Sel Klisiich Lomak
Sel klisiich lomak a rulii a osebelel a tal chad me a telungalek el morsel diak a ulebengelel klengar meng nglai a chesmerel mora rokui el ngelekel a Dios.
Ng mlulaoch er sera temel a Isaia1 el kmo sel luriul el klebesei, tirkel chedal a Rubak ra telbiil ra ngaramong, ra blai e ra Israel, a mo “mechudel ra kelteketel a taem el bereberiid, ra ikel beluu ra iuns, ma dirrek e ra ikel eual saus e ra beluulechad”2e mo moluut el “mora a ikel beluu el mle dikesir.”3 A President Russell M. Nelson a mla mengedecheduch el betok el taem el mesisiich el kirel tial mo mechudel, lomekedong er ngii “el kot el klou a belkul el tekoi el ngarngii er a beluulechad er chelechang.”4
Ngera moktek er tial mo cheludel?
Ngokiu ra ocholt el mlora Prophet Joseph Smith, ea Rubak a ulechotii a tara moktek el ua lebol sebechekelterir tirkel chedal a telbiil. Ng dilul kmo, “Sel mechudel elmo tmak e ra beluu ra Zion, ma ikel stakes er ngii, a ua [lebol] losebechakl, e kirel lomertelir ra ses el yolt, ma uldikel sel bol longimkumek e ra beluulechad el rokir.”5 “Uldikel” er tial cheldecheduch a domes er ngii el likel di ngii el dubech e luldingerongel lomeruul leng diak loltirakl a llechul a Dios.
A kot el klou a belkul, tial me chelludel a moktek er ngii a merous a ikel klengeltengat e ra olsobel ma diak a ulebengelel klengar el mora rokui el chad el tir a mong ngmai. Tiakid sel rolel a ikal telbiil el bilsang a Abraham a blo lolchesuar. A Rubak a diluu ra Abraham el kmo ngokiu e ra rengelekel ma priesthood “ea rokui el telungalek e ra beluulechad [a kirir] mukngeltengat, molmuut e ra ikel klengeltengat e ra Ebangkelio, e likel klengeltengat e ra mo suobel, molmuut e ra diak a ulebengelel klengar.”6 A President Nelson a milketeklii el ua tiakid el teletael: “Sel de nguu a ebangekelio e de metecholb, e kede nguu a chedaol ngklel a Jesus Kristo. A techolbechelid a chesmerel a siseball el mo dmak el loudiukes ikel rokui el yaksok el milkedmokl er sera irechar el mlara Rubak el mora Abraham, Isaac, Jacob, me a merael mei el rengelekir.7
Sera 1836, a Moses a mlo duum e ra Profet Joseph Smith e ra Templo ra Kirkland e “msang … a ikel kiis elmo mengudel e ra Israel raikel leual saus e ra beluulechad.”8 Uriul e ritiang, e a Elias a dilum, e “milskemam a cherrengelel a ebangkelio er a Abraham, e kmul kmo ngokiu er kemam me a rokui el ngelekam er a bek el telecheroll a mo mukngeltengat.”9 Ngokiu er tial ngerachel, e kemam er chelechang a chelungel e ra ebangkelio ra Jesus Kristo—sel meang el chais el lolsobel el lokiu er Ngii—el mora bekl el tokoro ma rechad e ra beluulechad e mengudel ra rokui el tir a kongei el soiiseb er sel telbiil ra ebangkelio. Te mo ngelekel a Abraham, me a ikelesia ma rengedel, me tirkel ngellitel e ra Dios.10
Seikid losisiu el taem ra elsel a Templo ra Kirkland, eng mla rengii a ongedei el anghel ra babeluades el mlo duum er a Joseph Smith ma Oliver Cowdery. Ak melekoi el kirel a prophet Elijah, eng sel ngerachel ma kiis el ngii a uluut el soak elmo mengedecheduch el kirel er chelechal sils.11 Sel klisiich elmo olterkokl a rokui el chedaol lureor ra priesthood e kutmokl meng ngulak e ra beluulechad ma babeluades—sel lomak el klisiich—a klou a belkul el mengudel e mengetmokl ra rechedal a telbiil el ngar er tial klechad me tirkel kuk ngarsel tara beluulechad.
