14:10

Odubech er a Reng

Mla er a Elder Gary E. Stevenson

Er a Chelechad er a Teruich me a terung el Apostol

Sel dil ngarngii el kldemed er a Chedaol Reng a tara kot el ngarbab el chedaol sengk el Uriul-klebesei el Santo a ousbech er ngii.

Omesodel

Tia dirk ke tekoi, el mederir a rechad ra klekool ra beluulechad a ulemes er sel 2023 Women’s World Cup el ble loungerachel er ngii a Australia me a New Zealand. A rengarbab el chad ra klekool el omtechei a erul dart el cheldebechel ra rousekoul el liueklii a beluulechad a mlocholt a dechal a rengrir, blakerreng, duch, me a ungil chad ra klekool er a le kaiuengader el melai er sel kot el ngarbab el dauch er a soccer.

Ke de mechas a rengud er a rousekool er a betok el bedengel a klekool me a lmuut el bebil el mlo kot er a ikel klokolir. Ke de mesaod er a ikel duch me a sengk el lolab el bilsterir a Dios. Tiang a uldimukl a sengk er a ngloik, gymnastic, chelitakl, sunga, drama, ochur, science, me a lmuut el bebil. Derta er tirkal chad a ulecholt a duch ma sengk el lobab el mlara Dios el tir a liluut el mengedmokl el omtanget lokiu a kemanget el klengar el loureor el kirel, mesuub, e meruul el moungil. A sengk el mlara Dios a rulii a chad meng meduch.

Ousbech a Chedaol Sengk

Sel domes loba osenged ra ebangkelio, ea Dios a ousengk er a rengelekel lolab e betok el chedaol sengk, el rulleterir el mo meduch lousbech a chedaol sengk el bedengir a rechad. A rolab a telbiil el chedal a Ikelesia a lomesterir a sengk el ngii a rdechel a Reng, el uldimukl er ngii a sengk er a klaumerang er a Jesus Kristo el Osobel, sengk er a Chedaol Reng, sengk er a oumerang er a omekungil me a moungil, sengk er a ungil lomes a mekngit ma ungil, sengk er a melai ongasireng, me a sengk er a llomes me a klemedengei.¹ A Rubak a olengit er kid el meral mo osiik aikel kot el ungil sengk, el ngii a sengk er a rdechel a reng. Ngii a omeskid a chedaol sengk el mo omekngeltengat er kid e ousbech lomekngeltengat er a rebebil.²

Ka deluut el morsel omesodel a remeduch el chad ra klekool, tia klou a ultutelel bododengei el kmo a sengk el kuk di ileakl a diak el relii a chad el mor sel dauch er a mastang. Tirkel ngaruchei el dimechell e meduch, a okiu a meringel e mekdekudem lurreor me a ducherreng ea chad ra klekool a moungil sumecheklii e toketekii a dechal el mo rsel kot el ngarbab el dauch er a kldachelbai. Ngii me a beresent el dengai a deboket, eng blechoel el obengkel a diak el soad el tekoi el kmo “ng kired el meleketek.”

Uaisei, ak mla omtab a omesuub el mengai er a chedaol sengk. A ousbech er a chedaol sengk a ultuir er a di ouedikel el kirel. “Sel mo obang omekrael er a Chedaol Reng er a klengar er kau a kirel ulsbechall a chedaol oureor. Aika el urreor a uldimukl a domelchesiu el nglunguuch me a blechoel el omesubel a chedaol llechukl. Tia uldimukl er ngii a mengull a chedaol telbilem me a llechul a Dios. … Tia uldimukl a klikiid el melai chedaol belsoil er a bek el sandei.”³

Ngera rdechel sel dousbech a chedaol sengk? Ng uldimukl aikel odubech er a Reng el olengesu er kid el mo chemau aikel dousbech e olecholt er kid a doruul ma dolekoi me a klengeltengat er a budech ma ongelaod. Mesel dorrenges e dotirakl el remuul aikal chedaol odubech, ea Chedaol Reng a kilou a dechad me aikel sebeched lotekau el mo ngarbab er sel kid a sebeched el kudmeklii alsekum eng kuk di kid. Aika el mekreos el chedaol sengk a mo ngosukid er a bek el teletelel a klengar er kid.⁴

Sel di ngarngii el kldemed er a Chedaol Reng a tara kot el ngarbab el chedaol sengk el Uriul-klebesei el Santo a ousbech er ngii.

