“O A’u, le Tina, Na Fanau Fouina”

O Lusila Aoelua, o se tagata o le Ekalesia i Amerika Samoa o lē sa soifua i Hawaii, sa fiafia i le kopi o le Tusi Paia Samoa, sa lafo atu ia te ia e lona tāmā faaletulafono. A o laiitiiti Lusila, sa faigata ona tautala, ma na manatu tagata uma e na te le gafatia ona a’oa’o, o lea sa lē alu ai lava o ia i le aoga. E ui e le’i mafai ona ia faitau, sa fiafia lava Lusila i le meaalofa o le Tusi Paia ma na mo’omo’o lava ina ia mafai ona ia malamalama i ona upu. O lona mana’o e faitau le Tusi Paia na matuai malosi lava se’ia iu ina oo i se tasi aso sa ia anapogi ma tatalo ai. “Sa ou ole atu i le Tama Faalelagi e fesoasoani mai ia ou malamalama i mea o loo i totonu o lena tusi,” sa ia fai mai ai. Ona ia tatalaina lea o le Tusi Paia ma---i lona fiafia tele---sa faitauina atoa le mataupu muamua o le Kenese.

Mai lena taimi agai i luma, sa faitau ai Lusila i le Tusi Paia ma isi tusitusiga paia, e aofia ai le Tusi a Mamona ma le Mataupu Faavae ma Feagaiga. A o ia faitau i ai, sa amata ona ia a’oa’o atu i lana fanau teine e to’aono mea na ia a’oa’oina e uiga i le Ekalesia mai tusitusiga paia. “O a’u, le tina, na fanau fouina,” sa manatua ai e Lusila.

Ina ua toe foi Lusila ma lona toalua ua litaea i Amerika Samoa i le 1974, sa faalogo lona tina ao ia tautala e uiga i mataupu ma aoaoga faavae o le talalelei. Sa matuā faate’ia lona tina ona sa ia iloa o Lusila e le’i a’oa’oina ia faitau. “La’u tama e,” sa fesili atu ai lona tina, “o fea na e a’oa’oina ai na mea uma?” Na tali atu Lusila faapea, sa ia a’oa’oina mai i le faitauina o tusitusiga paia.

Na o’o ina auauna atu Lusila o se faiaoga o le Peraimeri ma se peresitene o Tamaitai Talavou. “Ua tupu tele la’u molimau,” sa fai mai ai Lusila. “Sa ou faitau tusitusiga paia, ma ou umia le tele o tofiga i le Ekalesia. Ma ou te matuai fiafia lava i ai.”

Mo Lusila, o le su’esu’eina o tusitusiga paia ma le iloaina o o latou upumoni sa ia mafai ai ona atinaa’e sootaga faaletina ma i latou sa siomia o ia. “Sa latou matuā faaaloalogia a’u,” sa ia maitauina mai fanau ma tamaitai talavou sa ia auauna i ai. “Ma e latou te alolofa ia te a’u o se tina.”