Dauch er a Klebkall
Ngarngii a oubeltikerreng el Demad er a Babeluaeds el mo mesa el kmo kid a mo ngmai a rokui el klengeltengat me a rokui el techall el ikel soal a rengud ma ikel dolilt a mo uchul eng sebechel.
A rechedal a Ikelesia er a Jesus Kristo er a Uriul-klebesei el Santo a blechoel loker er tir el kmo, “Ng mekera ea ikelesia er kemiu a kakerous er a bebil er a ikelesia er a re Kristiano? A uldimukl er a ikel nger el de besterir a sel cherrungel el osisecheklel a Jesus Kristo. E sel klou a belkul er a ikal osisechakl a sel klemerang el kmo a Demad er a Babeluades a betik a rengul er a rokui el Rengelekel me Ngii a kmal soal kid rokui a mo kiei er sel rengedel a klebkall el mo cherechar. Ea lmuut el tang, Ngii a soal kid a bo de kiei Lobengkel me a Ngelekel Sechal er a, Jesus Kristo, el mora diak a ulebengelel. Ngii a mla meskid a osisechakl me a techall el mo melilt a ikel tekoi el kirel a bekesel ochid me a klengar el de ngiltii.
I.
Ngokiu a ocholt er a chelechal taem e kede medengei el kmo sel kmal urebetelel er tirkel kiei er a beluulechad a diak sel bleketakl el uldasu el remellemalt a mo er a babeluades ea diak a ulebengelel el ringel a mora rebebil. Sel uldesuel a Dios el mo er a Rengelekel a uldimukl er tial meral osisecheklel a Osobeled er a, Jesus Kristo: “A blil a Demak a betok a delemerab er ngii.”1
A mla mocholt el osisecheklel a mla moluut el Ikelesia er a Jesus Kristo er a Uriul-klebesei el Santo a olisechakl el kmo rokui el ngelekel a Dios—me a rebebil el diak bo kumasech er tir—a kmal molterekokl el mo ngara tara ikal edei el dauch er a klebkall, ludimukl er tirkel diak a klemedengei er tir.2 Uriul er sel taem er tikrel dimlak el bekongesenges a ngara ringel el kirel a kengterir, el ngii ringel a mo kudmekelterir el kirel sel mo dubech el tekoi, e tir rokui a mo mekiis er a kodall e mo er sel Ulebongel el Kerrekeriil er a Rubak el Jesus Kristo. Ngarsei, ea oubeltikerreng el Osobeled, a olisechakl el kmo Ngii a mengebkall er a Chedam, e mo olsobel a rokui el urerel a chimal,3 e mo oldurokl er a rokui rengelekel a Dios el mora tara ikal dauch er a klebkall lultuil er a ikel soal a rengrir el mlocholt lokiu a teletael el lullilt.
A tara diak a uai ngii el osisechakl me a omeruul er a mla moluut el Ikelesial a sel mla mocholt el llach me a telbiil el mo er a rokui el rengelekel a Dios a sel chedaol llemeltir el mo nguu sel kot e ngarbab el dauch er a klebkall el ngara rengedel a celestial. Ng kot el ngarbab el basio el bo er ngii—e mo suobel er a rengedel a celestial—a ngii sel moktek er a Ikelesia er a Jesus Kristo er a Uriul-klebesei el Santo.
Ngokiu a ocholt er a chelechal taem, ea Uriul-klebesei el Santo a ngarngii a tokubets el klemedengei er tir er a uldesuel a Dios el kirel a deurreng el mo er a Rengelekel. Tial uldasu a ulemuchel sel klengar er a delbenged er a uchei er a debechell, e ulechotii a moktek me a teletael el kirel omerael bla dengiltii er tial klengar me a ikel soal a rengud el kirel a bekesel ochid e ra chelechal mong.
II.
Kede medengei lokiu ocholt er a chelechal taem el kmo a “rokui el renged a ngarngii a llechul”4 me a dauch er a klebkall el denguu sel temel a Ulebongel el Kerrekeriil a ultuil er a ikel llach el dullilt el mo oltirakl er a dengara beluulechad. Nogkiu tial ungil uldasu, eng ngarngii a betok el renged—me a betok el delmerab—el rokui el rengelekel a Dios a sebecherir el mo er sel dauch er a klebkall el ngarngii a llechul el sebecherir “loltirakl.”
Me sel dosaod a teletelel me a otireklel a ikal kldei el renged el ngara uldesuel a Chedam, e kede omuchel er sel kot el ngarbab, el ngii a oltaut a ikel chedaol llach me a chedaol ruoll el Dios a mla ocholt lokiu a Iklelesia er a Jesus Kristo er a Uriul-klebesei el Santo. Chelsel a klebkellel a “celestial” 5 eng ngarrngii a edei el dauch,6 el sel kot el ngarbab a mo suobel er a chelsel a rengedel a celestial. Tiang sel le bo er ngii “tirkel mla nguu a cherengelel me a klebkellel,” ma le uaisei, e “te mla mo chelid, el rengelekl a Dios el sechal [me a redil]”7 e “kiei er a rengedel a Dios me a Kristo er ngii el mo cherechar.”8 Ngokiu a chedaol ocholt, ea Dos a mla ocholt a diak a ulebengelel llach, chedaol ruoll, me a telbiil el ngii a kmal kired loltirakl el kirel a rellel a chedaol teleteted el ngarngii a belkul el kirel a omtebengel a chedaol klisiich. A Ikelesia er a Jesus Kristo er a Uriul-klebesei el Santo a oltaut a ikang ele sel moktek er tial mla moluut el Ikelesia a mo mengedmokl er a rengelekel a Dios el kirel a osebelir el ngara klebkellel a celestial, tokuni, sel kirel a mo suobel el ngara kot el ngarbab el dauch.
