Feit na Tingting na Save long Mekim Wok

Taim ol nambawan fopela lain konvet i baptais long Oktoba 19, 1980, tripela mun bihain tasol long ol misinari i statim wok bilong ik long Port Moresby long Julai, em i bin stat bilong wanpela liklik brans i gro hariap tru na pastaim i bin gat ol ekspatriet lain bilong narapela kantri tasol. Narapela Sande i kam,, 63 pela ol investigeta i kam kamap long sevis.

Tupela long ol dispela konvet bilong dispela taim em Mauveri Wadega na man bilong em, Vaiba Rome. Long 1980, insait long setolmen long Two Mile, long Port Moresby, Mauveri i lukim ol liklik pikinini i save laik long holim han na wokabaut wantaim wanpela man na meri bilong America (ol sinia misinari Nita na Douglas Campbell) husat i bin kam raun long dispela hap. Mauveri i statim toktok wantaim Sista na Elda Campbell, dispela i pulim stori i go na ol i toktok long sios bilong ol. Stori i go na bihain, Mauveri i sus long baptais, Vaiba tu i bihainim dispela rot. Wanpela ol namba wan samting Vaiba i bin laikim em long tokim ol famili bilong em long dispela nupela lotu. Em i go long ples bilong em long Girabu, na ino long taim ol papamama, Rome Kavera and Magiba Natua, i bin baptais, wantaim ol kandere, ol anti, na ol tripela brata bilong em. Ol, i kirap, na stat long tokim ol prens bilong ol long ples long dispela Sios.

misinari kapol i tisim wanpela lain pipol

Ol Sinia misinari Douglas and Nita Campbell tisim wanpela leson long ol memba na ol prens long Port Morseby, ca. 1981.

Long Novemba 1981, dispela Port Moresby Brans i gro bikpela tumas na ol i brukim i go long fopela brans. Insait long sampela yias tasol, ol lain bilong Papua New Guinea yet i wok long karim ol bikpela wok bilong laip bilong Sios, wantaim tu wok bilong serim gospel. Long Ogas 1982, Robert Goisisi na Johnson Auda i kamap tupela nambawan Papua New Guinea misinari long sevim pul-taim misin taim ol i akseptim kol long sev long Australia Brisbane Misin. Long arere bilong 1987, olgeta brans long Papua New Guinea em ol lokol memba i lidim.

Long Mas 1987, i bin gat 1,450 memba long nainpela brans. Planti ol memba i bin stap long arere long nambis, tasol taim ol pipol i lainim long Sios na go bek long ples bilong ol, ol i tokaut long gospel long ol famili na prens bilong ol. Dispela i bin kamap long wanpela ples Kuriva taim John Oii i lusim Port Moresby na i go bek long1987 long planim pikinini man bilong em, husat i dai long sinek i kaikaim em. Long taim bilong hauskrai we i kisim tupela mun, Brata Oii i serim ol stori bilong Joseph Smith na dispela ensel Moronai. Planti ol lain bilong ples i interes tumas em i askim ol misinari long tisim ol dispela lain i bin gat bikpela laik long harim na em i mekim wok olsem man bilong tanim tok. Ol i soim bikpela feit na i gat laik long peim taiting na fas ofaring pastaim long ol i baptais.

Ol ples lain i sanapim wanpela haus lotu wantaim lip kokonas long holim sevis bilong baptisim bilong dispela 29 pela konvet husat i bin akseptim dispela gospel. Tripela mun bihain, Elda James E. Faust bilong Kwarum bilong ol Twelpela Aposol i raun i kam long Papua New Guinea na i bin go bungim ol dispela memba long Kuriva. Antap long askim bilong ol na taim em i lukim dispela haus lotu ol i mekim ol yet na nogat halivim i kam long Sios, em i tok, “Mi bai nau dedikeitim dispela haus i go long sevis bilong Bikpela.”