Ng kmal ua ngera ultutelel tial sengk? A President Russell M. Nelson a ulenger er tial teletael er sera lolekoi el kmo, “aikal merael mei el sils, eng diak el sebeched el mo selbechakl er a chedaol tekoi a lak a ulekrael, ngesou, ongelaod, me a blechoel odbechel Chedaol Reng.”⁵

Ng Mekera Dongemedaol e de Omelchesiu er a Odbechel a Reng

Aikal merko el temek lolsisechakl, e ak mla metik er a rekmeed el betok el chad er ker me ker el ngii a urungulir el mo meduch el mengemedaol e mtebengii a odbechel a Chedaol Reng. A odbechel a Reng a kmal di chad me ngii e mei er a kakerous el teletael. E kid, a bai, ngeltengat el olab a tekingir a re profet, er a irechar me a chelechal taem, el ngosukid meng sebeched el mes el kmo ngmekera a denguu a ulekrael lokiu a Reng.

Mei ek beskemiu a eua el omekrael osisechakl el sebechel ngosukau el mo mengemedaol e metebengar a odbechel a Reng.

Dechor er a Chedaol Basio

A kot bom dechor er a chedaol basio.⁶ Ak dirk mlo merek el ngara open house er a Templo er a Tokyo Japan. Aikel babier el mengemedaol er a rechad er a media ma re VIP el chad a kmal lilngelakl er a ikel lungerchir. Te betok er a redart a mlei el mlo teloi er a omesarch el lomekrael er tir. A re okiaksang a le rirutech a rengrir er a klebekelel tial templo, uldimukl er a llechukl me a sunga el ngii a dmolech el omak el mora siukang er a re Isiabal. Ng mekikngit a rengud er ngii engdi tuleba omelengmes me a omengull a re okiaksang sera losaod a chedaol ruoll el kirir a rebladek er a chelsel ikel delmerab el ngii a momekedmok. Engdi sel kot el ungil a rengud el kirel a sel odubech er a Reng.

A imo er tial omeruul a obengkel a tara ngarbab el chad er a kabelment a medechel el ngara uldesuek. Okiuellel a kedeb el taem el chelellakl lomdasu er a chelsel a delmerab er a celestial, eng rengul sal kmal lomelchesiu er ngii, eng milngelulau er a dingak, “Ngii ma eolt el douteliil er a chelsel tial delmerab a domelchesiu el ngodech.” Ak mle medengei el kmong melasem el mesaod er a omelchesiu er a Chedaol Reng, el ngii, a mle, kiei er a chelsel a ikel chedaol basio. Alsekum meng soam el lomelchesiu er a Reng, e bora basio el Reng a sebechel el kiei er ngii.

A templo me a blid a kot el chedaol raikakid el basio. Kede ngara elsel e mo mengemedaol e melchesuar a Reng. A bebil er a ikal basio uldimukl er ngii a delmerab me a basio el ngara chelsel a ikelesia, basio er a seminari me a institute, sel ngarngii a reksi er a Ikelesia me a basio er a roldingel. Dechor er a chedaol basio.

Dechor lobengterir a re Chedaol el Chad

Ongerung, dechor lobengterir a rechedaol chad. Ak mo mesaod er a ongerung el osisechakl lomekrael loba tara kudengelii el cheldecheduch.

Ng diak a tang me kubes er sera kngara chedaol ongdibel el mlarngii er a klou el blil a klekool. Ng blechoel aikal basio el mui er a cherdechir a rumes e oyeng er a rousekool el chad ra belurir ma lechub eng tirkel lousichai er tir. Engdi seikid el kesus, ea cheltel a kmal mle ngodech. Tial basio a mle mui er a rebetok el telael ngeasek el chad el kldibel el mo mengull e omes er a klengar er a Profet Joseph Smith. A omelengmes, mengelulau; omereng el saul; me a ngara nglunguuch a milkekii tial blil a klekool er a Chedaol Reng. Ng mle sebechek el mesang er a mederir. Tia sel sengk er a Chedaol Reng el loureor, el smisichii a klaumerang el mla duubech el kirel a Joseph Smith me a Olutel a ebangkelio.

