“Long Stadi na Tu long Feit”

Doreen Huena i bin bon long 1968 long kepitol siti Port Moresby. Taim em i bin samting olsem 9 pela krismas, papa bilong em i bin dai na mama bilong em i go long Popondetta. Long sapotim famili, mama bilong Doreen planim gaden, em i growim taro, banana, na swit poteto. “Em i wok hat stret,” Doreen.i tingim. Mama bilong em i salim ol samting long maket long kisim rais, suga, sol, na ol protin. Ethel, sista bilong Doreen i gat 15pela krismas i lukautim ol pikinini. Tasol, em i kisim sik tubekulosis na em i dai i go lusim Doreen i gat 9pela krismas tasol long lukautim ol liklik sista na brata bilong em. Em i pinisim wanpela yia tasol bilong fomol edukesen.

Long 1984, Doreen i gat 16pela krismas tasol na i maritim Winceslas Huena. Bihain long sampela yias, Winceslas i invaitim ol misinari long serim ristod gospel. Em i joinim Sios pastaim, long 1990, na Doreen i bin baptais bihain, long 1991. Doreen painim wok we em save wasim kolos long wanwan wik long misin hom. Em save bringim kam tupela liklik pikinini meri bilong em, husat i save laik long singim ol Praimeri singsing taim em i wok. Long taim em i wok, long Septemba 1992, Doreen i kam save long ol sinia misinari Luree Schmutz na askim Sista Schmutz long tisim em long rit.

Long dispela taim, aninit long lidasip bilong Jeneral Rilif Sosaiti Presiden Elaine L. Jack, Sios i bin tokaut long wanpela Gospel Literesi Wok long promotim save bilong rit na rait, moa yet long ol meri. Doreen na Luree i stat long wok wantaim dispela Besik Skripsa Literesi Kos na sampela nupela ol samting bilong rit. Long wanwan de, Doreen save kamap long misin hom wantaim hamamas long statim ol leson bilong em. Ol save stat wantaim prea, na Doreen bai tokim Bikpela olsem em i laik save stret long “ritim ol tok bilong yu.”

“Feveret skripsa bilong mi 1 Nifai 3:7,” Doreen i tok klia. “Dispela em skripsa bilong mi yet. Bikos em literesi bilong mi—dispela em namba wan skripsa mi bin ritim. Mi fas na pre long lainim long rit. Mi bin wok hat stret. Mi pre, na mi fas, long halivim mi lainim rit na rait.” Bihain long wanpela yia, wanpela nupela wol i op long ai bilong Doreen. Em i stat long ritim ol skripsa ves, ol Buk Momon stori, na ol toktok bilong ol singsing long himbuk. Em kopim ol skripsa i go long pepa na hangamapim ol long wol bai em i ken lukim ol taim em i wok. Em i lainim ol dispela toktok em i wok long lainim long ol pikinini bilong em long taim bilong famili hom ivining.

Bihain long tupela yia, Doreen i kisim koling long kamap praimeri tisa. Maski em i pilim olsem em i wok long lainim yet na i laik wet liklik long kamap tisa, bikos em i gat planti samting yet long lainim, em i tok, “Em i no laik bilong mi, tasol em laik bilong Papa long Heven, na Holi Gos bai halivim mi. So Mi tisim ol Sunbeam klas na kamap seken kaunsela insait long Praimeri.” Bihain, Doreen kamap Rilif Sosaiti distrik presiden, em i lukautim ol wok bilong raun na visitim na treinim ol sista insait long tripela brans na fopela yunit.

Narapela feveret skripsa, Doktrin na ol Kavanen 130:18, holim spesel mining: “Wanem kain prinsipel na save yumi kisim long dispela laiptaim, em bai kirap wantaim yumi long de bilong kirap gen.”