacna in muh elos kena kuhnahoslah siepacna mwet ke kahs in ahksuhpwacr ac ahkkoluk!
Kasrkuhsrak uh tiac kuh in mokle. Akwacsui uh tiac kuh in ahkkweye kuhtwena mwet. Lokoalok uh tiac kuh in kol nuh ke ma kahlwem mokleyuck. Mwe auliyak se, kuhtuh pacl uh kuht liye elahn lokoalok finne inmahsrlon wal lasr uh. Kuht lohng kaclos suc ahksrihkye mukul kuh muhtwacn kiyaclos ac tuhlihk nahtuhlos, suc orekmakihn kohuyak ke kasrkuhsrak uh in tulokihn mwet sahyac, ac elos suc ahkkweokye mwet in sucu lalos ke “aoras tiac sramsrsam.” Kuht lohng ke tuhlihk fuhsr ac tuhlihk srihsrihk suc ahngongkahs ac ke mwet orekma suc ahkkolukye mwet wuhluhlos orekma.
Tamuhlwel ac tahmtahel sacohk wiyuck, tiac enenuh in ohinge. Oa mwet tuhma lutlut luhn Jisus Kraist, kuht in mwe srihkasrak lah in sramsram fuhkah nuh sin mwet sahyac—yohkna ke siena nuhnak lasr uh. Sie inkacnek fihsrwacsr emet in konwacack mwet fahsr tukun Jisus Kraist pa fuhkah pahkomuhta luhn mwet sacn nuh sin mwet sahyac.
Mwet Lahngo El oraclah mwe luti kahlwem se Lal inge nuh sin mwet fahsr tohkohl ke kwewana lacyacn acn uh. “Insewowo elos su akiwe mwet uh,” El fahk.1 “Mwet se fin puokya la oalum layot, sang pac elan puokya layen lese an.”2 Ac na, El sang kahs in kai ma upac nuh sesr kais sie: “Luhngse mwet lokoalok lom, ahkinsewowoye elos suc kalyei kom, oruh wo nuh selos suc sruhngwac kom, ac pruhe kaclos suc ahklahlfonye kom ac kalyei kom.”3
Met liki El misac, Mwet Lahngo El sapkihn nuh sin Mwet Sap Singucul Luo Lal in luhngse sie in sie oacna ke El luhgse elos.4 Na El fahk pac, “Kowos fin lungse sie sin sie, na mwet nukewa ac fah etu lah kowos mwet tumuk lutlut.”5
Pweng luhn Mwet Lahngo uh kahlwem: Mwet tuhma lutlut pwacye Lal uh muhsaheack, sruhkwack, ahkkweye, pahtok, ac mokle—finne upac na pwacye. Mwet tuhma lutlut pwacye luhn Jisus Kraist pa mwet ahkiwe mwet uh.6
Misenge pa Sacnri in Palm. Ke kuht ahkolah in ahkfuhlwactye lwen yohk srihpac se emet ma sihmlac kac fin facluh, suc pa Iwaclah ac Moulyak luhn Leum Jisus Kraist. Sie ohiyac wo emet ma kuht kuh in ahkfuhlwactye Mwet Lahngo pa in eklac sie mwet ahkiwe mwet uh.7
Mwet Lahngo El oraclah tuh kuht in kuh in kuhtanglah ma koluk nuhkwewa weacng—lokoalok. Nimet tahfonglac kac: lokoalok uh koluk! Jisus Kraist El fahk lah elos suc oasr “nguhn in lokoalok yohrohl el tiacna ma Luhk, tuhsruhk ma luhn devil, suc pa pahpah tuhmwacn lokoalok, ac el puhrakwack insiacn mwet uh in acnwuck ke kasrkuhsrak, sie nuh sin siepac.”8 Elos suc orek lokoalok elos eislah sra puk se ke puk lal Setuhn, lah elos akihlen kuh tiac. “Wacngihn kuhtwena mwet kuh in kuhlwacnsapuh leum luo.“9 Kuht tiac kuh in tahpuhk plwacn lal Setuhn ke kohu kasrkuhsrak lasr ac kahs koluk lain ac motko muh kuht srackna kuh in kuhlwacnsapuh God.
Tamuhlwel ac tahmtahel sacohk, ohiyacn oruh lasr nuh sin sie sin sie uh arulacna yohk srihpac! Ohiyacn sramsram lasr nuh sin ac kacn mwet sahyac e lohm ah, ke alu, ke orekma, ac online uh arulacna yohk srihpac. Misenge, nga siyuck kuht in sramsram nuh sin sie sin sie ke ohiyac fuhlwact, muhtahl. Nuhnakmuhnahs lihksreni lohng. “Fin oasr kuhtwena ma wo, kahto, kuh pweng wo kac kuh ma fal in kaksakihnyuck”10 ma kuht kuh in fahk ke siepacna mwet—lah nuh ke muhtahl kuh nuh fintohkohl—ma ingacn enenuh in pa ohiyacn sramsram lasruh.