Uldesuel a Dios, el dilubech er a diak ulebengelel klemerang, a bo luchul ma diak a ulebengelel klengar di le bo er tirkel mekedung loltirakl a telbilel a diak a ulebengelel chebechiil er a delongelel a sechal me a redil er a chelsel a templo,9 el ngii el chelebechiil a mo sebechel mo er a rokui el oumerang. Tiaikid a uchul e kede olsisechakl el kmo “a teletelel a sechal me a redil a klou a ultutelel er a dersta el chad er a klengar ruchei, klengar chelechang, me a diak a ulebengelel olangch me a moktek.”10
Sel diak a mo uai ngii el ungil osisechakl el ngosukid er a kedmekled el kirel a osobeled a sel chais el mo er a telungalek er a 1995.11 Ngii el chais a meketeklii a ikel teletael el kired el meruul el mengedmokl er kid el mo kiei lobengkel a Dios el Chedam me a Ngelekel Sechal el, Jesus Kristo. Tirkel diak el mui el medengelii a moktek er a Chedam el kirel a Rengelekel a sebechir el mo omdasu el kmo tial chais er a telungalek a tekoi el di sebechel mengodech. E sel kuk ngodech er tiang, e kede kongei el kmo a chais er a telungalek, a dilubech er a osisechakl el diak el mesim, a ochotii a belkul sel deleuill er a telungalek el ngii a kot el klou a belkul tebechedel tial diak a ulebengelel ulekuruled a mo dubech.
A Apostol Paulus a ouchais el kirel a ikal edei el dauch er a klebkall., e mengaisiu er tir el mora klebkellel a sils, buil, me a btuch.12 Ng milengeklii ngkel kot el ngarbab el “celestial” e ngkel ongerung a “terrestrial.”13 Ng dimlak el longkiklii ngkel kot el ngariou, engdi a ocholt el mlo er a Joseph Smith a milsa ngklel el: “telestial.”14 A dirrek el tara ocholt a mesaod el kirel a teletelel a chad el mo er a ikal rengedel a klebkall. Tirkel el diak lolilt el “mo oltirakl a llechul a rengedel a celestial”15 a mo nguu a kuk tara rengedel a klebkall, el telkib el ngariou er a celestial engdi ngarngii a llechul el tir a mililt e sebecherir “loltirakl.” Sel tekoi el abide, a lluches er a chelsel a chedaol llechukl, el belkul a kmo mo outekangel malechub eng oltngakl.16 El uai tial okesiu, tirkel ngara rengedel a terrestrial—el mengaisisiu er sel uldasu el betok el Kristiano omdasu er ngii—“a tirkel el Kristo a mo oldingel er tir, engdi ngdiak el nguu sel cherrungel el klebkellel a Chedam.”17 Te mle “chetengakl rechad er a beluulechad, e milchebelad er a rechad,”18 e “dimlak el blak a rengrir er a ngerchelir loltirakl er a Kristo.”19
Sel olechotel a omsodel tirkel mo er sel kot el ngariou el dauch er a klebkall, el telestial, a “tirkel diak el sebecherir el ngara … klebkall er a terrestrial.”20 Ng ouchais er tirkel loltngakl er a Osobel e mle meterekakl a blekerdelir el kirel a chedaol teletael. Tiang sel renged el tirkel mekngit el chad a ngarngii, er a uriul a lechau a ringel el kirel a kengterir. A ikang ikel losaod a ocholt er a chelechal taem el “tirkel dimlak el nguu a ebangkelio er a Kristo, a lechub a eng diak a klaumera er tir er a Jesus. …
Tirka tirkel bulak el chad, chad er a olai, melaok a rengul chad, obengterir a oteruul el chad e melekoi a blulak el tekoi.21
Mengedecheduch el kirel a ikel edei el dauch er a klebkall el oba sel chedaol ues er a profet, ea President Russell M. Nelson a dirk lilechesii tiang: “A klengar er tial beluulechad a kmal di kedeb sel mongaisisiu er ngii el mo er a chiliuades. Meng kedeb a temel, engdi kmal klou a ultutelel! Ka bo mungil omtab er sel loureor: Chelsel tial klengar e kau a melilt a ikel llach el soam el mo oltirakl—me a ikel ngara rengedel a celestial, a lechub a terrestrial, a lechub a telestial— me a, leuaisei, eng ngeral dauch er a klebkall a soam el mo kiei er ngii el mo cherechar. Ng klebokel el uldasu! Ng uldasu el meral mengull er sel kau a mimokl el melilt.”22
III.
