Lako ena Veimaliwai ni Veiyalayalati kei Karisito

Mai vei Peresitedi Emily Belle Freeman

Peresitedi Raraba ni Goneyalewa

O koya e mavoa ka vorolaki me baleti keda ena vakatara me cakava na nona cakacaka veikeda, ia e sega ni kereikeda o KOya me sotava duadua na bolebole.

A vakatakilai au kina dua na sala matalia e Isireli o Ilan na noqu itokani vinaka. “E vakatokai me Sala i Jisu,” e kaya o koya, “baleta ni sala mai Nasareci ki Kapenaumi era vakabauta e lewe vuqa ni lako o Jisu.” Au nanuma sara ga e kea ena gauna oya niu vinakata meu lakova, au sa mani tekivu navuca e dua na ilakolako i Isireli.

Ni vo e ono na macawa ni bera na ilakolako, a ramusu na noqu qurulasawa. A leqataka o watiqu na mavoa; ia na noqu kauwai levu duadua oya au na taubale taka vakcava na Sala i Jisu ni oti edua na vula. Au dau yalokaukauwa, au sega ni vakadaroya na tikite ni waqavuka.

Au nanuma tu neitou sotavi daunivakasarasarataki ni Isireli na mataka ni June totoka oya. Au kiso yavai dua yani qai dreta mai e dua na ititoko kei na dua na qiqi ni duru. A raici au mai o Mya, na neitou dauveivakasarasarataki, a raica sobu na yavaqu simede, ka kaya, “Isa, au sega ni vakabauta ni rawa ni o lakova na sala oqo ena ituvaki oqori.”

“Io se sega” Au sauma. “Ena sega ni dua naka ena tarova na noqu sasaga.” A deguvacu vakalailai o koya, ka keirau tekivu sara. Au taleitaka koya baleta na veika ya, au vakabauta niu rawa ni lako ena sala ni ramusu.

Au lakova yani vakataki au na salatu baba kei na veivatu era veituyaki ena sala taucoko ena dua na gauna. Qai, ni tarai koya na dei ni noqu gumatua, a taura mai o Mya e dua na dali lailai, vesuka kina itautauri ni noqu qiqi, ka tekivu dreta yani. A dreti au cake yani ena veidelana, ena vei loganimoli, kei na bati ni Wasawasa o Kalili. Ni mai cava na ilakolako oya, au a vakavinavinakataka na dauveivakasarasarataki totoka, e vukei au meu rawata e dua na ka au na sega ni rawata vakataki au.

Ni kacivi Inoki na Turaga me lako curuma yani na vanua ka vakadinadinataki Koya, a lomalomarua o Inoki.¹ A dua ga na gonetagane o koya, dau vosa malua. Ena rawa vakaevei me lakova na sala oya ena nona ituvaki qori? A vakamatabokotaki koya na ka e vakaleqai koya tu. Na isaunitaro ni Turaga ki na veika a vakataotaki koya tu e rawarawa ka totolo sara: “Lako vata kei au.”² Me vakataki Inoki, e dodonu meda nanuma tiko nio Koya a mavoa ka ramusu ena vukuda³ ena vakatara na bula oqo me cakava vei keda na kena cakacaka, ia e sega ni kerei keda o Koya meda sotava duadua ga na bolebole oqori.⁴ Se cava ga na bibi ni noda italanoa, se na mua ni noda sala ena gauna oqo, ena sureti keda o Koya meda lako vata kei koya.⁵

Vakasamataka mada na cauravou ena dua na vanua ni leqa ka a sotava na Turaga ena loma ni lekutu. A lako vakayawa sara mai vale o Jekope. Ena butobuto ni bogi, a tadra o koya ka sega walega ni tiko kina e dua na ikabakaba ia a taura tale tu ga na yalayala bibi ni veiyalayalati, oka kina na ka au taleitaka me’u vakatoka me yalayala ni lima-na-iqaqalo.⁶ Ena bogi oya, a tucake tu na Turaga e yasai Jekope, ka vakatakilai Koya me Kalou i tamai Jekope, ka yalataka:

Au sa tiko vaka kei iko.
Au na maroroi iko.
Au na kauti iko tale mai ivale.
Au na sega ni laivi iko.
Au na maroroya na noqu yalayala vei iko.⁷

A tu e dua na digidigi me cakava o Jekope. E rawa ni digitaka me bulataka na nona bula ka veikilai wale tu ga kei na Kalou i tamana, se sa rawa Vua me digitaka me bulataka na bula ena dua na veimaliwai dina ni veiyalayalati kei Koya. Oti e vica na yabaki e vakadinadinataka o Jekope na bula ni bulataka na noda yalayala ni veiyalayalati: “E rogoci au na Kalou ena noqu veisiga ca, ka tiko vata kei au ena sala au lako kina.”⁸ Me vaka ga a cakava o Koya vei Jekope, ena sauma vei keda yadua na Turaga ena noda siga ni rarawa kevaka eda digitaka me da vauca na noda bula kei na Nona. Sa yalataka o Koya ni na lako vata kei keda ena sala.

