Lesoni ni Veisusugi Vakalou

Mai vei Elder Valeri V. Cordón

Ena Vitusagavulu

Era curuma yani e dua na veidinadinati kei na Tamada Vakalomalagi na itubutubu me ra dusimaki ira na luvedra me lesu talei ki lomalagi.

O sa bau roqota mada e dua na gone sucuvou e ligamu? E tiko e dua na rarama ka dau lako mai vei ira kece na sucuvou, ka kauta mai e dua na ivau bibi ni loloma ka rawa ni vakasinaita na yalodra na nodra itubutubu ena reki.¹ E dua na dauvolaivola mai Mexico a vola, “Au sa vulica ni gauna e boboka kina ena imatai ni gauna e dua na sucuvou na iqaqalo ni ligai tamana ena ligana lailai, oya esa na kubeti koya tu me tawamudu.”²

Na veisusugi e dua vei ira na veika vakasakiti duadua ni bula. Era curuma yani e dua na veitokani kei na Tamada Vakalomalagi na itubutubu me ra dusimaki ira lesu na luvedra talei ki lomalagi.³ Nikua au via wasea eso na lesoni ni veisusugi ka kunei ena ivolanikalou ka ra vakavulica na parofita bula me vukei keda me da biuta na noda ivotavota vakaitubutubu.

Kaba kina Vanua Cecere Cake ni iTovo ni Kosipeli

E dodonu me da kaba yani ki na vanua cecere cake ni itovo ni kosipeli vata kei na noda matavuvale. A kaya o Peresitedi Russell M. Nelson: “E ganita na matavuvale na veidusimaki mai lomalagi. E sega ni rawa ni ra vakasalataki ira vakavinaka na gone na itubutubu mai na veika era sotava, rerevaka, se lomana.”⁴

E dina ga ni noda itovo vakavanua ena yaga ki na iwalewale ni veisusugi, kei na veika eda sotava yadua, na veika oqo e sega ni veirauti me vukei ira na luveda me ra lesu ki lomalagi. E gadrevi me da curuma e dua na “ivakarau ni yavunibula kei na ivalavala” e cecere cake,⁵ e dua na itovo ni loloma kei na nanamaki, ni da veimaliwai kei ira na luveda “ena sala cecere, savasava cake.”⁶ A vakamacalataka o Peresitedi Dallin H. Oaks na ivakarau ni kosipeli me “dua na sala duatani ni bula ka dua na ivakarau ni yavunibula kei na nanamaki kei na ivalavala. Na ivakarau tudei oqo ni kosipeli, se ivakarau ni bula, e tadu mai na ituvatuva ni veivakabulai, na ivakaro ni Kalou, kei na nodra ivakavuvuli na parofita bula. E dusimaki keda ena sala me da susugi ira cake kina na noda matavuvale kei na noda bulataka na noda bula yadudua.”⁷

O Jisu Karisito sa usutu ni itovo ni kosipeli oqo. Na susugi ni itovo ni kosipeli ena noda matavuvale sa ka bibi sara me tauyavutaki kina e dua na vanua bulabula me na tubu vinaka kina na sorenikau ni vakabauta. Me da kabata rawa na vanua cecere cake, e sureti keda o Peresitedi Oaks “me da biuta laivi na ivakarau ni bula yadua se vakamatavuvale se ivalavala eso e veisaqasaqa kei na ivakavuvuli ni Lotu i Jisu Karisito.”⁸ Kemuni na itubutubu, na yalo ririko ena noda tauyavutaka na itovo ni kosipeli ena rawa ni vakatara na meca me vakadeitaki koya ena noda itikotiko se, ka ca sara, e yalodra na luveda.

Ni da digitaka me da cakava me itovo levu duadua ena noda matavuvale na itovo va-kosipeli, mai na veivakauqeti kaukauwa ni Yalo Tabu na noda itovo ni veisusugi, ivakarau, kei na ivalavala eso ena gauna oqo⁹ ena taviraki, vakatauvatataki, vakavinakataki, ka vaka levutaki.