Tial Reng a dikeal sebechel mo cheroid er tial ongdibel er a rechedaol el chad. A lsoam el mo omelchesiu er a Reng, e bo mobengterir a rechad el Reng a sebechel beot el ngarngii. A Osobel a dilii el ua tiang: “Sel sekum a re terung te tedei a kldibl el ngara ngklek, e ak dirrek el ngara delongelir.”⁷ Kemiu el ngeasek el chad, bo momes a ongdibel er kemiu el chedaol chad: chelechad me a klass, FSY me a seminary, omilil er a ward ma stake—me a rechad ra omengitakl er a ward. Molilt el mo obengterir a rechad e bora basio el debetik a llemalt er a chelsel. Msikii a klisichiu ra idisiu. Mosiik er a ungil sechelimiu. Bo moungil sechelei. Molngeseu er a tang ma tang ra bek el obor ngii. Dechor lobengterir a rechedaol chad.

Sioning el kirel a Klemerang

Ongedei, msioning a chedaol klemerang sel bek el taem el kau a sebechem. A Ongelaod a blechoel mengedecheduch lobengked sel de sioning lokiu omelekoi. A Chedaol Reng a sioning el mora chad el mengedecheduch me a orrenges el di osisiu.

Ak dobedbekii sera knguu a taxi el mle okoua ma eim el bung el kngarngii el mora New York City. Meng mla er ngii a ungil cheldecheduch lobengkel ngkal chad lomekall er sera kimorael el mora skozio, me ak mle harau er ngii e mo melchedech el mo tuobed er tial taxi. E miltebengar el kmo ngdimlak kuuchais er a klaumera er ngak el mo er ngii. Ak mlo stob, e ulechais er a kedeb el klaumera er ngak, el mengemedaol er a Reng, meng tilobed a iuechel a medemam el terung.

Sel mosiik em nguu a techall el mo olecholt er a klaumera er kau lobengterir a rebebil, e kau a mo mekdbebechii a taem el mo mtebengar a Reng el kirem.

Morrenges er a Chedaol Reng

Sel ulebongel el osisechakl a mo ungil lorrenges er a Chedaol Reng. Ngii a sebechel el mo blechoel el kldemed engdi Ngii a mengedecheduch el merkid lokiu a kekerei, e mengelulau el ngor. A profet el Elijah a miltik er ngii el kmo a ngerel a Rubak a diak el ngara eolt, me a desiu, malechub a ngau, ngbai mlara “kekerei e chellellakl el ngor.”⁸ Tia “diak el ngor er a derumk,” ng bai “ngor el kot el medemedemek, el diua ea blel longelulau,” meng uaisei e sebechel “mesisiich el subechii ra reng.”⁹

A President Boyd K. Packer a millekoi: “A Reng a diak lolechau er kid loldiu malechub el loririau er kid loba oberaod el chim. Ngbai mengelulau. Ng mekekokil melaiu a rengud mesel mui a bdelud er a kmong ngerang, eng sebeched el diak a tang me domelchesiu er ngii.”¹⁰ Ak mla metebengar el sel bebil ra taem ea Ngerel a meral kekerei, malechub ak mal chemau a kmong ngerang, me a betik ra renguk a omelchesuar er ngii el kirek. Ng betok el taem el odbechel a Chedaol Reng a me rengak lokiu a bechik, ra Lesa. A remekedung el chedam ma chedil me a remerredel a sebechir el ngmai a ulekrael llomes el morkau.

A cherrodech, diu, me a klautok el domes er chelechal beluulechad a sebechel mo mesisiich er tial chellelakl, e kekerei el domelchesiu er a Chedaol Reng. Msikii a chelellakl el basio, chedaol basio el kau a sebechem el melai a omekrael er a Reng.

Bebil er a Tekoi el bode Kerekikl el Kirel

Mesel bo momes aikal osisechakl el mo mengemedaol e omtab er a Reng, e bo momes aikal beldukl riou el tekoi el bo de kerekikl el kirel.¹¹

Moterkeklii a chedaol tekoi el momelchesiu er ngii. A omelchesiu el mlara Reng a oltirakl er a chedaol llechukl me a osisecheklir a rengar el profet.

Bo moterkeklii el kmo a blo molchesiu a chatter ngii me a ngerchelem. Dilmerekmo mngiluu okedong lokiu a mera loba ngerachel, ea omomelchesiu er a Reng a diak molai lolab el mellach ma lechub e ke omeklemalt er a rechad.