Oqo e dua na salatu ka tekivu—ena veiyalayalati ni papitaiso ka muataki kina veiyalayalati titobu cake eda cakava ena valetabu. De dua o rogoca beka na vosa oqori ka vakasamataka na veika me toqai. O na rairai raica beka e dua na salatu ni veika e gadrevi. Ni raici voleka e vakatakila e dua na ka e kaukauwa cake. Na veiyalayalati e sega ni baleta walega na veidinadinati, e dina ga ni bibi oqori. E baleta e dua na veimaliwai. O Presitedi Russell M. Nelson a vakavulica, “Na salatu ni veiyalayalati e baleta kecega na noda veimaliwai kei na Kalou.”⁹

Vakasamataka mada e dua na veiyalayalati ni vakamau. E bibi na tikinisiga ni vakamau, ia e bibi tale ga oya na veimaliwai e tauyavutaki ena bula taucoko e muri. Na dina vata oya ni veimaliwai ni veiyalayalati kei na Kalou Sa tiko na kena ivakarau matau ka na tiko na veika eda namaka nida lako kina. E sureti keda yadua o Koya meda lako yani ena ituvaki cava ga, ena taucoko ni yaloda, ka “dou sa toso ki liu”¹⁰ ka tiko tikivi keda, ena noda nuitaka tiko na yalayala ni na yaco mai na Nona veivakalougatataki. E vakananuma vei keda na ivolanikalou ni veivakalougatataki oqori e dau yaco mai ena Nona gauna ga kei na Nona sala ga: 38 na yabaki.¹¹ 12 na yabaki,¹² kei na gauna saraga oqo.¹³ Me vaka ena sotavi na nomu gagadre, ena vakakina na Nona veivuke.¹⁴

E Nona ilesilesi me siro sobu mai. Ena sotavi keda o Jisu Karisito ena vanua ga eda tiko kina ena keda ituvaki sara ga. Oqo na vuna baleta na were, na kauveilatai, kei na ibulubulu. A talai mai na iVakabula me vukei keda meda vakamalumalumutaka.¹⁵ Ia na tiko ga ena vanua eda tiko kina ena sega ni kauta mai na veisereki eda vakasaqara. Me vaka ga ni a sega ni biuti Jekope tu e kea ena qele, e sega ni nona inaki na Turaga me biuta e dua vei keda ena vanua eda tiko kina.

E Nona talega na ilesilesi ni lako cake. Ena cakacaka e lomada o Koya¹⁶ me laveti keda cake ki na vanua e tiko kina o Koya ka, ena sala oqori, me rawa kina vei keda me da yaco me vakataki Koya. A lako mai o Jisu Karisito me laveti keda.¹⁷ E vinakata o Koya me vukei keda meda yacova sara. Oqo na vuna me baleta na valetabu.

E dodonu meda nanuma tiko: e sega ni sala duadua ga ena vakacerecerei keda: ia sa ikoya na itokani––na noda iVakabula. Ka oqo sa ikoya na vuna me baleta na veimaliwai ni veiyalayalati.

Niu tiko mai Isireli, au a sikova na Western Wall. Vei ira na Jiu, oqo na vanua tabu duadua e Isireli. Sa ikoya na ivovo ga ni nodra valetabu. E vuqa era dau dara na isulu vinaka duadua ni ra sikova na vanua tabu oqo; na nodra isulu sa ivakatakarakara ni nodra yalodina ki na nodra veimaliwai kei na Kalou. Era sikova na lalaga oya mera wilika kina na ivolanikalou, mera sokalou, ka sovaraka yani na nodra masu. Na kerekere me baleta e dua na valetabu ena kedra maliwa e taura na nodra veisiga, na nodra masu kecega, na gagadre oqo me dua na vale ni veiyalayalati. Au qoroya na nodra yalodina.

