Katean te Ekaretia i Kiritimati

Timei ao Timaa Kaitaua, ataein ngkoa te Moroni High School, ake a maeka i Hawaii ngke a baireia bwa a na mwaing ma natiia aine aika niiman nako Kiritimati, n te tabo are e kaikawaki iai Timaa. Ma te tabeianga iaon te kantaninga ni maeka n te tabo teuana are akea iai te Ekaretia, a reitaki ma te beretitenti n te mition ae H. Ross Workman. Imwain mwaingiia, a kawaraki iroun Beretitenti Workman, ao n angan Timei te kakabwaia, ao e tuangnga bwa e na karekei ni kabane rongorongo ake e kona ni karekei ibukiia Aika Itiaki ake a maeka n te aba. Imwiin rokona i Kiritimati, Timei e ribooti rikaaki nakon Workman bwa e a tia ni karekeia ae raka iaon 40 membwa n te Ekaretia ake a maeka n te aba ao ni kaumakiia bwa e na katea te mwaanga.

Ni kaekaana, Beretitenti Workman e taetae ma taan mwakuri n te tautaeka ao a bairea te mwananga nako Kiritimati. Ni Meei 18, 1999, a ikotaki te kurubu ae mwaiti ni butimwaea rokon Workman. Tabeua te bong imwiina, Workman e a ikikina ma kain te aro. Temanna te mwaane e kaota nakoina Ana Boki Moomon ae a bon mane are e a karekea n ririki aika bwakanako ngke e reirei n te Moroni High School. E kuri katoa Moanibong inanon itiua te ririki, ngaia ma ana utu a tia ni kamatebwaia te boki n tain te kainutu n te tairiki. A maiuakina Tuan te Mauri ao a tataro ni katoa bong bwa e na roko te Ekaretia i Kiritimati. N te Tabati anne, e kateaki te mwaanga n te kaawa ae London ma ana beretitenti ae Timei Kaitaua.

Inanon ririki ni moan katean te mwaanga, te Ekaretia e a tia n riki bwa te kakabwaia nakoia utu aika a mwaiti iaon Kiritimati. Peter ao Christina Edwards, ake a tia natiia ni kaina te Ekaretia ngke a reirei n te Moroni High School, a aki kaina te Ekaretia ngke a roko mitinare i Kiritimati. Imwiin okiokin te kakao nakoia bwa a na reiakina taekan te euangkerio, Christina e a waaki ni kakaitibo ma mitinare ao e bwabetitoaki n 2001. Peter e noora te bitaki irouna, e a karako rawawatan ana iango, ni bwaina riki te tatangira, ao e a moana kakakin te moko. Peter e a ira aia banna ni katoto buuna ao natina ao e bwabetitoaki n te ririki are imwiina. Ngkai e a katiteuanaaki aia utu inanon te Ekaretia, a kukurei ni karaoa aia kainutu n te tairiki ao ni katauraoi bwa a na kabaeaki n te tembora bwa utu.