A chedaol tekoi a diak dorrimel. Ng sebechem lomekdubch a ungil teletelem ma teletelel a basio el mngara chelsel el ngii a mengemedaol er a Reng, e sebechem el kudmeklau, eng di diak el sebechem lomtebechel er a teletelel ma temel molai a ulekrael. Bol klou a rengum e moumerang el kmo kemo nguu sel kau a ousbech er ngii er sel lungil temel.

Bo mungil lousbech ra ungil luldesuem. A lebebil ra taem eng soad el mukrael er a Reng er a bek el tekoi. Engdi, a Rubak a blechoel el soal a dilkid lousbech er sel Dios-a milskid el llemesed e meruul a tekoi el ngii a tabesul ngii maikel dodengei. A President Dallin H. Oaks a ulsisechakl:

“Sel ngara rengud el soad el mukrael lokiu a Rubak a klisiich, engdi tiang a kirel lobengkel a ungil klemedengei el kmo a Demad er a Babeluades a mechei a betok el uldasu mel sebecheded el di kid el melilt. … A chad lodars a rokui el uldasu el mora Rubak e olengit a ocholt er a bek el omelilt a di mereched el metik ra teletael el ngii a meluluuch lolengit a ulekrael e diak el nguu. …

“Ng kired el mo suebii a tekoi lousbech er a btelud. … Seikid eng kired el meluluuch lolengit a ulekrael e otirakl. … Alsekum meng diak de ngai a ulekrael, eng kired el otireklii sel kot lungil luldesued.”¹²

Orokiolel me a Ongit

Sel mo ulebongel, a Uriul klebesei el Santo a oba sengk el olab-a telbiil el chad. Meng uaisei, ng kirel a derta er kid louedikel el kirel a chedaol sengk e okor e mo olengit e mesuub el mo omtab er a odbechel a Reng. Ng eua el osisechakl er a ulekrael el mo olngeseu er kid el kirel a klou lultutelel omelai el chedaol tekoi a:

Dechor er a chedaol basio.
Dechor lobengterir a rechedaol chad.
Sioning er a chedaol klemerang.
Morrenges er a Chedaol Reng.

Sel decham el mo olengit e mtebengar odbechel a Reng a mo mukdubech sel cherrengel a taem. “A omeroled el moungil medengelii a odbechel a Reng a diua dosuub er a tara bedengel omelekoi. Ng mekekokid el mo meduch e kirel el blak a rengud, e klou a rengud el mesuub.”¹³

Ka deluut el mor sel dulemuchel er ngii, a kulengit di molatk el kmo sel de Uriul-klebesei el Santo e ke dolab a sengk. Kam kor omes er tial dodengelii el teletael sel temel a Sandei el dolsengerenger, el dirk lulsaod er ngii el merngak. A kekerel ngalek, el dechor er a blil ochid, e diak dungil mesang er a pulpit. A demal a dechor er bitar ngii, lolengeseu el mengesuseu er ngii e mengelulau er a dingal e ngii a klou a rengul el ouchais, “Ngak a ngelekel a Dios.”

Sel ongingil a sioning a mlara kekerel chad e ulemuchel el kora medekdakt: “A kuureng ulekum meng ngarngii a mengelulau er a dingak el uaisei.” E okor e mle mereched el nguu a ulekrael meng mle sioning, “Ngak a ngarngii a mengelulau er a dingak el uaisei—ng Chedaol Reng!”

Ak mo mengesimer loba siotiai el tokubets el mo er a rokui el rengeasek! Te betok er kemiu omuchel a sils er tir el dechor er bita ra dirk. Klukuk, chelechal sandei, chelechal rak, di blechoel, bom stob el telkib el taem sel momes er kau er a dirk. E momdasu er a chelsel a uldesuem, malechub em delii el klou a ngerem, “Ng klebokel, kamesekak! Ngak a meang el chad! Ngak a ngelekel a Dios! Ngii a medengelkak! Ngii a betik a rengul er ngak! Ngak a ngarngii a sengk er ngak—ngarngii a sengk er a Chedaol Reng el ngii a blechoel kldemek!”

Ak dochelir a klaumerang er ngak lekor kemiu, mui ra sengk el Uriul-klebesei el Santo, er a Dios el Chedam, Jesus Kristo, me a Chedaol Reng, el ngii a sioning er Tir. El ngara a ngklel a Jesus Kristo, amen.