![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fb6%2F1f%2Fb61f0bd0e8748bd881f1cba6a5665f8e0c5929b7%2Fb61f0bd0e8748bd881f1cba6a5665f8e0c5929b7.jpeg/full/!250,/0/default)
Odanges el mora Chad
Kede mal ngeltengat el medengei aikel rokui el dodengei el Joseph Smith a uchul, el profet er chelechal ulebongel er a rokui el taem.
Rodam me a rodos er ngak, a kumelchesiu er a klengariou el reng el kteloi er kemiu er chelechal tutau. Nglunguchek el kmo a Rubak bol omekngeltengat er ngak.
Aikal elsul a medak a mla mo diak el uai ngii er a ngara mong. Ak mlo mesa toktang ra mad, ekmu, “Ng diak el sebchek el mesa tial mesil.”
Engii a kmo, “Le olbo, aikal elsul a medal a mechitechetong. E diak el bo lungil.”
Mak morsel tkul rebab el sebchek.
Ng soak el ouchais er kemiu a bebil er a tekoi el kekedel er a kumdasu. Aikal mla momrek el buil ak blechoel mo omdasu er a Profet Joseph. Ak mla dengchokl e melbedebk a chedaol ngerchelel el mo profet er chelechal ulebongel er a rokui el taem.
Akumdasu ekede mal ngeltengat ar chedal a Ikelesia er a Jesus Kristo er a Uriul-klebesei el Santo, a buik el mle soal mo medengei aikel kirel meruul el mousubes a kengtil, el mle mesisiich a arengul meng mlo er a oreomel er a beluu er a Palmyra, New York, a mlo utubaruach er a nglunguuch e—okiu a tekingel—eng mle ketengel meluluuch (mesa Joseph Smith—History 1:14).
Seikid el taem, ea Joseph a bol ultubaruach er a Oreomel, ea babeluades a ulebok. Teru el chad, el muut el dmiich er a dichel a sils, a dilum er ngii. A chimong a dilu er ngii el kmo, “[Joseph,] ngkakid a Betik er a Renguk el Ngelekek. Mrengesii!” (Joseph Smith—History 1:17). E sekid ng ulemuchl a Olutel a cherrengelel a ebangkelio er a Jesus Kristo
Ng Jesus, el Osobeled, el milngedecheduch er a ngeasek el Joseph e milkengii a chesmerel elechal taem el kid a kiei er ngii, ekede mengitakl, “Praise to the man who communed with Jehovah!” (“Praise to the Man,” Hymns, no. 27). Kede oureng a sulel a Rubak er a Joseph Smith er a klisichel a rengul el mlo er a oreomel er sera 1820, er a bita er a blil er a Palmyra, New York.
Ak mla omdasua betok el meang el tekoi el dodengei e olab er chelechal taem. Betik er a renguk el rodam me a rodos er ngak, a klaumera er ngak er chelchal tutau a kmo kede mal ngeltengat el medengei a rokui el dodengei lekede oba Joseph Smith, el profet er chelechal ulebongel taem,.
Ngarngii a klemedngei er kid er a moktek er a klengar, el kmo kid kede techang.
Kede medengei el kmo ng techa Dios; kede medengelii a Osobel, ele Joseph, el mlora delul a kerrekar sera le ngeasek el sechal, losiik a
Ng tara kmal chetengakl e meang el tekoi el rokui el chad a mo medengelii—el Demad er a Babeluades me a Rubak el Jesus Kristo a mla me Chemolt er chelchal uriul klebesei ea Joseph a mla mengilt el moluut er a cherrungel ebangkelio er a Jesus Kristo.
Kede oba Babier er a Mormon. Ng mal klebokel el sengk a Babier er a Mormom el mera rechedal a Ikelesia. Ng tara sioniong, el kmo Jesus a Kristo. Kede obang le Joseph el mo sebechel ngmai ikel tiberberk el sintsyu, mle ulekrael er a bableuades el mo oleiud loba sengk ma klisichel a Dios e nguu tial hong el mora beluulechad.
Ng uaisei el kedeb a klemchek er elchal tutau, eng di ng dmolech a belkul, e mui er a beltikerreng el mo er a Profet Joseph Smith me tirkel rokui, rodam me a rodos, el milsebchakl er ngii e kilengei el mesebchakl er ngii er a le ngeasek.
Ng soak el chotengii a delal er chelchal tutau. Ak blechoel melbedebk el kmo ng meral mengasireng a bel rei a Joseph er a le ngara Oreomel e louchais er a delal kirel ial tekoi, e ngii el Lucy Mack Smith a uluumerang er ngii.
Ak mereng a sulel a demal me a ruchedal me a telungalek er ngii, el milsebechakl er ngii er tial oberaod el ngerachel el Rubak a ngiluu el mesang el mo profet el moluut er a cherrungel ebangkelio er a Jesus Kristo er tial beluulechad.
Ma klaumera er ngak er chelchal tutau a kmo ak medengei el kmo Jesus Kristo a Osobel e Olsobel er a beluulechad. Ak dirrek el medengei el kmo a Demad er a Babeluades ma Rubak el Jesus Kristo a mlo duum e mengedecheduch er a Joseph e omekrael er ngii el mo profet.
Ng mechas a renguk, e dirrek el locha mechas a rengmiu, el kmo kede ngeltengat el medengei a dodengei el kirel a moktek er kid er tial klengar, ngera uchul mekede ngar tiang, ngera kired el meruul me a kired el oureor el kirel er a bek el sils. Kede melasm el mengedmokl er kid, er a bek el sils, el mo telkib el ungil, telkib el ungil a rengud mo er a tang ma tang, e telkib el keldmokl kirel sel sils, el ngii a mei, el kid a muut el mo er a Demad er a Babeluades me a Rubak el Jesus Kristo.
Tia ma mal olkedang. Di kmedung ak mo etiu ma eim a rekik A rengelekek a kmu er ngak el kmo tomdasu el kmo ak telkib el chuodel al bebil er a taem, engdi ng daijob. Ak morsel tkul rebab el sebechek.
Engdi mcha okeim el rak, rodam me a rodos, eak mla mukngeltengat el misii a beluulechad lokiu tial deruchelek el General Authority er a Ikelesia. Ng mengasireng el klengeltengat. Akumdasu ak mla mora betok el basio er a beluulechad. Ak mla mesterir a rebetok el chedal a Ikelesia er a beluulechad.
Eang, meral betik a renguk er kemiu. Ng mal mengasireng el tekoi—el omes a medemiu, teloi er kemiu, e mo medengelii a beltkil a rengmiu el kirel a Rubak mer a Oluut er a ebangkelio er a Jesus Kristo.
Akulengit me a Demad er a Babeluades lomes er kid e lomekngeltengat er kid er tial ongdibel. E bo doba Chedaol Reng er a Rubak er a elsel a rengud, me a beltkil a rengud er a ebangkelio er a Jesus Kristo—betik er a rengud el Osobel, el Rubak el Jesus Kristot—bol klou sel dolasm el mesiou er Ngii e oltirakl a Llechul e melasm el mo uai Ngii sel de ngar tial klou el ongdibel. A om ngar ker tial beluulechad, a kulengit me Dios lomekngeltengat er kau. Ma Chedaol Reng er a Rubak bo lobengked. Bo dodengelii a klisichel a babeluades selde dak el oldanges er tial ongdibel.
Ak meskau a sioning me a klaumerang er ngak el kmo Jesus a Kristo. Ngii a Osobeled, e Olsobel er Kid. Ngii a meral sechelid. El ngara chedaol ngklel a Jesus Kristo, amen.