Kesai rrak ra memong, ea Moroni a milketeklii el mora Joseph Smith el kmo a Elijah a mo odars a orechudel el ngerechelel a priesthood: Ak mo ochotii el lekor kemiu sel Priesthood, lokiu ra imal a prophet Elijah.12 A Joseph Smith ra uriul a silodii: “Ngerang meng mlodurokl a Elijah? Leng ngii el loba kiis e ra ngerachel el mengetmokl a ikel rokui el chedaol lureor e ra Priesthood; e [le merkmo] sel ngerachel a le bsang, a ikel chedaol lureor a diak el sebechel el meketmokl lokiu a llemalt”13—belkul a kmo, a ikal chedaol lureor a diak el moak er tial klengar mesel diak a ulebengelel klengar.14
Ngara ikel osisechakl er a chedaol llechukl el ngara Doctrine and Covenants, ea Profet a millekoi el kmo a denguu er a rebebil eng locha mesisiich el tekoi—el klisiich el rekord malechub eng ngomak er ngii er a beluulechad ma babeluades. Engdi, ngoeak e ra bekl el rak er a klengar er tial beluulechad, e ngidil taem el Rubak a odersii a telutk el temel sel priesthood el mora ngidil chad lokiu a meral locholt, malechub eng ngidil cheldebechel e ra rechad, e tial klisiich a blechoel eldi modars. Ma le uaisei, eng ngidil tekoi el tirkel chad a kiltmokl lokiu sel ngerachel, lulekiu a ngklel a Rubak, e milngetmokl er ngii loba klemerang ma blakerreng, e milngetmokl a klebechel e ulterkokl el rekord e tabesul, eng mo llach el ngar tial beluulechad ma babeluades, e diak el bol mengodech, e loltirakl a ikel lechul ngkel mesisiich el Jehovah.”15
Kede momdasu e ra ngerachel lomak elmo meruul a ikel kuk di kirel a bebil ra chedaol lureor ra templo, engdi seikid el ngerachel a ngarngii a usbechellel elmo meruul a ngidil chedaol lureor el lultebechel e lulak e ra beluulechad ma babeluades.16 Aikal klisiich er a omerenged a mo mutaut lokiu a techolbechelid, el uaia, sel bol moues er tiang ma babeluades. A kot el ngaruchei, a rokui el ruoll ra priesthood a mekedmokl el ngar cheungel a kisel a President er a Ikelesia, el uaia bla lesaod a President Joseph Fielding Smith: “Ngii [el President ra Ikelesia] a mla meskid a llemelted, ng mla lochang a klisichel a omerenged er a priesthood er kid, e le ngii el olab aike el kisel.”17
Ngarngii a tara klou el moktek ersel cheldellel a Israel el ngarngii a tokubets el belkul sel sekum e kede melekoi el kirel sel lomak el ngara beluulechad ma babeluades—sel meleketek ma ureor ra reua templo. A Profet Joseph Smith a silodii: “Ngera moktek er a omengideb … er a rechedal a Dios er a ngii di el ker er a beluuelchad? … A kmal mle moktek a mekedecherur a blil a Rubak el luchul e Ngii a mo olecholt el mo er a Rechedal a chedaol ruoll er a Blil me a klebkellel a Rengedel, e osisechekelterir a rechad a rolel e te mo suobel; a le ngarngii a chedaol ruoll me a llach sel sekum, eng mosisechakl e motirakl, eng kirel mekedmokl er a chelsel a basio malechub eng blai el mlo dechor el kirel seikid el moktek.”18
A olchotel el kmo sel lomak el klisiich a msang a chedaol lureor a priesthood a uldimukl, e lultebechel, a meringel chedaol lureor el longetmokl ra basio el blal ketmeklii a Rubak—el templo er Ngii. Ngar tiakid e kede mesang sel klebekelel ma chedolel tial lomak el klisiich—el kutmeklii a chad meng mo suobel ma diak a ulebengelel klengar el mora telungalek el ngarngii el kirir a rengelekel a Dios ra ngidil ker ma ngidil taem ra le kiei ra beluulechad. Ngdiak a ngodech el losischeklel a Dios malechub eng nguldasu malechub eng ngerachel el metechir a uai tial tekoi eldi imong e orekemel a rokui el techall. Tial klisiich el omak a cherrungel el lolechotel sel llemalt, klechubechub, ma beltikerreng ra Dios.