Cakava na Vale me Vanua ni Vulici ni Kosipeli

E vakavuvulitaka o Peresitedi Russell M. Nelson ni vuvale sa dodonu me “vale ni vulici ni kosipeli.”¹⁰ Na inaki ni vulici ni kosipeli sa ikoya me “vakatitobutaka na noda saumaki vei Tamada Vakalomalagi kei Jisu Karisito ka vukei keda me da vakataki Rau vakalevu sara.”¹¹ Me da raica mada e tolu na itavi bibi ni veisusugi ka ra vakamacalataka na parofita kei na iapositolo ka rawa ni vukei keda me da tauyavutaka e dua na itovo ni kosipeli cecere cake ena noda itikotiko.

iMatai: Veivakavulici ena Galala

A vakasalataki Atama na Tamada Vakalomalagi me baleti Jisu Karisito kei na Nona ivunau. A vakavulici koya me “vakatavulica raraba yani na veika oqo vei ira na [luvena].”¹² Ena vosa tale eso, a vakavulici Atama na Tamada Vakalomalagi me vakavulica na veika oqo ena galala, yalololoma, ka me kua ni vakadredretaki.¹³ E tukuna vei keda na ivolanikalou ni “Rau sa vakarokorokotaka na yaca ni Kalou ko Atama kei Ivi, ka rau vakatakila na veika kece vei ira na luvedrau tagane kei na luvedrau yalewa.”¹⁴

Eda vakavulici ira na luveda ena yalololoma ni da vakayagataka vata kei ira na gauna me vakaibalebale. Eda veivakavulici ena galala ni da veivosakitaka na ulutaga bibi eso me vaka na “gauna ni sikirini,” ena noda vakayagataka na ivurevure sa vakarautaka tu na Lotu.¹⁵ Eda veivakavulici ena lomasoli ni da vulica na ivolanikalou vata kei ira na luveda ena noda vakayagataka na Lako Mai, Mo Muri Au ka vakatara me qasenivuli na Yalotabu.

iKarua: iVakaraitaki ni Bula Vakatisaipeli

Ena ivola i Joni, eda wilika ni gauna era vakataroga kina na iVakabula e vica na Jiu me baleta na Nona ivalavala, a dusimaki ira o Jisu vua na Nona ivakaraitaki, na Tamana. A vakavulica o Koya, “E sega ni rawata vakai koya ga e dua na ka na Luvena, na ka ga sa raica ni kitaka ko Tamana: ia na veika sa kitaka ko Koya, sa kitaka vakatalega kina na Luvena.”¹⁶ Kemuni na itubutubu, na cava eda gadreva me da ivakaraitaki kina vei ira na luveda? Bula vakatisaipeli.

Ni da itubutubu, e rawa ni da vakavulica na bibi ni noda vakaliuca na Kalou ni da veitalanoataka na imatai ni ivakaro, ia eda vakaraitaka oqo ni da biuta vakatikitiki na veivagolei tani vakavuravura ka vakatabuya na Siga ni Vakacecegu ena veimacawa. E rawa ni da vakavulica na bibi ni veiyalayalati ni valetabu ni da vosa me baleta na ivunau ni vakamau vakasilesitieli, ia eda vakaraitaka ni da rokova na noda veiyalayalati, ni da qarava na watida ena veidokai.

iKatolu: Sureta me Cakacakataka

Na vakabauti Jisu Karisito e dodonu me uto ni nodra ivakadinadina na luveda, ka sa dodonu me yaco mai na ivakadinadina oqo vei ira yadua na gone ena ivakatakila yadua.¹⁷ Me vukei ira na luveda ena kena tarai cake na nodra ivakadinadina, eda vakauqeti ira me ra vakayagataka na nodra galala ni digidigi me ra digitaka kina na ka e dodonu¹⁸ ka vakarautaki ira ki na dua na bula taucoko ena salatu ni veiyalayalati ni Kalou.¹⁹

Ena ka vakayalomatua me da vakayaloqaqataki ira yadua na luveda me ra ciqoma na veisureti nei Peresitedi Nelson me ra karona na nodra dui ivakadinadina me baleti Jisu Karisito kei na Nona kosipeli, me ra cakacakataka, me ra susuga me ra tubu kina, me ra vakania ena dina, ka kakua ni vakaduka ena nodra vuku lasu na tagane kei na yalewa tawavakabauta.²⁰

Veisusugi Dodonu, ka Nakiti

Na inaki vakalou ni Tamada Vakalomalagi vaka-itubutubu a vakatakilaitaki mai ena dua na ivakatakila a soli vei Mosese: “Ia raica, oqo na noqu cakacaka kei na noqu lagilagi—meu vakavuna na tawamate rawa kei na bula tawamudu ni tamata.”²¹ Sa vakuria o Peresitedi Nelson, “Na Kalou ena cakava na veika taucoko ena Nona igu, ka sega ni na voroka na nomu galala ni digidigi, me vukei iko mo kakua ni calata na veivakalougatataki cecere duadua ena veigauna tawamudu.”²²

Nida itubutubu, eda sa liga ni cakacaka ni Kalou ena nodra qaravi na luveda.²³ E dodonu me da cakava na veika kece eda rawata me tauyavutaka e dua na ituvaki me rawa ni ra vakila kina na luveda na Nona veivakayarayarataki vakalou.