Fin siyacnyacn se ke ward lom an sahf, kuh misineri fuhsr se sa na fohlohk nuh lohm sel an, kuh mwet fuhsr se el tahfuh luo ke fahkwack luhlahlfongi lal an, elos tiacna enenuh nuhnuhnkuh lom an. Elos enenuh in puhlakihn luhngse luhn Jisus Kraist in kahlwem ke kahs ac mukwikwi lom an.
Fin sie mwet lili el sang nuh ke social media ma upac ke politics kuh liye luhn mwet uh ke social media ma kuhnahoslah ma nuhkwewa ma kom luhlahlfongi, top kasrkuhsrak in lain lom an e tiacna kahsruh. Muhsahelah sohs in kahsruh enenuh in yohk sum, tuhsruhk pa ingacn ma kawuck lom an enenuh uh.
Lokoalok uh luhslah Nguhn—pacl nuhkwewa. Lokoalok uh pahtok nuhnak kikiacp se lah in siyakwacng na pa inkacnek in ahkwoyelah ma [kuht] tiac insese kac; tuhsruhk tiac pa ingacn oreyac. Lokoalok el sulaclah se. Ahkiwe el sulaclah se. Oasr sukohsohk in sulaclah lom in sulaclah lokoalok kuh in auliyak. Nga kwacfe kom in sulaclah in sie mwet in ahkiwe mwet uh, ingena ac pacl nuhkwewa.11
Tamuhlwel ac tahmtahel, kuht kuh na pwacye in ekuhlah facluh—mwet se na ac ohsun se na ke pacl se na. Orek fuhkah? Pa ke kuht oraclah srikasrak in ahkfahsrye nuhnak lasr in ahkfuhlwact ac ke sramsram efahl uh.
Kain in nuhak pa sie ipin moul uh. Nga orekma lwen nuhkwewa wi mwet kuhlwacnsap oaru luhn Leum suc tiac kwacna insese ke ma se ma se. Elos etuh lah nga ke lohng nuhnak ac puhlakihn pwacye lalos ke ma nuhkwewa ma kuht sramsramkihn—yohk na ke ma mwet uh sahp tiac ke sramsram kac.
Mwet in kahsruh fuhlwact luo luhk, Prestuhn Dallin H. Oaks ac Prestuhn Henry B. Eyring, elos pihsrlac ke ohiyac ma elos ahkkahlwemye nuhnak lalos—yohk na ke nuhnak lalos uh siena. Elos oruh ke luhngse pwacye ac nwacsnwacs lalos nuh sin sie sie. Tiac sie selos fahk lah el etuh muh el etuh yohk liki kuhtwena mwet sahyac ac ohinge enenuh na in karihngihn fahk lal an. Tiac sie selos ahkkahlwemye enenuh se in amaci nuh sin siepacna. Ke srihpen kais sie sesseslah ke luhngse pwacye, “luhngse suwohs luhn Kraist,,”12 sramsram lasr uh kuh in kolyuck ke Nguhn luhn Leum. Nga luhngse ac ahkfuhlwactye mukul wowo luo inge!
Luhngse pwacye pa ono se nuh ke lokoalok uh. Luhngse pwacye pa mwe sang luhn nguhn ma lwelah kuh in sislah ohiyacn mwet uh, suc pa srohwohsr, insefuhlwact, ac lwemta. Luhngse pwacye pa sie ip yohk ke sie suc fahsr na pwacye tukun Jisus Kraist.13 Luhngse pwacye uh ahkuhtweyac mwet ahkiwe mwet uh.
Ke kuht sifacna insepuhsisaclye kuht ye muhtuhn God ac pruhe ke kuhiyacn insiacsr kwewa God El fah acse luhngse pwacye nuh sesr.14
Elos suc ahkinsewowoyeyuck ke mwe sang muhtahl se inge uh mongfihsrwacsr ac kuhlwacng. Elos tiac sok sin mwet sahyac ac tiac sifacna isaclos ne lucng. Elos tiac fihsrwacsr in puhrakwack ac tiac nuhnkuh ma koluk kacn mwet sahyac.15
Tamuhlwel ac tahmtahel, luhngse pwacye pa top nuh ke lokoalok ma ahkfohsye kuht misenge. Luhngse pwacye uh pahtok kuht “in akacsruhi ke ma toasr luhn kais sie,”16 liki na in ahktoasrye kais sie sin sie. Luhngse pwacye luhn Kraist lwelah kuht “in tu oacna mwet loh luhn God ke pacl nuhkwewa ac ke ma nuhkwewa”17—yohkna ke pacl upac. Luhngse pwacye uh lwelah kuht in ahkkahlwemye fuhkah ke mukul ac muhtwacn luhn Kraist uh sramsram ac mukwikwi—yohkna ke pacl lainyuck.
