Uotakin te Euangkerio n Oki Nako Kiribati

N 1972, 14-ana ririki Iotua Tune ao tibuna mai iroun tinan tinana e karina arana n Auriaria Kokoi Ataria School (AKAS) i Tarawa bwa e na karekea ana reirei ae nakoraoi riki nakon are ni mweengaia i abaia. Ma, Imwain teiraken te reirei, Tune e rin n te onaoraki. N te tai teuana, Tune e ongongo irouia taokita n tuangakiia ana utu bwa a aki kantaningaia bwa e na maiu. “Te Atua, ti ngkoe mwiokon maiu,” e tataro Tune. “Ngkana Ko kamaiuai, I berita bwa N na riki bwa te mitinare. N na kabanea bongin maiu ni beku Ibukim.”

E kamaiuaki Tune, ao, imwiin uoua te ririki n te onaoraki, e a kona ni waakina ana reirei n te AKAS. E waekoa n ataia ma tabeman raona n reirei bwa a na nako n te reirei n te kauarinan i Tonga. Aia burintibo, Waitea Abiuta, e a tia n reitaki ma te Liahona High School are reirein te Ekaretia n iterana ae kakaawaki, te kororeta n anainano ibukin kakaean angaia ana ataei bwa a na reita riki aia reirei. Ngkai e aki boraoi aron ana konabwai ma ataein ana reirei ake tabeman n ana roro, Tune e mimi bwa e rineaki ibukin te katenikoraki irouia ataein te reirei ake a na nako n reirei n te Liahona. N ai aroia ataein Kiribati ake a nakon te Liahona, Tune e butimwaei reirein te euangkerio are e kaokaki ao e bwabetitoaki n Tuun 1975. Aua te namwakaina imwiina, tabeman I-Kiribati ake a rairaki a oki nako abaia bwa mitinare. E ngae ngke Tune e rang uarereke n riki bwa te mitinare n te tai anne, e ata ana tai are e na kakoroa iai bukin ana berita ma te Atua ao e butimwaea te wewete n te mition imwiin ana angabeeba man te Liahona teniua te ririki imwiina.

Ngke e okira mweengana Tune imwiin ana angabeeba, te Ekaretia i Kiribati e bon rang uarereke ma e a tia ni kaota kanikinaean te rikirake. E a tia ni kateaki te mwaanga inanon 1976 iaon Tarawa, are e tararuaaki iroun aia burintibo ngkoa, Waitea Abiuta, ao e kainaki riki irouia aia utu naake a moan mitinare. AKAS e a tia ni kabooaki iroun te Ekaretia n 1977 ao e a aranaki imwiina bwa Moroni High School, ni kabotauaki ma te Liahona High School. Tune e mwakuri n te reirei bwa te tia reirei n taekan te aro ao ni mwakuri bwa te tia kateitei ni karekea ana mwane ibukin ana mition. Inanon Tuun 1979, Tune e weteaki bwa e na beku bwa te mitinare ae bwanin ana tai i Kiribati. N te tai are e bane iai ana mitinare n 1981, mwaitiia kain te Ekaretia e a raka iaon 500 ao a mwaiti mwaanga i aban nako Kiribati.

Iotua Tune ma toana ngke a beku bwa mitinare i Kiribati, tao n te 1979

Imwiin ana mitinare, Tune e nako tinaniku ni karaoa ana reirei ae rietata riki ao ni katei utu. N 1988 e oki nako Kiribati ma ana utu, ike e a riki iai bwa te burintibo n te Moroni High School ao te moan I-Kiribati n aranaki bwa te beretitenti n te mwakoro. Inanon ana mwakuri n ibuobuoki, e kaokoroaki te bong teuana ibukin te aki mamatam ao e kaoia naake aikoa roroko bwa a na manga oki nakon te Ekaretia. Membwa a kunea bwa a mwaiti kain te aro aika a tataninga ni kan oki ma a tataninga te kakao. Inanon Beberuare 1996, 80 mwaane a karekea te Nakoanibonga ae te Merekitereka, ni katanea te kawai ibukin katean te Tarawa Kiribati Titeiki onoua te namwakain imwiina.