Meng ngarngii a techelled el morngii el klisiich lomak, e a rengud a mereched lobult el kirir tirkel di mla merael er kid. A uriul—klebesei lomengudel lokiu sel telbiil a imuul el mora bita el beluulechad. Ngar sel cherrungel lurerel a Dios, ea re dirke ngar a diak el cheremii sel diak a ulebengelel klengar er sel cherrengelel a lak el ketmokl a dodai elmo er tirkel “demerir,” a rucheled. Meng ngosisiu, a omerolir tirkel ngar sel bitang, malechub a re mochu melobech el moimuul lokiu a kodall e dirkak el nguu sel omak el klisiich, a diak el mecherungel di le merekmo le meketmokl a meringel el chedaol lureor el somesemid elmo tang tir me kid, a re bebil er tir, me kid el mo er tir e lokiu sel klebechel chedaol lureor.19 Sel telbiil elmo olengeseu ra tang el ngarsel bitang a sebechel domes er ngii el telbiil ra miltib, el telkib ersel beches e diak a ulebengelel el telbiil. Ngokiu a tekingel a Joseph Smith, eng soad elmo “mak e ra re bladek mel bekiis e [lobengked] ersel kot el lokisel a kodall.”20
Sel kot el ngarbab e kot el chedaol el lochotel sel lomak el klisiich a ngarsel diak a ulebengelel el klaubuch e ra sechal ma redil loeak e ra chebechiil mesel omak el klauchad lokiu ra rokui el ngelekir. El belkul a kmo sel klisiich el mo mengedmokl aika el chedaol ruoll a chedaol, a President er a Ikelesia a mo omes aikel rellel el mekedmokl el mora rebebil. A President Gordon B. Hinckley a uluuchais er a tara ongdibel, “Ak mla smodii el betok el taem el kmo a lsekum ng diak a ngera el mo tuobed er a klengit el reng me a ringel ma ringelel er a olutel sel lomak el klisiich e ra chedaol el priesthood el mo rongedii a telungalek el mo er a ulebengelel, ng mle klou a utulel er sel ngii a rirelii.”21
A lak sel lomak el mukdubech a diak a ulebengelel telungalek e mech a telecheroll er tial klengar me ma merael mei, e kid a cheloit el mora ulebongel el diak a rised ma kal recheled, el ua, lak a ucheled ma kal rengeleked. Ng tiakid el di meleuaoch, el diak lultebechel a rechad, mete kuk bebil, malechub eng ngulech el deleuill el lomtok a chebechiil ma telungalek el Dios a mla kutmokl,22 meng kuk tang, el mocha mengesang a ikel kmal moktek el kirel a blebelel a beluulechad. Tiang a blol teletelel a klechad, eng mocha ultebechel kirel a beluulechad el medebeakl malechub eng di “mesuld el remiid” sel lemei a Rubak.22
Me kede mesang el kmo ngerang ma “chebechiil ra delongelel a sechal ma redil a mlekedmokl ra Dios e a telungalek a moktek el kirel sel luldesuel a Ulemeob el kirel a diak a ulebengelel klengar el mora Rengelekel.”23 Meng ngosisiu el taem, e kede mesang el kmo tial chetiteuokel el klechad er chelechang, e tiang a diak el sel meral klechad malechub eng meral ngarngii el lolchesuar a ra kuk bebil. Engdi kid a ultuil e ra Kristo. Chelechal dongiil e ra Rubak, ea President M. Russell Ballard a omeklatk er kid el kmo a “chedaol llechukl ma uriul-klebesei el profet a olterkokl el kmo a rokui el chad el mekedung el loltirakl a telbiil ra ebangkelio a morengii a techellir ra diak a ulebengelel klengar.”24
A re bebil a mla melchesuar ra diak lungil e metacherbesul lomeruul ra telungalek e dikeang a klemeriar reng er tir el kirel a diak a ulebengelel telungalek. A Elder David A. Bednar a dilii tial lulemes el kirel: “Me kemiu el mla soiseb ra rengelel a amireng leng berudel a chelbechiliu ra delengchekliu malechub eng ringel el molchesuar leng miltemall a klaumera er kau, kulengit e molatk [el kmo sel rolel a Dios ra telungalek] a lmuut elmo omuchel er kau! A imol lomechelel tial bombatel el telecheroll el kirem altang eng mla metemall, engdi a ikel bebil ra melmalt el lomchelel el mlo medechel er tial bombatel a kmal direke meklou a ultutelel el diak a ulebengelel. Kau a sebechem el dochel a klisiich el mo er tial bombatel e locha dirrek el lolngeseu el toketek a ikel miltemall el lomchelel. Sel lureor a mo meketmokl lou derta er ngii.”25