Inge, nga taic sramsramkihn “mislac ke oacna sie molo.”18 Nga sramsramkihn oruh lasr nuh sin sie sie ke ohiyac ma fal nuh ke olwelah ma kom oraclah ke kom ipeis kuhfa luhn Leum. Kom olwelah in esam Mwet Lahngo pacl nuhkwewa. Ke elyah ma arulacna upac lokoalok kuh nwacnwaclah ke fohs, nga suli kowos in esamuhl Jisus Kraist. Pruhe in oasr puhlaik ac lahlmwetmwet in fahk kuh oruh ma El oruh. Ke kuht fahsr tukun Fisrack in Mislac, kuht fah eklac mwet in ahkiwe Lal.
Ke pacl se inge, sahp kom motko muh sap se inge kuh in kahsruh sie mwet kom etuh. Sahp kom finsrak tuh e kahsrel in wolac nuh sum. Nga etuh tuh ac fah! Tuhsruhk nga finsrak pac muh kom fah ngwetwacng pal nuh ke insiom in liye fin oasr ipin insefuhlwact kuh sok ma tulokihn kom in tiac eklac sie mwet ahkiwe mwet uh.19
Kom fin kena na pwacye in kahsruh orwacni Israel ac in muhsaheack inmahsrlon mwet uh suc e fah an paht wacngihn sahflahiyac, ingena pa pacl in fihliyac nuh sahyac ma kom srihnglac kac an. Ingena pa pacl in tui tilac pahtok lah in oruh ke inkacnek lom, fin tiac, na e tiac orek. Ingena pa pacl in tui tiac oruh ma ma oruh mwet sahyac uh in muh oacna elos fahsr tuhpwek fin kulun ahtro ke srihpen elos sahngweng in ahktoasrye kom. Ingena pa pacl in pihkihnyac kuhfwen mwe mweun.20 Fin kahs lom sesseslah ke selngawi ac kahs in ahkkoluk lain mwet, ingena pa pacl in sislah ohiyac ingacn.21 Kom fah tuyak oa sie mukul kuh muhtwacn fokoko in nguhn luhn Kraist.
Tempuhl uh kuh in kahsre kuht ke moul in srihke lasr uh. Kuht eis mwe sang muhtahl we ke kuh luhn God, acse nuh sesr kuh se in kuhtanglah Setuhn, mwet puhrakwack luhn lokoalok nuhkwewa.22 Tohllah ma inge liki inmahsrlowos! Liye lah kuht tulokihn pac mwet lokoalok pacl nuhkwewa ma kuht unwelah sie ma kuht tahfonglac tiac kahlwem kac, kuh sruhnga in sang in ahkkolukye kuht. Tuhsruhk, kuht kuh in ahkkahlwemye pahkotwen suc pa [sie] ohiyacn mwet tuhma lutlut pwacye luhn Jisus Kraist. Mwet ahkiwe mwet uh tulokihnyac mwet lokoalok.
Lwelah kuht in ekihn sie un mwet eklac sie kahlwem pwacye fin inging uh—sie kahlwem ma “tiacna kuh in wihklac.”23 Lwelah kuht in ahkkahlwemye lah oasr ohiyacn suhnak in ahkwoyelah ma upac ac ohiyac etatwen in inseselac ke ma [kuht] tiac insese kac. Ke kom ahkkahlwemye luhngse pwacye ma mwet fahsr na pwacye tukun Jisus Kraist elos oruh, Leum El fah ahkyohkye insacnweacng lom an.
Nwek in wosasuc pa nwek se ma yohk emet fin facluh. God El suli nuhkwewa in fahsr nuh Yohrohl, “sralsral ac fasrfasr, srohoh ac sukohsohk, mukul ac muhtwacn.”24 Oasr acn nuh sin mwet nuhkwewa. Tuhsruhk tuh, wacngihn acn luhn nuhnak kikiacp, sruhnga, kuh lokoalok ke kuhtwena ohiyac.
Tamuhlwel ac tahmtahel sacohk, ma wo se emet uh soenna tuhkuh nuh selos suc sislah moul lalos in muhsaheack mwet sahyac. Misenge nga suli kom in lohacng liye orekma in tuhma lutlut lom ke ohiyacn oruh lom nuh sin mwet sahyac. Nga ahkinsewowoye kom in oruh oacna sie ma kom enenuh in oruh in ahollah an tuh elah lom an in efahl, suhnak, ac mwe ahol sie mwet fahsr na pwacye tukun Jisus Kraist.
Nga ahkinsewowoye kom in ahollah akuhkuhin ke kwacfe, sruhnga yohk ke kahlwem, ac fohs ke pahkomuhta.
God El moul! Jisus pa Kraist. El tu ke sifen Alu se inge. Kuht mwet kuhlwacnsap Lal. El fah kahsre kuht in eklac mwet ahkiwe Lal. Nga fahkwack ma inge ke ine muhtahl luhn Jisus Kraist, amen.