“Ou Te Iloa Fao Uma Lava”

Ia Setema 1955, ina ua faatoa mavae le vaiaso talu na auai Mote Siufanua e 26 tausaga le matua i le Ekalesia, sa fesili atu lana peresitene o le itu pe mafai ona ia auauna atu i se misiona leipa. Ina ua ta’u atu e Mote i lona tina o loo ia fuafua e alu, sa ia lagolagoina ae sa popole po o le a se manatu o lona tama, o se taitai i le Ekalesia Lonetona Misionare Saosaiete. “Ua e iloa, o a’u o le taitai tiakono o le lotu lenei,” na ta’u atu e lona tama ia te ia ina ua alu atu Mote e talanoa i ai. “Ae ua lelei lena. Alu pea oe.” Na maua e Mote lona valaauga faamisiona i le Aso Lua na soso’o ai. O lona tofiga muamua o Suva, Fiti, lea, ona o tulaga moomia faalemalo, sa tatau ai i faifeautalai ona fausia se falelotu i totonu o se tausaga. A o i ai iina, sa auauna atu ai Mote o se peresitene o le Mutual Improvement Association ona avea lea ma se tasi o le au peresitene o le paranesi. Ina ua faamaea e lana aufaigaluega le falelotu i le na’o le 10 masina, na faaauau e Mote lana misiona i Samoa.

I le avea pea ma se tagata fou liliu mai, sa aoao Mote i le talalelei ma le auauna atu mai faifeautalai faiaoga. Sa ia auai ma isi faifeautalai leipa i vasega o le taeao po o le afiafi, ia sa aoaoina e faiaoga mai le aoga maualuga a le Ekalesia ina ia saunia tamaiti aoga mo aoaoga maualuluga. Sa tuuina atu foi e Mote lesona faitautusi ma le tusitusi i ona uso a faifeautalai leipa i le mae’a ai o taumafataga i afiafi taitasi. I le mae’a ai ona faaopoopo lana misiona mo le isi lua tausaga ma mulimuli ane ai toe foi atu i le aiga, na faaipoipo atu ai Mote ia Safiono, o se tagata o le Ekalesia mai Samoa i Sisifo. Sa la tausia se fanau e toaiva ma auauna faamaoni atu i le Ekalesia i Amerika Samoa. I le 1968 na malaga faatasi ai le aiga i le malumalu i Niu Sila ina ia faamauina.

O le aafiaga o Mote o se faifeautalai leipa na saunia ai o ia mo se galuega i le fauina o fale, mo galuega faaopoopo o le fauina o fale a le Ekalesia, ma mo auaunaga i le Uarota o Faleniu. Na ia faamautinoaina le fausiaina o fale o le Ekalesia sa faatinoina i le lelei silisili i taimi uma. I se tasi taimi, i le siakiina o se pou faatoa faatulaga, na ia fai atu ai i le aufaigaluega e toe ave i lalo. “A tatou faia soo se mea mo le Alii, tatou te faia i le mea sili tatou te iloa,” sa ia ta’u atu ia i latou.

Ina ua amata ona fausia le Malumalu o Apia Samoa i le 1981, sa talosagaina Au Paia i Amerika Samoa e ofo atu o latou taimi ma meatotino i lena taumafaiga faapei ona faia e le Au Paia i Samoa. “Sa ou vaaia le faatuatua o na tamaitai o e sa i ai ni a latou sao,” sa fai mai ai Mote. Sa faapea foi ona ia malaga faatasi ma isi alii mai Amerika Samoa ina ia fesoasoani i le fausiaina. O Mote o se tasi o le vaega na tofia e fausia le olo lea o le a tu ai le agelu o Moronae. “Sa ou i ai i le malumalu mai lava i le faavae seia oo i le fao mulimuli o le taualuga,” na ia faapea mai ai mulimuli ane. “Ou te iloa fao uma lava. … Ou te lagonaina pei a’u o se vaega o le malumalu.”

Na faaumatia e se afi le malumalu i le 2003 lea na galulue malosi ai Au Paia mai Amerika Samoa ma Samoa e fausia---ae o le faatagata o le agelu o Moronae, i luga o le olo na fesoasoani Mote e fau, sa sao mai le mumu o le afi. I le 2005, a o gasolo le toe fausiaina o le malumalu, sa toe tuuina atu ai le faatagata i luga o le malumalu. I le sefulufa tausaga mulimuli ane, i le 2019, sa fofogaina ai e Peresitene Russell M. Nelson fuafuaga mo le fausia o se malumalu i Pago Pago, Amerika Samoa, lea ua aumaia faalatalata atili ai se malumalu i le Au Paia o Amerika Samoa ma faaopoopoina ai se isi mataupu i lo latou talaaga o le faatuatua.