A Apostol Paulus ulsisechakl el kmo a osisecheklel a Rubak me a llechul a bilelskid me bo el sebeched “el mo cherrungel el ua teletelel a Kristo.”23 Sel teletael a ousbech a betok el omeruul el diak dil ikel klemedengei el mngai. Ng diak el dil ikakid e bo moumera er a ebangkelio; ng kired el louedikel e omdasu me bo lobult a rengud el kirel. Meng kuk ngodech ra ikel bebil er a osisechakl, el ngii a olsisechakl er kid el mo medengei kirel a ngerang ngklel, ea ebangkelio er a Jesus Kristo a bai melasem er kidel mo ngarngii a belkud.
Sel Ulebongel el Kerekeriil a diak eldi bo domes er a cherrengelel a ungil me a mekngit el omeruul—el kid a mlaremuul. Ng ultuil kirel aikel teletelel a blekerdeled ma uldesued—el kid a mla mo uangera el chad. Ng sebeched el mo nguu a diak a ulebengelel klengar lokiu a omerollel a bult. Me sel ulsbechel er tiang, e tial tekoi a betok a belkul el lolechotel a dmolech lomengodech el teletael. Ng diak el sebechel a chad el di meruul er ngii e lak el kmal lomdasu el kirel. A llach, chedaol ruoll, me a telbilel a ebangkelio a diak el ua udoud moltuu er a bangk e solang e meruul a klengit el ua moltobed a udoud er a bangk. A ebangkelio er a Jesus Kristo a uldasu el lolecholt er kid el kmo kede mekerang e mo ua ngera el chad el Demad er a Babeluades a soal kid a mo uai ngii.24
IV.
E leng uchul eng Jesus Kristo me a Tngakireng er Ngii, e sel deruul a chelebirukel tekoi, eng sebeched louchel a rengud e lmuut el mo er a rael er a telbiil el lomekrael er kid el mo er a ikel Demad er a Babeluades a soal bo doruul.
A Babier er a Mormon a olsisechakl el kmo “tia ikid el klengar a belsechel kirir a rechad el mengedmokl er [kid] el mo omes er a Dios.”25 Engdi a ikel telekael er “tia ikid el klengar” a ngarngii a tekoi el mo melisiich er tir (el locha ngarngii a rellii el mora rebebil er a rechad) el Dios a ulechotii el mo er a President Joseph F. Smith, el llechukl er a Doctrine and Covenants sel bliongel 138. A profet a milluches el kmo, ak milsterir tirkel mekedung el re elder er tial taem, sel le mad, a mo melemolem a urerir losisechakl ebangkelio er a ouchel reng me a ngebetel a klengit, lokiu a tengetengel a Ditang el Ngelekel a Dios el Sechal, el mo er tirkel ngara ilkolk e kelbus leng uchul a kengterir me te ngarsel beluulechad er a redeleb.
A re mla mad el mo ouchel a rengrir a mo suobel, lokiu a otireklel a chedaol ruoll er a blil a Dios,
Me a uriul er a le kekad a belsir er a klengit, e mukbeches, e te mo nguu a nguked loltirakl er a urerir, e le tir a dikesel a mo suobel.26
Uldimukl er tiang, e kede medengei el kmo chelsel a derstal telael el rak, el telael el rak ruriul a Ongeru Lemei a Osobel , a ngii sel taem el kired el mo meruul a ikel chedaol ruoll el mo er tirkel dimlak el ngai er a chelsel a klengar er tir.27
Ng kmal betok a diak dodengei el kirel a ikel edei el meklou el klemengetel a taem er sel uldasu er a mo suobel ma ikel deleuill er tir el mora tang ma tang: (1) klengar ruchei er a beluulechad er a redeleb, (2) klengar er a beluulechad, me a (3) sel merael mei klengar. Engdi kede bai medengei a ikakid el diak a ulebengelel klemerang: “A mo suobel a tekoi el mo er a ta me a ta el chad, engdi ngarbab el deurreng a tekoi el mo er a telungalek.”28 Ngarngii a oubeltikerreng el Demad er a Babeluaeds el mo mesa el kmo kid a mo ngmai a rokui el klengeltengat me a rokui el techall el ikel soal a rengud ma ikel dolilt a mo uchul eng sebechel. Kede dirrek el medengei el kmo Ngii a diak el bolorim er a ngidil chad el mo merenged a deluill a lak el soal. A klengeltengat er a omerenged el deleuill a mo er tirkel tir a oltirakl e meruul a telbilir engdi ngdiak lorrim a ikal omerenged el deleuill el mora tara chad el diak el klikiid a lechub eng diak el soal.
Rodam me a rodos er ngak, Ak ouchais a klemerang el kirel a ikal tekoi. Ak ouchais el kmo a Rubak el Jesus Kristo, “a uchul e ulebengelel a klaumerang er kid,”29 el Tngakireng er ngii, a ngar sel moktek er a Demad er a Babeluades, el uchul meng sebechel a ikel rokui tekoi, el ngara ngklel a Jesus Kristo, amen.