A sega vakadua ni nakita vei keda na Tamada Vakalomalagi me da dabe vakatikitiki na itubutubu me vaka na dausarasara, ka sarava tiko na tevuki mai ni nodra bula vakayalo na luveda. Meu solia mada e dua na ivakaraitaki oqo ni veisusugi nakiti ena dua na ka au a sotava. Niu a se tiko ena Lalai ena dua na tabana lailai mai Guatemala, rau a tekivu vakavulici au na noqu itubutubu me baleta na yaga ni veivakalougatataki vakapeteriaki. A taura na gauna o tinaqu me wasea na veika a sotava ena nona ciqoma na nona veivakalougatataki vakapeteriaki vakamareqeti. A vakavulica vei au na ivunau e semati ki na veivakalougatataki vakapeteriaki, ka vakadinadinataka na veivakalougatataki yalataki. Na nona veisusugi nakiti a uqeti au me‘u gadreva me‘u ciqoma na noqu veivakalougatataki vakapeteriaki.

Ni‘u a yabaki 12, rau a vukei au na noqu itubutubu me‘u vakasaqara e dua na peteriaki. A gadrevi oqo baleta ni a sega tu na peteriaki ena tikina keitou vakaitikotiko kina. Au qai gole vua e dua na peteriaki ka tiko ena dua na iteki e 156 na kilomita (97 maile) na kena yawa. Au nanuma vinaka tiko na gauna a tabaka kina na uluqu na peteriaki me vakalougatataki au. Au a kila ena veivakadeitaki kaukauwa vakayalo, ka sega ni vakatitiqataki, ni kilai au tu na Tamaqu Vakalomalagi.

Vua e dua na gonetagane yabaki 12 mai na dua na tauni lailai, oya a vakaibalebaletaka na veika kece vei au. A vuki na yaloqu vua na Tamaqu Vakalomalagi ena siga oya ena vuku ni nodrau veisusugi nakiti na tinaqu kei tamaqu, ka‘u na dau vakavinavinakataki rau me tawamudu.

A vakavulica o Sisita Joy D. Jones, na Peresitedi Raraba ni Lalai e liu: “Eda na sega ni rawa ni waraka na saumaki mai me yaco vakarawarawa vei ira na luveda. Na saumaki e dau tubukoso e sega ni ivakavuvuli ni kosipeli i Jisu Karisito.”²⁴ Na noda loloma kei na veisureti veivakauqeti e rawa ni vakavuna na veisau ena sala era vakayagataka kina na luveda na nodra galala ni digidigi. A vakabibitaka o Peresitedi Nelson, “E sega tale ni dua na cakacaka me bibi cake mai na cakacaka vakaitubutubu e dodonu, ka nakiti!”²⁵

iTinitini

Kemuni na itubutubu, na vuravura oqo e sinai tu ena vuku, itovo, kei na vakasama eso era veiqatitaka tiko me ra malele yani na luveda. Na vale levu ka vakaitamera e kacivaka ka veivakayarayarataki tu ena veisiga me ra lewena ena kena vakayagataki tiko na veisala ni vakauitukutuku vou duadua ni gauna oqo. “Ia sa vakarautaka na Kalou,” a vakavulica na parofita o Moronai, “e dua na sala uasivi cake sara ena isolisoli ni Luvena.”²⁶

Ni da veitokani vata kei na Kalou ena veiyalayalati ka yaco me Nona itini ena nodra qaravi na luveda, ena vakatabuya na noda inaki o Koya, vakauqeta na noda ivakavuvuli, ka vakamatautaka na noda veisureti “me rawa ni ra kila kina na noda kawa na ivurevure me ra rai kina me bokoci kina na nodra ivalavala ca.”²⁷ Ena yaca i Jisu Karisito, emeni.