Niu lesu ivale mai Isireli, au dau vakarorogo vakavoleka sara ki na veivosaki e vakavolivoliti au me baleta na veiyalayalati. Au raica na tamata ni ra taroga, Na cava meu lakova kina e dua na sala ni veiyalayalati? E dodonu meu curuma na vale meu cakava na veiyalayalati? Na cava meu dara kina na isulu tabu? E dodonu meu cakacakataka na noqu veiyalayalati kei na veimaliwai kei na Kalou? E isau ni vinaka qo: Ena vakatau ena ivakatagedegede ni veimaliwai cava o vinakata vata kei Jisu Karisito.¹⁸ E dodonu meda na vakaraica yadua na noda isaunitaro titobu yadua oqori.

Oqo na noqu: Au lakova na salatu oqo me vaka e dua na “luvena yalewa daulomani na itubutubu vakalomalagi,”¹⁹ kilai vakalou²⁰ ka nuitaki vakatitobu²¹ Niu dua na gone ni veiyalayalati, sa rawa vei au me ciqoma na veivakalougatataki²² yalataki. Au sa digia²³ meu lako kei na Turaga. Au sa kacivi²⁴ meu tu ka ivakadinadina i Karisito. Ni sa veivakadrukai na salatu, au sa vaqaqacotaki²⁴ ena loloma soliwale kaukauwai. E veigauna yadua au takosova kina na ilago ni Nona vale, au sotava kina na veimaliwai titobu ni veiyalayalati kei Koya. Au sa vakatabui²⁶ ena Nona Yalotabu, vakaivotavota²⁷ ena Nona isolisoli, ka vakatikori²⁸ meu taracake na Nona matanitu. Ena dua na ivakarau ni veivutuni e veisiga kei na vakaivotavota e veimacawa ni sakaramede, au sa vulica tiko meu tudei²⁹ ka sega ni yavalati rawa, me’u lako voli ka caka vinaka³⁰ Au lakova na sala oqo vata kei Jisu Karisito, ka vakanamata kina siga yalataki ni na lesu tale mai o Koya. Au na qai vauci me Nona³¹ ka laveti cake me’u luvena yalewa tabu³² na Kalou.

Oqo na vuna au lakova kina na salatu ni veiyalayalati.

Oqo na vuna au kubeta matua kina na yalayala ni veiyalayalati.

Oqo na vuna au curuma kina na Nona vale ni veiyalayalati.

Oqo na vuna au dara kina na isulu tabu me ivakananumi tudei.

Baleta niu vinakata meu bula ena veimaliwai yalodina ni veiyalayalati kei Koya.

De rairai o iko tale beka ga. Tekivu ena vanua ga o tu kina qo.³³ Kakua ni vakatara me tarovi iko na nomu ituvaki. Nanuma tiko, na totolo se vanua o tu kina ena sala e sega ni bibi sara me vaka na nomu tubu.³² Kerea e dua o nuitaka o koya e tiko ena salatu ni veiyalayalati me vakatakilai iko vua na iVakabula e sa kila o koya. Vulica vakalevu cake me baleti Koya. Vakaitavi ena veimaliwai ena nomu caka veiyalayalati kei Koya. E sega ni vakatau ki na nomu yabaki ni bula se ituvaki. E rawa ko lako vata kei Koya.

Ni keitou sa taubaletaka oti na Sala i Jisu, e sega ni taura tale na nona dali o Mya. E vesuka tuga ena nona qiqi. Ena vica na siga tarava, na vuqoqu tagane kei nona itokani erau veivuketaka na dreta ena sala i loma i Jerusalemi.³⁵ Eratou qarauna meu kua sara ni calata na italanoa kei Jisu. Au vakananumi kina ena nodra kaukauwa na kawa tamata tubu cake tiko mai. Eda rawa ni vuli mai vei ira. E tiko vei iko na gagadre dina me kila na dauniveivakasarasarataki, o Jisu Karisito. Ko nuitaka na kaukauwa ni dali e semati keda Vua. O sa vakalougatataki ena nodra sokomuni eso tale Vua.³⁶

E da vakavinavinaka, nida lako vata ena sala oqo, meda veivakayaloqaqataki ena noda ilakolako.³⁷ Nida wasea na veika eda sotava kei Kairisito, ena vaqaqacotaki na noda dui bula. Sa noqu ivakadinadina oqo ena yaca i Jisu Karisito, emeni.