Kiribati

Taekana ae Kimototo

N 1975 ataein te reirei mai Kiribati ake a reirei n ana reirei te Ekaretia ae Liahona High School i Tonga a okiri mweengaia n riki bwa mitinare. Naake a moan rairaki mairouia kairake n I-Kiribati aika mitinare a katea te moan mwaanga n te Ekaretia ao a karaoi aia bootaki n te kaembwati n aia reirei mai imwaina, Auriaria Kokoi Ataria School iaon te abamwakoro ae Tarawa. Bon uoua te ririki imwiina, te Ekaretia e bita te reirei anne nakon te Moroni Community School (are e kinaaki imwiina bwa te Moroni High School).

Ngkai ataein te reirei n te Moroni High School a butimwaea te euangkerio are e kaokaki ao a tibwa rongorongona ni kabuta te abamwakoro, te reirei e karekea kinaakina bwa te “kaawa ae toka iaon te tabuki” (taraa Mataio 5:14) ao te tabo ni kamatebwai ao n onimaki. N aki mweuti n te totoko rimoa man te tautaeka ao taan kairiiri n te komiunite te reirei ao te Ekaretia e a tia n rang n rikirake inanon ririki man te tai are e inaomata iai Kiribati inanon 1979. Ngkai te Ekaretia e a kinaaki ibukin arona aika a tamaroa n te aroaro, reirei, ao karikirakean katein te aba ao bon te kateniua ni bootaki ni Kiritian ni bubura n te tautaeka n inaomata.

Koaua Iaona

Arana ae Kinaaki: Republic of Kiribati/Ribwaberiki Kiribati
Kautuun te Aba: Tarawa
Kaawa ae Bubura: Tarawa
Taetae ae Kabonganaaki: Kiribati ao Ingiriti
Abwakin te Aba: 811 km² (313 mi²)
Aono n te Ekaretia: Te Betebeke
Mition: 1 (Mwakoron Aban Matiare/ Kiribati Mition)
Bootaki n Taromauri: 30