Sera kemeldilel a Sister Pat Holland, el bechil a Elder Jeffrey R. Holland, er tial mlo merek el Longeuid ell buil, ea President Russell M. Nelson a ulsisechakl: “Ng mei sel taem, ea Patricia ma Jeffrey a lmuut elmo dmak. Ea uriul e tir ma rengelekir a mo dmak me tirkel milngeluoleu a telbilir el telcheroll mete mo melchesuar sel mui el deurreng el Dios a mla kutmokl el kirel tirkel mekedung el Rengelekel. Sel dodengelii seikid, e kid a medengei el kmo sel kot el klou a ututelel el sils ra klengar ra Patricia a diak el sel sils ra le mechell malechub eng sils ra le mad. A sils el klou a ututelel er ngii a Ongelolem el buil[June] 7, 1963, el ngii ma Jeff a mlo meuak e ra St. George Templo. … Ngera me tiang a kmal klou a belkul? Leng ngii el kmal luchul ea beluulechad a ulebeob ma telungalek el sebechir el mukdubech e le muak a delongelir. A osebelel a chad a tekoi el mo er a ta me a ta el chad, engdi ngarbab el klebkall a tekoi el mo er a telungalek. Ngdiak a chad eldi ngii el tang e nguu a ngarbab el klebkall.”
Ngdiak el meketeket, ea bechik me ngak a mlo mesang a sechelimam e ra delmerab e ra omak e ra Templo ra Bountiful Utah. Ak kot el milsang ngikal sechelik sera le kekerei el ngalek e ra Córdoba, Argentina. A kldemek el misionari me ngak a ulmes e ra rechad ra chelsel a beluu eldi mle kmeed e ra obis ra mision, e ngii a milkengii a chesimer sera ki bora blil. Ng dimlak el meketeket, e ngii ma delal ma re bebil er ngii a mlo chedal a Ikelesia, e tirkaikid ra lolemolem el chedal el me re chelechang. Ng klungang el redil, e chelechal sils e aki ngara templo elmo omak e ra re mla mad el chad ra blil elmo dmak e kuk mo omak er ngii elmo er tir.
A rubekel e ra ikal mlamo merek el rrak el kmal bla bolungil kaudengei a mo omtechei e ra rechad e ra blil el ngara altar. Ng mle sils ra deurreng e liluut el kmal mlo ungil leng ngikal sechelimam ra Argentina a mlo meuak el mora rechad e ra blil. Aki di mle telolem el chad el mla rengii e ra mle chelellakl el sueleb el cheroid e ra beluulechad, ngdi tiang a tara mle klou a belkul el tekoi el mlo rengii ra beluulechad el milketmokl. Ak mlo ungil a renguk el kmo a ngerechelek ma kudengelii a mla bech er sera kulengod er a chesmerel e ra kngeasek el misionari el me re chelechang, eng telal rrak luriul, e ak mengetmokl e ra chedaol lureor e lomak er ngii lomchelel el mora rechad ra blil ma telecheroll ra mla memong.
Tiang a siasing e longetmokl er ngii ra bek el taem er a chelsel a templo el meliuekl e ra beluulechad. Tiakid sel lorechudel el bakes el mengudel er tirkel ngara telbiil el chad. Ngii a kot el ngarbab el lemeltem el chedal Ikelesia ra Jesus Kristo. Ak yaksok el kmo sel sekum e kau a blak a rengum losiik er seikid el lemeltem, eng diak el meketeket malechub eng morsel diak a ulebengelel klengar e kemo nguu.
A kuuchais el kmo sel merenged el klisiich ma ngerachel a mla moluut el mera beluulechad lokiu ra Joseph Smith a klemerang, el kmo sel ngii a mouak e ra beluulechad a meral mo meuak e ra babeluades. A kuuchais el kmo a President Russell M. Nelson, el President e ra Ikelesia, a di ngiltang el chad el ngara beluulechad er chelechal sils lomekrael a usbechellel tial klisiich. A kuuchais el kmo sel Tngakireng ra Jesus Kristo a mla rulii meng diak a mad el meral tekoi mesel mo sebechel a telungalek el ngara mui el deurreng el dmak a mo meral tekoi. El ngara a ngklel a Jesus Kristo, amen.