“Sa Fetalai le Atua, Ioe!”

Sa soifua Leva’aia Levao faatasi ma ni tulaga le atoatoa e tele faaletino. Sa le lelei lana faalogo ma lana vaai. Sa aveesea se tasi o ona vae ona o le ma’i suka ma sa faalagolago ai i se vae fai e savali solo ai i le tamai motu o Olosega, lea sa nofo ai.

I le 2015 na tutupu ai ni ma’i sua i mata o Levao, ma na amata ai ona sau le toto mai ona mata. I se tasi aso, a o tagi Levao, sa popo atu e se tasi lona tauau. E toatolu ni alii talavou, o faifeautalai a le Au Paia o Aso e Gata Ai, o loo taumafai e talanoa atu ia te ia. I le leaga o lana faalogo ma le fulafula o ona mata, sa le mafai ai ona ia mulimuli i mea o loo latou fai mai ai, a e sa u’u ane i luga e faifeautalai se ata o Iesu Keriso o faamaloloina se tamaitai talavou. I le malamalama ai i le mea o loo latou ofoina atu ia te ia, na taliaina ai e Levao la latou valaaulia o se faamanuiaga faaleperisitua mo le faamaloloina o e mama’i.

Sa fuafuaina e le aiga o Levao e ave atu o ia i le falema’i e 120 kilomita le mamao i Tutuila, a e o le taeao i le mavae ai o le faamanuiaga, o ma’i sua i mata o Levao ua faamaloloina. Na vave ona amata ona feiloai Levao ma faifeautalai e toatolu---Amona Tuimaualuga, Weston Holt, ma Gabe Reid---ma amata naunau ai e suesue le Tusi a Mamona. I le faitau ai ma le lē lelei o le vaai ma le aunoa ma se faataitai po o se aoaoina, sa faigata lava, a e sa ia galue malosi i ai, i le faitauina o se fuaiupu se tasi pe lua faatasi ma faifeautalai i aso taitasi ona ia toe faitauina lea o fuaiupu lava ia e tasi na’o ia ina ua tuumuli ese atu latou. Ina ua valaaulia o ia e faifeautalai e ole atu i le Atua pe moni le Tusi a Mamona, sa ia faia ma na ia maua se tali manino. “E moni!” sa ia molimau ai ina ua ia toe vaai ia i latou. “Sa fetalai mai le Atua, ioe!”

Peitai sa lē fiafia ni isi o tagata o i le afioaga laitiiti o le motu, i le vaai ai ua mafaufau Levao i se lotu fou. Sa latou faifai i ana taumafaiga, saeiina ana tusitusiga ma ulagia o ia. Ae, sa ia tumau ma e lei umi a e papatisoina loa. O lona toalua, o Tui, ma lana fanau e toatolu e le’i umi a e faapea ona mulimuli i lana faatuatuaga, ma na mulimuli ane auauna atu Levao i lana paranesi o se peresitene o le Aualofa. O isi, sa aafia i ana faataitaiga o le tuuto atu, na faaigoaina o ia o le fatu o le Ekalesia i Olosega.